ന്യൂഡല്‍ഹി: കഴിഞ്ഞ വര്‍ഷം റഷ്യയില്‍ നടന്ന ലോകകപ്പ് ഫുട്‌ബോളില്‍ ഫൈനലിസ്റ്റുകളായ ക്രൊയേഷ്യയുമായി ഇന്ത്യ സൗഹൃദ മത്സരം കളിച്ചേക്കുമെന്ന് സൂചന. അഖിലേന്ത്യാ ഫുട്‌ബോള്‍ ഫെഡറേഷനും, ക്രൊയേഷ്യന്‍ ഫുട്‌ബോള്‍ ഫെഡറേഷനും തമ്മില്‍ ഇതുസംബന്ധിച്ച പ്രാഥമിക ചര്‍ച്ചകള്‍ നടത്തി.

അടുത്ത വര്‍ഷം മാര്‍ച്ചില്‍ മത്സരം നടത്താനാണ് ആലോചന. ക്രൊയേഷ്യന്‍ ഫെഡറേഷന്‍ അധ്യക്ഷനും ഇതിഹാസ താരവുമായ ഡേവര്‍ സൂക്കറിന്റെ നേതൃത്വത്തിലുള്ള സംഘം നവംബര്‍ 27ന് ഇന്ത്യ സന്ദര്‍ശിക്കുമെന്നും അഖിലേന്ത്യാ ഫുട്‌ബോള്‍ ഫെഡറേഷന്‍ ജനറല്‍ സെക്രട്ടറി കുശാല്‍ ദാസ് അറിയിച്ചു.

യൂത്ത് ഡെവലപ്‌മെന്റ് പദ്ധതികളെക്കുറിച്ചുള്ള പ്രാഥമിക ചര്‍ച്ചകള്‍ക്കായി കുശാല്‍ ദാസ് ക്രൊയേഷ്യന്‍ തലസ്ഥാനമായ സാഗ്രെബ് സന്ദര്‍ശിച്ചിരുന്നു. സൗഹൃദ മത്സരവും ചര്‍ച്ചയില്‍ വിഷയമായതായി ദാസ് വ്യക്തമാക്കി. എന്നാല്‍ സൂക്കറിന്റെ സന്ദര്‍ശശേഷം നവംബറില്‍ മാത്രമെ ഇക്കാര്യത്തില്‍ കൂടുതല്‍ വ്യക്തത വരുള്ളുവെന്നും ദാസ് പറഞ്ഞു.

മാര്‍ച്ച് 23നും 31നും ഇടയ്ക്ക് ക്രൊയേഷ്യയുമായി സൗഹൃദ മത്സരം കളിക്കാനാണ് ഇന്ത്യയുടെ ദേശീയ ടീം പരിശീലകനും ക്രൊയേഷ്യന്‍ താരവുമായിരുന്ന ഇഗോര്‍ സ്റ്റിമാച്ച് ശ്രമിക്കുന്നത്. മാര്‍ച്ച് 26ന് ഇന്ത്യക്ക് ഖത്തറുമായി ലോകകപ്പ് യോഗ്യതാ മത്സരം കളിക്കേണ്ടതുണ്ട്. നിലവില്‍ ലോക റാങ്കിംഗില്‍ ക്രൊയേഷ്യ എട്ടാം സ്ഥാനത്തും ഇന്ത്യ 104ാം സ്ഥാനത്തുമാണ്.

