മോഹന്‍ലാല്‍ ക്ലബ് എന്ന പേജിലൂടെയാണ് പ്രചാരണം. സിനിമയിലെ മോഹന്‍ലാലിന്റെ രംഗങ്ങളാണ് പുറത്തായിരിക്കുന്നത്. സമൂഹമാധ്യമങ്ങളില്‍ ഇത് പോസ്റ്റ് ചെയ്ത് മിനിറ്റുകള്‍ക്കകം ആയിരക്കണക്കിന് ആളുകളാണ് രംഗങ്ങള്‍ ഷെയര്‍ ചെയ്തത്.

ആദിയില്‍ മോഹന്‍ലാലും പ്രണവിന്റെ അമ്മ സുചിത്രയും അതിഥി താരങ്ങളായി എത്തുന്നുണ്ട്. സിനിമയില്‍ മോഹന്‍ലാല്‍ മോഹന്‍ലാല്‍ തന്നെയായാണ് അഭിനയിക്കുന്നത്. ഒരു റസ്‌റ്റോറന്റില്‍ ചിത്രീകരിച്ച സീനിലാണ് ഇരുവരും അഭിനയിക്കുന്നത്. നിര്‍മാതാവ് ആന്റണി പെരുമ്പാവൂരുമുണ്ട് ചിത്രത്തില്‍. ഈ രംഗമാണ് പുറത്തായത്.

ജിത്തു ജോസഫിന്റെ സംവിധാനത്തില്‍ എത്തുന്ന 9ാമത്തെ ചിത്രമാണ് ആദി. അനില്‍ ജോണ്‍സന്റെ പശ്ചാത്തലസംഗീതവും സതീഷ് കുറുപ്പിന്റെ ഛായാഗ്രഹണം ട്രെയിലര്‍ ആകര്‍ഷണമാക്കുന്നു. അനില്‍ ജോണ്‍സണ്‍ തന്നെയാണ് ചിത്രത്തിനായി സംഗീതമൊരുക്കിയതും. ആശീര്‍വാദ് സിനിമാസിനു വേണ്ടി ആന്റണി പെരുമ്പാവൂര്‍ നിര്‍മ്മിക്കുന്ന ചിത്രം അടുത്ത വര്‍ഷം തിയറ്ററുകളിലെത്തും.

‘ആദി’യില്‍ ഗിത്താറിസ്റ്റിന്റെ കഥാപാത്രത്തെയാണ് പ്രണവ് അവതരിപ്പിക്കുന്നതെന്നാണ് സൂചന. ആശീര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂര്‍ ആണ് ചിത്രം നിര്‍മ്മിക്കുന്നത്.

മലയാള സിനിമക്ക് പുതുതാരമല്ല പ്രണവ്. സിനിമയ്ക്ക് അകത്തും പുറത്തും പ്രണവിന്റെ കരസ്പര്‍ശമേറ്റിറ്റുണ്ട്. ബാലതാരമായി തമ്പി കണ്ണന്താനം സംവിധാനം ചെയ്ത ഒന്നാമന്‍ എന്ന ചിത്രത്തില്‍ മോഹന്‍ലാലിന്റെ കുട്ടിക്കാലം അഭിനയിച്ചത് പ്രണവായിരുന്നു. 2002-ലായിരുന്നു ചിത്രം. അതേവര്‍ഷം മേജര്‍രവിയുടെ പുനര്‍ജനി എന്ന ചിത്രത്തിലൂടെ മികച്ച ബാലതാരത്തിനുള്ള കേരള സംസ്ഥാന ചലച്ചിത്ര പുരസ്‌ക്കാരം പ്രണവ് സ്വന്തമാക്കി. കൂടാതെ സാഗര്‍ ഏലിയാസ് ജാക്കി എന്ന മോഹന്‍ലാല്‍ ചിത്രത്തിലെ രെു ഗാനത്തിലും കുഞ്ഞുവേഷത്തില്‍ പ്രണവ് എത്തിയിരുന്നു. സ്‌ക്രീനില്‍ ഇങ്ങനെ എത്തിയപ്പോള്‍ സിനിമക്ക് പിറകിലും പ്രണവുണ്ടായിരുന്നു. ജിത്തു ജോസഫിന്റെ രണ്ടു ചിത്രങ്ങളില്‍ സഹസംവിധായകനായി പ്രവര്‍ത്തിച്ചു. ദൃശ്യത്തിന്റെ തമിഴ് പതിപ്പായ പാപനാസത്തിലും ദിലീപ് നായകനായ ലൈഫ് ഓഫ് ജോസൂട്ടിയിലുമാണ് പ്രണവ് സഹസംവിധായകനായത്.