കിട്ടാവുന്നത്ര ഇരന്നുവാങ്ങുകയെന്നതാണ് എല്‍. ഡി.എഫ് സര്‍ക്കാരിന്റെ നയം. വികസന മുന്നേറ്റത്തിനെന്ന പേരില്‍ രൂപീകരിച്ച കേരള ഇന്‍ഫ്രാസ്ട്രക്ചര്‍ ഇന്‍വെസ്റ്റ്‌മെന്റ് ഫണ്ട് ബോര്‍ഡ് (കിഫ്ബി) കടം വാങ്ങാനുള്ള സംവിധാനമാണ്. സാമ്പത്തിക വിദഗ്ധര്‍ക്കു തന്നെ കിഫ്ബിയുടെ പ്രവര്‍ത്തനങ്ങളില്‍ ആശങ്കയുണ്ട്. സംസ്ഥാനത്തിന്റെ അടിസ്ഥാന സൗകര്യ വികസന രംഗത്ത് അഞ്ച് വര്‍ഷം കൊണ്ട് അമ്പതിനായിരം കോടി രൂപയുടെ നിക്ഷേപമാണ് കിഫ്ബിയുടെ ലക്ഷ്യം. മുടക്കുമുതല്‍ പോലും തിരിച്ചുകിട്ടാത്ത പദ്ധതികള്‍ കേരളത്തെ കടക്കെണിയിലാക്കില്ലേ എന്നാണ് വിദഗ്ധര്‍ ചോദിക്കുന്നത്. കിഫ്ബിയുടെ പദ്ധതികളില്‍ ഒന്നുപോലും വരുമാനം ഉണ്ടാക്കുന്നവയല്ല. സാമ്പത്തിക വളര്‍ച്ചക്ക് അടിസ്ഥാന സൗകര്യ വികസനം അനിവാര്യമാണെങ്കിലും അതിനുവേണ്ടി വാങ്ങുന്ന വായ്പയുടെ തിരിച്ചടവ് എങ്ങനെ സാധിക്കുമെന്ന ചോദ്യം ഏറെ പ്രസക്തമാണ്. കെ റെയില്‍ പോലെ വന്‍കിടക്കാരെ മാത്രം ലക്ഷ്യമിട്ടുള്ള പദ്ധതികള്‍ കൊണ്ട് സംസ്ഥാനത്തിനെന്ത് പ്രയോജനമെന്ന ചോദ്യത്തില്‍ കഴമ്പുണ്ട്. പക്ഷെ, ആത്യന്തികമായി അതിന്റെ സാമ്പത്തിക ഭാരം വീഴുന്നത് സാധാരണക്കാരന്റെ തലയിലുമായിരിക്കും.