മുപ്പതിനായിരത്തോളം ഖത്തറികള്‍… അവര്‍ക്കിടയില്‍ പതിനായിരത്തോളം ഇന്ത്യക്കാര്‍…. ജാസിം ബിന്‍ ഹമദ് സ്‌റ്റേഡിയത്തിലെ കാതടിപ്പിക്കുന്ന ആരവങ്ങള്‍ക്കിടയിലും ഇന്ത്യന്‍ നായകന്‍ ഗുര്‍പ്രീത് സിംഗ് സന്ധു ജ്വലിച്ചു നിന്നു… ആദ്യ പകുതിയില്‍ എട്ട്് കോര്‍ണറുകള്‍ നേടി ഖത്തര്‍ പക്ഷേ പന്തിനെ വലയിലേക്ക് അടുപ്പിച്ചില്ല സന്ധു. മൈതാനത്ത് സഹല്‍ അബ്ദുല്‍ സമദ് എന്ന കണ്ണുരുകാരന്‍ ചടുലതയുടെ പ്രതീകമായി കത്തിയപ്പോള്‍ ആദ്യ പകുതിയില്‍ ഗോളില്ല. രണ്ടാം പകുതിയിലും ഇന്ത്യ പ്രതിരോധ മികവില്‍ പൊരുതി നിന്നപ്പോള്‍ ഖത്തറിനെതിരായ ലോകകപ്പ് യോഗ്യതാ പോരാട്ടത്തില്‍ ഇന്ത്യക്ക് വിജയത്തിന് തുല്യമായ സമനില
കളം നിറഞ്ഞത് ഖത്തറായിരുന്നു. ഇന്ത്യന്‍ ഡിഫന്‍സിനെ അവര്‍ പലവട്ടം കീഴടക്കി. പക്ഷേ ഗോളിലേക്കുള്ള യാത്ര എളുപ്പമായില്ല. പരുക്ക് കാരണം നായകന്‍ സുനില്‍ ഛേത്രി ടീമിലുണ്ടായിരുന്നില്ല. അദ്ദേഹത്തിന് പകരം നായകന്റെ ആം ബാന്‍ഡ് ഗുര്‍പ്രീതിനായിരുന്നു. ഒമാനെതിരായ ആദ്യ മല്‍സരത്തില്‍ 82 മിനുട്ട് വരെ മുന്നിട്ടു നിന്ന ഇന്ത്യ അവസാനത്തില്‍ രണ്ട് ഗോള്‍ വഴങ്ങി പരാജയപ്പെട്ട ചിത്രം എല്ലാവരുടെയും മുന്നിലുണ്ടായിരുന്നു. മല്‍സരത്തിന്റെ തുടക്കത്തില്‍ തന്നെ ഇന്ത്യന്‍ ഡിഫന്‍ഡര്‍ സന്ദേശ് ജിങ്കാന്‍ മഞ്ഞക്കാര്‍ഡ് കണ്ടതിനാല്‍ ജാഗരൂകമായിരുന്നു കാര്യങ്ങള്‍. പരുക്കില്‍ ആഷിഖ് കുരുണിയനും ടീമിലുണ്ടായിരുന്നില്ല. ഒമാനെതിരെ ഗംഭീര പ്രകടനം നടത്തിയിരുന്നു മലപ്പുറത്തിന്റെ താരം. രണ്ടാം പകുതിയില്‍ തളരുന്ന പതിവ് ഇന്ത്യന്‍ കാഴ്ച്ചകള്‍ക്ക്് പകരം ഇന്നലെ അവസാനം വരെ ഇന്ത്യ പൊരുതി നിന്നു. എണ്‍പത്തിനാലാം മിനുട്ടില്‍ ഇന്ത്യ ഗോള്‍ വഴങ്ങിയെന്ന് തോന്നി. പക്ഷേ ഗുര്‍പ്രീതിന്റെ മികവും ഗോള്‍ പോസ്റ്റും ടീമിനെ തുണച്ചു. ലോകകപ്പ് യോഗ്യതാ റൗണ്ടിലെ ആദ്യ മല്‍സരത്തില്‍ അഫ്ഗാനെ തകര്‍ത്തുവിട്ടവരായിരുന്നു ഖത്തര്‍. പക്ഷേ ഇന്ത്യന്‍ ഗോള്‍ക്കീപ്പറും ഡിഫന്‍സും മധ്യനിരയുമെല്ലാം വീരോചിതം പൊരുതി നിന്നു. മല്‍സരം ആസ്വദിക്കാന്‍ ഖത്തര്‍ ക്ലബില്‍ കളിക്കുന്ന സ്പാനിഷ് രാജ്യാന്തര സാവിയുമുണ്ടായിരുന്നു. മല്‍സര ടിക്കറ്റിന്റെ എട്ട് ശതമാനം മാത്രമായിരുന്നു ഇന്ത്യന്‍ ആരാധകര്‍ക്ക്് നല്‍കിയിരുന്നത്. എന്നിട്ടും ഇന്ത്യ പൊരുതി നിന്നു.

