Games – Chandrika Daily

ദേശിയ ഗെയിംസ്; കളരിപ്പയറ്റ് മത്സരയിനമാക്കണമെന്ന ഹര്‍ജിയില്‍ പി.ടി. ഉഷയ്ക്ക് നോട്ടീസ്

webdesk17 — Thu, 30 Jan 2025 10:35:04 +0000

ദേശിയ ഗെയിംസില്‍ കളരിപ്പയറ്റ് മത്സരയിനമാക്കണമെന്ന ഹര്‍ജിയില്‍ പി.ടി.ഉഷയ്ക്ക് നോട്ടീസ്. ഡല്‍ഹി ഹൈക്കോടതിയാണ് പി.ടി. ഉഷയ്ക്ക് നോട്ടീസ് അയച്ചത്. കൂടാതെ ഒളിമ്പിക് അസോസിയേഷനും, കേന്ദ്ര, ഉത്തരാഖണ്ഡ് സര്‍ക്കാരുകള്‍ക്കും നോട്ടീസ് നല്‍കി. ഹരിയാന സ്വദേശി നല്‍കിയ ഹര്‍ജിയില്‍ ഹൈക്കോടതി നോട്ടീസ് അയക്കുകയായിരുന്നു.

അതേസമയം കളരിപ്പയറ്റ് ഇപ്രാവശ്യം പ്രദര്‍ശന ഇനമാണ്. കഴിഞ്ഞ തവണ ഗോവയില്‍ മത്സര ഇനമായിരുന്നു കളരി. കഴിഞ്ഞതവണ ഗോവയില്‍ 19 സ്വര്‍ണമടക്കം 22 മെഡലാണ് കളരിപ്പയറ്റ് സംഘം നേടിയെടുത്തത്.

എന്നാല്‍ ഇത്തവണ കളരിപ്പയറ്റ് മത്സരയിനമാക്കില്ലെന്ന് ഒളിമ്പിക് അസോസിയേഷന്‍ നിലപാടെടുത്തിരുന്നു.

വിപുലമായ പങ്കാളിത്തവും രാജ്യത്തെമ്പാടും പ്രചാരവുമുള്ള കായിക ഇനമായിരിക്കണമെന്ന നിബന്ധന പറയുന്നുണ്ടെന്ന് ഐഒഎ വിശദീകരിക്കുന്നു. എന്നാല്‍ ഈ മാനദണ്ഡങ്ങള്‍ കളരിപ്പയറ്റ് പാലിക്കാത്തിനാല്‍ മത്സരയിനമാക്കാനാകില്ലെന്നാണ് പറയുന്നത്.

ലോക ചെസ് ചാംപ്യന്‍ഷിപ്പ്; പതിനൊന്നാം റൗണ്ടില്‍ ഗുകേഷിന് ജയം

webdesk17 — Sun, 08 Dec 2024 14:03:03 +0000

ലോക ചെസ് ചാംപ്യന്‍ഷിപ്പിലെ പതിനൊന്നാം റൗണ്ട് മത്സരത്തില്‍ ഇന്ത്യന്‍ യുവ താരം ഡി ഗുകേഷിന് ജയം. നിലവിലെ ചാംപ്യനായ ചൈനയുടെ ഡിങ് ലിറനെ പരാജയപ്പെടുത്തിയാണ് ഗുകേഷ് മുന്നേറിയത്. ചാംപ്യന്‍ഷിപ്പില്‍ ആറു പോയിന്റുമായി ഗുകേഷാണ് ഇപ്പോള്‍ മുന്നില്‍.

ഇതോടെ ആറു പോയിന്റാണ് ഗുകേഷ് നേടിയത്. ഇനി ഒന്നരപോയിന്റാണ് ലോക ചാംപ്യന്‍ പട്ടത്തിലേക്ക് ഗുകേഷിന് ലക്ഷ്യം വെക്കേണ്ടത്. ചാംപ്യന്‍ഷിപ്പില്‍ ഇനി അവശേഷിക്കുന്നത് മൂന്ന് മത്സരങ്ങളാണ്. ഡിങ് ലിറന് നിലവില്‍ അഞ്ച് പോയന്റാണുള്ളത്.

ഡിങ് ലിറനുമായുള്ള കഴിഞ്ഞ റൗണ്ടും സമനിലയിലാണ് അവസാനിച്ചിരുന്നത്. ഒന്നാം റൗണ്ടില്‍ ഡിങ് ലിറനും മൂന്നാം റൗണ്ടില്‍ ഗുകേഷ്ുമാണ് വിജയിച്ചത്. പത്താം മത്സരവും സമനിലയില്‍ പിരിഞ്ഞതോടെ തുടരെ ഏഴ് പോരാട്ടങ്ങളാണ് ഒപ്പത്തിനൊപ്പം നിന്നത്.

