കോഴിക്കോട്: ‘ഏഴാം നൂറ്റാണ്ടിലെ പ്രാകൃതബോധത്തില്‍ നിന്ന് ജനങ്ങളെ ഇളക്കിവിടുന്ന തീവ്രവാദ സംഘങ്ങളാണ്’ ഗെയില്‍ ഇരകളുടെ സമരത്തിന് മുമ്പിലെന്ന സി.പി.എം വാദം അപ്രസക്തമാക്കി സര്‍വ്വ കക്ഷിയോഗം. സമരസമിതിക്കായി സര്‍വ്വ കക്ഷിയോഗത്തില്‍ പങ്കെടുത്തത് കണ്‍വീനര്‍ അബ്ദുല്‍കരീം പഴങ്കലും വൈസ് ചെയര്‍മാന്‍ ജി അബ്ദുല്‍ അക്ബറുമായിരുന്നു. അബ്ദുല്‍ അക്ബര്‍ കാരശ്ശേരി ഗ്രാമ പഞ്ചായത്തിലെ സി.പി.എം അംഗമാണ്. യു.ഡി. എഫ് ബഹിഷ്‌കരണ ഭീഷണിയെ തുടര്‍ന്നാണ് ഒടുവില്‍ യോഗത്തിലേക്ക് എരഞ്ഞിമാവ് ഗെയില്‍ സമരസമിതിയുടെ രണ്ടു പേരെ ജില്ലാ കലക്ടര്‍ നേരിട്ട് വിളിച്ചത്. ചെയര്‍മാന്‍ ഗഫൂര്‍ കുറുമാടന്‍ മലപ്പുറം കുഴിമണ്ണക്കാരനായതിനാല്‍ വൈസ് ചെയര്‍മാനായ സി.പി. എം അംഗത്തെ ജില്ലാ ഭരണകൂടം തന്നെ ക്ഷണിക്കുകയായിരുന്നു. ജനവാസ കേന്ദ്രങ്ങളിലൂടെ ഗെയില്‍ പൈപ്പ് ലൈന്‍ പോവുന്നത് അംഗീകരിക്കില്ലെന്ന് സമരസമിതി ശക്തമായ നിലപാട് സ്വീകരിച്ചതോടെ ഭിന്നിപ്പുണ്ടാക്കി ലക്ഷ്യം നേടാനുള്ള ശ്രമം വിഫലമായി. സമരസമിതി മുന്നോട്ടു വെച്ച ഏക ആവശ്യം ജനവാസ കേന്ദ്രം ഒഴിവാക്കിയുള്ള പുതിയ അലൈന്‍മെന്റ് എന്നതു മാത്രമാണ്. ഇതംഗീകരിക്കാനാവില്ലെന്ന നിലപാടില്‍ ഗെയിലും അതിനെ പിന്താങ്ങി വ്യവസായ മന്ത്രിയും ഉറച്ചു നിന്നു. ജനകീയ സമരത്തിന് യു.ഡി.എഫ് പിന്തുണയുണ്ടാവുമെന്ന് യോഗത്തില്‍ പങ്കെടുത്ത നേതാക്കള്‍ വ്യക്തമാക്കിയതോടെ സര്‍വ്വ കക്ഷിയോഗത്തിന് പൊതു പ്രഖ്യാപനത്തിന് കഴിഞ്ഞില്ല. മന്ത്രിയും യു.ഡി.എഫും സമരസമിതിയും വെവ്വേറെ വാര്‍ത്താ സമ്മേളനങ്ങളാണ് നടത്തിയത്.

ഗെയില്‍ പദ്ധതിയില്‍ ജനത്തിന്റെ ആശങ്കയും പൊലീസ് അതിക്രമവും ശരിവെച്ച് കോഴിക്കോടും മലപ്പുറത്തും ചേര്‍ന്ന സര്‍വകക്ഷിയോഗങ്ങള്‍. മുമ്പ് ഗെയില്‍ തള്ളിയ കലക്ടറുടെ പാക്കേജ് അംഗീകരിക്കാനും നഷ്ടപരിഹാര തുക വര്‍ധിപ്പിക്കുന്നതിന് ശിപാര്‍ശ ചെയ്യാനും വ്യവസായ മന്ത്രി കോഴിക്കോട് കലക്ട്രേറ്റില്‍ വിളിച്ച യോഗത്തില്‍ ധാരണയായി. എന്നാല്‍, ജനവാസ മേഖലയെ ഒഴിവാക്കിയുള്ള അലൈമെന്റ് നടപ്പാക്കണമെന്ന യു.ഡി.എഫിന്റെയും സമര സമിതിയുടെയും ആവശ്യങ്ങള്‍ തള്ളിയതോടെ യോഗം ഫലത്തില്‍ പ്രഹസനമായി.
