electric car – Chandrika Daily

സംസ്ഥാന ബജറ്റ്: ഇലക്ട്രിക് വാഹനങ്ങളുടെ നികുതി വർധിപ്പിച്ചു

webdesk13 — Fri, 07 Feb 2025 06:30:43 +0000

സംസ്ഥാനത്ത് ഇലക്ട്രിക് വാഹനങ്ങളുടെ നികുതി വർധിപ്പിച്ചു. 15 വർഷം കഴിഞ്ഞ സ്വകാര്യ വാഹനങ്ങളുടെ നികുതിയും 50 ശതമാനം വർധിപ്പിച്ചു. ഇതിലൂടെ 50 ശതമാനം അധിക വരുമാനം പ്രതീക്ഷിക്കുന്നുവെന്ന് ധനമന്ത്രി കെ.എൻ ബാലഗോപാൽ പറഞ്ഞു.

നികുതി വെട്ടിക്കുന്ന ചരക്കുകൾ കൊണ്ടുപോകുന്ന വാഹനങ്ങൾ കണ്ടുകെട്ടാൻ നിയമം ഉൾപ്പെടുത്തും. കോടതി ഫീസ് വർധിപ്പിച്ചു. 150 കോടി അധിക വരുമാനമാണ് ഇതിലൂടെ ലക്ഷ്യമിടുന്നത്.

ഇലക്ട്രിക് കെ.എസ്.ആര്‍.ടി.സി; ആദ്യ ദിനത്തില്‍ കോഴിക്കോട് പതിനായിരം രൂപയുടെ കലക്ഷന്‍

chandrika — Sat, 30 Jun 2018 07:45:20 +0000

കോഴിക്കോട്: ഡീസല്‍ പ്രതിസന്ധി മറികടക്കാന്‍ കെ.എസ്.ആര്‍.ടി.സി നിരത്തിലിറക്കുന്ന ഇലക്ട്രിക് ബസിന്റെ പരീക്ഷണ ഓട്ടത്തില്‍ ആദ്യ ദിനം കലക്ഷന്‍ പതിനായിരം കടന്നു. പരീക്ഷണടിസ്ഥാനത്തില്‍ വ്യാഴാഴ്ച ആരംഭിച്ച സര്‍വ്വീസ് ജില്ലയിലെ വിവിധ കേന്ദ്രങ്ങളിലേക്ക് ഓടിയെത്തി.

ആദ്യ ദിനത്തില്‍ 246 കിലോ മീറ്റര്‍ യാത്രയില്‍ 305 പേര്‍ യാത്രക്കാരായെത്തി. 10065 രൂപ വരുമാനവും ലഭിച്ചു. ആദ്യ ദിനമായതിനാല്‍ യാത്രക്കാര്‍ യാത്രക്ക് ഇലക്ട്രിക് ബസ് തെരഞ്ഞെടുക്കാന്‍ മടി കാണിക്കുകയായിരുന്നു.

രാവിലെ 7.40 ന് കോഴിക്കോട് ടെര്‍മിനലില്‍ നിന്നും 100 ശതമാനം ചാര്‍ജോടെ ഓടിത്തുടങ്ങിയ വാഹനം രാത്രി 9.20 ന് ട്രിപ്പ് അവസാനിക്കുമ്പോള്‍ 33.8 ശതമാനം ചാര്‍ജ്ജുണ്ടായിരുന്നു. ഇന്നലെ സാമാന്യം മികച്ച കലക്ഷന്‍ ലഭിച്ചിട്ടുണ്ട്. തിങ്കളാഴ്ച വരെ ജില്ലയില്‍ ബസ് സര്‍വ്വീസ് നടത്തും. ബേപ്പൂര്‍, കുന്ദമംഗലം, ബാലുശ്ശേരി, കൊയിലാണ്ടി, രാമനാട്ടുകര, അടിവാരം എന്നിവിടങ്ങളിലേക്കാണ് ബസ് സര്‍വ്വീസ് നടത്തുന്നത്. കെ.എസ്.ആര്‍.ടി.സി ലോ ഫ്‌ളോര്‍ ബസിന്റെ നിരക്കാണ് വൈദ്യുതി ബസിനും ഇടാക്കുന്നത്. മിനിമം ചാര്‍ജ്ജ് 20 രൂപയാണ്. നാവിഗേഷന്‍, വൈഫൈ, സി.സി ടി.വി ക്യാമറ സൗകര്യങ്ങളും ബസിലുണ്ട്.

