ഡബ്ലിന്‍: ലൈംഗികാരോപണം മൂടിവെച്ചതിന് താന്‍ രാജിവെക്കണമെന്ന ആവശ്യത്തോട് പ്രതികരിക്കാന്‍ ഫ്രാന്‍സിസ് മാര്‍പാപ്പ വിസമ്മതിച്ചു. അമേരിക്കയിലെ വത്തിക്കാന്‍ അംബാസഡറായിരുന്ന മുന്‍ ആര്‍ച്ച് ബിഷപ്പ് കാര്‍ലോ മരിയ വിഗാനോ ആണ് മാര്‍പാപ്പക്കെതിരെ ആരോപണമുന്നയിച്ചിരിക്കുന്നത്.
2013ല്‍ വാഷിങ്ടണ്‍ അതിരൂപത ആര്‍ച്ച് ബിഷപ്പായിരുന്ന കര്‍ദ്ദിനാള്‍ തിയോഡോര്‍ മക് കാരിനെതിരെയുള്ള ലൈംഗിക പീഡന ആരോപണം മാര്‍പാപ്പയെ അറിയിച്ചെങ്കിലും അദ്ദേഹം നടപടിയൊന്നും സ്വീകരിച്ചില്ലെന്ന് 11 പേജുള്ള കത്തില്‍ വിഗാനോ പറയുന്നു. മക്കാരിയുടെ ബാലലൈംഗിക പീഡനങ്ങളെക്കുറിച്ച് താന്‍ പോപ്പിന് വിവരം നല്‍കിയിരുന്നു. കര്‍ദിനാള്‍ കുറ്റക്കാരനാണെന്നതിന് വ്യക്തമായ തെളിവുകളുണ്ടായിട്ടും അദ്ദേഹം അക്കാര്യം മറച്ചുവെച്ചു. കര്‍ദിനാള്‍മാര്‍ക്കും ബിഷപ്പുമാര്‍ക്കും മാതൃകയാകേണ്ട പോപ്പ് ഫ്രാന്‍സിസ് ബാലപീഡകരെ സംരക്ഷിക്കുന്ന നയമാണ് സ്വീകരിച്ചതെന്നും അദ്ദേഹം രാജിവെക്കണമെന്നും വിഗാനോ ആവശ്യപ്പെട്ടു. അയര്‍ലന്‍ഡ് സന്ദര്‍ശനത്തിനിടെ പുരോഹിതന്മാരുടെ ലൈംഗികപീഡനങ്ങള്‍ക്കെതിരെ മാര്‍പാപ്പ പരസ്യ പ്രസ്താവന നടത്തിയ പശ്ചാത്തലത്തില്‍ കഴിഞ്ഞ ദിവസമാണ് വിഗാനോ കത്ത് പരസ്യമാക്കിയത്.

പോപ്പ് ഫ്രാന്‍സിസിന് ഇന്ത്യയിലെ ആര്‍.എസ്.എസ് അനുകൂല സംഘടനയുടെ കത്ത്.മതവിവേചനങ്ങള്‍ക്ക് മാപ്പു പറയണമെന്നാവശ്യപ്പെട്ടാണ് കത്തയച്ചത്. ക്രിസ്ത്യന്‍ മിഷനറിമാര്‍ മതവിവേചനം കാണിക്കുന്നെന്നും സ്ത്രീകളെ ബലാത്സംഗം ചെയ്യുന്നെന്നും ആരോപിച്ചാണ് ആര്‍.എസ്.എസിന്റെ അനുകൂല നിയമ സംഘടനയുടെ കത്ത്. ഇന്ത്യയിലെ വടക്കു കിഴക്കന്‍ സംസ്ഥാനങ്ങളില്‍ ക്രിസ്ത്യന്‍ മിഷനറിമാര്‍ നടത്തി വരുന്ന പ്രവര്‍ത്തനങ്ങളെ സൂചിപ്പിച്ചുകൊണ്ടാണ് കത്ത്. പോപ്പ് ഫ്രാന്‍സിസ് ഇന്ത്യയിലെ അക്രമങ്ങളില്‍ അപലപിക്കണമെന്നാണ് മേഘാലയയിലെ ആര്‍.എസ്.എസ് പ്രചാരകായ വിനയ് ജോഷിയുടെ കീഴിലുള്ള ലീഗല്‍ റൈറ്റ്‌സ് ഒപ്‌സര്‍വേറ്ററിയുടെ ആവശ്യം. ഇല്ലെങ്കില്‍ ഇന്ത്യ നടപടിയെടുക്കുമെന്ന് കത്തില്‍ ഭീഷണിപ്പെടുത്തിയിരിക്കുന്നത്. കത്തോലിക്കാ സഭയുടെ ഇന്ത്യന്‍ നേതൃത്വത്തിനെതിരെ നിയമനടപടിയെടുക്കുമെന്നാണ് കത്തില്‍ ഭീഷണിപ്പെടുത്തിയിരിക്കുന്നത്.

മേഘാലയയിലും സമീപ പ്രദേശങ്ങളിലും കത്തോലിക്കാ വിഭാഗത്തില്‍പ്പെട്ടവര്‍ നടത്തുന്ന ബലാത്സംഗങ്ങളും ലൈംഗിക പീഡനങ്ങളും ശ്രദ്ധയില്‍പ്പെടുത്തി പോപ്പിന് മറ്റൊരു കത്തയക്കുമെന്ന് ആര്‍.എസ്.എസ് നേതാവ് ജോഷി പറഞ്ഞതായി മെയില്‍ ടുഡേ റിപ്പോര്‍ട്ടു ചെയ്യുന്നു.