g7 summit – Chandrika Daily

സിഒപി 27 ഉച്ചകോടിയുടെ മറവില്‍ ചാരപ്രവര്‍ത്തനം

Test User — Sun, 13 Nov 2022 09:43:11 +0000

കെയ്‌റോ: 27-ാമത് യു.എന്‍ കാലാവസ്ഥാ ഉച്ചകോടി (സിഒപി27) ക്കെത്തിയ രാഷ്ട്രത്തലവന്മാരുടെയും ഉന്നത ഉദ്യോഗസ്ഥരുടെയും ഫോണുകള്‍ ഔദ്യോഗിക ആപ്പ് വഴി ഈജിപ്ഷ്യന്‍ ഭരണകൂടം ചോര്‍ത്തുന്നതായി പരാതി. രണ്ടാഴ്ചത്തെ ഉച്ചകോടിക്ക് 35,000 പേരാണ് ഈജിപ്തില്‍ എത്തിയിരിക്കുന്നത്. ഇവര്‍ക്കുവേണ്ടി ഈജിപ്ഷ്യന്‍ വാര്‍ത്താ വിനിമയ മന്ത്രാലയം വികസിപ്പിച്ച ആപ്പ് ലോകത്തിന്റെ വിവിധ ഭാഗങ്ങളില്‍നിന്ന് എത്തിയ ഭരണാധികാരികളും ഉദ്യോഗസ്ഥരും ഡൗണ്‍ലോഡ് ചെയ്തിട്ടുണ്ട്. ഉച്ചകോടിയുടെ സുഗമമായ നടത്തിപ്പിനെന്ന പേരിലുള്ള ആപ്പ് പ്രതിനിധികളെ രഹസ്യമായി നിരീക്ഷിക്കാനാണെന്ന് സൈബര്‍ സുരക്ഷാ മേഖലയില്‍ പ്രവര്‍ത്തിക്കുന്ന വിദഗ്ധര്‍ ചൂണ്ടിക്കാട്ടുന്നു.

ഫോണ്‍ സംഭാഷണങ്ങള്‍, വീഡിയോകള്‍, ഫോട്ടോകള്‍ എന്നിവ ചോര്‍ത്താനും ഉപയോക്താവിന്റെ നീക്കങ്ങള്‍ രഹസ്യമായി നിരീക്ഷിക്കാനും ഇതുവഴി സാധിക്കുമെന്ന് റിപ്പോര്‍ട്ട്. സ്ലീപ്പ് മോഡിലാണെങ്കില്‍ പോലും ഫോണിലൂടെ രഹസ്യ നിരീക്ഷണം സാധ്യമാകുമെന്നതാണ് ആപ്പിന്റെ പ്രത്യേകത. എന്നാല്‍ സൈബര്‍ സുരക്ഷ അപകടപ്പെടുത്തുന്ന യാതൊരു നീക്കവും രാജ്യത്തിനില്ലെന്നും അത്തരം പ്രചാരണങ്ങള്‍ തെറ്റാണെന്നും ഈജിപ്തിന്റെ കാലാവസ്ഥാ ഉച്ചകോടി അംബാസഡര്‍ അറിയിച്ചു.

സുഖവാസ കേന്ദ്രമായ ഷറം അല്‍ ഷെയ്ഖില്‍ ലോകനേതാക്കള്‍ കാലാവസ്ഥാ വ്യതിയാനത്തെക്കുറിച്ച് ചര്‍ച്ച നടത്തുമ്പോള്‍ ഈജിപ്ഷ്യന്‍ ഭരണകൂടത്തിന്റെ മനുഷ്യാവകാശ ധ്വംസനങ്ങള്‍ക്കെതിരെയും പ്രതിഷേധങ്ങള്‍ അലയടിക്കുകയാണ്. 2013ല്‍ ജനാധിപത്യ ഭരണകൂടത്തെ അട്ടിമറിച്ച് പ്രസിഡന്റ് അബ്ദുല്‍ ഫത്താഹ് അല്‍ സിസി അധികാരത്തിലെത്തിയ ശേഷം 60,000ത്തോളം രാഷ്ട്രീയ പ്രവര്‍ത്തകരെയാണ് ഈജിപ്ത് ജയിലിലടച്ചിരിക്കുന്നത്. ഉച്ചകോടിക്ക് മുന്നോടിയായി മാത്രം 1540 പേരെ ഭരണകൂടം അറസ്റ്റ് ചെയ്തതായി മനുഷ്യാവകാശ സംഘടനകള്‍ പറയുന്നു. ബ്രിട്ടീഷ് മനുഷ്യാവകാശ പ്രവര്‍ത്തകന്‍ അലാഅ അബ്ദുല്‍ ഫത്താഹിന്റെ അനിശ്ചിതകാല നിരാഹാര സമരവും രാജ്യത്തിപ്പോള്‍ സജീവ ചര്‍ച്ചയാണ്.

