മത്സരത്തിന്റെ 28-ആം മിനിറ്റില്‍ സ്പാനിഷ് താരം ആല്‍ബര്‍ട്ട് നേടിയ ഗോളിലൂടെ ഗോകുലം ലീഡ് നേടി. തുടക്കം മുതല്‍ ആക്രമണോത്സുകമായി കളിച്ച ഗോകുലത്തിന് ഈ ലീഡ് നിര്‍ണായകമായി. രണ്ടാം പകുതിയിലും ടീം അതേ വേഗത തുടര്‍ന്നു; 55-ആം മിനിറ്റില്‍ സാമുവേല്‍ കിന്‍ഷി ഗോള്‍ നേടി ലീഡ് ഇരട്ടിയാക്കി.

മുഹമ്മദന്‍സ് പ്രതിരോധത്തിലെ പിഴവുകള്‍ പ്രയോജനപ്പെടുത്തി 85-ആം മിനിറ്റില്‍ പകരക്കാരനായ സ്പാനിഷ് സ്ട്രൈക്കര്‍ ജുവാന്‍ കാര്‍ലോസ് മൂന്നാം ഗോള്‍ നേടി ടീമിന്റെ വിജയം ഉറപ്പാക്കി. എല്ലാ മേഖലകളിലും മികച്ച പ്രകടനമാണ് ഗോകുലം ഇന്ന് കാഴ്ചവെച്ചത്.

മത്സരശേഷം ഹെഡ് കോച്ച് ജോസ് ഹെവിയ പ്രതികരിച്ചു: ”മുന്‍ പരാജയങ്ങളില്‍ നിന്ന് ടീം പാഠം ഉള്‍ക്കൊണ്ടു. സൂപ്പര്‍ കപ്പില്‍ നിന്ന് പുറത്തായെങ്കിലും, 202627 ഐ ലീഗില്‍ കൂടുതല്‍ ഊര്‍ജ്ജത്തോടെ തിരിച്ചുവരും,” എന്നാണ് അദ്ദേഹത്തിന്റെ വാക്കുകള്‍.

കോഴിക്കോട്: അവകാശവാദങ്ങളില്ലാതെ കൊല്‍ക്കത്തയിലെത്തി അഭിമാനനേട്ടത്തിലേക്ക് പന്ത്തട്ടിയ ഗോകുലം കേരളയ്ക്ക് ചാലകശക്തിയായത് മലയാളിക്കൂട്ടം. ട്രാവു എഫ്.സിയ്‌ക്കെതിരായ ഫൈനല്‍ മത്സരത്തില്‍ ഗോകുലത്തിനായി ലീഡ് നേടി ചരിത്രത്തിലേക്ക് നിറയൊഴിച്ചത് വയനാട്ടുകാരനായ എമില്‍ബെന്നിയാണ്. വിജയമുറപ്പിച്ച നാലാം ഗോള്‍പിറന്നത് വയനാട്ടുകാരനായ മുഹമ്മദ് റാഷിദിന്റെ ബൂട്ടില്‍നിന്ന്. കൊല്‍ക്കത്തയിലെ കെ.ബി.കെ സ്റ്റേഡിയത്തില്‍ ഐലീഗ് കിരീടമുയര്‍ത്തുമ്പോള്‍ റിയല്‍ മലബാറിയന്‍സായി ഗോകുലം കേരള.

കഴിഞ്ഞ സീസണ്‍ മുതല്‍ ഗോകുലം നിരയിലുള്ള എമില്‍ബെന്നി മലയാളിക്ലബിനായി മികച്ച പ്രകടനമാണ് നടത്തുന്നത്. ഫൈനലിലെ താരവുമായി. ഈസീസണില്‍ രണ്ട് ഗോളുകളാണ് താരം സ്‌കോര്‍ചെയ്തത്. ക്ലബ് ആരംഭകാലംമുതല്‍ ഗോകുലംക്യാമ്പിലുള്ള മുഹമ്മദ് റാഷിദ് മധ്യനിരയിൽ എന്നും മലബാറിയൻസിന്റെ വിശ്വസ്തപോരാളിയാണ്. ഗോകുലം ക്യാപ്റ്റനായും തിളങ്ങിയ റാഷിദ് നിര്‍ണായകമത്സരങ്ങളില്‍ ഇതിനുമുന്‍പും സ്‌കോര്‍ചെയ്തിട്ടുണ്ട്.
ഐലീഗില്‍ ഗോകുലത്തിന്റെ ഗോള്‍പോസ്റ്റിന് മുന്നില്‍ ചോരാത്തകൈകളുമായി നിലയുറപ്പിച്ചത്കൂത്തുപറമ്പുസ്വദേശി സി.കെ ഉബൈദാണ്.

