പുതിയ ഭരണസമിതിയെ നിയമിച്ചതിനെ കുറിച്ച് ഔദ്യോഗിക അറിയിപ്പ് ലഭിച്ചിരുന്നില്ലെന്നും, അറിയിപ്പ് ലഭിച്ചിരുന്നെങ്കില്‍ ചുമതല കൈമാറുന്ന ചടങ്ങില്‍ പങ്കെടുത്തേനെയെന്നും പ്രേംകുമാര്‍ പറഞ്ഞു.

‘മാറ്റം സര്‍ക്കാരിന്റെ തീരുമാനമാണ്. എന്നെ നിയോഗിച്ചത് സര്‍ക്കാരാണ്, അതിനാല്‍ എപ്പോള്‍ വേണമെങ്കിലും ഉചിതമായ തീരുമാനമെടുക്കാം. അന്താരാഷ്ട്ര പ്രശസ്തനായ ചലച്ചിത്രകാരനെയാണ് സര്‍ക്കാര്‍ കണ്ടെത്തിയിരിക്കുന്നത്. അതിനെ സ്വാഗതം ചെയ്യേണ്ടതാണ്,” പ്രേംകുമാര്‍ പറഞ്ഞു.

റസൂല്‍ പൂക്കുട്ടി ഏറെ ആദരിക്കുന്ന വ്യക്തിത്വമാണ.് ”അദ്ദേഹത്തെ നിയമിച്ചതും സ്ഥാനമേറ്റെടുത്തതും സംബന്ധിച്ച് അറിയിപ്പ് ലഭിച്ചില്ല. ചടങ്ങില്‍ പങ്കെടുക്കണമെന്ന് ആഗ്രഹമുണ്ടായിരുന്നു. പങ്കെടുക്കാനായില്ല എന്നതില്‍ വിഷമമുണ്ട്, പക്ഷേ പരാതിയോ പരിഭവമോ ഇല്ല,” എന്നും അദ്ദേഹം വ്യക്തമാക്കി.

”റസൂല്‍ പൂക്കുട്ടിയുടെ വരവ് അക്കാദമിക്ക് ഗുണം ചെയ്യും. സര്‍ക്കാരിന്റെ വിവേചനാധികാരമാണ് പുതിയ നിയമനവും ക്ഷണവുമായി ബന്ധപ്പെട്ട കാര്യങ്ങളും. എനിക്ക് ഏല്‍പ്പിച്ച ചുമതലകള്‍ ആത്മാര്‍ഥമായി നിര്‍വഹിക്കാന്‍ കഴിഞ്ഞുവെന്ന് വിശ്വാസമുണ്ട്,” അദ്ദേഹം കൂട്ടിച്ചേര്‍ത്തു.

മാറ്റത്തിന് രാഷ്ട്രീയകാരണമില്ലെന്നും, ”അറിയിപ്പ് നല്‍കിയിരുന്നെങ്കില്‍ പങ്കെടുക്കുമായിരുന്നുവെന്നതാണ് എന്റെ വിഷമം,” എന്നും പ്രേംകുമാര്‍ വ്യക്തമാക്കി.

റസൂല്‍ പൂക്കുട്ടി ചുമതലയേറ്റപ്പോള്‍ ആദ്യമായി തന്നെ തനിക്കാണ് വിളിച്ചതെന്ന് പ്രേംകുമാര്‍ കൂട്ടിച്ചേര്‍ത്തു.

രണ്ട് ദിവസത്തിനകം ഇതുസംബന്ധിച്ച സാംസ്‌കാരിക വകുപ്പ് ഉത്തരവ് പുറപ്പെടുവിക്കുമെന്ന് അധികൃതര്‍ അറിയിച്ചു.

സംവിധായകന്‍ രഞ്ജിത്ത് രാജിവെച്ചതിനെ തുടര്‍ന്ന്, വൈസ് ചെയര്‍മാനായിരുന്ന പ്രേംകുമാര്‍ താല്‍ക്കാലികമായി ചുമതല വഹിച്ചുവരികയായിരുന്നു. അക്കാദമിക്ക് സ്ഥിരം ചെയര്‍മാന്‍ ആവശ്യമുണ്ടെന്ന ആവശ്യം പരിഗണിച്ചാണ് ഈ തീരുമാനം എടുത്തത്.