ക്വാലാലംപൂര്‍: ഖത്തറില്‍ നടക്കുന്ന 2022 ലോകകപ്പിനുള്ള യോഗ്യത റൗണ്ട് മത്സരങ്ങള്‍ക്കുള്ള ഗ്രൂപ്പുകള്‍ നിശ്ചയിച്ചു. മലേഷ്യയില്‍ നടന്ന നറുക്കെടുപ്പില്‍ ആതിഥേയരായ ഖത്തര്‍ ഉള്‍പ്പെടുന്ന ഗ്രൂപ്പ് ഇയിലാണ് ഇന്ത്യയുടെ സ്ഥാനം. ഖത്തറിനോടൊപ്പം ഒമാന്‍, അഫ്ഗാനിസ്ഥാന്‍, അയല്‍ രാജ്യക്കാരായ ബംഗ്ലാദേശ് എന്നിവരാണ് ഗ്രൂപ്പിലുള്ളത്. ഖത്തര്‍ ലോകകപ്പിനോടൊപ്പം 2023 ല്‍ നടക്കുന്ന ഏഷ്യ കപ്പിനുള്ള യോഗ്യതയും ഈ ഗ്രൂപ്പ് മത്സരങ്ങള്‍ പരിഗണിച്ചായിരിക്കും. സെപ്റ്റംബറിലാണ് യോഗ്യതാ മത്സരങ്ങള്‍ ആരംഭിക്കുന്നത്. ഇന്ത്യക്ക് ആദ്യം ഹോം മത്സരമാണ്. സെപ്റ്റംബര്‍ അഞ്ചിന് ഒമാനെതിരെ ഇന്ത്യ ആദ്യ മത്സരത്തിനിറങ്ങും.
40 ടീമുകള്‍ പങ്കെടുക്കുന്ന മത്സരത്തില്‍ അഞ്ച് ടീമുകള്‍ ഉള്‍പ്പെടുന്ന എട്ട് ഗ്രൂപ്പുകളാക്കിയാണ് തിരിച്ചിരിക്കുന്നത്. പലസ്തീന്‍, ബഹ്‌റൈന്‍, തായ്‌ലന്‍ഡ്, കൊറിയ, താജിക്കിസ്ഥാന്‍, ചൈനീസ് തായ്‌പേയ്, ഫിലിപ്പീന്‍സ് എന്നിവക്കൊപ്പം പോട്ട് 3 ലായിരുന്നു ഇന്ത്യയെ ഉള്‍പ്പെടുത്തിയിരുന്നത്.
ആ ഏട്ട് ഗ്രൂപ്പില്‍ ഗ്രൂപ്പ് വിജയികള്‍ക്കൊപ്പം നാല് മികച്ച റണ്ണേഴ്‌സും അവസാന റൗണ്ടിലേക്ക് യോഗ്യത നേടും. ഗ്രൂപ്പ് ഇയില്‍ രണ്ടാം സ്ഥാനത്തെത്തിയാല്‍ 2022 ലെ ലോകകപ്പിന് ആതിഥേയത്വം വഹിക്കുന്ന ഖത്തറിന് യോഗ്യത ഉറപ്പായത് കൊണ്ട് ഇന്ത്യന്‍ ടീമിന് അവസാന റൗണ്ടിലേക്ക് യോഗ്യത നേടാന്‍ സാധിക്കും.
അയല്‍ രാജ്യക്കാരായ നോര്‍ത്ത് കൊറിയയും സൗത്ത് കൊറിയയും ഒരു ഗ്രൂപ്പിലാണ് ഉള്‍പ്പെട്ടിരിക്കുന്നത്. ഗ്രൂപ്പ് എച്ചിലാണ് ഇവരുടെ സ്ഥാനം.
ഗ്രൂപ്പ് എയില്‍ ചൈന,സിറിയ,ഫിലിപ്പൈന്‍സ് ,മാലിദ്വീപ് ഗുവാം എന്നിവരാണുള്ളത്. ബിയിലാണ് ഓസ്‌ട്രേലിയ. ഓസ്‌ട്രേലിയക്കൊപ്പം ജോര്‍ദാന്‍, ചൈനീസ് തായ്‌പ്യെ, കുവൈത്ത് നേപ്പാള്‍ എന്നിവര്‍ അണിനിരക്കും. ഇറാഖും ഇറാനും സി ഗ്രൂപ്പിലാണ് . കൂടെ ബഹ്‌റൈന്‍, ഹോങ്കോങ്, കംബോഡിയ എന്നിവരുമുണ്ട്. സഊദി അടങ്ങുന്ന ഗ്രൂപ്പ് ബിയില്‍ ഉസ്ബക്കിസ്ഥാന്‍, ഫലസ്തീന്‍,യെമന്‍, സിംഗപ്പൂര്‍ എന്നിവര്‍ ഏറ്റുമുട്ടും. കഴിഞ്ഞ ഏഷ്യാ കപ്പിലെ റണ്ണറപ്പ് ജപ്പാന്‍ എഫ് ഗ്രൂപ്പിലാണ്. കിര്‍ഗിസ്ഥാന്‍, മ്യാന്‍മര്‍, മംഗോളിയ എന്നിവരാണ് ജപ്പാന്റെ എതിരാളികള്‍ യുഎഇ, വിയറ്റ്‌നാം, തായ്‌ലാന്‍ഡ്, മലേഷ്യ, ഇന്തോനേഷ്യ എന്നിവര്‍ ഗ്രൂപ്പ് ജിയിലാണ്.