കഴിഞ്ഞ സീസണ്‍മുതല്‍ ടീമിനൊപ്പമുള്ള ഉബൈദ്, ഗോകുലം ഡ്യൂറന്റ്കപ്പ് സ്വന്തമാക്കുന്നതിലും നിര്‍ണായകപ്രകടനം നടത്തിയിരുന്നു. അന്ന് പെനാല്‍റ്റി ഷൂട്ടൗട്ടില്‍ ഉബൈദിന്റെ തകര്‍പ്പന്‍ സേവുകളാണ് ടീമിനെ കിരീടത്തിലേക്ക് നയിച്ചത്. തൃശൂര്‍കാരന്‍ എം.എസ് ജിതിന്‍, കോഴിക്കോട് കൊടുവള്ളിക്കാരന്‍ താഹിര്‍സമാന്‍, മലപ്പുറം തിരൂര്‍ സ്വദേശി മുഹമ്മദ് സല്‍മാന്‍, കരുവാരക്കുണ്ട് സ്വദേശി ഷിബില്‍ മുഹമ്മദ് എന്നിവരും ടീം മലബാറിയന്‍സ് നിരയുടെ യംഗ്കരുത്തായി. ഗോകുലത്തിനായി നിരവധിതവണ ലക്ഷ്യംകണ്ട ഈ താരങ്ങളുടെ സാന്നിധ്യം കേരള ക്ലബിൽ നിർണായകമായി.
ഗോള്‍കീപ്പിംഗില്‍ രണ്ടാംഗോളിയായി പി.എ അജ്മല്‍, പ്രതിരോധനിരയിലെ അലക്‌സ് സജി, ജസ്റ്റിന്‍ ജോര്‍ജ്ജ്, ജാസിം എന്നീ മലയാളിതാരങ്ങളും സ്വപ്നനേട്ടത്തില്‍ ഗോകുലം ടീമിന്റെ ഭാഗമായി. നാല് വര്‍ഷത്തെമാത്രം കരിയര്‍ഗ്രാഫില്‍ കേരള പ്രീമിയര്‍ലീഗ്, ഡ്യൂറന്റ്കപ്പ്, വനിതാലീഗ് ഫുട്‌ബോള്‍ കിരീടം ഷെല്‍ഫിലെത്തിച്ച യുവസംഘത്തിന്റെ ലക്ഷ്യങ്ങള്‍ക്ക് പിന്നില്‍ പ്രതികൂലസാഹചര്യത്തിലും പൂര്‍ണപിന്തുണയോടെ നിലയുറപ്പിച്ച മികച്ച സപ്പോർട്ടിംഗ് സ്റ്റാഫും ടീം മാനേജ്‌മെന്റുമാണ്.

ഇറ്റലിയ്ക്കാരനായ മുഖ്യപരിശീലകന്‍ വിന്‍സെന്റ് ആല്‍ബെര്‍ട്ടോ അനീസെ, ഫിറ്റ്‌നെസ് കോച്ച് ബ്രസീലുകാരന്‍ ഗാര്‍ഷ്യമിറാന്‍ഡ കിരീടനേട്ടത്തിലേക്ക് യുവനിരയെ ഒരുക്കുന്നതില്‍ മുഖ്യപങ്ക്‌വഹിച്ചു. അസി.കോച്ച് ഷെരീഫ് ഖാന്‍, ഗോള്‍കീപ്പര്‍ കോച്ച് മിലിന്ദ് സാവന്ത്, പെര്‍ഫോമന്‍സ് അനലിസ്റ്റായി മുന്‍ഫുട്‌ബോളര്‍ ഐ.എം വിജയന്റെ മകന്‍ ആരോമല്‍ എന്നിവരുമുണ്ടായിരുന്നു.

31ാം മിനിറ്റില്‍ ഫിലിപ്പ് അഡ്‌ജെ, 39മിനിറ്റില്‍ ജസ്റ്റിന്‍ ജോര്‍ജ്ജ്, 86ാം മിനിറ്റില്‍ പെനാല്‍റ്റിയിലൂടെ ഷരീഫ് മുഹമ്മദ് എന്നിവരാണ് ഗോകുലത്തിനായി ലക്ഷ്യംകണ്ടത്. 23ാം മിനിറ്റില്‍ ജിതേശ്വര്‍ സിംഗിന്റെ സെല്‍ഫ് ഗോളും കേരളത്തിന് സഹായകരമായി. 88ാം മിനിറ്റില്‍ സോങ്പു സിംഗാണ് നെരോക്കയുടെ ആശ്വാസഗോള്‍ നേടിയത്.