വാതക പൈപ്പ് ലൈന്‍ പദ്ധതി നടപ്പാക്കുന്നതിന് ഭരണ-പ്രതിപക്ഷ കക്ഷികളും ജനപ്രതിനിധികളും സമരസമിതിയും ഒറ്റക്കെട്ടായ പിന്തുണ പ്രഖ്യാപിച്ചതായി യോഗ ശേഷം മന്ത്രി പറഞ്ഞു. അലൈന്‍മെന്റ് മാറ്റണമെന്ന നിര്‍ദേശം ഉയര്‍ന്നെങ്കിലും മുമ്പ് പരിശോധിച്ച് തള്ളിയതായതിനാല്‍ അംഗീകരിക്കില്ലെന്ന് ഗെയില്‍ നിലപാട് അറിയിച്ചു. എറണാകുളം, തൃശൂര്‍ ജില്ലകളില്‍ പ്രശ്‌നമില്ലാതെ പൈപ്പിടല്‍ പൂര്‍ത്തിയാവുകയാണ്. മലപ്പുറം, കോഴിക്കോട് ജില്ലകളിലൂടെ പദ്ധതി കടന്നു പോവുന്നത് പലരും ആശങ്കയോടെയാണ് കാണുന്നത്. അഞ്ചും പത്തും സെന്റുകളിലൂടെ പൈപ്പിടല്‍ നടന്നാല്‍ ഭൂമികൊണ്ട് പ്രയോജനമില്ലെന്ന വാദം ശരിയാണ്. അക്കാര്യം പരിശോധിക്കാനും പാക്കേജ് തയ്യാറാക്കാനും കലക്ടര്‍ യു.വി ജോസിനെ ചുമതലപ്പെടുത്തി. ഇതുമായി ബന്ധപ്പെട്ട് കലക്ടര്‍ ഇന്നു തന്നെ കാരശ്ശേരി പഞ്ചായത്തിലെത്തും. നഷ്ടപരിഹാരം കൊടുക്കുന്നതിലെ കാലതാമസം ഒഴിവാക്കാന്‍ നടപടി സ്വീകരിക്കും. ഏറ്റെടുത്ത് ജോലി തുടങ്ങിയ ഭൂ ഉടമകള്‍ക്ക് രേഖകള്‍ കൈമാറിയാല്‍ ഒരാഴ്ചക്കകവും ഏറ്റെടുക്കാനുള്ളവര്‍ രേഖകള്‍ സമര്‍പ്പിച്ചാല്‍ മൂന്നാഴ്ചക്കകവും ആധാരവിലയുടെ 10% തുക ഉപയോഗ വിലയായി കൈമാറും. 10% എന്നത് 30% ആക്കാന്‍ മുന്‍ സര്‍ക്കാറിന്റെ കാലത്തു തന്നെ 30% ആക്കാന്‍ ധാരണയായിരുന്നു. ഇത് 50% ആക്കാന്‍ ഗെയിലിനോട് ആവശ്യപ്പെടും – മന്ത്രി കൂട്ടിച്ചേര്‍ത്തു.
അതിനിടെ, പൊലീസ് ക്രൂരമായിട്ടാണ് പെരുമാറുന്നതെന്നും ജനവാസ കേന്ദ്രങ്ങള്‍ ഒഴിവാക്കണമെന്നും മലപ്പുറത്തെ യോഗത്തില്‍ ജനപ്രതിനിധികള്‍ ആവശ്യപ്പെട്ടു. എം.ഐ ഷാനവാസ് എം.പി, എം.എല്‍.എമാരായ പി ഉബൈദുല്ല, പി.കെ ബഷീര്‍, എം.ഉമ്മര്‍, കെ.കെ ആബിദ് ഹുസൈന്‍ തങ്ങള്‍ എന്നിവരും മുനിസിപ്പല്‍ പഞ്ചായത്ത് പ്രസിഡന്റുമാരുമാണ് യോഗത്തില്‍ പങ്കെടുത്തത്.

