അന്നത്തെ റഷ്യന്‍ രാത്രി ആഘോഷത്തിന്റെ ഉല്‍സവമായിരുന്നു. അവിടെയും അവസാനിച്ചില്ല റഷ്യന്‍ ഗാഥ. ക്വാര്‍ട്ടറില്‍ ക്രൊയഷ്യക്കാര്‍. നിശ്ചിത സമയത്തില്‍ മല്‍സരം 2-2 ല്‍. അധികസമയത്ത്് ഗോളില്ല. ഷൂട്ടൗട്ടില്‍ ഒരു ഗോള്‍ തോല്‍വിയുമായി റഷ്യ പുറത്തായെങ്കിലും 2018 ലെ ലോകകപ്പിലെ വിസ്മയ സംഘമായിരുന്നു പഴയ സോവിയറ്റ് യൂണിയനുകാര്‍. ഇതാ, ആ ലോകകപ്പ് വിസ്മയത്തിന് ശേഷം അവര്‍ വീണ്ടും വന്‍കരയിലേക്ക് വരുന്നു. ഗ്രൂപ്പ് ബിയില്‍ ബെല്‍ജിയം, ഡെന്മാര്‍ക്ക്, ഫിന്‍ലാന്‍ഡ് എന്നിവര്‍ക്കെതിരെ.

പരിശീലകന്‍ പഴയ സ്റ്റാനിസ്ലാവ് ചെര്‍ച്ചഷോവ് തന്നെ. ലോകകപ്പ്് കളിച്ച സൂപ്പര്‍ താരങ്ങളില്‍ പലരും യൂറോ സംഘത്തിലുമുണ്ട്. സ്പാര്‍ട്ടക്ക് എഫ്.സിയുടെ അലക്‌സാണ്ടര്‍ സോബലേവ്, സെനിത്ത് എഫ്.സിയുടെ അര്‍തേ സുബ, സി.എസ്.കെ.എ യുടെ അന്റോണ്‍ സബോല്‍ട്ടണി എന്നിവര്‍ തന്നെ പ്രമുഖര്‍. മധ്യനിരയില്‍ ലോക്കോമോട്ടീവ് മോസ്‌ക്കോയുടെ ഡിമിത്രി ബാരിനോവ്, റിഫാത് സെമാല്‍ദിനോവ് എന്നിവര്‍ക്കൊപ്പം അലക്‌സാണ്ടര്‍ ഗോലോവിന്‍ എന്ന വിസ്മയവുമുണ്ട്. ഫ്രഞ്ച് ഡിവിഷന്‍ ഒന്നില്‍ മോണോക്കോയുടെ താരമായ ഗോലോവിനായിരുന്നു ലോകകപ്പില്‍ നാട്ടുകാരുടെ മനം കവര്‍ന്നത്. വലിയ പ്രതീക്ഷകള്‍ റഷ്യക്കില്ല. പക്ഷേ അവരുടെ പ്രഥമ ലക്ഷ്യം ആദ്യ റൗണ്ട് പിന്നിടുകയാണ്. അതിന് കഴിയുമോ…

സെവിയെ താരം ഇവാന്‍ റാക്കിറ്റിച്ച്, ലോകകപ്പ് ഹീറോ മരിയോ മാന്‍സുകിച്് എന്നിവര്‍ രാജ്യാന്തര രംഗം വിട്ടതിനാല്‍ ബോര്‍ന ബാറിസിച്ച്, ഡമഗോജ് ബ്രദാറിച്ച്, ജോസ്‌കോ വാര്‍ദിയോള്‍ തുടങ്ങി യുവനിരക്കാണ് കാര്യമായ അവസരം. സാറ്റികോ ഡാലിച്് എന്ന ലോകകപ്പ് പരിശീലകന്‍ തന്നെയാണ് ഇപ്പോഴും കളിക്കാര്‍ക്കൊപ്പമുള്ളത്. ലോകകപ്പില്‍ അല്‍ഭുതങ്ങള്‍ കാട്ടിയ പരിശീലകന് യുവതാരങ്ങളിലാണ് കാര്യമായ വിശ്വാസം. പ്രതിരോധത്തില്‍ ബോര്‍ന സാസ എന്ന താരത്തിന്റെ അഭാവമാണ് ക്ഷീണം. ബുണ്ടസ് ലീഗില്‍ സറ്റട്ട്ഗര്‍ട്ടിനായി കളിക്കുന്ന 23 കാരന്‍ ഇരട്ട പൗരത്വ പ്രശ്‌നത്തില്‍ പുറത്താണിപ്പോള്‍. ഇത് വരെ അദ്ദേഹം ക്രോട്ട് താരമായിരുന്നു. പക്ഷേ ജര്‍മന്‍ പൗരത്വമുള്ളതിനാല്‍ കുരുക്കില്‍പ്പെട്ടു. ക്രോട്ടുകാര്‍ അവഗണിച്ചപ്പോള്‍ സോസക്ക് ജര്‍മന്‍ സംഘത്തില്‍ ഇടം ലഭിക്കുമെന്നാണ് കരുതപ്പെട്ടത്. എന്നാല്‍ ഫിഫ നിയന്ത്രണങ്ങള്‍ കാരണം ജര്‍മന്‍ കോച്് ജോക്കിം ലോ സാഹസത്തിന് മുതിര്‍ന്നില്ല. അങ്ങനെ എവിടെയുമില്ലാതെയായി. റോബര്‍ട്ട് ജാര്‍നിക്ക് ശേഷം ക്രൊയേഷ്യ കണ്ട ഏറ്റവും മികച്ച ഇടത് വിംഗറാണ് സാസ. മുന്‍നിരയിലാണ് ക്രോട്ടുകാര്‍ക്ക്് അഗ്നീപരീക്ഷണം. പ്രതിയോഗികളെ വിറപ്പിക്കാന്‍ പ്രാപ്തനായ ഒരു സ്‌ട്രൈക്കറില്ല. ഏ.സി മിലാന്‍ താരം ആന്‍ഡി റെബിച്ചിലാണ് കോച്ചിന്റെ പ്രതീക്ഷ.