ഘാന താരങ്ങളായ ഡെന്നിസ് അന്ടവിയിലും ഫിലിപ് അഡ്ജായിലുമാണ് ഗോകുലത്തിന്റെ പ്രതീക്ഷ. കഴിഞ്ഞ മത്സരത്തിന്റെ രണ്ടാം പകുതിയില്‍ ഇറങ്ങിയ ജിതിനും സോഡിങ്‌ലിയാനയും മികച്ച പ്രകടനമാണ് കാഴ്ചവെച്ചത്. രണ്ടു മത്സരത്തില്‍ നിന്നും അന്ടവി മൂന്ന് ഗോളും അഡ്ജ ഒരു ഗോളും ഒരു അസിസ്റ്റും നേടി.

ഐ ലീഗില്‍ ഒരിക്കല്‍പോലും ഐസ്വാള്‍ എഫ് സിയെ തോല്‍പിക്കാനായില്ലെന്ന നാണക്കേട് ഒഴിവാക്കുക കൂടിയാണ് ഗോകുലം ലക്ഷ്യമിടുന്നത്. രണ്ടു മത്സരത്തില്‍ നിന്നും മൂന്ന് പോയിന്റുമായി ഗോകുലം ഇപ്പോള്‍ ആറാം സ്ഥാനത്താണുള്ളത്. വണ്‍ സ്‌പോര്‍ട്‌സ് ചാനലിലും 24 ന്യൂസിലും മത്സരം തത്സമയസംപ്രേഷണമുണ്ടാകും.

അന്ടവി ആദ്യ മത്സരത്തില്‍ ഗോകുലത്തിനു വേണ്ടി ഗോള്‍ നേടിയിരുന്നു. പരിക്ക് കാരണം ആദ്യ മത്സരത്തില്‍ ഇറങ്ങാതിരുന്ന അഫ്ഘാന്‍ തരാം ഷെരീഫ് മുഹമ്മദ് ഇന്ന് കളത്തിലിറങ്ങിയേക്കും. പ്രതിരോധ നിരയില്‍ ഘാന താരവും ക്യാപ്റ്റനുമായ മുഹമ്മദ് അവാലിനൊപ്പം വയനാടുകാരന്‍ അലക്‌സും അണിനിരക്കും.

ടൂര്‍ണമെന്റില്‍ മുഴുവന്‍ കളിയിലും മിന്നും പ്രകടനം കാഴ്ചവെച്ച ക്യാപ്റ്റന്‍ കൂടിയായ മാര്‍കസ് ജോസഫ് തന്നെയാണ് ഫൈനലിലെയും വിജയശില്‍പി. രണ്ടു ഗോളുകളും മാര്‍കസിന്റെ വകയായിരുന്നു.

ആദ്യ പകുതിയിലെ അവസാന നിമിഷങ്ങളില്‍ ഗോകുലം കേരള എഫ്.സി ആണ് ആദ്യം ഗോളടിച്ചത്. ഹെന്റി കിസേകയെ പെനാല്‍ട്ടി ബോക്‌സില്‍ ദെബിജിത് മജുംദാര്‍ വീഴ്ത്തിയതിന് ലഭിച്ച പെനാല്‍ട്ടിയാണ് ആ ഗോളിലേക്ക് വഴിവെച്ചത്. കിക്കെടുത്ത മാര്‍കസിന് ഒട്ടും പിഴച്ചില്ല.

ഗോള്‍ നേടിയതിന്റെ ആധിപത്യത്തില്‍ രണ്ടാം പകുതിയില്‍ ഗോകുലം ഒന്നൂടെ ഉണര്‍ന്നു കളിച്ചു. ആ മേല്‍ക്കോയ്മ ഫലം കണ്ടു. 54ാം മിനിറ്റില്‍ ഇടതു വിങ്ങിലൂടെ കുതിച്ചെത്തിയ മാര്‍കസ് രണ്ടാമതും ഗോള്‍ സ്‌കോര്‍ ചെയ്തു. മാര്‍കസിന്റെ ടൂര്‍ണമെന്റിലെ 11ാമത്തെ ഗോള്‍ കൂടിയായിരുന്നു ഇത്.