എങ്ങനെയാണ് ഇത്രയും ഗ്രാമീണര്‍ ഒരു പദ്ധതിക്കെതിരെ ഒരുമിച്ചു വരുന്നത് ?
ഇതൊക്കെ ആദ്യം ജനങ്ങളിലേക്കെത്തിച്ചത് യാതൊരു ജനകീയതയുമില്ലാത്ത ജമാ അത്തെ ഇസ്ലാമിയും എസ്.ഡി.പി.ഐ യും ആണെന്നാണോ കരുതുന്നത് ?
കഴിഞ്ഞ യു ഡി എഫ് ഭരണ കാലത്ത് സി.പി.എം ബുദ്ധിജീവികളും സി.പി.എം മുഖപത്രവും കൂടി നടത്തിയ നിരന്തര പ്രയത്‌നത്തിന്റെ കൂടി ഫലമാണ് ഈ ഭയനിര്‍മ്മിതി, ദേശാഭിമാനി ഒക്കെ എഴുതി വിട്ട ലേഖനങ്ങളിലെ ‘വാതക ബോംബ് ‘ പോലെയുള്ള പ്രയോഗങ്ങള്‍ ഒരു സാധാരണക്കാരനെ എത്ര മാത്രം ഭയപ്പെടുത്തുമെന്നു ഊഹിക്കാവുന്നതേ ഉള്ളൂ.

ദേശാഭിമാനിയും പി രാജീവനും പിന്നെ ലോക്കല്‍ ഐഐ.പി.എം നേതാക്കളുമെല്ലാം തുടങ്ങി വെച്ച് , ആഴത്തില്‍ വേരാഴ്ത്തിയ മസ്തിഷ്‌ക പ്രക്ഷാളനമാണ് ഇന്ന് ജമാ അത്തെ ഇസ്ലാമിയും എസ്.ഡി.പി.ഐയും തുടര്‍ന്ന് ഏറ്റെടുക്കുന്നത് . താല്‍ക്കാലിക രാഷ്ട്രീയ നേട്ടങ്ങള്‍ക്കു വേണ്ടി സി.പി.എമ്മിന്റെ ‘വെടക്കാക്കി തനിക്കാക്കല്‍’ ഗെയിമിന്റെ ഇരകള്‍ ആണ് ആന്റി ഗെയില്‍ സമരത്തിലെ ജനങ്ങള്‍, അത് ചര്‍ച്ച ചെയ്തു പരിഹരിക്കാനുള്ള മാന്യത എങ്കിലും ഇടതു ഗവണ്മെന്റ് കാണിക്കണം , അതല്ലാതെ പള്ളിയില്‍ കലാപത്തിന് ആളെ കൂട്ടുന്നു എന്നൊക്കെ പ്രചരിപ്പിച്ചു സാമൂഹ്യ അരാജകത്വം സൃഷ്ടിക്കുകയല്ല വേണ്ടത്.

കേരള ചരിത്രത്തില്‍ മുമ്പെങ്ങുമില്ലാത്ത വിധത്തിലാണ് കോഴിക്കോട്, മലപ്പുറം ജില്ലകളില്‍ ഗെയ്ല്‍ പ്രകൃതി വാതക പൈപ്പ് ലൈന്‍ പ്രവര്‍ത്തനങ്ങള്‍ പുരോഗമിക്കുന്നത്. ഗെയ്ല്‍ അധികാരികളല്ല പൊലീസാണ് അവിടെ പ്രവൃത്തികള്‍ക്ക് നേതൃത്വം നല്‍കുന്നത്. സംസ്ഥാനത്തെ നിയമ വ്യവസ്ഥയെയാണ് ഗെയ്ല്‍ വെല്ലുവിളിക്കുന്നത്. സര്‍ക്കാര്‍ തന്നെ നിയമത്തെ വെല്ലുവിളിക്കുന്ന കാഴ്ചയാണ് ഉള്ളത്.
പൊലിസിനെ നേരത്തെ ആര്‍ എസ് എസിന് കീഴിലാക്കുന്ന തിരക്കിലായിരുന്നു മുഖ്യമന്ത്രി. അതിനാല്‍ തന്നെ മുക്കത്ത് കോഴിക്കോട് മലപ്പുറം ജില്ലാ അതിര്‍ത്തിയില്‍ പൊലീസ് ഭീകരതക്ക് പിന്തുണയുമായി കുമ്മനം രാജശേഖരന്‍ രംഗത്ത് വന്നിട്ടുണ്ട്.
