പാരിസില്‍ 8000ത്തോളം സൈനികരെ നിയോഗിച്ചിട്ടുണ്ട്. ഈഫല്‍ ടവറും മറ്റു പ്രധാന വിനോദസഞ്ചാര കേന്ദ്രങ്ങളും അടച്ചു. ദിവസങ്ങള്‍ക്കുമുമ്പ് ചാംപ്‌സ് എലിസീസില്‍ അക്രമസാക്തരായ പ്രതിഷേധക്കാര്‍ കാറുകള്‍ക്ക് തീവെക്കുകയും കടകള്‍ കൊള്ളയടിക്കുകയും ചെയ്തിരുന്നു. കലാപകാരികള്‍ പ്രതിഷേധങ്ങളെ ഹൈജാക്ക് ചെയ്തിരിക്കുകയാണെന്നും കൂടുതല്‍ അപകടകാരികളായി മാറിയിരിക്കുകയാണെന്നും മക്രോണ്‍ ആരോപിച്ചു. പ്രക്ഷോഭകരുടെ ആവശ്യം കണക്കിലെടുത്ത് വര്‍ധിപ്പിച്ച ഇന്ധന നികുതി സര്‍ക്കാര്‍ കുറച്ചിട്ടുണ്ടെങ്കിലും മക്രോണിന്റെ രാജി ഉള്‍പ്പെടെയുള്ള ആവശ്യങ്ങള്‍ ഉന്നയിച്ചുകൊണ്ടാണ് സമരക്കാര്‍ വീണ്ടും രംഗത്തിറങ്ങിയിരിക്കുന്നത്.

വാഹനങ്ങള്‍ക്ക് കാര്‍ബണ്‍ നികുതി ഏര്‍പ്പെടുത്താനുള്ള നീക്കവും ഉപേക്ഷിച്ചതായി പ്രധാനമന്ത്രി എഡ്വേര്‍ഡ് ഫിലിപ്പ് പറഞ്ഞു.

വില വര്‍ധനക്ക് കാരണമായ ഇന്ധന നികുതിക്കെതിരെ നടന്ന പ്രതിഷേധ പരിപാടികളില്‍ മൂന്നുപേര്‍ കൊല്ലപ്പെടുകയും നിരവധി പേര്‍ക്ക് പരിക്കേല്‍ക്കുകയും ചെയ്തിരുന്നു. അക്രമങ്ങള്‍ നിയന്ത്രിക്കുന്നതിന്റെ ഭാഗമായി അടിയന്തരാവസ്ഥയെക്കുറിച്ചു പോലും ഫ്രാന്‍സ് ആലോചിച്ചു.

രാജ്യത്തിന്റെ ക്രമസമാധാനം തകര്‍ക്കുന്ന അവസ്ഥയിലേക്ക് പ്രതിഷേധങ്ങള്‍ മാറിയതോടെയാണ് അധിക നികുതി പിന്‍വലിക്കാന്‍ സര്‍ക്കാര്‍ സമ്മതിച്ചത്. പ്രസിഡന്റ് ഇമ്മാനുവല്‍ മക്രോണിന്റെ സാമ്പത്തിക പരിഷ്‌കരണ പദ്ധതികള്‍ക്ക് ഇന്ധന വില വര്‍ധന മങ്ങലേല്‍പ്പിച്ചു. ഭരണകൂടത്തിന്റ പരിഷ്‌കരണ നയങ്ങളോട് എതിര്‍പ്പുള്ളവരാണ് പ്രതിഷേധങ്ങള്‍ക്കു പിന്നിലെന്ന് മക്രോണ്‍ ആരോപിച്ചിരുന്നു.