64ാം മിനിറ്റില്‍ ബഗാന്‍ താരത്തിന്റെ ഫ്രീകിക്കില്‍ നിന്ന് വന്ന ഹെഡര്‍ പിടിച്ചു നിര്‍ത്തുന്നതില്‍ ഗോകുലം ഗോള്‍ കീപ്പര്‍ ഉബൈദ് പരാജയപ്പെട്ടു. ഉബൈദിന്റെ കൈയില്‍ നിന്ന വഴുതി അത് ബോക്‌സിനുള്ളിലേക്ക് കയറിയതോടെ മോഹന്‍ ബഗാന് ആശ്വാസ ഗോളായി. അതിനെ തുടര്‍ന്ന് മോഹന്‍ ബഗാന്‍ നിരന്തരമായി കേരള ഗോള്‍മുഖത്ത് വെല്ലുവിളിയുയര്‍ത്തിയെങ്കിലും പ്രയോജനപ്പെടുത്താനായില്ല.
1997-ല്‍ എഫ്.സി കൊച്ചിന്‍ മാത്രമാണ് ഇതിനു മുമ്പ് ഡ്യൂറണ്ട് കപ്പ് കിരീടം നേടിയ കേരളാ ക്ലബ്. ഗോകുലം കേരള എഫ്.സിയുടെ ദേശീയ തലത്തിലുള്ള ആദ്യ പ്രധാന കിരീടവുമാണിത്.

ഞങ്ങള്‍ക്ക് ലഭിച്ചിരിക്കുന്ന സുവര്‍ണാവസരമാണിത്… ഡ്യൂറന്‍ഡ് കപ്പ് കലാശപോരാട്ടത്തിനിറങ്ങുമ്പോള്‍ ഇതുവരെ പുലര്‍ത്തിയ പ്രകടനം ആവര്‍ത്തിക്കുകയാണ് ലക്ഷ്യം’… ഈസ്റ്റ് ബംഗാളിനെതിരെ പെനാല്‍റ്റി ഷൂട്ടൗട്ടില്‍ ഉജ്ജ്വലസേവുമായി ഗോകുലം കേരള എഫ്.സിയുടെ വിജയശില്‍പിയായ കണ്ണൂര്‍ കൂത്തുപറമ്പ് സ്വദേശി സി.കെ ഉബൈദിന്റെ വാക്കുകളാണിത്… ഗോകുലം ടീമിനൊപ്പം ചേര്‍ന്ന് ഏതാനും മത്സരം മാത്രം കളിച്ച യുവതാരമാണിപ്പോള്‍ ടീം മലബാറിയന്‍സിന്റെ ഹീറോ… നിരവധി ക്ലബുകള്‍ക്ക് വേണ്ടിവലകാത്ത 29കാരന്‍ പ്രതീക്ഷകള്‍ പങ്കുവെക്കുന്നു

ഈസ്റ്റ് ബംഗാളിനെതിരായ വിജയത്തിന്‌ശേഷം…
-പുതിയ കോച്ച് ഫെര്‍ണാണ്ടോ വലേരയ്ക്ക് കീഴില്‍ ടൂര്‍മമെന്റിലുടനീളം ടീം ഒത്തിണക്കത്തോടെയാണ് കളിച്ചത്. സെമിഫൈനലിലെ വിജയവും ടീം കരുത്തിന്റേതാണ്. തികഞ്ഞ ആത്മവിശ്വാസത്തിലായിരുന്നു തന്റെ പഴയ ക്ലബായ ഈസ്റ്റ് ബംഗാളിനെ നേരിട്ടത്. മോഹന്‍ബഗാനെതിരെ ഫൈനലിലിറങ്ങുമ്പോള്‍ പ്രത്യേകമായി മുന്നൊരുക്കങ്ങളൊന്നും നടത്തുന്നില്ല. പതിവുപോലെ പ്രകടനം ആവര്‍ത്തിക്കുകയെന്ന ലക്ഷ്യത്തോടെ ആത്മവിശ്വാസത്തോടെയാണ് കിരീടപോരാട്ടത്തില്‍ ഇറങ്ങുന്നത്. വിജയം മാത്രമാണ് മനസിലുള്ളത്.

ഗോകുലം ടീമിലേക്കുള്ള വരവ്….
-ഗോകുലം ടീമിലെത്തിയത് തന്റെകരിയറിലെ വലിയ അവസരമായാണ് കാണുന്നത്. പരസ്പരം അറിയാവുന്ന മലയാളിതാരങ്ങള്‍. സീനിയര്‍-ജൂനിയര്‍ വേര്‍തിരിവൊന്നും ഇവിടെയില്ല. അതിനാല്‍ ഫ്രീയായി കളിക്കാന്‍കഴിയുന്നു. ഗോകുലത്തിനായി ഐലീഗ് മത്സരങ്ങളിലും തിളങ്ങാനാകുമെന്നാണ് പ്രതീക്ഷ.

