വിവാഹ ഫോട്ടോഷൂട്ടിനിടെ നവദമ്ബതികള്‍ക്ക് പിന്നില്‍ ആന ഇടഞ്ഞു.പാലക്കാട് സ്വദേശി നിഖിലിന്റെയും ഗുരുവായൂര്‍ സ്വദേശി അഞ്ജലിയുടെയും വിവാഹ ഫോട്ടോഷൂട്ടിനിടയിലാണ് സംഭവം. താലി കെട്ടിന് ശേഷം ക്ഷേത്രത്തിന്റെ വലത് വശത്തുള്ള നടഭാഗത്തായിരുന്നു ഫോട്ടോ ഷൂട്ട്. ഇതിനിടയില്‍ ക്ഷേത്രത്തില്‍ ശീവേലി എഴുന്നെള്ളിപ്പിനെത്തിച്ച ആനയെ കൊണ്ട് പോകുന്നത് രസകരമായി തോന്നിയതോടെ ദൃശ്യങ്ങള്‍ പകര്‍ത്തുകയായിരുന്നു ഇവര്‍. വരനും വധുവിനും തൊട്ട് പിന്നിലെത്തിയ ആന പെട്ടെന്ന് തിരിഞ്ഞ് ഒന്നാം പാപ്പാനെ ആക്രമിച്ചു. പാപ്പാനെ തുമ്ബിക്കൈയിലെടുത്ത് ഉയര്‍ത്തിയെങ്കിലും പിടിത്തം മുണ്ടിലായതിനാല്‍ ഉടുതുണി ഊരി താഴെ വീണു. ഉടന്‍ പാപ്പാന്‍ ഒഴിഞ്ഞു മാറിയതിനാല്‍ തലനാരിഴക്ക് രക്ഷപ്പെട്ടു.ഇതിനിടയില്‍ തോട്ടി ഉപയോഗിച്ച് ആനപ്പുറത്തുണ്ടായിരുന്ന പാപ്പാന്‍ ആനയെ നിയന്ത്രണത്തിലാക്കുകയായിരുന്നു.സംഭവം കോഴിക്കോട് വെഡിങ് മോയിറ്റോയിലെ വീഡിയോ ഗ്രാഫര്‍ ജെറി ആണ് പകര്‍ത്തിയത്.