‘സ്ലംഡോഗ് മില്യനെയര്‍’ എന്ന ചിത്രത്തിന് മികച്ച ശബ്ദസംയോജനത്തിനുള്ള ഓസ്‌കര്‍ പുരസ്‌കാരം നേടിയ റസൂല്‍ പൂക്കുട്ടി, ഇന്ത്യന്‍ സിനിമയിലെ പ്രമുഖ സാങ്കേതിക വിദഗ്ധരില്‍ ഒരാളാണ്.

പാലേരി മാണിക്യം സിനിമയിൽ അഭിനയിക്കാൻ എത്തിയ തന്നോട് രഞ്ജിത്ത് മോശമായി പെരുമാറി എന്നായിരുന്നു ബംഗാളി നടിയുടെ പരാതി. ലൈം​ഗിക താത്പര്യത്തോടെ സ്പർശിക്കാൻ ശ്രമിച്ചുവെന്നാണ് പരാതി. നടിയുടെ പരാതിയുടെ അടിസ്ഥാനത്തിൽ എറണാകുളം നോർത്ത് പോലീസ് കേസ് രജിസ്റ്റർ ചെയ്തിരുന്നു. ഹേമ കമ്മിറ്റി റിപ്പോർട്ട് പുറത്ത് വന്നതിന് പിന്നാലെയാണ് രഞ്ജിത്തിനെതിരെ ആരോപണം ഉയർന്നത്.

നടിയുടെ പരാതിക്ക് പിന്നാലെ സിനിമയിൽ അവസരം വാഗ്ദാനം ചെയ്ത് പീഡിപ്പിച്ചെന്ന് ആരോപിച്ച് കോഴിക്കോട് സ്വദേശിയായ യുവാവ് പരാതി നൽകിയിരുന്നു. കോഴിക്കോട് മാങ്കാവ് സ്വദേശിയാണ് പരാതി നൽകിയത്. 2012ലാണ് പരാതിയ്ക്ക് ആസ്പദമായ സംഭവം നടന്നത്. യുവാവിന്റെ പരാതിയുടെ അടിസ്ഥാനത്തിൽ ജാമ്യമില്ലാ വകുപ്പ് പ്രകാരം കസബ പൊലീസ് രഞ്ജിത്തിനെതിരെ കേസെടുത്തിരുന്നു.

ചലച്ചിത്ര അക്കാദമിയുടെ എക്‌സിക്യൂട്ടീവ് ബോഡി ഒരു അംഗത്തെക്കൂടി ഉള്‍പ്പെടുത്തി വിപുലപ്പെടുത്തുമെന്ന് രഞ്ജിത്ത് അറിയിച്ചു. ജനറല്‍ കൗണ്‍സില്‍ അംഗമായ കുക്കു പരമേശ്വരനെയാണ് ഉള്‍പ്പെടുത്തുക.

ചെയര്‍മാന്‍ സ്ഥാനം രാജി വെക്കേണ്ട സാഹചര്യം ഇപ്പോള്‍ ഇല്ലെന്നും അങ്ങനെ എന്തെങ്കിലും ഉണ്ടെങ്കില്‍ അറിയിക്കാമെന്ന് രഞ്ജിത്ത് പറഞ്ഞു.

രഞ്ജിത്തിനെ ചെയര്‍മാന്‍ സ്ഥാനത്തുനിന്ന് നീക്കണമെന്ന് ആവശ്യപ്പെട്ട് അക്കാദമി അംഗങ്ങള്‍ സമാന്തരയോഗം ചേര്‍ന്നിരുന്നെന്ന് വാര്‍ത്തകള്‍ വന്നിരുന്നു. 9 അംഗങ്ങള്‍ പ്രത്യേക യോഗം ചേര്‍ന്ന് രഞ്ജിത്തിനെ മാറ്റണമെന്ന് ആവശ്യപ്പെട്ട് സര്‍ക്കാരിന് കത്തുനല്‍കുകയും ചെയ്തു.

ഡോ. ബിജുവിനെക്കുറിട്ട് രഞ്ജിത്ത് പറഞ്ഞ പരാമര്‍ശങ്ങള്‍ ഉള്‍പ്പെടെ വിവാദമായതിന് പിന്നാലെയാണ് രഞ്ജിത്തിനെതിരെ പടയൊരുക്കമുണ്ടാകുന്നത്.