ലോക ചെസ് ചാംപ്യന്‍ഷിപ്പ്; ആറാം പോരാട്ടവും സമനിലയില്‍

webdesk17 — Sun, 01 Dec 2024 18:59:05 +0000

ലോക ചെസ് ചാംപ്യന്‍ഷിപ്പ് ഫൈനലിലെ ആറാം പോരാട്ടവും സമനിലയില്‍. നിലവിലെ ലോക ചാംപ്യന്‍ ചൈനയുടെ ഡിങ് ലിറനും ഇന്ത്യയുടെ ഡി ഗുകേഷുമാണ് ലോക ചാംപ്യന്‍ കിരീടത്തിനു വേണ്ടി പോരാടുന്നത്. ആറാം അങ്കവും കഴിഞ്ഞതോടെ രണ്ടു താരങ്ങള്‍ക്കും 3 പോയിന്റുകള്‍ വീതമാണുള്ളത്. എന്നാല്‍ ആകെ 7.5 പോയിന്റാണ് ലോക കിരീടത്തിനു വേണ്ടത്. ഇരുവര്‍ക്കും ശേഷിക്കുന്ന എട്ട് റൗണ്ടില്‍ നിന്നു 4.5 പോയിന്റുകളാണ് കിരീടം സ്വന്തമാക്കണമെങ്കില്‍ ആവശ്യമുള്ളത്.

ആറാം പോരാട്ടത്തില്‍ ഗുകേഷ് കറുത്ത കരുക്കളുമായാണ് അംഗത്തിനിറങ്ങിയത്. 46 നീക്കങ്ങള്‍ക്കൊടുവില്‍ മത്സരം സമനിലയില്‍ അവസാനിക്കുകയായിരുന്നു.

ഒന്നാം പോരാട്ടത്തില്‍ ഡിങ് ലിറന്‍ ജയം കമ്‌ടെങ്കിലും മൂന്നാം മത്സരത്തില്‍ ഗുകേഷ് ജയം പിടിച്ച് ഒപ്പമെത്തി. രണ്ടാം പോരാട്ടം ഇരുവരും സമനിലയിലായിരുന്നു പിരിഞ്ഞത്. നാലും അഞ്ചും ആറും പോരാട്ടം ഒപ്പത്തിനൊപ്പം നിന്നത്. ശേഷിക്കുന്ന മത്സരങ്ങള്‍ ഇരു താരങ്ങള്‍ക്കും വാശിയേറിയതാണ്.

ഗെയിമിംഗ് പ്രേമികള്‍ക്കിടയില്‍ തരംഗമാകാന്‍ ഗെയിമത്തോണുമായി ജിയോ

Test User — Mon, 26 Oct 2020 18:23:21 +0000

മുംബൈ: മൊബൈല്‍ ഓണ്‍ലൈന്‍ ഗെയിമിംഗ് മേഖലയിലും പുതിയ തന്ത്രങ്ങളുമായി റിലയന്‍സ് ജിയോ. ഗെയിമിംഗ് പ്രേമികള്‍ക്കായി ‘ഫ്രീ ഫയര്‍ ഇ സ്‌പോര്‍ട്‌സ് ടൂര്‍ണമെന്റ്’ നടത്തുകയാണ് ജിയോ. ജിയോമാര്‍ട്ട് ഗെയിമത്തോണ്‍ എന്നാണ് ടൂര്‍ണമെന്റിന് പേരിട്ടിരിക്കുന്നത്. ജിയോ ഗെയിം പ്ലാറ്റ്‌ഫോമിന് കീഴിലാണ് ടൂര്‍ണമെന്റ് സംഘടിപ്പിക്കുന്നത്.

നിലവില്‍ ആപ്ലിക്കേഷന്റെ ബീറ്റാ വേര്‍ഷന്‍ മാത്രമേ തയാറായിട്ടുള്ളൂ. ഒക്ടോബര്‍ 30 മുതല്‍ നവംബര്‍ ഒന്നുവരെയാണ് ഫ്രീ ഫയര്‍ ടൂര്‍ണമെന്റ് സംഘടിപ്പിക്കുന്നത്. യൂട്യൂബിലും ജിയോ ടിവിയിലും ഇതിന്റെ ലൈവ് ബ്രോഡ്കാസ്റ്റുണ്ടാകും. വിജയിക്കുന്ന ടീമിന് 25,000 രൂപ സമ്മാനമായി ലഭിക്കും. റണ്ണര്‍ അപ്പിന് 12,000 രൂപയും മോസ്റ്റ് വാല്യൂവബിള്‍ പ്ലെയറിന് 1,000 രൂപയും ലഭിക്കും. തുക കളിക്കാരുടെ ജിയോമാര്‍ട്ട് വാലറ്റിലേക്കായിരിക്കും ലഭിക്കുക.