ഗോള്‍കീപ്പിംഗിലേക്ക് വരുന്നത്
-വിദ്യാര്‍ത്ഥിയായിരുന്ന കാലത്ത് കൂത്തുപറമ്പ് മുനിസിപ്പാലിറ്റി ഗ്രൗണ്ടില്‍ നടന്ന കോച്ചിംഗ് ക്യാമ്പാണ്് കരിയറിലെ വഴിത്തിരിവായത്. മുന്നേറ്റനിരയില്‍ കളിക്കാന്‍ താല്‍പര്യപ്പെട്ട് ക്യാമ്പിലെത്തിയ തന്നെ പരിശീലകന്‍ ശ്രീധരനാണ് ഗോള്‍കീപ്പിംഗിലേക്ക് തിരിച്ചുവിട്ടത്. ഉയരകൂടുതല്‍ ഗോള്‍കീപ്പിംഗിന് ഗുണകരമാകുമെന്ന് അദ്ദേഹം പറഞ്ഞു. ക്യാമ്പിന് ശേഷം നാട്ടിലെ സെവന്‍സ് ടൂര്‍ണമെന്റുകളിലെല്ലാം ഗോളിയായി ഇറങ്ങി..തുടര്‍ന്ന് അഖിലേന്ത്യാസെവന്‍സിലും പങ്കെടുത്തു.
2011-12ല്‍ വിവാകേരളയുടെ ഗോള്‍കീപ്പറായി അവസരം ലഭിച്ചു. തലശ്ശേരിയിലെ ടോപ്‌മോസ്റ്റ് എന്ന സെവന്‍സ് ടീമിന് കളിക്കുമ്പോഴാണ് വിവയിലേക്ക് വിളിവരുന്നത്. പിന്നീട് ഡെംപോ ഗോവ, എയര്‍ഇന്ത്യ, ഒ.എന്‍.ജി.സി എന്നിവയ്ക്കായും വലകാക്കാന്‍ അവസരംതേടിയെത്തി. 2017ല്‍ എഫ്.സി കേരളയില്‍ വായ്പാഅടിസ്ഥാനത്തില്‍ കളിച്ചിരുന്നു.

ഗോകുലം എഫ്‌സിയുടെ ക്യാപ്റ്റന്‍ മാര്‍ക്കസ് ജോസഫ് തന്നെയാണ് അവരുടെ പ്രതീക്ഷ. ടൂര്‍ണമെന്റില്‍ ഇതുവരെ 8 ഗോളുകള്‍ ടീമിനായി അദ്ദേഹം നേടിയിട്ടുണ്ട്. ടൂര്‍ണമെന്റിലെ ഗോള്‍ വേട്ടക്കാരില്‍ ഒന്നാം സ്ഥാനത്തും അദ്ദേഹം തന്നെയാണ്. ഈസ്റ്റ് ബംഗാളും മികച്ച ഫോമിലാണ്, ബംഗാളിന്റെ ബിദ്യാസാഗര്‍ സിംങ് ടൂര്‍ണമെന്റില്‍ അഞ്ച് ഗോളുകള്‍ ഇതുവരെ നേടിയിട്ടുണ്ട്.

മത്സരം തത്സമയമായി സ്റ്റാര്‍ സ്‌പോര്‍ട്‌സ് 3 ലും ഹോട്ട്‌സ്റ്റാറിലും കാണാം.