കെ.എസ്.ആര്‍.ടി.സി ഇലക്ട്രിക് ബസ് പരീക്ഷണ ഓട്ടം തുടങ്ങി

chandrika — Tue, 19 Jun 2018 08:51:30 +0000

തിരുവനന്തപുരം: ആധുനിക സാങ്കേതിക വിദ്യകള്‍ പ്രയോജനപ്പെടുത്തി കെ.എസ്.ആര്‍.ടി.സിയെ നവീകരിക്കുമെന്ന് ഗതാഗത മന്ത്രി എ.കെ ശശീന്ദ്രന്‍. സംസ്ഥാനത്ത് പരീക്ഷണാടിസ്ഥാനത്തില്‍ സര്‍വീസ് ആരംഭിക്കുന്ന കെ.എസ്.ആര്‍.ടി.സി.യുടെ ഇലക്ട്രിക് ബസ് ഫ്ളാഗ് ഓഫ് ചെയ്ത് സംസാരിക്കുകയായിരുന്നു അദ്ദേഹം.
ആറ് പ്രധാന നഗരങ്ങളില്‍ മലിനീകരണം കൂടുതലാണെന്നും മലിനീകരണമുണ്ടാക്കുന്ന ഇന്ധനങ്ങള്‍ ഉപയോഗിച്ചുള്ള വാഹനങ്ങളുടെ ഉപയോഗം ഒഴിവാക്കണമെന്നും ദേശീയ ഹരിത ട്രൈബ്യൂണല്‍ വിധിയുണ്ട്. ഇതിന്റെ അടിസ്ഥാനത്തില്‍ സംസ്ഥാനത്ത് ഇലക്ട്രിക്, സി.എന്‍.ജി, എല്‍.എന്‍.ജി വാഹനങ്ങളുടെ ഉപയോഗം വ്യാപകമാക്കുന്നതിനെക്കുറിച്ച് സര്‍ക്കാര്‍ ആലോചിക്കുകയാണ്. എന്നാല്‍ വൈദ്യുതി ഉപയോഗിച്ചുള്ള വാഹനങ്ങള്‍ കേരളത്തിലെ റോഡുകളില്‍ എത്ര മാത്രം ഫലപ്രദമായിരിക്കുമെന്ന് പഠിക്കേണ്ടതുണ്ട്. ഇത് പരീക്ഷിക്കുന്നതിനാണ് ഗോള്‍ഡ്സ്റ്റോണ്‍ കമ്പനിയുടെ ഇലക്ട്രിക് ബസ് അഞ്ചു ദിവസം വീതം തിരുവനന്തപുരം, കൊച്ചി, കോഴിക്കോട് നഗരങ്ങളില്‍ സൗജന്യമായി പരീക്ഷണ ഓട്ടം നടത്തുന്നത്.
പിന്നിലെ രണ്ടു വീലുകളില്‍ ഘടിപ്പിച്ചിരിക്കുന്ന ഇലക്ട്രിക് മോട്ടോറുകളാണ് ബസില്‍ എഞ്ചിനു പകരമായി ഉപയോഗിക്കുന്നത്. ഡീസല്‍/സി.എന്‍.ജി. ബസുകളേക്കാള്‍ റണ്ണിംഗ് ചെലവ് കുറവാണ്. പുകമലിനീകരണവും ശബ്ദമലിനീകരണവുമില്ലാത്ത പൂര്‍ണമായും പരിസ്ഥിതി സൗഹാര്‍ദ്ദമായ വാഹനത്തിന് രണ്ടര കോടിയോളം രൂപ വില വരും. ഹിമാചല്‍ പ്രദേശ്, തെലുങ്കാന, കര്‍ണാടക, ഗോവ, മഹാരാഷ്ട്ര എന്നീ സംസ്ഥാനങ്ങളില്‍ ഇത്തരം ബസുകള്‍ ഓടുന്നുണ്ട്.
നിലവിലുള്ള സിറ്റി എ.സി ബസിന്റെ അതേ നിരക്കു തന്നെയാണ് പുതിയ ഇലക്ട്രിക് ബസിലെ യാത്രയ്ക്കും ഈടാക്കുക. 35 സീറ്റുകളുണ്ട്. വീല്‍ചെയര്‍ കയറ്റാന്‍ സൗകര്യമുണ്ട്. ബാറ്ററി ചാര്‍ജ് ചെയ്യുന്നതിന് നാലു മുതല്‍ അഞ്ചു മണിക്കൂര്‍ വരെ സമയം മതി. ഒരു ചാര്‍ജ്ജിംഗില്‍ 350 കിലോമീറ്റര്‍ വരെ ഓടാന്‍ കഴിയും.
തിരുവനന്തപുരം-മെഡിക്കല്‍ കോളജ്-കഴക്കൂട്ടം, കിഴക്കേക്കോട്ട-കോവളം, കിഴക്കേക്കോട്ട-ടെക്നോപാര്‍ക്ക്, പാപ്പനംകോട് എന്നീ റൂട്ടുകളിലും എറണാകുളത്ത് ആലുവ-വൈറ്റില-ചേര്‍ത്തല, തിരുവാങ്കളം-ഹൈക്കോര്‍ട്ട്-തോപ്പുംപടി, അങ്കമാലി-ഇന്‍ഫോപാര്‍ക്ക് എന്നീ റൂട്ടുകളിലും കോഴിക്കോട് നഗരത്തില്‍ കോഴിക്കോട്-രാമനാട്ടുകര-കൊണ്ടോട്ടി-മലപ്പുറം, കോഴിക്കോട്-സിവില്‍ സ്റ്റേഷന്‍ -തലശ്ശേരി എന്നീ റൂട്ടുകളിലുമാണ് പരീക്ഷണ ഓട്ടം ക്രമീകരിച്ചിരിക്കുന്നത്. കൗണ്‍സിലര്‍ എം.വി ജയലക്ഷ്മി, ഗതാഗത വകുപ്പ് പ്രിന്‍സിപ്പല്‍ സെക്രട്ടറി കെ.ആര്‍ ജ്യോതിലാല്‍, കെ.എസ്.ആര്‍.ടി.സി സി.എം.ഡി ടോമിന്‍ തച്ചങ്കരി, ഗോള്‍ഡ്സ്റ്റോണ്‍ കമ്പനി ചീഫ് ഓപ്പറേറ്റിംഗ് ഓഫീസര്‍ ആനന്ദസ്വരൂപന്‍, നാറ്റ്പാക് പ്രതിനിധി ശ്രീദേവി തുടങ്ങിയവര്‍ സംബന്ധിച്ചു.