ചൈനക്കും റഷ്യക്കും വിര്‍ശനം ജി 7 ഉച്ചകോടിക്ക് സമാപനം

Test User — Fri, 07 May 2021 06:20:01 +0000

ലണ്ടന്‍: ചൈനക്കും റഷ്യക്കും രൂക്ഷ വിര്‍ശനമുന്നയിച്ചുകൊണ്ട് ഗ്രൂപ്പ് സെവന്‍ (ജി 7) ഉച്ചകോടിക്ക് സമാപനം. ചൈനയുടെ ഭാഗത്ത് നിന്നും കടുത്ത മനുഷ്യാവകാശ ലംഘനമുണ്ടാകുന്നുവെന്നും ഉക്രെയ്‌നെതിരെ റഷ്യ നടത്തുന്ന ആക്രമണത്തില്‍ ആശങ്ക പ്രകടിപ്പിച്ചുകൊണ്ടുമാണ് ഇരു രാജ്യങ്ങള്‍ക്കു നേരെ ജി 7 ഉച്ചകോടി വിമര്‍ശനമുന്നയിച്ചത്. തായ്‌വാനും ഉക്രെയിനും പിന്തുണയും യോഗത്തില്‍ പ്രഖ്യാപിക്കുകയുണ്ടായി. ഒപെക് എണ്ണ വില പോലുള്ള പ്രതിസന്ധികള്‍ ചര്‍ച്ച ചെയ്യുന്ന വേദിയായി 1975 ല്‍ സ്ഥാപിതമായ ജി 7 ഇത്തവണ ഏറ്റവും വലിയ ഭീഷണിയായി കാണുന്നത് ചൈന, റഷ്യ എന്നീ രാജ്യങ്ങളുടെ ഇടപെടലുകളും കോവിഡ് വ്യാപനത്തെയുമായിരുന്നു.
കോവിഡ് പശ്ചാത്തലത്തില്‍ കടുത്ത നിയന്ത്രണങ്ങളോടെയായിരുന്നു ലണ്ടനില്‍ ജി 7 വിദേശകാര്യ മന്ത്രിമാര്‍ യോഗം ചേര്‍ന്നത്. തുടര്‍ന്ന് പുറപ്പെടുവിച്ച പ്രസ്താനയിലാണ് റഷ്യയെയും ചൈനയെയും രൂക്ഷമായി ഭാഷയില്‍ വിമര്‍ശിച്ചത്. റഷ്യ ജനാധിപത്യത്തെ ദുര്‍ബലപ്പെടുത്താന്‍ ശ്രമിക്കുകയാണ്. ചൈന മനുഷ്യാവകാശ ലംഘനങ്ങളില്‍ മുന്‍പന്തില്‍ നില്‍ക്കുമ്പോള്‍ മറ്റുള്ളവരെ ഭീഷണിപ്പെടുത്താന്‍ സാമ്പത്തിക സ്വാധീനം ചെലുത്തുകയാണെന്നും അവര്‍ ആരോപിച്ചു. ചൈനയുടെ നിര്‍ബന്ധിത സാമ്പത്തിക നയങ്ങള്‍ തടയുന്നതിനും റഷ്യയുടെ തെറ്റായ വിവരങ്ങളെ ചെറുക്കുന്നതിനുള്ള കൂട്ടായ ശ്രമങ്ങള്‍ക്ക് കരുത്തു പകരാനും ജി 7 കൂട്ടായ്മ ഉറപ്പ് നല്‍കി.

ഇന്ത്യന്‍ വിദേശകാര്യമന്ത്രി ക്വാറന്റീനില്‍

Test User — Wed, 05 May 2021 10:35:26 +0000

ലണ്ടന്‍: ജി 7 ഉച്ചകോടിക്കായി ലണ്ടനിലെത്തിയ ഇന്ത്യന്‍ സംഘത്തലെ രണ്ട് പ്രതിനിധികള്‍ക്ക് കോവിഡ് സ്ഥിരീകരിച്ചു. വിദോശകാര്യ മന്ത്രി എസ് ജയശങ്കര്‍ ഉള്‍പ്പെടെ ഉള്ളവരെ ക്വാറന്റീനില്‍ പ്രവേശിപ്പിച്ചു. തിങ്കളാഴ്ചയാണ് ഇന്ത്യന്‍ സംഘം ലണ്ടനില്‍ എത്തിയത്.
ഓണ്‍ലൈനായി ഉച്ചകോടിയില്‍ പങ്കെടുക്കുമെന്ന് മന്ത്രി ട്വറ്റ് ചെയ്തു.

Was made aware yesterday evening of exposure to possible Covid positive cases. As a measure of abundant caution and also out of consideration for others, I decided to conduct my engagements in the virtual mode. That will be the case with the G7 Meeting today as well.