കോഴിക്കോട്: ഐലീഗ് ഫുട്‌ബോളില്‍ ഗോകുലം കേരള എഫ്.സിക്ക് സീസണിലെ ആദ്യ തോല്‍വി. സ്പാനിഷ് താരങ്ങളുടെ കരുത്തില്‍ മുന്നേറിയ ചെന്നൈ സിറ്റി എഫ്.സിയാണ് രണ്ടിനെതിരെ മൂന്ന് ഗോളുകള്‍ക്ക് സ്വന്തംതട്ടകത്തില്‍ ഗോകുലത്തെ മുട്ടുകുത്തിച്ചത്. പെനാല്‍റ്റിയിലൂടെ ആന്റോണിയോ ജര്‍മെയ്ന്‍ (4), വി.പി സുഹൈര്‍(70) എന്നിവര്‍ കേരളത്തിനായി ലക്ഷ്യംകണ്ടമ്പോള്‍ പ്രവിട്ടോ രാജു(22), പെട്രോ ജാവിയര്‍(31), അമീറുദ്ദീന്‍ മൊഹിയുദ്ദീന്‍(68) എന്നിവരാണ് ചെന്നൈ ക്ലബിനായി ഗോള്‍നേടിയത്. ഇതോടെ മൂന്ന് കളിയില്‍ ഏഴുപോയന്റുള്ള ചെന്നൈ സിറ്റി എഫ്.സി പോയന്റ് ടേബിളില്‍ ഒന്നാമതെത്തി. ഗോകുലത്തിന്റെ മുന്നേറ്റത്തിന്റെ മുനയൊടിച്ച ചെന്നൈയുടെ പ്രതിരോധതാരം അജിത്ത് കുമാര്‍ കാമരാജാണ് കളിയിലെതാരം. അനാവശ്യ ഫൗള്‍വഴങ്ങിയ കേരള ക്യാപ്റ്റന്‍ മുഡ്ഡൈ മൂസ ചുവപ്പ് കാര്‍ഡ്കണ്ട് പുറത്ത് പോയത് ആതിഥേയര്‍ക്ക് തിരിച്ചടിയായി. മൂന്ന് സ്പാനിഷ് താരങ്ങളാണ് ചെന്നൈയ്ക്കായി ആദ്യ ഇലവനില്‍ ഇറങ്ങിയത്.

ടീം മലബാറിയന്‍സിന്റെ മുന്നേറ്റത്തോടെയാണ് കളിആരംഭിച്ചത്. ബോക്‌സില്‍വെച്ച് മലയാളി മധ്യനിരതാരം അര്‍ജ്ജുന്‍ജയരാജിന്റെ അക്രോബാറ്റിക് ഗോള്‍ശ്രമം ചെന്നൈ പ്രതിരോധതാരങ്ങള്‍ അപകടകരമാംവിധം തടഞ്ഞതാണ് ഗോകുലത്തിന്റെ ആദ്യഗോളിന് വഴിയൊരുക്കിയത്. അര്‍ജ്ജുനെ ഫൗള്‍ചെയ്തതിന് ലഭിച്ച പെനാല്‍റ്റി അനായാസം വലയിലെത്തിച്ച് അന്റോണിയോ ജര്‍മെയ്ന്‍ ആതിഥേയര്‍ക്ക് സ്വപ്‌നതുല്യമായ തുടക്കം നല്‍കി.(1-0) എന്നാല്‍ ഈ മുന്‍തൂക്കത്തില്‍ മുന്നേറികളിക്കുന്നതിന് പകരം കളിമറന്ന ഗോകുലത്തെയാണ് പിന്നീടങ്ങോട്ട് കണ്ടത്. തുടരെ തുടരെ ഗോകുലം ബോക്‌സിലേക്ക് കുതിച്ചെത്തിയ അയല്‍ക്കാര്‍ നിരന്തരം അപകടം വിതച്ചു.

സ്പാനിഷ്-ഇന്ത്യന്‍ കോമ്പിനേഷനില്‍ പിറന്ന സുന്ദരനീക്കങ്ങള്‍ക്കൊടുവിലാണ് ചെന്നൈ ടീം സമനില ഗോള്‍ കണ്ടെത്തിയത്. ഗോകുലം പ്രതിരോധനിരയെ വെട്ടിച്ച് മുന്നേറിയ സ്‌പെയിന്‍ മധ്യനിരതാരം നെസ്റ്റര്‍ ജീസസിന്റെ ഉജ്ജ്വലമായ ഷോട്ട് കേരള ഗോളി ഷിബിന്‍ രാജ് തട്ടിയകറ്റി. എന്നാല്‍ ബോക്‌സില്‍ തക്കംപാര്‍ത്തിരുന്ന പ്രവിട്ടോ രാജു അനായാസം പന്ത് പോസ്റ്റിലേക്ക് തിരിച്ചുവിട്ട് സന്ദര്‍ശകര്‍ക്ക് സമനില നേടികൊടുത്തു.(1-1). ആദ്യ ഗോളിന് സമാനമായ നീക്കമാണ് രണ്ടാംഗോളിനും ഇടയാക്കിയത്. ഇടതുവിംഗില്‍ നിന്ന് ചെന്നൈ ക്യാപ്റ്റന്‍ പെട്രോ ജാവിയറിന്റെ ഒറ്റയാന്‍ നീക്കം തടയാനുള്ള കേരള ഡിഫന്‍ഡര്‍ ഡാനിയല്‍ അഡോയുടെ ശ്രമം വിഫലമായി. മുന്നോട്ടിറങ്ങി പന്ത്തട്ടിയകറ്റാനുള്ള കേരള ഗോളി ഷിബിന്‍രാജിനും പിഴച്ചു. ഗോളിയില്ലാത്ത പോസ്റ്റിലേക്ക് പന്തടിച്ച് സ്പാനിഷ് താരം മത്സരത്തില്‍ ആദ്യമായി ചെന്നൈയ്ക്ക് ലീഡ് നേടികൊടുത്തു(2-1).കഴിഞ്ഞ ഹോംമത്സരത്തിലേതുപോലെ രണ്ടാംപകുതിയില്‍ എതിര്‍ ഗോള്‍മുഖത്തേക്ക് ഇരമ്പിയടുക്കുന്ന ഗോകുലത്തെയാണ് രണ്ടാം പകുതിയില്‍ കണ്ടത്.

