golwalker – Chandrika Daily

ഗോള്‍വാള്‍ക്കര്‍ വീട്ടില്‍ വന്നപ്പോള്‍ ആദ്യം പരിശോധിച്ചത് കക്കൂസുകള്‍; ഗോള്‍വോള്‍ക്കര്‍ വീട് സന്ദര്‍ശിച്ച അനുഭവം പങ്കുവെക്കുന്ന കുറിപ്പ്

ചന്ദ്രിക വെബ് ഡെസ്‌ക്‌ — Mon, 07 Dec 2020 14:17:45 +0000

കോഴിക്കോട്: ആര്‍എസ്എസ് ആചാര്യന്‍ എം.എസ് ഗോള്‍വോള്‍ക്കര്‍ തന്റെ വീട് സന്ദര്‍ശിച്ച അനുഭവം പങ്കുവെക്കുന്ന യുവതിയുടെ കുറിപ്പ് വൈറലാവുന്നു. ശ്രീദേവി എസ് കര്‍ത്തയാണ് ഫെയ്‌സ്ബുക്കില്‍ അനുഭവം പങ്കുവെക്കുന്നത്. ഇവര്‍ക്ക് മൂന്നു വയസുള്ളപ്പോഴാണ് ഗോള്‍വോള്‍ക്കര്‍ വീടില്‍ വന്നത്. അമ്മ പറഞ്ഞ അനുഭവങ്ങളാണ് ശ്രീദേവി ഫെയ്‌സ്ബുക്കിലൂടെ പങ്കുവെക്കുന്നത്.

ശ്രീദേവി എസ് കര്‍ത്തയുടെ കുറിപ്പ്:

എനിക്ക് 3 വയസുള്ളപ്പോഴാണ് ഗുരുജി ഗോൾവാർക്കർ എന്റെ വീട് സന്ദർശിക്കുന്നത് .എന്റെ അച്ഛൻ ശ്രീ K.S.കർത്താ കേരളത്തിലെ ആദ്യത്തെ സംഘ പ്രചാരകരിൽ ഒരാളായിരുന്നു .പിൽക്കാലത്തു ബിജെപി നേതാക്കാളായ പലരും നിത്യ സന്ദർശകരാ യിരുന്നു വീട്ടിൽ ..3 വയസ് മാത്രമുണ്ടായിരുന്ന എനിക്ക് ഗോൾവാർക്കാരുടെ സന്ദര്ശനത്തെക്കുറിച്ചു വലിയ ഓർമ്മകൾ ഒന്നുമില്ല .പിന്നീട് അമ്മ പറഞ്ഞ കാര്യങ്ങൾ മാത്രമാണ് അതിനെക്കുറിച്ചുള്ള എന്റെ അറിവ് .അത് കൊണ്ടു ഇനി അമ്മയാണ് സംസാരിക്കുക

