ജൂണ്‍ 23നാണ് നിഖില്‍ അറസ്റ്റിലാകുന്നത്. ജസ്റ്റിസ് സിയാദ് റഹ്മാന്റെ ബെഞ്ചാണ് ജാമ്യം അനുവദിച്ചത്. കലിംഗ സര്‍വകലാശാലയില്‍ നിന്ന് ബികോം പഠനം പൂര്‍ത്തിയായെന്ന തീരിയിലായിരുന്നു നിഖില്‍ വ്യാജ സര്‍ട്ടിഫിക്കറ്റ് ഉണ്ടാക്കി നല്‍കിയത്.

മാലി ദ്വീപില്‍ ജോലി ചെയ്യുന്ന അബിനെ ഉടന്‍ നാട്ടിലെത്തിക്കുമെന്ന് കായംകുളം ഡിവൈഎസ്പി പറഞ്ഞു. കലിംഗ സര്‍വകലാശാലയുടെ വ്യാജ ബിരുദ സര്‍ട്ടിഫിക്കറ്റ് ഹാജരാക്കിയാണ് നിഖില്‍ തോമസ് കായംകുളം എംഎസ്എം കോളേജില്‍ എംകോമിന് പ്രവേശനം നേടിയത്. അബിന്‍ തയ്യാറാക്കി നല്‍കിയ സര്‍ട്ടിഫിക്കറ്റ് ഒറിജിനല്‍ ആണെന്നും കേരള സര്‍വകലാശാലയില്‍ സമര്‍പ്പിച്ചാല്‍ പ്രശ്‌നങ്ങള്‍ ഉണ്ടാകില്ലെന്നും അദ്ദേഹം പറഞ്ഞതിനെ തുടര്‍ന്നാണ് എംകോം പ്രവേശനത്തിന് സര്‍ട്ടിഫിക്കറ്റ് സമര്‍പ്പിച്ചതെന്നുമായിരുന്നു നിഖിലിന്റെ മൊഴി.

കേരളത്തിനു പുറത്തുള്ള പല സര്‍വകലാശാലകളുടെയും പേരില്‍ വ്യാജ സര്‍ട്ടിഫിക്കറ്റുകള്‍ നിര്‍മ്മിച്ചു നല്‍കുന്ന മാഫിയാ സംഘത്തിന്റെ സഹായം തേടിയ ഒട്ടനേകം ചെറുപ്പക്കാരില്‍ ഒരാളായി നിഖില്‍ തോമസും. തുടക്കത്തില്‍ വളരെ ശക്തമായാണ് പാര്‍ട്ടി നിഖിലിനെ ന്യായീകരിച്ചിരുന്നത്. നിഖിലിന്റെ സര്‍ട്ടിഫിക്കറ്റ് വ്യാജമാണെന്ന് കേരള സര്‍വകലാശാലയും സ്ഥിരീകരിച്ചതോടെയാണ് എസ്എഫ്‌ഐ കൈവിട്ടത്.

നിഖില്‍ തോമസിനെതിരെ കേരള യൂനിവേഴ്‌സിറ്റി രജിസ്ട്രാര്‍ ഡോ. അനില്‍ കുമാര്‍ ഡി.ജി.പിക്ക് നല്‍കിയ പരാതി തുടര്‍നടപടികള്‍ക്കായി ബന്ധപ്പെട്ട സ്‌റ്റേഷനിലേക്ക് നല്‍കുമെന്ന് പൊലീസ് അറിയിച്ചു. നിയമ നടപടികള്‍ക്ക് തുടക്കം കുറിച്ചതായി കലിംഗ യൂനിവേഴ്‌സിറ്റി രജിസ്ട്രാര്‍ സന്ദീപ് ഗാന്ധിയും വ്യക്തമാക്കിയതോടെ നിഖിലിനെതിരെ ഛത്തിസ്ഗഢിലും കേസ് ഉറപ്പായി. കായംകുളം എം.എസ്.എം കോളജില്‍ രണ്ടാം വര്‍ഷ എം.കോം വിദ്യാര്‍ഥിയായ നിഖിലിനെ കഴിഞ്ഞ ദിവസം കോളജില്‍നിന്ന് സസ്‌പെന്‍ഡ് ചെയ്തതായി കോളേജ് അധികൃതര്‍ അറിയിച്ചിരുന്നു.