പൂര്‍ണമായി കായികക്ഷമത വീണ്ടെടുക്കാത്ത അന്റോണിയോ ജര്‍മെയ്‌നെ പിന്‍വലിച്ച് എസ്. രാജേഷിനെ ഇറക്കിയതോടെ മുന്നേറ്റത്തിന് മൂര്‍ച്ചകൂടി. രാജേഷ്-അര്‍ജുന്‍-സുഹൈര്‍ നീക്കങ്ങള്‍ പലപ്പോഴും ചെന്നൈ ബോക്‌സില്‍ അപകടം വിതച്ചെങ്കിലും ഗോള്‍മാത്രം അകന്നുനിന്നു. ഗോകുലം പ്രതിരോധത്തിന്റെ പിഴവില്‍ മൂന്നാംഗോള്‍നേടി അയല്‍ക്കാര്‍ ലീഡ് ഉയര്‍ത്തി. 68ാം മിനിറ്റില്‍ പകരക്കാരനായി ഇറങ്ങിയ അമീറുദ്ദീന്‍ മൊഹിയുദ്ദീനിലൂടെയാണ് ലക്ഷ്യംകണ്ടത്. (3-1) എന്നാല്‍ തൊട്ടടുത്ത മിനിറ്റില്‍ മലയാളിതാരം വി.പി സുഹൈറിലൂടെ ഗോള്‍മടക്കിയ ഗോകുലം അതിവേഗം മത്സരത്തിലേക്ക് തിരിച്ചുവന്നു. (3-2). ബോക്‌സിന് പുറത്തുനിന്ന് മലയാളിതാരം ഉതിര്‍ത്ത ഉജ്ജ്വലമായ വലംകാലന്‍ ഷോട്ടിന് മുന്നില്‍ നിസഹായനായി നില്‍ക്കാനേ ചെന്നൈ ഗോളിക്ക് കഴിഞ്ഞുള്ളൂ.

89ാം മിനിറ്റില്‍ കേരള ക്യാപ്റ്റന്‍ മുഡ്ഡെ മൂസെയുടെ ഗോള്‍ശ്രമം പോസ്റ്റില്‍തട്ടിപുറത്തേക്ക് പോയത് അവിശ്വസിനീയമായാണ് കായിക പ്രേമികള്‍ കണ്ടത്. അവസാനമിനുറ്റില്‍ മത്സരം പരുക്കന്‍ കളിയിലേക്ക്‌നീങ്ങി. മൂന്ന് കളിയില്‍ രണ്ട് പോയന്റുള്ള കേരളം നിലവില്‍ ആറാം സ്ഥാനത്താണ്. എവേമത്സരത്തില്‍ ഞായറാഴ്ച ഷില്ലോംഗ് ലജോംഗുമായാണ് ഗോകുലത്തിന്റെ അടുത്തമത്സരം.