രഞ്ജിത്തിനെതിരെ നടപടി എടുക്കണം എന്നാണ് ഇവരുടെ ആവശ്യം. രഞ്ജിത്തിന്റെ ഏകധിപത്യമാണ് നടക്കുന്നത്. അടിക്കടി ഉണ്ടാക്കുന്ന വിവാദ പരാമര്‍ശം ചലച്ചിത്ര അക്കാദമിക്ക് തന്നെ അവമതിപ്പ് ഉണ്ടാക്കുന്നു.

ഇതെല്ലാം ചൂണ്ടിക്കാണിച്ചാണ് നടപടി വേണമെന്ന് ആവശ്യപ്പെട്ട് പരാതി നല്‍കിയിരിക്കുന്നത്. മനോജ് കാന, എന്‍ അരുണ്‍, മമ്മി സെഞ്ച്വറി, കുക്കു പരമേശ്വരന്‍, പ്രകാശ് ശ്രീധര്‍, ഷൈബു മുണ്ടയ്ക്കല്‍ (വിസ്മയ), അഭിനേതാവ് ജോബി, സിബി, സന്തോഷ് എന്നിവരാണ് സമാന്തര യോഗം ചേര്‍ന്നത്. നടന്‍ ഭീമന്‍ രഘുവിനെതിരെയും സംവിധായകന്‍ ഡോ. ബിജുവിനെതിരെയും രഞ്ജിത്ത് നടത്തിയ പരമാര്‍ശങ്ങള്‍ വിവാദമായിരുന്നു.

കഴിഞ്ഞ ദിവസം ദി ന്യൂ ഇന്ത്യന്‍ എക്‌സ്പ്രസിന് നല്‍കിയ അഭിമുഖത്തില്‍ സംവിധായകന്‍ ഡോ. ബിജുവിന് എതിരെ രഞ്ജിത്ത് നടത്തിയ പരാമര്‍ശം വിവാദമായിരുന്നു. ‘അദൃശ്യജാലകങ്ങള്‍’ എന്ന സിനിമ തിയറ്ററില്‍ റിലീസ് ചെയ്തപ്പോള്‍ ആളുകള്‍ കയറിയില്ലെന്നും ഇവിടെയാണ് ഡോക്ടര്‍ ബിജുവൊക്കെ സ്വന്തം റെലവന്‍സ് എന്താണ് എന്ന് ആലോചിക്കേണ്ടതെന്നുമായിരുന്നു രഞ്ജിത്തിന്റെ പരാമര്‍ശം.

പിന്നാലെ രഞ്ജിത്തിന് മറുപടിയുമായി ഡോ. ബിജുവും രംഗത്തെത്തി. ‘തിയേറ്ററില്‍ ആളെ കൂട്ടുന്നത് മാത്രമാണ് സിനിമ എന്ന താങ്കളുടെ ബോധം തിരുത്താന്‍ ഞാന്‍ ആളല്ല. കേരളത്തിനും ഗോവയ്ക്കും അപ്പുറം ലോകത്തൊരിടത്തും പേരിനെങ്കിലും ഒരു ചലച്ചിത്ര മേളയില്‍ പോലും പങ്കെടുത്തിട്ടില്ലാത്ത താങ്കളോട് രാജ്യാന്തര ചലച്ചിത്ര മേളകളെപറ്റിയും തിയേറ്ററിലെ ആള്‍ക്കൂട്ടത്തിനപ്പുറം സിനിമയുടെ ഫോമിനെ പറ്റിയും ഒക്കെ പറയുന്നത് വ്യര്‍ഥമാണ്,’ എന്നായിരുന്നു ഡോ. ബിജുവിന്റെ പ്രതികരണം.

കേരള ചലച്ചിത്ര അക്കാദമി വികസന കോര്‍പ്പറേഷന്‍ മെമ്പര്‍ സ്ഥാനം ഡോ. ബിജു രാജിവെച്ചിരുന്നു. ജോലി കാരണം തിരക്കിലായതിനാലാണ് രാജിയെന്ന് ബിജുവിന്റെ പ്രതികരണം. രഞ്ജിത്തുമായി തര്‍ക്കം നിലനില്‍ക്കേയായിരുന്നു രാജി.