അപകടത്തെ തുടര്‍ന്ന് ദേശീയപാതയിലെ ഗതാഗതം തടസ്സപ്പെട്ടു. മൂടല്‍മഞ്ഞ് കാരണം റോഡ് വ്യക്തമായി കാണാന്‍ കഴിയുന്നുണ്ടായിരുന്നില്ല. ആദ്യം ഒരു ജീപ്പ് ട്രക്കിലിടിക്കുകയായിരുന്നു. പിന്നാലെ മുന്‍പിലും പിന്‍പിലുമുള്ള വാഹനങ്ങളും കൂട്ടിയിടിച്ചു. പരിക്കേറ്റവരെ ഏറെ കഷ്ടപ്പെട്ടാണ് പുറത്തെടുത്തത്. ഹരിയാന സര്‍ക്കാര്‍ മരിച്ചവരുടെ കുടുംബത്തിന് രണ്ട് ലക്ഷം രൂപയും പരിക്കേറ്റവര്‍ക്ക് ഒരു ലക്ഷം രൂപയും പ്രഖ്യാപിച്ചു. കര്‍ണാല്‍ ജില്ലയിലെ അന്തരീക്ഷ താപനില ഞായറാഴ്?ച പൂജ്യം ഡിഗ്രിയിലേക്ക് എത്തിയിരുന്നു. ഇതിന് പിന്നാലെയാണ് കനത്ത മൂടല്‍ മഞ്ഞും രൂപപ്പെട്ടത്.

ഹരിയാനക്ക് പുറമെ ഡല്‍ഹി, പഞ്ചാബ്, ഉത്തര്‍ പ്രദേശ്, രാജ്സ്ഥാന്‍ എന്നീ സംസ്ഥാനങ്ങളിലും കനത്ത മൂടല്‍മഞ്ഞ് ജനജീവിതത്തെ ബാധിച്ചിട്ടുണ്ട്. 500 മീറ്റര്‍ ദൂരത്തോളം വരെ കാഴ്ച മങ്ങിയ രീതിയിലാണ് മഞ്ഞ് രൂപപ്പെടുന്നത്. രണ്ട് ദിവസങ്ങള്‍ക്ക് മുമ്പ് പഞ്ചാബിലെ രാജ്പുരയിലും വാഹനങ്ങള്‍ കൂട്ടിയിടിച്ചിരുന്നു. ഏകദേശം 20 വാഹനങ്ങളാണ് അന്ന് അപകടത്തില്‍പ്പെട്ടത്. ഇതോടെ ദേശീയപാത 44ല്‍ ഒരു മണിക്കൂര്‍ ഗതാഗത തടസവും നേരിട്ടു.

കനത്ത മൂടല്‍മഞ്ഞിനെ തുടര്‍ന്ന് ഡല്‍ഹിയില്‍ വാഹനാപകടത്തില്‍ നാല് പേര്‍ മരിച്ചു. രണ്ട് പേര്‍ക്ക് പരിക്കേറ്റു. പവര്‍ലിഫ്റ്റിങ് താരങ്ങളാണ് മരിച്ചത്. അലിപൂരിലെ സിംഗു അതിര്‍ത്തിയില്‍ വെച്ചാണ് അപകടം നടന്നത്. പരിക്കേറ്റവരില്‍ പവര്‍ ലിഫ്റ്റിങ് ലോക ചാമ്പ്യന്‍ സാക്ഷം യാദവും ഉണ്ടെന്നാണ് വിവരം.

പുലര്‍ച്ചെ 4 മണിയോടെയായിരുന്നു അപകടം. പാനിത്തില്‍ നിന്ന് അത്‌ലറ്റിക് മീറ്റ് കഴിഞ്ഞ് സ്വിഫ്റ്റ് ഡിസയര്‍ കാറില്‍ മടങ്ങുകയായിരുന്നു സംഘം. മറ്റൊരു കാറിനെ മറികടക്കാന്‍ ശ്രമിക്കുന്നതിനിടെ നിയന്ത്രണം വിട്ടാണ് അപകടം സംഭവിച്ചതെന്ന് പൊലീസ് പറഞ്ഞു. ഹരീഷ്, ടിങ്കു, സൂരജ് എന്നിവരാണ് മരിച്ചത്. നാലാമത്തെയാളെ തിരിച്ചറിഞ്ഞിട്ടില്ല. പരിക്കേറ്റ ആറ് പേരെ സമീപത്തുള്ള ആശുപത്രിയില്‍ പ്രവേശിപ്പിച്ചു.
ദിവസങ്ങളായി കനത്ത മൂടല്‍മഞ്ഞാണ് ഡല്‍ഹിയില്‍ അനുഭവപ്പെടുന്നത്. ഇതേ തുടര്‍ന്ന് ഡല്‍ഹിയിലെ ട്രെയിന്‍ വ്യോമഗതാഗതം താറുമാറായിരുന്നു. മൂടല്‍മഞ്ഞ് മൂലം ഞായറാഴ്ച 28 ട്രെയിനുകള്‍ റദ്ദാക്കിയിട്ടുണ്ട്. 38 ട്രെയിനുകള്‍ വൈകിയോടുകയാണ്. വ്യോമഗതാഗതത്തെയും മൂടല്‍മഞ്ഞ് ബാധിച്ചിട്ടുണ്ട്.