“ഒരു ദിവസം ഉച്ചയ്ക്കാണ് നിന്റെ അച്ഛനും ഗുരുജിയും കൂടെ 3സംഘ പ്രവർത്തകരും കൂടി വീട്ടിൽ വന്നത് .അന്ന് നമ്മൾ ശാസ്തമംഗലത്തുള്ള ആ വലിയ മുറ്റമുള്ള പഴയ വീട്ടിലാണ് താമസം ..റോസ് കലർന്ന വെളുപ്പ് നിറമുള്ള ഒരാളായിരുന്നു ഗുരുജി .വെള്ള കുർത്തയും പൈജാമയും കട്ടിക്കണ്ണടയും താടിയും ..ഒരു സുന്ദരൻ .വീട്ടിലേക്ക് കടന്നു വരുമ്പോൾ നീയും ഞാനും ഇറയത്ത് നിൽപ്പുണ്ട് .നീ ഒരു വെള്ള പെറ്റിക്കോട്ട് ആണ് ഇട്ടിരുന്നത് .(അതെങ്കിലും നിന്നെ ഇടീക്കാൻ ഞാൻ പെട്ട പാട് !!).നീ ഒരു ഓറഞ്ച് പൊളിച്ചു തിന്നുകയായിരുന്നു .പകുതി തിന്ന ഒരല്ലി വലത്ത് കൈയിലും ബാക്കി പൊളിച്ച ഓറഞ്ച് മറു കയ്യിലും .വാതിൽ കടന്ന് ഗുരുജി മുന്നോട്ട് വന്നു ഗംഭീര സ്വരത്തിൽ കൈകൂപ്പി എന്നോട് പറഞ്ഞു .”ഗൃഹലക്ഷ്മി കോ സാദാർ പ്രണാമ് “ഗൃഹ ലക്ഷ്മി എന്നൊക്കെ കേട്ട് എനിക്ക് ചിരി വന്നെങ്കിലും ഞാൻ തിരിച്ചു കൈക്കൂപ്പി .അപ്പോഴാണ് അദ്ദേഹം നിന്നെ കണ്ടത് .കുനിഞ്ഞു നിന്റെ കവിളിൽ തട്ടി അദ്ദേഹം നിന്നോട് ചോദിച്ചു “ഒരു ഓറഞ്ച് എനിക്കും തരുമോ ?”.നീ ഉടനെ തന്നെ തിന്നു കൊണ്ടിരുന്ന അല്ലിയും ബാക്കിയുണ്ടായിരുന്ന മുഴുവനും ഓറഞ്ചും കൂടി അദ്ദേഹത്തിന്റെ കയ്യിൽ കൊടുത്തിട്ട് പറഞ്ഞു ” ബാക്കി നീ തിന്നോ “..ഞാനങ്ങു വല്ലാതെയായി . എല്ലാവരും പൊട്ടിച്ചിരിച്ചു .ഒരല്ലി ചോദിച്ചപ്പോൾ നീ മുഴുവൻ ഓറഞ്ചും കൊടുത്തത് കണ്ടു ഗുരുജിക്കും വലിയ സന്തോഷമായി .പുള്ളി തിരിഞ്ഞ് നിന്റെ അച്ഛനോട് പറഞ്ഞു “ശ്രീധർജി Am not surprised .After all she is your daughter ഹെയ് നാ ?(ആരെങ്കിലും സഹായം ചോദിച്ചാൽ ബാങ്കിൽ നിന്ന് ലോൺ എടുത്തു കൊടുത്തു പോലും സഹായിച്ചു മുടിഞ്ഞു പോയ ഒരാളാണ് എന്റെ അച്ഛൻ )..അത് കഴിഞ്ഞ് അവർ അകത്തേക്ക് വന്നു .ഇനിയാണ് തമാശ .അകത്തു കയറിയ ഉടനെ ഗുരുജി ചോദിച്ചു “ടോയ്ലറ്റ് കിദർ “? വളരെ ദൂരം യാത്ര ചെയ്തു വന്നയാൾ അല്ലേ ?ടോയ്ലറ്റ് ഉപയോഗിക്കേണ്ടിയിരിക്കും എന്ന് കരുതി അദ്ദേഹത്തിന് ടോയ്ലറ്റ് കാണിച്ചു കൊടുത്തു .അദ്ദേഹം ടോയ്ലറ്റ് വാതിൽ തുറന്നു .അകത്തേക്ക് നോക്കി .അപ്പോൾത്തന്നെ പുറത്തിറങ്ങി .”വേറെ ടോയ്ലറ്റ് ഉണ്ടോ ?”എന്നാരാഞ്ഞു .ഞാൻ അങ്ങ് വിഷമിച്ചു .ഈ ടോയ്ലറ്റിനു എന്തെങ്കിലും പ്രശ്നമുണ്ടോ ?രാവിലെ വൃത്തിയായി കഴുകിയതാണല്ലോ .അപ്പോഴേക്കും അദ്ദേഹം രണ്ടാമത്തെ ടോയ്ലറ്റിനു അകത്തേക്ക് കയറി പൊടുന്നനെ പുറത്തേക്ക് ഇറങ്ങി . ഇനിയുള്ളത് പുറത്തുള്ള ടോയ്ലറ്റ് ആണ് .അവിടെയുമുണ്ടായി വാതിൽ തുറക്കലും ഉടനടി പുറത്തേക്ക് ഇറങ്ങലും എനിക്ക് ആകെ നാണക്കേടായി .എന്താണ് പ്രശ്നമെന്ന് മനസിലായില്ല .അപമാനം കൊണ്ട് ഞാൻ തല കറങ്ങി വീഴുമെന്ന് തോന്നി .അപ്പോഴേക്കും അദ്ദേഹത്തിന്റെ കൂടെ വന്ന ആൾ പറഞ്ഞു “ചേച്ചി വിഷമിക്കണ്ട .അദ്ദേഹം എവിടെ പോയാലും ആദ്യം ടോയ്ലറ്റ് പരിശോധിക്കും .ടോയ്ലറ്റ് വൃത്തിയില്ലെങ്കിൽ അദ്ദേഹം അവിടെന്ന് ഭക്ഷണം കഴിക്കില്ല “അപ്പോഴേക്കും ടോയ്ലറ്റ് ഒക്കെ വൃത്തിയാണെന്ന് കണ്ട് സന്തുഷ്ടനായി അദ്ദേഹം “ഭേഷ് .”സർട്ടിഫിക്കേറ്റ് തന്നു കഴിഞ്ഞു .ഭക്ഷണം വിളമ്പിക്കൊള്ളൂ എന്ന അനുമതിയും കിട്ടി .സത്യത്തിൽ എനിക്ക് അന്ന് വന്ന ദേഷ്യവും അപമാനവും കരച്ചിലും പറയാൻ വയ്യ ..ആഹാരവും ചർച്ചയും ഒക്കെ കഴിഞ്ഞ് എല്ലാവരും പോയിക്കഴിഞ്ഞു ഞാൻ നിന്റെ അച്ഛനോട് പറഞ്ഞു “ഗുരുജിയോ ആരോ ആയിക്കോട്ടെ .മേലാൽ ഇത്തരം മാനസിക രോഗികളെയും കൊണ്ട് ഇങ്ങോട്ട് വന്നേക്കരുത് .”പിന്നെ പോകുന്നതിന് മുൻപ് ഒരു കാര്യമുണ്ടായി .നിന്റെ തലയിൽ കൈ വച്ചു “ബേട്ടിക്കു സത് ബുദ്ധി ഉണ്ടാവട്ടെ “എന്ന് ഗുരുജി അനുഗ്രഹിച്ചു .. എന്നിട്ട് അതുണ്ടായോ മോളെ “?

