Germeny – Chandrika Daily

തിരികെ പോകാന്‍ അഭയാര്‍ത്ഥിയ്ക്ക് 1,200 ഡോളര്‍

chandrika — Thu, 07 Dec 2017 15:13:04 +0000

ബര്‍ലിന്‍: സ്വന്തം രാജ്യത്തേക്ക് തിരിച്ചു പോകുന്ന അഭയാര്‍ത്ഥിയ്ക്ക് പണം നല്‍കാന്‍ തയാറെന്ന് ജര്‍മനി. ഒരു ലക്ഷം അഭയാര്‍ത്ഥികളാണ് ജര്‍മനയിലുള്ളത്. അഫ്ഗാനിസ്താനില്‍ നിന്നും ഒട്ടേറെ പേരാണ് ജര്‍മനിയിലേക്ക് ഒഴുകിയെത്തുന്നത്. രാജ്യത്ത് അഭയാര്‍ത്ഥികളുടെ എണ്ണം ഉയരുന്നതായും അത് സുരക്ഷയ്ക്ക് ഭീഷണിയാണെന്ന കണ്ടത്തലിനെ തുടര്‍ന്നാണ് ജര്‍മനിയുടെ പുതിയ നീക്കം. തിരികെ പോകുന്ന ഒരാള്‍ക്ക് 1,200 ഡോളര്‍ നല്‍കാന്‍ തയാറാണെന്ന് വക്താക്കള്‍ അറിയിച്ചു.