— Dr. S. Jaishankar (@DrSJaishankar) May 5, 2021

ട്രംപ് പുറംതിരിഞ്ഞുനിന്നു; ജി7 ഉച്ചകോടി കലങ്ങി

chandrika — Sat, 27 May 2017 16:02:18 +0000

ടോര്‍മിന: അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് ഇടഞ്ഞുനിന്നതിനെ തുടര്‍ന്ന് കാലാവസ്ഥാ വ്യതിയാനം സംബന്ധിച്ച് സംയുക്ത പ്രസ്താനവയിലെത്തുന്ന കാര്യത്തില്‍ ജി7 രാഷ്ട്രത്തലവന്‍മാര്‍ പരാജയപ്പെട്ടു. ഹരിതഗൃഹ വാതകങ്ങള്‍ പുറംതള്ളുന്നത് കുറക്കാന്‍ ആവശ്യപ്പെടുന്ന ആദ്യ സമഗ്ര കരാറായ പാരിസ് ഉടമ്പടിയോട് പ്രതിബദ്ധത ആവര്‍ത്തിക്കുന്ന പ്രസ്താവന ആറ് രാഷ്ട്രത്തലവന്‍മാര്‍ അംഗീകരിച്ചപ്പോള്‍ ട്രംപ് മാത്രം പുറംതിരിഞ്ഞുനിന്നു. അടുത്തയാഴ്ച മാത്രമേ അക്കാര്യത്തില്‍ തീരുമാനമെടുക്കൂ എന്ന് യു.എസ് വ്യക്തമാക്കി.

ആഗോള താപനമെന്ന ആശയത്തില്‍ തന്നെ വിശ്വാസമില്ലാത്ത ട്രംപ് പാരിസ് ഉടമ്പടിയില്‍നിന്ന് പിന്മാറുമെന്ന് നേരത്തെ ഭീഷണി മുഴക്കിയിരുന്നു. ഭീകരതക്കെതിരെ സംയുക്ത പോരാട്ടത്തിന് ആഹ്വാനം ചെയ്യുന്ന പ്രസ്താവന ട്രംപ് അംഗീകരിച്ചു. യു.എസ്, ബ്രിട്ടന്‍, കാനഡ, ഫ്രാന്‍സ്, ജര്‍മനി, ഇറ്റലി, ജപ്പാന്‍ എന്നീ സമ്പന്ന രാജ്യങ്ങളുടെ കൂട്ടായ്മയാണ് ജി7. കാലാവസ്ഥാ വ്യതിയാന വിഷയത്തില്‍ അമേരിക്ക മുന്‍ നിലപാടുകളില്‍നിന്ന് പിന്‍വലിയുന്ന സാഹചര്യത്തില്‍ അക്കാര്യത്തില്‍ സംയുക്ത നിലപാടിലെത്താന്‍ ഉച്ചകോടിക്ക് സാധിച്ചിട്ടില്ലെന്ന് ജി7 പുറത്തിറക്കിയ പത്രക്കുറിപ്പില്‍ പറയുന്നു. കാലാവസ്ഥാ വ്യതിയാന ചര്‍ച്ചകള്‍ തൃപ്തികരമായിരുന്നില്ലെന്നും ഒന്നിനെതിരെ ആറ് എന്ന സ്ഥിതിയാണ് ഉള്ളതെന്നും ജര്‍മന്‍ ചാന്‍സലര്‍ അംഗല മെര്‍ക്കല്‍ അറിയിച്ചു. ട്രംപിന്റെ നിലപാടിനെ അതിജീവിക്കാന്‍ പാരിസ് ഉടമ്പടിക്ക് സാധിക്കുമെന്ന് യു.എന്‍ സെക്രട്ടറി ജനറല്‍ അന്റോണിയോ ഗുട്ടെറസ് വിശ്വാസം പ്രകടിപ്പിച്ചു. സ്വതന്ത്ര വ്യാപാരം, കുടിയേറ്റം തുടങ്ങിയ വിഷയങ്ങളിലും ട്രംപ് മറ്റു നേതാക്കളുമായി യോജിക്കാന്‍ തയാറായില്ല. യൂറോപ്യന്‍ യൂണിയന്‍ രാജ്യങ്ങള്‍ നാറ്റോക്ക് നല്‍കുന്ന വിഹിതം അപര്യപ്തമാണെന്ന് പറഞ്ഞും ട്രംപ് ഉച്ചകോടി ആദ്യത്തില്‍ തന്നെ കലക്കിയിരുന്നു. മെര്‍ക്കലിന്റെ മുഖത്തുനോക്കി ജര്‍മനിയെ കുറ്റപ്പെടുത്താനും അദ്ദേഹം മടിച്ചില്ലെന്നാണ് റിപ്പോര്‍ട്ട്.