ശനിയാഴ്ച ഉച്ചയോടെ കന്യാകുമാരി മുട്ടം തീരത്തില്‍ നിന്ന് ഏകദേശം 57 നോട്ടിക്കല്‍ മൈല്‍ അകലെയായിരുന്നു അപകടം. കൊല്ലം ചിറക്കര സ്വദേശി രാജേഷ് മാത്യുവിന്റെ ഉടമസ്ഥതയിലുള്ള ‘സെയ്ന്റ് ജോസഫ്’ എന്ന ട്രോളിങ് ബോട്ടാണ് എണ്ണക്കപ്പല്‍ ഇടിച്ച് തകര്‍ന്ന് കടലില്‍ മുങ്ങിയത്.

മത്സ്യബന്ധനത്തിന് ശേഷം വിശ്രമത്തിലായിരുന്ന മത്സ്യത്തൊഴിലാളികളുടെ ബോട്ടിലേക്കാണ് കപ്പല്‍ ഇടിച്ചുകയറിയത്. ഉറക്കത്തിലായിരുന്ന തൊഴിലാളികള്‍ വെള്ളത്തിലേക്ക് വീണതോടെയാണ് അപകടം മനസിലായത്. ബോട്ടിലുണ്ടായിരുന്ന 11 പേരില്‍ ഒന്‍പതു പേരെ കപ്പല്‍ ജീവനക്കാര്‍ രക്ഷപ്പെടുത്തി. എന്നാല്‍ രണ്ടുപേരെ ഇതുവരെ കണ്ടെത്താനായിട്ടില്ല.

സംഭവത്തെ തുടര്‍ന്ന് വിഴിഞ്ഞം കോസ്റ്റ് ഗാര്‍ഡ് കേസെടുത്തു. അപകടം നടന്നത് തമിഴ്‌നാട് തീരപരിധിയിലായതിനാല്‍ തുടര്‍നടപടികള്‍ക്കായി കേസ് തമിഴ്‌നാട്ടിലേക്ക് മാറ്റാനാണ് തീരുമാനം.

അപകടത്തിന് പിന്നാലെ കോസ്റ്റ് ഗാര്‍ഡ് പുറംകടലില്‍ തന്നെ കപ്പലിനെ തടഞ്ഞുവെച്ചിരുന്നു. ഡയറക്ടര്‍ ജനറല്‍ ഓഫ് ഷിപ്പിങ് അധികൃതരുടെ നിര്‍ദേശപ്രകാരം കോസ്റ്റ് ഗാര്‍ഡിന്റെ ‘അനഘ്’ എന്ന കപ്പല്‍ ‘എംടി സോളിസ്’നെ കസ്റ്റഡിയിലെടുത്ത് വിഴിഞ്ഞം പുറംകടലിലെത്തിച്ചു.

തുടര്‍ന്ന് കൊച്ചിയില്‍ നിന്ന് എത്തിയ ഡി.ജി. ഷിപ്പിങ്ങിന്റെ ചീഫ് സര്‍വേയര്‍ ഉള്‍പ്പെടെയുള്ള ഉദ്യോഗസ്ഥ സംഘം കപ്പലില്‍ പ്രാഥമിക പരിശോധന നടത്തി. അന്താരാഷ്ട്ര കപ്പല്‍ച്ചാലിന് സമീപത്താണ് അപകടം നടന്നതെന്നതാണ് പ്രാഥമിക അന്വേഷണത്തില്‍ വ്യക്തമാകുന്നത്. സംഭവത്തെക്കുറിച്ച് കൂടുതല്‍ വിവരങ്ങള്‍ ശേഖരിക്കാന്‍ ക്യാപ്റ്റന്‍ ഉള്‍പ്പെടെയുള്ള 20 അംഗ കപ്പല്‍ ജീവനക്കാരില്‍ നിന്ന് മൊഴി എടുക്കും.