അമ്മയെ കൈവിടാതെ ജര്‍മനി

chandrika — Mon, 25 Sep 2017 17:25:43 +0000

ബെര്‍ലിന്‍: ജര്‍മനിയുടെ ഉരുക്കു വനിത അംഗല മെര്‍ക്കല്‍ നാലാമതും രാജ്യത്തിന്റെ ഭരണാധികാരിയായി തെരഞ്ഞെടുക്കപ്പെട്ടു. ജര്‍മന്‍കാര്‍ സ്‌നേഹത്തോടെ അമ്മയെന്ന് വിളിക്കുന്ന മെര്‍ക്കലിന്റെ വിജയത്തിന് പക്ഷെ, നവനാസികളുടെ പാര്‍ലമെന്റ് അരങ്ങേറ്റത്തില്‍ തിളക്കം കുറഞ്ഞു. ആറു പതിറ്റാണ്ടിനുശേഷം ആദ്യമായാണ് തീവ്രവലതുപക്ഷമായ ആള്‍ട്ടര്‍നേറ്റീവ് ഫോര്‍ ജര്‍മനി (എ.എഫ്.ഡി) പാര്‍ലമെന്റിന്റെ പടികയറുന്നത്.
ജര്‍മനിയുടെ കരുത്തുറ്റ മൂന്നാമത്തെ പാര്‍ട്ടിയെന്ന പദവിയും എ.എഫ്.ഡി സ്വന്തമാക്കിയിരിക്കുകയാണ്. ഇസ്്‌ലാമിനെ കടന്നാക്രമിച്ചും കുടിയേറ്റ വിരുദ്ധ നിലപാടുകള്‍ സ്വീകരിച്ചും വോട്ടു ചോദിച്ച പാര്‍ട്ടിയുടെ മുന്നേറ്റം ജനാധിപത്യവാദികളെ ആശങ്കയിലാഴ്ത്തിയിട്ടുണ്ട്. നാലാം തവണയും ജര്‍മന്‍ ചാന്‍സലറാകുന്ന നേതാവായി ചരിത്രം കുറിച്ചെങ്കിലും മെര്‍ക്കലിന്റെ പാര്‍ട്ടിയായ ക്രിസ്റ്റ്യന്‍ ഡെമോക്രാറ്റിക് പാര്‍ട്ടി(സി.ഡി.യു)യുടെ ജനപിന്തുണ ഇടിഞ്ഞുവെന്നതും ശ്രദ്ധേയമാണ്. 33 ശമതാനം വോട്ടുനേടിയ പാര്‍ട്ടിക്ക് 2013ലെ തെരഞ്ഞെടുപ്പിനെ അപേക്ഷിച്ച് വോട്ടിങ് വിഹിതത്തില്‍ ഒമ്പത് ശതമാനം ഇടിവുണ്ടായിട്ടുണ്ട്. മെര്‍ക്കലിന്റെ പ്രധാന എതിരാളി മാര്‍ട്ടിന്‍ ഷൂള്‍സിന്റെ സോഷ്യല്‍ ഡെമോക്രാറ്റിക് പാര്‍ട്ടിക്ക് 21 ശതമാനം വോട്ടു മാത്രമാണ് ലഭിച്ചത്. യുദ്ധാന്തര ജര്‍മനിയില്‍ അവര്‍ക്കേറ്റ ഏറ്റവും കനത്ത തിരിച്ചടിയാണ് ഇതെന്നും രാഷ്ട്രീയ നിരീക്ഷകര്‍ ചൂണ്ടിക്കാട്ടുന്നു. ഫ്രീ ഡെമോക്രാറ്റിക് പാര്‍ട്ടിക്ക് 10.1 ശതമാനം വോട്ടും പരിസ്ഥിതിവാദികളായ ഗ്രീന്‍സ് പാര്‍ട്ടിക്ക് 9.2 ശതമാനവും വോട്ട് ലഭിച്ചു.
ബെര്‍ലിനിലെ പാര്‍ട്ടി ആസ്ഥാനത്ത് അനുയായികളെ അഭിസംബോധന ചെയ്യവെ കൂടുതല്‍ മികച്ച ഫലം പ്രതീക്ഷിച്ചിരുന്നതായി മെര്‍ക്കല്‍ പറഞ്ഞു. അസാധാരണ വെല്ലുവിളി നേരിട്ട ഒരു പോര്‍ക്കളത്തില്‍നിന്നാണ് നാം പുറത്തുവന്നതെന്ന കാര്യം മറക്കാന്‍ പാടില്ലെന്നും അവര്‍ ഓര്‍മിപ്പിച്ചു. സാമ്പത്തിക പ്രതിസന്ധിയിലും അഭയാര്‍ത്ഥി പ്രവാഹത്തിലും വീര്‍പ്പുമുട്ടിയ യൂറോപ്പില്‍ തുടര്‍ച്ചയായി നാലാം തവണയും തെരഞ്ഞെടുപ്പില്‍ വിജയം ഉറപ്പിക്കാന്‍ സാധിച്ച ഏക നേതാവാണ് മെര്‍ക്കല്‍. പല യൂറോപ്യന്‍ രാജ്യങ്ങളും അഭയാര്‍ത്ഥികളെ അടിച്ചോടിക്കുകയും വാതില്‍ കൊട്ടിയടക്കുകയും ചെയ്തപ്പോള്‍ മെര്‍ക്കല്‍ മാത്രമാണ് അവരെ സന്തോഷപൂര്‍വം സ്വാഗതം ചെയ്തത്. 10 ലക്ഷത്തോളം അഭയാര്‍ത്ഥികളെ ജര്‍നി സ്വീകരിച്ചു. ഇതിനെതിരെ പ്രതിഷേധിച്ചാണ് എ.എഫ്.ഡി കരുത്താര്‍ജിച്ചത്.

ജര്‍മനിയില്‍ ബസിന് തീപിടിച്ച് 18 മരണം

chandrika — Mon, 03 Jul 2017 14:48:07 +0000

ബെര്‍ലിന്‍: തെക്കന്‍ ജര്‍മനിയില്‍ ടൂറിസ്റ്റ് ബസിന് തീപിടിച്ച് 18 പേര്‍ മരിച്ചു. 30 പേര്‍ക്ക് പരിക്കേറ്റു. ലോറിയുമായി കൂട്ടിയിടിച്ചാണ് ബസിന് തീപിടിച്ചത്. വടക്കന്‍ ബവേറിയയിലെ സ്റ്റംബാച്ചിനു സമീപമാണ് സംഭവം. സാക്‌സോനിയില്‍നിന്നുള്ള ജര്‍മന്‍ വിനോദ സഞ്ചാരികളാണ് ബസിലുണ്ടായിരുന്നത്. 46 യാത്രക്കാരും രണ്ട് ഡ്രൈവര്‍മാരുമാണ് ബസിലുണ്ടായിരുന്നതെന്ന് പൊലീസ് അറിയിച്ചു. ബസും ലോറിയും കൂട്ടിയിടിക്കാനുള്ള കാരണം വ്യക്തമല്ല. അപകടം നടക്കുമ്പോള്‍ അതുവഴി ഓടിക്കൊണ്ടിരുന്ന വാഹനങ്ങള്‍ക്ക് വേഗത കുറവായിരുന്നുവെന്ന് റിപ്പോര്‍ട്ടുണ്ട്.