എട്ടാം മിനുട്ടില്‍ ഗോള്‍ വേട്ടക്ക് ഉത്തര കൊറിയ തുടക്കം കുറിച്ചത്. ക്യാപ്റ്റനും ഉത്തര കൊറിയയുടെ 11ാം നമ്പര്‍ താരവുമായ ജോങ് ഗ്വാനാണ് ആദ്യഗോള്‍ സ്വന്തമാക്കിയത്. മനോഹരമായി ഒരു ഫ്രീകിക്ക് വലയിലെത്തിച്ചായിരുന്നു തുടക്കം. പിന്നാലെ 16ാം മിനുട്ടില്‍ മനോഹരമായൊരു മുന്നേറ്റത്തിലൂടെ 13ാം നമ്പര്‍ താരം സിം ജിന്‍ രണ്ടാം ഗോള്‍ നേടി. 29ാം മിനുട്ടിലായിരുന്നു ക്യാപ്റ്റന്റെ വക മൂന്നാം ഗോള്‍. ആദ്യപകുതി അവസാനിക്കുമ്പോള്‍ ഉത്തര കൊറിയ 3-0 ഇന്ത്യ.

രണ്ടാം പകുതി ആരംഭിച്ച് അഞ്ച് മിനുട്ട് കഴിഞ്ഞപ്പോള്‍ തന്നെ ഇന്ത്യ തിരിച്ചടിച്ചു. പകരക്കാരന്‍ ലാലിയന്‍സുവാല ചാങ്‌തെയുടെ വകയായിരുന്നു ഗോള്‍ സുനില്‍ ഛേത്രി നല്‍കിയ ഒന്നാം തരം പാസ് ചാങ്‌തെ കൃത്യമായി വലയിലെത്തിച്ചു. എന്നാല്‍ പിന്നാലെ ഉത്തര കൊറിയ വീണ്ടും ഇന്ത്യന്‍ വല ചലിപ്പിച്ചു. റീചോളായിരുന്നു ഗോള്‍ സ്‌കോറര്‍. പകരത്തിന് പകരമെന്നോണം 71ാം മിനുട്ടില്‍ ഇന്ത്യന്‍ നായകന്‍ സുനില്‍ ഛേത്രി ഒരു ഗോള്‍ കൊറിയന്‍ വലയിലെത്തിച്ചു. കളിയുടെ അധികസമയത്ത് ഒരു ഗോള്‍ കൂടി നേടി ഉത്തര കൊറിയ ഇന്ത്യന്‍ പതനം പൂര്‍ണമാക്കുകയായിരുന്നു. 16ാം തീയതി നടക്കുന്ന മൂന്നാം മത്സരത്തില്‍ സിറിയയാണ് ഇന്ത്യയുടെ എതിരാളികള്‍.