സംസ്ഥാനത്ത് ഭൂമി ഏറ്റെടുക്കുന്നതിന് കൃത്യമായ നിയമങ്ങള്‍ ഉണ്ട്. അതൊന്നും ഗെയില്‍ പാലിച്ചതായി അറിവില്ല. ഭൂമി ഏറ്റെടുക്കാന്‍ സര്‍ക്കാര്‍ വിജ്ഞാപനം ഇറങ്ങി ഉടമക്ക് നോട്ടിസ് നല്‍കേണ്ടതുണ്ട്. ഔദ്യോഗികമായി ഭൂമി അളന്ന് ഏറ്റെടുത്തിട്ടില്ല. അതിനാല്‍ തന്നെ നഷ്ട പരിഹാരം നല്‍കാനോ, അതിനെ കുറിച്ച് തര്‍ക്കം ഉന്നയിക്കാനോ ഭൂവുടമക്ക് അവസരം കിട്ടിയിട്ടില്ല. ഭൂമി ഏറ്റെടുക്കുന്നതിനെ കുറിച്ച് കൃത്യമായ വിവരങ്ങള്‍ ബന്ധപ്പെട്ട വില്ലേജ് പഞ്ചായത്ത് ഓഫീസുകളില്ല. സമരക്കാരോട് ഇതു വരെ സര്‍ക്കാര്‍ ചര്‍ച്ച നടത്തിയിട്ടില്ല. ജനങ്ങളുടെ ആശങ്കയകറ്റാന്‍ ഒരു വാര്‍ത്താ കുറിപ്പ് നല്‍കാന്‍ പോലും റവന്യൂ വകുപ്പോ, ജില്ലാ കലക്ടറോ തയ്യാറായിട്ടില്ല. റവന്യൂ വകുപ്പിന്റെ ജോലിയാണ് പൊലീസ് ചെയ്യുന്നത്. ചട്ടപ്രകാരം ചെയ്യേണ്ടത് ടിയര്‍ഗ്യാസ് പൊട്ടിച്ചും, ഭീകരാന്തരീക്ഷം സൃഷ്ടിച്ചും ചെയ്യാനാണ് സര്‍ക്കാര്‍ ശ്രമം.
കൊച്ചിയില്‍ നിന്ന് കോയമ്പത്തുര്‍ വഴി തമിഴ്‌നാട്ടിലെ ധര്‍മ്മപുരിയിലേക്കുള്ള ഗെയ്ല്‍ പൈപ്പ് ലൈനിനെതിരെ കര്‍ഷക പ്രതിഷേധം തമിഴ്‌നാട്ടില്‍ ആരംഭിച്ചു കഴിഞ്ഞു. സി പി എമ്മാണ് അവിടെ പ്രതിഷേധത്തിന് നേതൃത്വം നല്‍കുന്നത്. ഗെയ്ല്‍ വിഷയത്തില്‍ പിണറായി വിജയന്‍ പറയുന്നത് പാര്‍ട്ടിയുടെ തമിഴ്‌നാട് ഘടകത്തിന് പോലും ബോധ്യമായിട്ടില്ലെന്ന് ചുരുക്കം.
പൈപ്പ് ലൈന്‍ ഇടാന്‍ പൊലിസിനെ കൂട്ടുപിടിക്കുന്ന ഈ ധൃതിയുടെ രാഷ്ട്രീയം വരും നാളുകളില്‍ പുറത്തു വരും. ഏത് അഴിമതിയാണ് ഇതിലൂടെ മറച്ച് പിടിക്കാന്‍ ശ്രമിക്കുന്നതെന്ന് കണ്ടറിയണം.
