കഴിഞ്ഞ ദിവസം വിമാനത്താവള ഡയറക്ടർ നൽകിയ കത്തിന്റെ അടിസ്ഥാനത്തിലാണ് ഇപ്പോൾ നടപടി ആരംഭിച്ചത്. നിപ്പ ഫ്രീ സർട്ടിഫിക്കറ്റ് നൽകി പഴം, പച്ചക്കറി കയറ്റുമതിയുടെ തടസ്സം നീക്കാനുള്ള നടപടിക്രമങ്ങൾ നടന്നു വരുന്നതായി ആരോഗ്യ പ്രിൻസിപ്പൽ സെക്രട്ടറി എം.പി.എം.മുഹമ്മദ് ഹനീഷ് പറഞ്ഞു.

നിപ്പയുടെ പേരിൽ കോഴിക്കോട് വിമാനത്താവളത്തിൽനിന്നുള്ള പഴം, പച്ചക്കറി കയറ്റുമതിയുടെ വിലക്ക് സംബന്ധിച്ച പ്രശ്നത്തിൽ ഇടപെടുമെന്ന് മന്ത്രി വീണാ ജോർജ് അറിയിച്ചതായി എയർപോർട്ട് ഉപദേശക സമിതി ചെയർമാൻ എം.പി.അബ്ദുസ്സമദ് സമദാനി എംപി അറിയിച്ചു. നിപ്പയുടെ സാഹചര്യത്തിൽ യുഎഇയിലെ വിമാനത്താവളങ്ങളിലേക്കു പഴം, പച്ചക്കറി കയറ്റുമതി ചെയ്യാൻ ആരോഗ്യവകുപ്പിന്റെ പ്രത്യേക അനുമതി വേണം.

പ്രതിദിനം സംസ്ഥാനത്തെ പഴവര്‍ഗ വിപണിയില്‍ രണ്ടായിരം കോടിയുടെ വ്യാപാരമാണ് നടക്കുന്നത്. എന്നാല്‍ നിപ്പ റിപ്പോര്‍ട്ട് ചെയ്തതിനു പിന്നാലെ ഇത് ആയിരം കോടി രൂപയായി കുറഞ്ഞു. ഇതുപ്രകാരം പത്തു ദിവസത്തില്‍ 10,000 കോടിയുടെ നഷ്ടം രേഖപ്പെടുത്തുന്നു.

കഴിഞ്ഞ പത്തു ദിവസത്തിനിടെ കോഴിക്കോട്, മലപ്പുറം ജില്ലകളില്‍ 25 ശതമാനം കച്ചവടം പോസും നടന്നിട്ടില്ല. ഇതേത്തുടര്‍ന്ന് കേരളത്തിലേക്കെത്തിക്കുന്ന പഴവര്‍ഗങ്ങളുടെ ലോഡ് 200ല്‍ നിന്ന് 100ആയി വെട്ടിചുരുക്കി.

പൊതുവെ റമസാന്‍ വിപണിയില്‍ 4000 കോടിയുടെ കച്ചവടം പ്രതിദിനം നടക്കാറുണ്ടായിരുന്നു. എന്നാല്‍ ഇത്തവണ അത് ആയിരത്തില്‍ താഴേക്ക് കുറഞ്ഞത് വ്യാപാരികളെ ആശങ്കപ്പെടുത്തുന്നു.