ഗെയിമത്തോണില്‍ പങ്കെടുക്കുന്നതിനായുള്ള രജിസ്‌ട്രേഷന്‍ നിലവില്‍ ആരംഭിച്ചിട്ടുണ്ട്. ഇന്നു മുതല്‍ ഈ മാസം 29 വരെ ജിയോ ഗെയിംസ് പോര്‍ട്ടലിലൂടെ പേര് രജിസ്റ്റര്‍ ചെയ്യാം.നാല് സ്‌റ്റേജുകളിലായിട്ടായിരിക്കും മത്സരം നടക്കുക. ക്വാളിഫൈയിംഗ് സ്‌റ്റേജ് ഒക്ടോബര്‍ 30 നും 31 നും രാവിലെ 11 മുതല്‍ നടക്കും. ഇതിന് പിന്നാലെ ക്വാര്‍ട്ടര്‍ ഫൈനലും സെമി ഫൈനലും ഗ്രാന്റ് ഫൈനലും നടക്കും.

ഉത്തരമേഖലാ ഗെയിംസിന് സമാപനം; തൃശൂരിന് ഓവറോള്‍ കിരീടം

Test User — Fri, 18 Oct 2019 15:13:47 +0000

കണ്ണൂര്‍: ഉത്തരമേഖലാ സ്‌കൂള്‍ ഗെയിംസില്‍ ഓവറോള്‍ കിരീടം തൃശൂരിന്. ആദ്യ ദിനം മുതല്‍ മുന്നില്‍ നിന്ന പാലക്കാടിനെ പിന്തള്ളിയാണ് തൃശൂര്‍ കിരീടം സ്വന്തമാക്കിയത്. അവസാന നിമിഷം വോളിബോളിലെയും ഹാന്റ് ബോളിലെയും ഫലം അനുകൂലമായതോടെ 10 സ്വര്‍ണവും അഞ്ച് വെള്ളിയും എട്ട് വെങ്കലവുമായി 152 പോയിന്റ് നേടിയാണ് തൃശൂര്‍ ഓവറോള്‍ ചാമ്പ്യന്‍മാരായത്. ഏഴ് സ്വര്‍ണവും 10 വെള്ളിയും നേടി 146 പോയിന്റോടെയാണ് പാലക്കാട് രണ്ടാം സ്ഥാനത്തൊതുങ്ങിയത്. 10 സ്വര്‍ണവും എട്ട് വെള്ളിയും നാല് വെങ്കലവുമായി നേരത്തെ അഞ്ചാം സ്ഥാനത്തുണ്ടായിരുന്ന കണ്ണൂര്‍ മൂന്നാം സ്ഥാനവും നേടി.

0.2 സെക്കന്റിന്റ വില!