ഏഴാം നൂറ്റാണ്ടിലെ പ്രാകൃതബോധമാണ് ഗെയ്ല്‍ വിരുദ്ധതക്ക് കാരണമെന്ന സി പി എം കോഴിക്കോട് ജില്ലാ കമ്മിറ്റിയുടെ പ്രസ്താവന ബോധപൂര്‍വ്വ മാകാന്‍ സാധ്യതയില്ല. അബദ്ധം സംഭവിച്ചതായിരിക്കും. ബി ജെ പിയുമായി ഒന്നിച്ചിരുന്ന് പ്രസ്താവന തയ്യാറാക്കിയത് സി പി എം സെക്രട്ടറി മാറിയെടുത്തതായിരിക്കും. ആ അബദ്ധം ഇനി ആവര്‍ത്തിക്കാതിരിക്കാനുള്ള ജാഗ്രത പാര്‍ട്ടി കാണിക്കണം.
പിന്നെ മംഗലാപുരത്ത് പ്രകൃതി വാതകം എത്താന്‍ ഏത് കുത്തക ക്കാണ് ഏറെ ധൃതിയെന്ന് നമുക്കറിയില്ല. അവര്‍ പറയുന്നതല്ലേ പാര്‍ട്ടിയുടെയും മുഖ്യ രാജന്റെയുമൊക്കെ മൂലധനം.കാരശേരിയിലും , കാവനൂരിലും ഗെയ്ല്‍ വിരുദ്ധ സമരത്തില്‍ ക്യൂബാ മുകുന്ദന്‍മാരെ രമണന്‍ സഖാവിന് കാണാന്‍ കഴിയണെന്നില്ല.

കഴിഞ്ഞ ദിവസം ഗെയില്‍ സമരക്കാര്‍ക്കു നേരെ പൊലീസ് നടത്തിയ അതിക്രമത്തില്‍ മര്‍ദനമേറ്റ കേരള മുസ്ലിം ജമാഅത്ത് നേതാവ് ഇസ്മാഈല്‍ വഫയെ യു.ഡി.എഫ് നേതാക്കള്‍ സന്ദര്‍ശിച്ചിരുന്നു. സോഷ്യല്‍ മീഡിയയില്‍ എ.പി സുന്നി വിഭാഗം ഗെയില്‍ സമരത്തിനനുകൂലമായി പ്രചാരണം നടത്തുന്നുണ്ട്.

കഴിഞ്ഞ നിയമസഭാ തിരഞ്ഞെടുപ്പില്‍ തിരുവമ്പാടി മണ്ഡലത്തില്‍ ഇടതു സ്ഥാനാര്‍ഥി ജോര്‍ജ്ജ് എം തോമസിന്റെ വിജയത്തില്‍ എ.പി സുന്നി വിഭാഗത്തിന്റെ പിന്തുണ നിര്‍ണ്ണായകമായിരുന്നു. പിണറായി സര്‍ക്കാറിന്റെ ഭരണത്തില്‍ പൂര്‍ണ തൃപ്തിയുണ്ടെന്നാണ് അടുത്തിടെ വരെ അവരുടെ പ്രധാന നേതാക്കള്‍ തന്നെ പറഞ്ഞിരുന്നത്.

ഗെയില്‍ പൈപ്പ് ലൈന്‍ പദ്ധതി ബലപ്രയോഗത്തിലൂടെ നടപ്പാക്കുന്നതിനെതിരെ സമരം ചെയ്യുന്ന, സ്വന്തം പാര്‍ട്ടിക്കാരടക്കമുള്ളവരെ മുഴുവന്‍ തീവ്രവാദികളും വികസന വിരോധികളുമാണെന്ന് മുദ്ര കുത്തുന്ന ഇടതു സര്‍ക്കാര്‍ നിലപാട് വ്യാപക പ്രതിഷേധത്തിന് ഇടയാക്കിയിട്ടുണ്ട്. പിണറായി സര്‍ക്കാറിന്റെ ഭരണത്തില്‍ പൂര്‍ണ തൃപ്തിയുണ്ടെന്ന് ഈയിടെ വരെ വ്യക്തമാക്കിയ എ.പി വിഭാഗം ഇപ്പോള്‍ സി.പി.എമ്മിനും സര്‍ക്കാറിനുമെതിരെ തിരിഞ്ഞിരിക്കുന്നത് പ്രതിഷേധത്തിന്റെ, സ്വന്തം പക്ഷത്തു തന്നെയുള്ള അമര്‍ഷം വ്യക്തമാക്കുന്നു. ഗെയില്‍ സമരക്കാര്‍ക്കെതിരെ സി.പി.എം കോഴിക്കോട് ജില്ലാ കമ്മിറ്റി പുറത്തിറക്കിയ പ്രസ്താവനയില്‍, പ്രവാചകന്‍ ജീവിക്കുകയും മതം പ്രചരിപ്പിക്കുകയും ചെയ്ത ഏഴാം നൂറ്റാണ്ടിനെ ‘പ്രാകൃതം’ എന്നു വിശേഷിപ്പിച്ചത് മുമ്പ് പിന്തുണ ഇടതുപക്ഷത്തിന് നല്‍കിയിരുന്ന മുസ്‌ലിം സംഘടനകളെ പോലും അകറ്റാന്‍ കാരണമായിരിക്കുകയാണ്.

