കോഴിക്കോട്: കേരളത്തില്‍ പൊടുന്നനെ തരംഗമായി മാറിയ ഫുള്‍ജാര്‍ സോഡക്ക് പൂട്ടിടാനുള്ള ഒരുക്കത്തിലാണ് ഭക്ഷ്യ സുരക്ഷാ വകുപ്പ്. പാനീയത്തിനെതിരെ വിവിധ ഇടങ്ങളില്‍ നിന്ന് വ്യാപകമായ പരാതി ഉയരുന്ന സാഹചര്യത്തിലാണ് ഭക്ഷ്യസുരക്ഷാ വകുപ്പ് പരിശോധന കര്‍ശനമാക്കുന്നത്.

പച്ചമുളക്, ഇഞ്ചി, പൊതിന എന്നിവ അരച്ച മിശ്രിതവും ഉപ്പും പഞ്ചസാരയും കസ്‌കസും ലായനിയാക്കി ചേര്‍ത്ത് ചെറയ ഗ്ലാസില്‍ ഒരുക്കിയ ശേഷം സോഡ നിറച്ച വലിയ ഗ്ലാസിലേക്ക് ഇടുന്നതാണ് ഫുള്‍ജാര്‍ സോഡ.

ഇത്തരം പാനീയങ്ങള്‍ വില്‍ക്കുന്ന കേന്ദ്രങ്ങളില്‍ വലിയ തോതിലുള്ള തിരക്കാണ് അനുഭവപ്പെടുന്നത്. എന്നാല്‍ യാതൊരു വിധത്തിലുള്ള സുരക്ഷാ മാനദണ്ഡങ്ങളും പാലിക്കാതെയാണ് ഫുള്‍ജാര്‍ സോഡ വില്‍പന നടത്തുന്നത്. ഇതേ തുടര്‍ന്ന് നിരവധി പരാതികള്‍ ലഭിച്ച സാഹചര്യത്തിലാണ് ഭക്ഷ്യ സുരക്ഷാ വകുപ്പ് പരിശോധന കര്‍ശനമാക്കാന്‍ തീരുമാനിച്ചത്.

ഫുള്‍ജാര്‍ സോഡ തയ്യാറാക്കുന്ന ചെറുതും വലുതുമായ ഗ്ലാസുകള്‍ കഴുകാതെയോ അല്ലെങ്കില്‍ വൃത്തിഹീനമായ വെള്ളത്തിലിട്ട് കഴുകുകയോ ആണ് ചെയ്യുന്നത്. ഇത് ഭക്ഷ്യ വിഷബാധയടക്കം നിരവധി രോഗങ്ങള്‍ക്ക് കാരണമായേക്കാം എന്ന് ഭക്ഷ്യ സുരക്ഷാ വകുപ്പ് ഉദ്യോഗസ്ഥര്‍ പറയുന്നു.

അതേസമയം വൃത്തിയും വെടിപ്പുമുള്ള കടകളില്‍ നിന്നു മാത്രമേ ഉപഭോക്താക്കള്‍ ഫുള്‍ജാര്‍ സോഡ വാങ്ങാവു എന്നും ഭക്ഷ്യ സുരക്ഷാ വകുപ്പ് ഉദ്യോഗസ്ഥര്‍ നിര്‍ദേശം നല്‍കുന്നു. വൃത്തിഹീനമായ സാഹചര്യത്തില്‍ കാണുന്ന കടകളെ പറ്റി അറിയിപ്പ് നല്‍കാനും അവര്‍ നിര്‍ദേശിക്കുന്നുണ്ട്.

ബീച്ചിലെ കച്ചവട കേന്ദ്രത്തില്‍ നിന്ന് ഫുള്‍ജാര്‍ സോഡ കുടിക്കാനെത്തിയ യുവാവ് പ്രദേശത്തെ വൃത്തിഹീനമായ സാഹചര്യത്തെ മുന്‍നിര്‍ത്തി ഫെയ്‌സ്ബുക്കില്‍ പോസ്റ്റ് ചെയ്യുകയായിരുന്നു. ഇക്കാര്യം ശ്രദ്ധയില്‍ പെട്ട കോര്‍പറേഷന്‍ ഹെല്‍ത്ത് ഓഫീസര്‍ ആര്‍.എസ് ഗോപകുമാര്‍ നൈറ്റ് പട്രോളിങ് സംഘത്തെ വിവരമറിയിക്കുകയായിരുന്നു. തുടര്‍ന്ന് ആരോഗ്യ വിഭാഗമെത്തി പരിശോധിച്ച ശേഷം സോഡ ഉണ്ടാക്കാന്‍ ആവശ്യമായ സാമഗ്രികള്‍ പിടിച്ചെടുക്കുകയായിരുന്നു.

നഗരത്തിലെ എല്ലാ ഫുള്‍ജാര്‍ സോഡ വിപണന കേന്ദ്രവും പരിശോധിക്കുമെന്നും വിഷയത്തില്‍ കൂടുതല്‍ ജാഗ്രത പുലര്‍ത്താനും ആരോഗ്യ വകുപ്പ് അറിയിച്ചു.
ഹെല്‍ത്ത് ഇന്‍സ്‌പെക്ടര്‍ കെ സി മുരളീധരന്‍, ജൂനിയര്‍ ഹെല്‍ത്ത് ഇന്‍സ്‌പെക്ടര്‍മാരായ സുനില്‍കുമാര്‍, ഇ പി ശൈലേഷ് തുടങ്ങിയവര്‍ അടങ്ങിയ സംഘമാണ് റെയ്ഡ് നടത്തിയത്.

കുറഞ്ഞ ദിവസങ്ങള്‍ക്കകം തന്നെ കേരളത്തില്‍ തരംഗമായ പാനീയമാണ് ഫുള്‍ജാര്‍ സോഡ. കൊച്ചിയിലും കോഴിക്കോടുമെല്ലാം ഫുള്‍ജാര്‍ സോഡ തേടി വരുന്നവരുടെ തിരക്കാണിപ്പോള്‍.