ഒന്നാം തിയതി ശമ്പളം ലഭിക്കുന്ന 40 ശതമാനം പേര്‍ക്ക് മാത്രമാണ് ഇന്നലെ പണം കൈയില്‍ കിട്ടിയതെന്നാണ് പ്രതിഷേധ സമരം നടത്തുന്ന സെക്രട്ടേറിയറ്റ് ആക്ഷൻ കൗൺസിൽ ആരോപിക്കുന്നത്. സെക്രട്ടേറിയറ്റ്, പൊലീസ്, എക്സൈസ്, റവന്യു ജീവനക്കാര്‍ക്കാണ് ഒന്നാം തിയതി ശമ്പളം ലഭിക്കേണ്ടത്. ശമ്പളം വിതരണം പൂര്‍ണതോതില്‍ ആകാന്‍ മൂന്ന് ദിവസമെങ്കിലും വേണ്ടിവരുമെന്ന് ധനവകുപ്പ് പറയുന്നു.

പ്രതിസന്ധി തീര്‍ത്തെന്ന് മന്ത്രി പറഞ്ഞതിനു പിന്നാലെ ചിലര്‍ക്കെല്ലാം കിട്ടി. ഭൂരിഭാഗവും ഇനിയും ശമ്പളത്തിനായി കാത്തിരിക്കുകയാണ്. രണ്ടാം പ്രവൃത്തി ദിവസം ശമ്പളം അനുവദിക്കേണ്ട അധ്യാപകര്‍ക്കും ആരോഗ്യ പ്രവര്‍ത്തകര്‍ക്കും ഇന്ന് മുതൽ ശമ്പളം കൊടുത്തു തുടങ്ങണം.

ആദ്യ രണ്ട് പ്രവൃത്തിദിനത്തിൽ ശമ്പള വിതരണത്തിലുണ്ടായ പ്രതിസന്ധി പരിഹരിക്കാൻ മൂന്ന് ദിവസമെങ്കിലും എടുക്കുമെന്നാണ് ധനവകുപ്പ് വിശദീകരിക്കുന്നത്. അതായത് മൂന്നും നാലും പ്രവൃത്തി ദിനം ശമ്പളം കിട്ടേണ്ടവര്‍ക്ക് ഇനിയും കാത്തിരിക്കണം.

കേന്ദ്രത്തിൽനിന്ന് കിട്ടാൻ അര്‍ഹതയുള്ളത് 13,608 കോടി രൂപയാണ്. നാളെ സുപ്രിംകോടതി കേസ് പരിഗണിക്കുമ്പോൾ ഇത് ലഭ്യമാകുന്ന വിധം ഇടക്കാല വിധിയുണ്ടാകുമെന്നാണ് സംസ്ഥാനം പ്രതീക്ഷിക്കുന്നത്.

സപ്ലൈകോയില്‍ ഓണക്കാലത്ത് തുടങ്ങിയ പ്രതിസന്ധി ക്രിസ്തുമസ് അടുത്തിട്ടും തീരുന്നില്ല. സംസ്ഥാനത്തെ എല്ലാ സപ്ലൈകോ ഔട്ട്‌ലെറ്റുകളിലെയും റാക്കുകള്‍ കാലിയാണ്.

അരിയും പഞ്ചസാരയും മുളകും വെളിച്ചെണ്ണയും അടക്കം അവശ്യസാധനങ്ങള്‍ ഒന്നും ലഭ്യമല്ല. സാധനങ്ങള്‍ വാങ്ങാന്‍ ആളുകളെത്താതെ സപ്ലൈകോയില്‍ അവശേഷിക്കുന്നത് മല്ലിയും ചെറുപയറും മാത്രം. അരക്കിലോ സാധനങ്ങള്‍ പോലും കിട്ടാതെ എങ്ങനെ മുന്നോട്ടുപോകും എന്നറിയാതെ ബുദ്ധിമുട്ടുകയാണ് സാധാരണക്കാര്‍.

വിതരണക്കാര്‍ക്ക് കുടിശ്ശികയിനത്തില്‍ കോടികള്‍ നല്‍കാനുണ്ട്. സാധനങ്ങളുടെ ടെന്‍ഡര്‍ എടുക്കാന്‍ വിതരണക്കാര്‍ എത്താത്തതും ഇപ്പോഴത്തെ പ്രതിസന്ധിയുടെ ആക്കംകൂട്ടി. ഈ സ്ഥിതി തുടര്‍ന്നാല്‍ സജീവമായ ക്രിസ്തുമസ് – പുതുവത്സര വിപണി ഉണ്ടായേക്കില്ല. ജീവനക്കാരുടെ ശമ്പളം മുടങ്ങും എന്ന ആശങ്കയും ഒരു ഭാഗത്തുണ്ട്.

ഓണക്കാലമായതോടെ സര്‍ക്കാരിന്റെ ചെലവ് ഇരട്ടിയായിരിക്കുകയാണ്. ചെലവ് കൂടുമ്പോഴും വരുമാനത്തിന്റെ കാര്യത്തില്‍ കാര്യമായ നേട്ടങ്ങള്‍ ഉണ്ടാകുന്നില്ല എന്നതാണ് തിരിച്ചടി. കേന്ദ്രസര്‍ക്കാര്‍ സംസ്ഥാനത്തിന്റെ വായ്പാ പരിധി ഉയര്‍ത്താത്തത് പ്രതിസന്ധി അതിരൂക്ഷമാകുന്നതിന് ഇടയാക്കുന്നുവെന്നാണ് സര്‍ക്കാരിന്റെ പരാതി. ഓണം കഴിയുന്നതോടെ ഖജനാവ് കാലിയാകുന്ന അവസ്ഥയാണെന്നാണ് മന്ത്രിമാര്‍ പറയുന്നത്.

സാമ്പത്തിക ഞെരുക്കം വകുപ്പുകളുടെ പ്രവര്‍ത്തനത്തെ കാര്യമായി ബാധിക്കുമെന്നുണ്ടെന്നാണ് മന്ത്രിമാരുടെ പരാതി. പദ്ധതികളെയും കാര്യമായി ബാധിക്കുന്നുണ്ടെന്ന് മന്ത്രിമാര്‍ പറഞ്ഞു. സാമ്പത്തിക ഞെരുക്കമുണ്ടെന്ന കാര്യം മുഖ്യമന്ത്രിയും യോഗത്തില്‍ സമ്മതിച്ചു. പണം കരുതലോടെ ചെലവഴിക്കണമെന്ന് മുഖ്യമന്ത്രി മന്ത്രിമാരോട് പറഞ്ഞു. സംസ്ഥാനത്ത് സാമ്പത്തിക ബുദ്ധിമുട്ടുണ്ടെന്ന് ധനകാര്യമന്ത്രി കെ.എന്‍ ബാലഗോപാലും മന്ത്രിസഭാ യോഗത്തില്‍ ആവര്‍ത്തിച്ചു.