ഒരിക്കല്‍ ചാര്‍ജ് ചെയ്താല്‍ 140 കിലോമീറ്റര്‍ യാത്ര; മഹീന്ദ്രയുടെ പുതിയ ഇലക്ട്രിക് കാര്‍ വിപണിയില്‍

chandrika — Sat, 22 Oct 2016 04:24:53 +0000

രാജ്യത്തെ പ്രമുഖ വാഹന നിര്‍മാതാക്കളായ മഹീന്ദ്ര, തങ്ങളുടെ ഇലക്ട്രിക് കാര്‍ ശ്രേണിയിലെ പുതിയ വാഹനമായ ഇ2ഓപ്ലസ് (e2oPlus) രംഗത്തിറക്കി. നാല് ഡോറും 150 ലിറ്റര്‍ കാബിന്‍ സ്‌പേസുമുള്ള ഇ2ഓപ്ലസ് നാല് വ്യത്യസ്ത വിഭാഗങ്ങളിലാണ് ഇറക്കുന്നത്. ഇതില്‍ മൂന്നു വിഭാഗങ്ങള്‍ വിപണിയിലെത്തും. നിലവില്‍ ഇന്ത്യയില്‍ മാത്രം വിപണനം നടത്താനാണ് പദ്ധതി. വലിപ്പത്തിന്റെയും സൗകര്യത്തിന്റെയും കാര്യത്തില്‍ മാരുതി ആള്‍ട്ടോ, ഹ്യൂണ്ടായ് ഐ 10 തുടങ്ങിയവയോട് കിടപിടിക്കുന്നതാണ് ഇ2ഓപ്ലസ്.