ഗെയില്‍ വിരുദ്ധ സമരം കത്തി നില്‍ക്കുന്ന കാരശ്ശേരി പഞ്ചായത്തില്‍ നിയമസഭാ തിരഞ്ഞെടുപ്പിന്റെ തലേന്ന് പോലും ജോര്‍ജ്ജ് എം തോമസ്, പദ്ധതി നടപ്പാക്കില്ലെന്ന് ഉറപ്പ് നല്‍കിയരുന്നതായി അണികള്‍ തന്നെ പറയുന്നു. ഗെയില്‍ സമരത്തിനു പിന്നില്‍ തീവ്രവാദ ഗ്രൂപ്പുകളാണെന്ന സിപിഎം നിലപാട് ഇവിടുത്തെ പാര്‍ട്ടി അണികള്‍ക്കിടയിലും അസ്വസ്ഥത സൃഷ്ടിച്ചിട്ടുണ്ട്. ഇതിനു പിന്നാലെയാണ് ഗെയില്‍ സമരം ഏഴാം നൂറ്റാണ്ടിലെ പ്രാകൃത രൂപത്തിലുളളതാണെന്ന പ്രസ്താവന വന്നത്.

പ്രകൃതിവാതക പൈപ്പ് ലൈന്‍ കേരളത്തിന്റെ വികസനത്തിന് ഒഴിച്ചുകൂടാനാവില്ല. കേരളം ഊര്‍ജ ദരിദ്രമായ സംസ്ഥാനമാണ്. നമ്മുടെ പ്രധാന വ്യവസായങ്ങള്‍ പലതും താപോര്‍ജത്തിനെയും താരതമ്യേന വളരെ ഉയര്‍ന്ന വിലയുള്ള ഫ്യൂയല്‍ ഓയിലിനെയും മറ്റും ആശ്രയിച്ചാണ് പ്രവര്‍ത്തിക്കുന്നത്. ഈ പശ്ചാത്തലത്തിലാണ് പ്രകൃതിവാതകലഭ്യത കേരളത്തിലെ വ്യവസായവല്‍ക്കരണത്തിന് വലിയ അനുഗ്രഹമായിത്തീരുക. കെ.എസ്.ആര്‍.ടി.സി അടക്കം നഷ്ടത്തിലോടുന്ന പലസ്ഥാപനങ്ങളും ലാഭകരമാക്കാന്‍ പ്രകൃതിവാതക ലഭ്യത സഹായിക്കും. ഇതിലുപരി നഗരങ്ങളിലെ വീടുകളിലേക്ക് പൈപ്പു വഴി പാചകവാതകത്തിനു പകരം പ്രകൃതിവാതകം ലഭ്യമാക്കുന്നത് ജീവിത ചെലവ് കുറക്കും.