രാജ്യത്തിനു പുറത്തുള്ള ധനകാര്യ സ്ഥാപനങ്ങളില്‍നിന്ന് വായ്പ വാങ്ങാന്‍ സര്‍ക്കാരിന് വലിയ ആവേശമാണ്. പ്രായോഗിക ധനസമാഹരണത്തിന് നീക്കമില്ലെന്ന് മാത്രമല്ല, അനാവശ്യ ചെലവുകള്‍ അടിച്ചേല്‍പ്പിക്കുകയും ചെയ്യുന്നു. വാര്‍ഷിക ബജറ്റിനെ പ്രഖ്യാപനങ്ങള്‍ക്കുള്ള രേഖ മാത്രമായി തരംതാഴ്ത്തിയിരിക്കുന്നു. സാമ്പത്തിക പ്രതിസന്ധിയുടെ പേരില്‍ കടങ്ങള്‍ വാങ്ങിക്കൂട്ടുമ്പോഴും മന്ത്രിമാരുടെ ആര്‍ഭാടങ്ങള്‍ക്ക് ഒട്ടും കുറവില്ല. മുഖ്യമന്ത്രി പിണറായി വിജയന്റെ വാഹനഭ്രമത്തിന്റെ ബാധ്യതയും പൊതുഖജനാവിന്റെ തലയിലാണ്. പിണറായിക്ക് സഞ്ചരിക്കാന്‍ കിയ കാര്‍ണിവലും എസ്‌കോര്‍ട്ടിനായി മൂന്ന് ഇന്നോവ ക്രിസ്റ്റയും വാങ്ങാന്‍ 88,69,841 രൂപയാണ് മുതല്‍മുടക്ക്. അതോടൊപ്പം മന്ത്രിമാരുടെയും എം.എല്‍.എമാരുടെയും ശമ്പളം വര്‍ധിപ്പിക്കാനും നീക്കമുണ്ട്. കെ.എസ്.ആര്‍.ടി.സി ജീവനക്കാര്‍ ഉള്‍പ്പെടെ ശമ്പളമില്ലാതെയും ജനം വരുമാനമില്ലാതെയും നട്ടംതിരിയുമ്പോഴാണ് ഭരണതലത്തില്‍ ദൂര്‍ത്ത് പൊടിപൊടിക്കുന്നതെന്ന് ഓര്‍ക്കണം. ഇടതുപക്ഷത്തിന് അഞ്ച് വര്‍ഷത്തെ ഭരണത്തില്‍ മാത്രമേ താല്‍പര്യമുണ്ടാകൂ. സര്‍ക്കാര്‍ കാലാവധി തീര്‍ത്ത് ഇറങ്ങിപ്പോയാലും കടബാധ്യത സംസ്ഥാനത്തിന്റെ കണക്കില്‍ തന്നെ ഉണ്ടാകും. അതിന് തല വെച്ചുകൊടുക്കേണ്ടത് പാവപ്പെട്ട ജനങ്ങളായിരിക്കും. നിത്യചെലവിനുപോലും ധനകാര്യ സ്ഥാപനങ്ങള്‍ക്കുമുന്നില്‍ കൈ നീട്ടുന്ന അവസ്ഥയിലേക്ക് സംസ്ഥാനത്തെ എത്തിച്ചതിന്റെ ഉത്തരവാദി സര്‍ക്കാര്‍ മാത്രമാണ്. കൃത്യമായ നികുതി പിരിവ് ഉള്‍പ്പെടെ വരുമാനം വര്‍ധിപ്പിക്കാനുള്ള മാര്‍ഗങ്ങളെക്കുറിച്ച് ആലോചനയില്ല. സമ്പദ്ഘടന വലിയ തകര്‍ച്ചയുടെ വക്കില്‍ എത്തിയിരിക്കുന്നു. എല്ലാം കോവിഡിന്റെ തലയില്‍ കെട്ടിവെച്ച് ഇനിയും മുന്നോട്ടുപോകാന്‍ സര്‍ക്കാരിന് സാധിക്കില്ല. സാമ്പത്തിക യാഥാര്‍ഥ്യങ്ങള്‍ തിരിച്ചറിയാന്‍ കണ്ണുതുറന്നേ തീരൂ. അല്ലാത്തപക്ഷം, കേരളം പാപ്പരാകുന്ന കാലം അധികം വിദൂരമല്ല.

വാഷിങ്ടണ്‍: അമേരിക്ക വീണ്ടും സാമ്പത്തിക അടിയന്തരാവസ്ഥയിലേക്ക് നീങ്ങുമെന്ന് സൂചന. അടുത്ത നാല് മണിക്കൂറിനകം പ്രസിഡന്റ് ഡോണള്‍ഡ് ട്രംപ് സാമ്പത്തിക അടിയന്തരാവസ്ഥ പ്രഖ്യാപിച്ചേക്കുമെന്നാണ് റിപ്പോര്‍ട്ട്. മെക്‌സിക്കന്‍ മതിലിന്റെ ബില്ല് പാസാക്കാന്‍ സെനറ്റ് വിസമ്മതിച്ചാല്‍ ഭരണസ്തംഭനമെന്ന് മുന്നറിയിപ്പ് നല്‍കിയിരിക്കയാണ് പ്രസിഡന്റ് ഡോണള്‍ഡ് ട്രംപ്.