ജര്‍മ്മനിയില്‍ സ്വവര്‍ഗ വിവാഹത്തിന് അനുമതി

chandrika — Fri, 30 Jun 2017 14:45:33 +0000

ബെര്‍ലിന്‍: ജര്‍മ്മനിയില്‍ സ്വവര്‍ഗ വിവാഹം നിയമാനുസൃതമാക്കി. പാര്‍ലമെന്റില്‍ നടന്ന വോട്ടെടുപ്പിന് ശേഷമാണ് തീരുമാനം. സഭയിലെ 393 സമാജികര്‍ സ്വവര്‍ഗ വിവാഹത്തിന് അനുകൂലമായി വോട്ട് രേഖപ്പെടുത്തിയപ്പോള്‍ 226 പേര്‍ വിവാഹത്തിനെ എതിര്‍ത്തു. ജര്‍മ്മനിയില്‍ 2001 മുതല്‍ സ്വവര്‍ഗാനുരാഗികള്‍ക്ക് ഒരുമിച്ച് ജീവിക്കാനുള്ള അനുവാദം ഉണ്ട്. എന്നാല്‍ രാജ്യത്ത് വിവാഹിതര്‍ക്ക് നല്‍കുന്ന എല്ലാ അവകാശങ്ങളും സ്വവര്‍ഗാനുരാഗികള്‍ക്ക് നല്‍കിയിരുന്നില്ല.
അതേ സമയം, ജര്‍മ്മന്‍ ചാന്‍സലര്‍ ആഞ്ചല മെര്‍ക്കല്‍ സ്വവര്‍ഗ വിവാഹത്തിനെതിരായാണ് വോട്ടു രേഖപ്പെടുത്തിയത്. സ്വവര്‍ഗ വിവാഹത്തിന് താനെതിരാണെങ്കിലും പാര്‍ട്ടിയിലെ മറ്റംഗങ്ങള്‍ക്ക് അവരുടെ മനസാക്ഷിയ്ക്കനുസൃതമായി വിഷയത്തില്‍ വോട്ട് രേഖപ്പെടുത്താനുള്ള അനുവാദമുണ്ടെന്ന് വോട്ടെടുപ്പിന് മുന്‍പായി ആഞ്ചല മെര്‍ക്കല്‍ പറഞ്ഞു.വിവാഹം നിയമാനുസൃതമാക്കിയതോടു കൂടി ദമ്പതികള്‍ക്ക് കുഞ്ഞിനെ ദത്തെടുക്കാനുള്‍പ്പെടെയുള്ള അവകാശങ്ങള്‍ ലഭിക്കും. ആഞ്ചല മെര്‍ക്കലിന്റെ നേതൃത്വത്തിലുള്ള കണ്‍സര്‍വേറ്റീവ് കൊളീഷന്‍ സ്വവര്‍ഗ വിവാഹത്തിന് എതിരാണെങ്കിലും പാര്‍ലമെന്റ് അംഗങ്ങള്‍ക്ക് വിഷയത്തില്‍ സ്വതന്ത്ര നിലപാട് സ്വീകരിക്കാമെന്ന ജര്‍മ്മന്‍ ചാന്‍സലറുടെ നിലപാടാണ് വിഷയത്തില്‍ നിര്‍ണായകമായത്.