chandrika — Tue, 10 Apr 2018 18:31:45 +0000

ഗോള്‍ഡ് കോസ്റ്റ്: കോമണ്‍വെല്‍ത്ത് ഗെയിംസ് ആറാം ദിനത്തില്‍ ഇന്ത്യക്ക് ശുഭവാര്‍ത്തകള്‍. ഇന്നലെ വനിതകളുടെ 25 മീറ്റര്‍ പിസ്റ്റല്‍ ഇവന്റില്‍ ഹീന സിധു സ്വര്‍ണം നേടിയപ്പോള്‍ പാരാ ലിഫ്റ്റര്‍ സച്ചിന്‍ ചൗധരി വെങ്കലം സ്വന്തമാക്കി. ബോക്‌സിങില്‍ മുഹമ്മദ് ഹിസ്സമുദ്ദീന്‍, മനോജ് കുമാര്‍, സതീഷ് കുമാര്‍, അമിത് പങ്കാല്‍, നമന്‍ തന്‍വാര്‍ എന്നിവര്‍ സെമിഫൈനലിലെത്തി മെഡലുറപ്പിച്ചിട്ടുണ്ട്. ഇതിനു പുറമെ, ഹോക്കി, സ്‌ക്വാഷ് തുടങ്ങിയവയില്‍ ഇന്ത്യ മെഡല്‍ പ്രതീക്ഷ നിലനിര്‍ത്തി. ഹോക്കിയില്‍ മലേഷ്യയെ തോല്‍പ്പിച്ച് പുരുഷ ടീമും ദക്ഷിണാഫ്രിക്കയെ വീഴ്ത്തി വനിതാ ടീമും സെമിയിലെത്തി. മില്‍ഖാ സിങിനു ശേഷം 400 മീറ്റര്‍ ഫൈനലിലെത്തിയ മലയാളി താരം മുഹമ്മദ് അനസ് ദേശീയ റെക്കോര്‍ഡ് സമയം കുറിച്ചെങ്കിലും ഫോട്ടോഫിനിഷില്‍ മെഡല്‍ നഷ്ടമായി. പ്രതീക്ഷകളുയര്‍ത്തി 1500 മീറ്റര്‍ ഫ്രീസ്റ്റൈല്‍ നീന്തല്‍ ഫൈനലിലെത്തിയ മലയാളി താരം സാജന്‍ പ്രകാശിന് ഏഴാം സ്ഥാനത്തെത്താനേ കഴിഞ്ഞുള്ളൂ.
ആറാം ദിനം പിന്നിടുമ്പോള്‍ 11 സ്വര്‍ണവും നാല് വെള്ളിയും ആറ് വെങ്കലവുമടക്കം 21 മെഡലുമായി മൂന്നാം സ്ഥാനത്താണ് ഇന്ത്യ. 50 സ്വര്‍ണമടക്കം 130 മെഡലോടെ ഓസ്‌ട്രേലിയയും 24 സ്വര്‍ണമടക്കം 74 മെഡലുമായി ഇംഗ്ലണ്ടും ആണ് ഒന്നും രണ്ടും സ്ഥാനങ്ങളില്‍.
ഹീനയുടെ സ്വര്‍ണവേട്ട
ബെല്‍മണ്ട് ഷൂട്ടിങ് സെന്ററില്‍ നിന്നാണ് ഇന്നലെ ഇന്ത്യ കേള്‍ക്കാന്‍ കൊതിച്ച സ്വര്‍ണവാര്‍ത്ത എത്തിയത്. ഞായറാഴ്ച 10 മീറ്റര്‍ എയര്‍ പിസ്റ്റളില്‍ വെള്ളി നേടിയിരുന്ന ഹീന സിധു വ്യക്തമായ ആധിപത്യം പുലര്‍ത്തിയാണ് 25 മീറ്ററില്‍ സ്വര്‍ണം സ്വന്തമാക്കിയത്. എട്ടുപേര്‍ മത്സരിച്ച ഫൈനലില്‍ റെക്കോര്‍ഡ് പോയിന്റായ 38 സ്വന്തമാക്കിയായിരുന്നു 28-കാരിയുടെ പൊന്നിന്‍ പ്രകടനം. വെള്ളി നേടിയ ഓസ്‌ട്രേലിയക്കാരി എലാന ഗലിയബോവിച്ച്, വെങ്കലം നേടിയ മലേഷ്യന്‍ താരം ആലിയ അസ്ഹരി എന്നിവരുടെ സമ്മര്‍ദം അതിജീവിച്ചായിരുന്നു ഹീനയുടെ വിജയം. ഹീന ഇതാദ്യമായാണ് കോമണ്‍വെല്‍ത്ത് ഗെയിംസ് വ്യക്തിഗത ഇനത്തില്‍ സ്വര്‍ണം നേടുന്നത്. 2010-ലെ ഡല്‍ഹി കോമണ്‍വെല്‍ത്ത് ഗെയിംസില്‍ ഹീന സിധു ടീം ഇനത്തില്‍ സ്വര്‍ണം നേടിയിരുന്നു.
ഹോക്കി സന്തോഷം