അതിര്‍ത്തി വഴിയുള്ള കുടിയേറ്റം തടയുന്നതിനയി മെക്‌സിക്കന്‍ അതിര്‍ത്തിയില്‍ മതില്‍ പണിയുമെന്നത് ഡൊണള്‍ഡ് ട്രംപിന്റെ തെരഞ്ഞെടുപ്പ് വാഗ്ദാനങ്ങളില്‍ പ്രധാനപ്പെട്ട ഒന്നാണ്. മതിലിനായി 5.7 ബില്യണ്‍ ഡോളര്‍ അനുവദിക്കണമെന്നാണ് ട്രംപിന്റെ ആവശ്യം. ഇത് അമേരിക്കന്‍ കോണ്‍ഗ്രസിലെ അധോസഭയായ ജനപ്രതിനിധി സഭ പാസാക്കി. ഇനി സെനറ്റിന്റെ അംഗീകാരം കൂടി വേണം. എന്നാല്‍ സെനറ്റില്‍ ഇക്കാര്യത്തില്‍ വോട്ടെടുപ്പ് നടന്നില്ല.

മതിലിന് പണം അനുവദിക്കുന്ന കാര്യത്തില്‍ ധാരണയിലെത്താനും സെനറ്റിന് സാധിച്ചിട്ടില്ല. ഈ സാഹചര്യത്തിലാണ് അമേരിക്ക സാമ്പത്തിക അടിയന്തരാവസ്ഥയിലേക്ക് നീങ്ങുന്നത്. അടിയന്തരാവസ്ഥ പ്രഖ്യാപിക്കുകയാണെങ്കില്‍ അടുത്ത മൂന്ന് മണിക്കൂറിനകം പൊതുഭരണത്തിനായി തുക ലഭിക്കാതെ വരും. എട്ട് ലക്ഷത്തോളം വരുന്ന സര്‍ക്കാര്‍ ജീവനക്കാര്‍ക്ക് ശമ്പളം ലഭിക്കാതെ വരുമെന്നാണ് സെനറ്റ് അപ്രോപ്രിയേറ്റ് കമ്മിറ്റിയുടെ വിലയിരുത്തല്‍. ആഭ്യന്തരസുരക്ഷാവിഭാഗം, ഗതാഗതം, കാര്‍ഷികം, നീതിന്യായവിഭാഗം എന്നിവയുടെ പ്രവര്‍ത്തനം നിലയ്ക്കും. ഏതാണ്ട് എട്ട് ലക്ഷം തൊഴിലാളികള്‍ക്ക് ശന്പളം നഷ്ടമാവും. കൂടാതെ നാസ, പാര്‍പ്പിടം, നഗരവികസനം, നാഷണല്‍ പര്‍ക്ക് സര്‍വീസ്, ആഭ്യന്തര സുരക്ഷ, കൃഷി, നീതിന്യായം തുടങ്ങി വിവിധ മേഖലകള്‍ സ്തംഭിക്കും.

മതിലിന് അനുകൂലമായും വിരുദ്ധമായും ജനങ്ങള്‍ക്കിടയിലും ക്യാംപയിനുകള്‍ നടക്കുന്നുണ്ട്. റിപബ്ലിക്കന്‍ ഭൂരിപക്ഷമുള്ള ജനപ്രതിനിധിസഭ ബില്‍ പാസാക്കിയിരുന്നു. ജനുവരിയിലാണ് ഡമോക്രാറ്റ് അംഗങ്ങള്‍ക്ക് ഭൂരിപക്ഷമുള്ള ജനപ്രതിനിധിസഭ അധികാരമേല്‍ക്കുന്നത്.

ബില്ലില്‍ ഇന്ത്യന്‍ സമയം ഇന്നു പുലര്‍ച്ചെ നടന്ന സെനറ്റര്‍മാരുടെ യോഗത്തിലെ വോട്ടെടുപ്പു പരാജയപ്പെട്ടു. ബില്‍ പാസാക്കാന്‍ 60 വോട്ടുകളാണ് റിപ്പബ്ലിക് അംഗങ്ങള്‍ക്കു വേണ്ടിയിരുന്നത്. എന്നാല്‍ 50 വോട്ടുകള്‍ മാത്രമാണ് അവര്‍ക്കു ലഭിച്ചത്. അതേസമയം അഞ്ച് ഡമോക്രാറ്റ് സെനറ്റര്‍മാര്‍ ബില്ലിനെ പിന്തുണച്ചപ്പോള്‍ നാലു റിപ്പബ്ലിക് അംഗങ്ങള്‍ എതിര്‍ത്തു വോട്ടു ചെയ്തു.