മെയ്ക് ഇന്‍ ഇന്ത്യയില്‍ ജര്‍മ്മനി പങ്കാളിയാവും

chandrika — Tue, 30 May 2017 21:29:05 +0000

ബര്‍ലിന്‍: ഇന്ത്യയും ജര്‍മ്മനിയും തമ്മില്‍ എട്ട് സുപ്രധാന കരാറുകളില്‍ ഒപ്പുവെച്ചു. പ്രധാനമന്ത്രി നരേന്ദ്ര മോദിയും ജര്‍മ്മന്‍ ചാന്‍സലര്‍ ആംഗല മെര്‍ക്കലും തമ്മിലുള്ള കൂടിക്കാഴ്ചക്കു ശേഷമായിരുന്നു ഇത്.
വ്യാപാരം. നൈപുണ്യവികസനം, സൈബര്‍ സുരക്ഷ തുടങ്ങിയ വിഷയങ്ങള്‍ ഇരുവരും ചര്‍ച്ച ചെയ്തു. സാമ്പത്തിക രംഗത്ത് വന്‍ കുതിച്ചു ചാട്ടമുണ്ടാക്കുന്ന, ഇരു രാജ്യങ്ങള്‍ക്കും ഗുണകരമായ പെട്ടെന്ന് നേട്ടമുണ്ടാക്കുന്ന വ്യവസ്ഥകളാണ് തങ്ങള്‍ മുന്നോട്ടു വെക്കുന്നതെന്ന് കരാറില്‍ ഒപ്പിട്ട ശേഷം നടത്തിയ സംയുക്ത പത്രസമ്മേളനത്തില്‍ മോദി പറഞ്ഞു. ഇന്ത്യയെ ശക്തമായ പ്രാപ്തിയുള്ള രാജ്യമായാണ് ജര്‍മ്മനി എപ്പോഴും കണ്ടിട്ടുള്ളതെന്നും അദ്ദേഹം കൂട്ടിച്ചേര്‍ത്തു. സൈബര്‍ രാഷ്ട്രീയം, വികസനോന്മുഖ സംരംഭം, സുസ്ഥിര നഗര വികസനം, നൈപുണ്യ വികസനം, ഡിജിറ്റല്‍ വത്കരണത്തിലെ സഹകരണം, റയില്‍വെ മേഖലയിലെ സഹകരണം, സുരക്ഷ, വൊക്കേഷണല്‍ ട്രെയ്‌നിങ്, ഇന്തോ-ജര്‍മ്മന്‍ സെന്റര്‍ ഫോര്‍ സസ്‌റ്റൈനബിലിറ്റിയുടെ സഹകരണം എന്നിവയില്‍ സംയുക്ത പ്രസ്താവനയില്‍ ഇരുവരും ഒപ്പുവെച്ചു. മെയ്ക് ഇന്‍ ഇന്ത്യയില്‍ ജര്‍മ്മനി മുഖ്യ പങ്കാളിയാവാനും തീരുമാനിച്ചിട്ടുണ്ട്. ചൈനയുടെ സില്‍ക് റൂട്ട് പദ്ധതിയും സാമ്പത്തിക ഇടനാഴിയും ഇന്ത്യയെ അസ്വസ്ഥപ്പെടുത്തുന്ന സാഹചര്യത്തിലാണ് ഇന്ത്യ ജര്‍മ്മനിയുമായി സുപ്രധാന കരാറുകളില്‍ ഒപ്പുവെച്ചത്. ബ്രക്‌സിറ്റിന്റേയും ട്രംപിന്റേയും കാലത്ത് തങ്ങളുടെ പരമ്പരാഗത സഖ്യ രാജ്യങ്ങളായ അമേരിക്കയേയും ബ്രിട്ടനേയും മാത്രം ആശ്രയിച്ച് മുന്നോട്ടു പോകാനാവില്ലെന്ന് ഉടമ്പടി ഒപ്പുവെച്ച ശേഷം ആംഗല മെര്‍ക്കല്‍ പറഞ്ഞു. അടുത്ത മാസം ജര്‍മ്മനിയിലെ ഹാംബര്‍ഗില്‍ നടക്കുന്ന ജി 20 ഉച്ചകോടിയില്‍ ഇരു നേതാക്കളും വീണ്ടും കൂടിക്കാഴ്ച നടത്തും.