കോഴിക്കോട്: ശക്തമായ മുന്നേറ്റനിരയെ അണിനിരത്തി ഐലീഗില്‍ ആദ്യജയം സ്വന്തമാക്കാനുറച്ച് ഗോകുലം കേരള എഫ്.സി ഇന്ന് രണ്ടാം ഹോം മത്സരത്തിനിറങ്ങുന്നു. വൈകീട്ട് അഞ്ചിന് കോര്‍പറേഷന്‍ സ്റ്റേഡിയത്തില്‍ നടക്കുന്ന പോരാട്ടത്തില്‍ അയല്‍ക്കാരായ ചെന്നൈ സിറ്റി എഫ്.സിയാണ് എതിരാളികള്‍. കരുത്തരായ മോഹന്‍ബഗാനെയും കഴിഞ്ഞതവണത്തെ രണ്ടാംസ്ഥാനക്കാരായ നെറോക്ക എഫ്.സിയേയും സമനിലയില്‍തളച്ച ആതിഥേയര്‍ക്ക് ലീഗില്‍ മുന്നേറാന്‍ ഞായറാഴ്ച വിജയം അനിവാര്യമാണ്. മുന്നേറ്റത്തിന് മൂര്‍ച്ചകൂട്ടാന്‍ ഒരു വിദേശതാരത്തെകൂടി ഗോകുലം കൂടാരത്തിലെത്തിച്ചു. ഐവറികോസ്റ്റ് സ്‌ട്രൈക്കര്‍ ആര്‍തര്‍ കൊവാസിയാണ് ഐ ലീഗില്‍ കേരളടീമിനായി ബൂട്ട്‌കെട്ടുന്നത്. കഴിഞ്ഞദിവസം ക്ലബിനൊപ്പം ചേര്‍ന്ന താരത്തിന്റെ രജിസ്‌ട്രേഷന്‍ നടപടികള്‍ പുരോഗമിക്കുകയാണ്. ചെന്നൈയുമായുള്ള മത്സരത്തില്‍ ഐവറികോസ്റ്റ് താരത്തെ ഉള്‍പ്പെടുത്തുമെന്ന് ടീം മാനേജ്‌മെന്റ് വ്യക്തമാക്കി.

അതേസമയം, കായികപ്രേമികള്‍ ഏറെ പ്രതീക്ഷയര്‍പ്പിച്ച സ്‌ട്രൈക്കര്‍ അന്റോണിയോ ജര്‍മെയ്ന്‍ ഫോമിലേക്ക് ഉയരാത്തത് ഗോകുലം ക്യാമ്പിനെ ആശങ്കയിലാഴ്ത്തുന്നു. ആദ്യ ഹോംമാച്ചില്‍ മികച്ച പ്രകടനത്തിലൂടെ കാണികളുടെ കൈയടിനേടിയ മലയാളി സ്‌ട്രൈക്കര്‍ എസ്. രാജേഷിലും മധ്യനിരതാരം അര്‍ജ്ജുന്‍ ജയരാജിലുമാണ് കേരള സംഘം പ്രതീക്ഷയര്‍പ്പിക്കുന്നത്. ടീം ഘടനയില്‍ വലിയമാറ്റങ്ങളിലെല്ലാതെയാണ് ഗോകുലം കളത്തിലിറങ്ങുകയെന്ന് കോച്ച് ബിനോ ജോര്‍ജ്ജ് പറഞ്ഞു. ചെന്നൈയ്‌ക്കെതിരെ ജയത്തോടെ വിലപ്പെട്ട മൂന്ന് പോയന്റ് സ്വന്തമാക്കുകയാണ് ലക്ഷ്യമെന്നും അദ്ദേഹം വ്യക്തമാക്കി.
ഒരു ജയവും സമനലിലുമായി നാല് പോയന്റുള്ള ചെന്നൈ സിറ്റി എഫ്.സി നിലവില്‍ പോയന്റ് ടേബിളില്‍ രണ്ടാംസ്ഥാനത്താണ്. മൂന്ന് മലയാളിതാരങ്ങളാണ് സ്‌ക്വാര്‍ഡിലുള്ളത്. കഴിഞ്ഞ കേരള പ്രീമിയര്‍ലീഗില്‍ ഗോകുലത്തിനായി കളത്തിലിറങ്ങിയ മലപ്പുറം സ്വദേശി മഷ്‌റൂം ഷെരീഫ് ഇത്തവണ ചെന്നൈ നിരയിലാണ്. നാല് സ്പാനിഷ് താരങ്ങളാണ് അയല്‍ക്കാരുടെ സ്‌ക്വാര്‍ഡിലുള്ളത്. ഗോകുലത്തെ അവരുടെ ഗ്രൗണ്ടില്‍ പരാജയപ്പെടുത്തുക പ്രയാസകരമാണെന്ന് ചെന്നൈ എഫ്.സി. കോച്ച് അക്ബര്‍ നവാസ് പറഞ്ഞു. ഐലീഗിലെ കഴിഞ്ഞ സീസണില്‍ ഇരു ടീമുകളും ഏറ്റുമുട്ടിയപ്പോള്‍ ഒരു സമനിലയും ഒരു വിജയവുമായി ഗോകുലത്തിനായിരുന്നു മുന്‍തൂക്കം.