ഏകദേശം 15,000 കി.മീ. ദൈര്‍ഘ്യം വരുന്ന ഇന്ത്യയിലെ പ്രകൃതിവാതക ഗ്രിഡിനോട് കേരളത്തിലെ എല്‍.എന്‍.ജി ടെര്‍മിനലിനെ ബന്ധിപ്പിച്ചാല്‍ മാത്രമേ രാജ്യത്ത് ഉല്‍പാദിപ്പിക്കുന്ന പ്രകൃതിവാതകത്തിന്റെ സംസ്ഥാനവിഹിതം നമുക്ക് ലഭിക്കൂ. രാജ്യത്ത് ഉല്‍പാദിപ്പിക്കുന്ന പ്രകൃതിവാതകത്തിന് വിദേശത്ത് നിന്നും ഇറക്കുമതി ചെയ്യുന്ന പ്രകൃതിവാതകത്തേക്കാള്‍ വളരെ താഴ്ന്നവിലയാണ്. വില കുറഞ്ഞ പ്രകൃതിവാതകത്തിന്റെ സുലഭമായ ലഭ്യതയാണ് ഗുജറാത്തിലെയും ആന്ധ്ര, തെലങ്കാന സംസ്ഥാനങ്ങളിലെയും വ്യവസായക്കുതിപ്പിന് പിന്നിലെ ഒരു ഘടകം. ഇതെല്ലാം മറച്ചുവച്ചുകൊണ്ടാണ് ചിലര്‍ കൊച്ചിയില്‍ നിന്ന് മംഗലാപുരത്തേക്കുള്ള പ്രകൃതിവാതക പൈപ്പ് ലൈന്‍ മറ്റു സംസ്ഥാനങ്ങളിലെ വ്യവസായ കുത്തകകള്‍ക്ക് ഇന്ധനം എത്തിക്കാനുള്ള ഗൂഡാലോചനയാണ് എന്നും മറ്റും പ്രചരണം നടത്തുന്നതെന്നും മന്ത്രി പറയുന്നു.
ഗെയില്‍ പൈപ്പ് ലൈനിന്റെ കാര്യത്തില്‍ സര്‍ക്കാര്‍ ഭൂമി ഏറ്റെടുക്കുന്നില്ല. 20 മീറ്റര്‍ വീതിയില്‍ ഭൂഉപയോഗത്തിന് ചില നിയന്ത്രണങ്ങള്‍ ഏര്‍പ്പെടുത്തുകയേ ചെയ്യുന്നുള്ളൂ. വിളകള്‍ക്കും മറ്റും ന്യായമായിട്ടുള്ള നഷ്ടപരിഹാരം നല്‍കുന്നുണ്ടെന്നാണ് സര്‍ക്കാറിന്റെ നിലപാട്. മറിച്ചാണ് ആരുടെയെങ്കിലും അഭിപ്രായമെങ്കില്‍ അവ ചര്‍ച്ച ചെയ്യാം. ആരുടെയെങ്കിലും വീടിന് നഷ്ടമോ അപകടമോ വരുന്നുണ്ടെങ്കില്‍ അതും പൂര്‍ണമായിട്ടും പരിഹരിക്കാന്‍ സര്‍ക്കാര്‍ തയാറാണ്. പക്ഷെ പൈപ്പ് ലൈന്‍ വേണോ വേണ്ടയോയെന്നത് ഇനി ചര്‍ച്ച ചെയ്ത് തീരുമാനിക്കേണ്ട കാര്യമല്ല. കേരളത്തിലെ ജനങ്ങളോട് വോട്ട് ചോദിച്ചപ്പോള്‍ മാനിഫെസ്റ്റോയില്‍ വ്യക്തമാക്കി അംഗീകാരം നേടിയ നിലപാടാണിതെന്നും ഐസക് പറഞ്ഞു.

ഗെയില്‍ വിരുദ്ധ സമര സമിതിയെ സര്‍ക്കാര്‍ ചര്‍ച്ചയ്ക്കന ക്ഷണിച്ച സാഹചര്യത്തില്‍ ഭാവി കാര്യങ്ങള്‍ തീരുമാനിക്കാന്‍ സമിതി ഇന്ന് യോഗം ചേരും. സ്ഥലം എം പി എം ഐ ഷാനവാസിന്റെ നേതൃത്വത്തില്‍ രാവിലെ പതിനൊന്ന് മണിക്കായിരിക്കും യോഗം ചേരുക.

തിങ്കളാഴ്ച സംസ്ഥാന സര്‍ക്കാറുമായി നടക്കുന്ന ചര്‍ച്ചയില്‍ ഉന്നയിക്കേണ്ട വിഷയങ്ങളായിരിക്കും ഇന്നത്തെ യോഗത്തില്‍ തീരുമാനിക്കുക. രാവിലെ പതിനൊന്ന് മണിക്ക് കാരശ്ശേരി സഹകരണബാങ്ക് ഓഡിറ്റോറിയത്തിലാണ് യോഗം. അതേസമയം പൈപ്പിടല്‍ പ്രവര്‍ത്തികള്‍ നിര്‍ത്തിവെക്കാതെ ചര്‍ച്ച കൊണ്ട് ഫലമില്ലെന്ന നിലപാടിലാണ് സമരസമിതി.