പൂള്‍ ബി.യില്‍ മലേഷ്യയെ ഒന്നിനെതിരെ രണ്ടു ഗോളുകള്‍ക്ക് വീഴ്ത്തിയാണ് ഇന്ത്യന്‍ പുരുഷ ഹോക്കി സംഘം സെമിഫൈനലിലേക്ക് മുന്നേറിയത്. ഹര്‍മന്‍പ്രീത് സിങിന്റെ ഇരട്ട ഗോളുകള്‍ വിജയമൊരുക്കിയത്. മൂന്നാം മിനുട്ടില്‍ തന്നെ ലീഡ് നേടിയ ഇന്ത്യ ശക്തമായ ആക്രമണം അഴിച്ചുവിട്ടപ്പോള്‍ മലേഷ്യക്കാര്‍ക്ക് സ്വന്തം ഗോള്‍മുഖം സംരക്ഷിക്കുകയായിരുന്നു പ്രധാന ജോലി. രണ്ടാം ക്വാര്‍ട്ടറിന്റെ തുടക്കത്തില്‍ വലതുവിങിലൂടെ ഓടിക്കയറി പാസ് സ്വീകരിച്ച ഫൈസല്‍ സാറി, പി.ആര്‍ ശ്രീജേഷിനെ മറികടന്ന് മലേഷ്യയെ ഒപ്പമെത്തിച്ചു. ഇന്ത്യക്ക് പെനാല്‍ട്ടി കോര്‍ണറുകള്‍ തുടരെ ലഭിച്ചെങ്കിലും മലേഷ്യ ചെറുത്തുനിന്നു.
മൂന്നാം ക്വാര്‍ട്ടറിന്റെ അവസാന നിമിഷങ്ങളില്‍ പെനാല്‍ട്ടി കോര്‍ണര്‍ കരുത്തുറ്റ ഷോട്ടിലൂടെ വലയിലാക്കിയാണ് ഹര്‍മന്‍പ്രീത് ലീഡ് തിരിച്ചുപിടിച്ചത്. അവസാന മിനുട്ടുകളിലെ മലായ് ആക്രമണത്തെ ഇന്ത്യ ഫലപ്രദമായി പ്രതിരോധിച്ചു.
ക്യാപ്ടന്‍ റാണി രാംപാല്‍ 47-ാം മിനുട്ടില്‍ നേടിയ ഏക ഗോളിനാണ് ഇന്ത്യന്‍ വനിതകള്‍ ദക്ഷിണാഫ്രിക്കയെ തോല്‍പ്പിച്ചത്. ഇതോടെ പൂള്‍ എയില്‍ ഇംഗ്ലണ്ടുമായി പോയിന്റ് പങ്കിട്ട് രണ്ടാം സ്ഥാനത്തെത്താന്‍ ഇന്ത്യക്കു കഴിഞ്ഞു.
മെഡല്‍ ബോക്‌സിങ്
ബോക്‌സിങില്‍ 49 കിലോ വിഭാഗത്തില്‍ അമിത് പങ്കാല്‍ ആണ് ഇന്നലെ ആദ്യം സെമിയിലെത്തിയത്. സ്‌കോട്ട്‌ലാന്റിന്റെ അഖീല്‍ അഹ്മദിനെതിരെ 4-1 നായിരുന്നു പങ്കാലിന്റെ ജയം. 91 കിലോ വിഭാഗത്തില്‍ സമോവയുടെ ഫ്രാങ്ക് മാസോയെ ഏകപക്ഷീയമായ 5-0 ന് തറപറ്റിച്ച് നമന്‍ തന്‍വാറും ക്വാര്‍ട്ടര്‍ കടന്നു. 56 കിലോ വിഭാഗത്തില്‍ സാംബിയയുടെ മുലിംഗ എവറിസ്‌റ്റോയെ ഹുസ്സമുദ്ദീന്‍ 5-0 ന് ഇടിച്ചിട്ടപ്പോള്‍ 69 കിലോയില്‍ ഓസ്‌ട്രേലിയയുടെ ടെറി നിക്കോളാസിനെതിരെ 4-1 ന് മനോജ് കുമാറും ജയിച്ചു കയറി. 91+ വിഭാഗത്തില്‍ 4-1 നായിരുന്നു സതീഷിന്റെ ജയം.
മിക്‌സഡ് ഡബിള്‍സ് സ്‌ക്വാഷില്‍ ദീപിക പള്ളിക്കലും സൗരവ് ഘോഷാലും പാകിസ്താന്റെ മദീന സഫര്‍ – തയ്യബ് അസ്‌ലം സഖ്യത്തെ 2-0 ന് തോല്‍പ്പിച്ച് സെമി സാധ്യത ശക്തമാക്കി. പൂള്‍ ഇയിലെ മത്സരം വെറും 13 മിനുട്ടേ നീണ്ടുനിന്നുള്ളൂ. ഓക്‌സന്‍ഫോര്‍ഡ് സ്റ്റുഡിയോസില്‍ നടന്ന മത്സരത്തില്‍ 11-2, 11-3 സ്‌കോറിനായിരുന്നു ഇന്ത്യന്‍ ജയം. നേരത്തെ ഗയാനയുടെ മേരി ഫുങ് – ജേസണ്‍ റേ ഖലീല്‍ എന്ന സഖ്യത്തെയും ഇന്ത്യന്‍ സഖ്യം 13 മിനുട്ടില്‍ കീഴടക്കിയിരുന്നു.