നാല് മോഡലുകള്‍

പി 4, പി 6, പി 8 എന്നിങ്ങനെ മൂന്നു വിഭാഗങ്ങളിലാണ് ഇ2ഓപ്ലസ് വില്‍പ്പനക്കെത്തുന്നത്. പി4-ന് 5.46 ലക്ഷവും പി6ന് 5.95 ലക്ഷവും പി8-ന് 8.46 ലക്ഷവുമാണ് വിലയിട്ടിരിക്കുന്നത്.

പി 8 ഒഴികെയുള്ളവക്ക് 14.1 സെക്കന്റിനുള്ളില്‍ പൂജ്യത്തില്‍ നിന്ന് 60 കിലോമീറ്റര്‍ വരെ വേഗത കൈവരിക്കാനാവും. മണിക്കൂറില്‍ 80 കിലോമീറ്ററാണ് പരമാവധി വേഗത. 9.5 സെക്കന്റില്‍ 60 കി.മീ വേഗത കൈവരിക്കുമെന്നതും 85 കിലോമീറ്റര്‍ പരമാവധി വേഗതയുണ്ടെന്നതുമാണ് പി 8ന്റെ സവിശേഷത.

പരമാവധി വേഗത്തില്‍ 140 കി.മീ

ഒരിക്കല്‍ ഫുള്‍ ചാര്‍ജ് ചെയ്താല്‍ പരമാവധി വേഗത്തില്‍ സഞ്ചരിക്കുകയാണെങ്കില്‍ 140 കിലോമീറ്റര്‍ വരെ സഞ്ചരിക്കാനാവുമെന്ന് കമ്പനി അവകാശപ്പെടുന്നു. സാധാരണ സിറ്റി ഡ്രൈവിങില്‍ 100 കിലോമീറ്റര്‍ വരെ ലഭിക്കുമെന്നാണ് സൂചന. ബാറ്ററി 10 ശതമാനത്തില്‍ താഴെയെത്തിയാല്‍ 7 മുതല്‍ 10 കിലോമീറ്റര്‍ വരെ അധികദൂരം ഓടാന്‍ കഴിയുന്ന ഓപ്ഷനുമുണ്ട്.

ഫാസ്റ്റ് ചാര്‍ജിങ് ആണ് പി 8ന്റെ മറ്റൊരു സവിശേഷത. ഒന്നര മണിക്കൂര്‍ കൊണ്ട് ഇതിന്റെ ബാറ്ററി പൂര്‍ണമായി ചാര്‍ജാവും. ഫാസ്റ്റ് ചാര്‍ജിങ് ഇല്ലാത്ത പി 4ഉം പി 6ഉം ചാര്‍ജ് ചെയ്യാന്‍ ആറ് മണിക്കൂര്‍ വേണം.

ജി.പി.എസ് നാവിഗേഷന്‍, ബാറ്ററി, സഞ്ചരിക്കാവുന്ന ദൂരം തുടങ്ങിയവയെപ്പറ്റി വിവരങ്ങള്‍ നല്‍കുന്ന ടച്ച് സ്‌ക്രീന്‍ മോണിറ്റര്‍ തുടങ്ങിയ സംവിധാനങ്ങള്‍ കാറിലുണ്ട്. കാറിലെ എ.സി പ്രവര്‍ത്തിപ്പിക്കാനും ലോക്ക്, അണ്‍ലോക്ക് ചെയ്യാനും മൊബൈല്‍ ആപ്പ് കൊണ്ട് സാധിക്കും.