“അത് കൃത്യമായി ഫലിച്ചു അമ്മേ .അത് കൊണ്ടാണ് ഇത്ര ശക്തമായ സവർണ ശുദ്ധാശുദ്ധ ഫാസിസ്റ്റു ബോധം പേറി നടക്കുന്ന ഈക്കൂട്ടരെ ചത്താലും എതിർക്കണമെന്ന വെളിച്ചം നല്ലോണം തലയിൽ തെളിഞ്ഞു പ്രകാശിക്കുന്നത് ” ..

വാജ്‌പെയിയ്ക്ക് തുരങ്കം പണി അറിയാമോ? വി. മുരളീധരനോട് എന്‍.എസ് മാധവന്‍

ചന്ദ്രിക വെബ് ഡെസ്‌ക്‌ — Mon, 07 Dec 2020 11:37:52 +0000

തിരുവനന്തപുരം: രാജീവ് ഗാന്ധി സെന്റര്‍ ഫോര്‍ ബയോ ടെക്‌നോളജി ക്യാമ്പസിന് ആര്‍എസ്എസ് സൈദ്ധാന്തികന്‍ എംഎസ് ഗോള്‍വാള്‍ക്കറുടെ പേരിടുന്നതിനെ ന്യായീകരിച്ച കേന്ദ്രമന്ത്രി വി. മുരളീധരനെ വിമര്‍ശിച്ച് എഴുത്തുകാരനും നിരൂപകനുമായ എന്‍എസ് മാധവന്‍ ജവഹര്‍ലാല്‍ നെഹ്‌റു വള്ളം കളിക്കാരനായതുകൊണ്ടാണോ കായിക വിനോദത്തിന് അദ്ദേഹത്തിന്റെ പേര് കൊടുത്തത് എന്നായിരുന്നു മുരളീധരന്റെ ചോദ്യം. വാജ്പേയിയ്ക്ക് തുരങ്കംപണി അറിയുമോ എന്നായിരുന്നു എന്‍എസ് മാധവന്റെ മറുചോദ്യം.

”നെഹ്‌റുവിന് വള്ളംകളി അറിയാമോയെന്ന് ചോദിച്ചാല്‍ വാജ്പയിയ്ക്ക് തുരങ്കംപണി അറിയാമോയെന്ന് തിരിച്ചു ചോദിക്കേണ്ടി വരും” എന്‍എസ് മാധവന്‍ ട്വീറ്റ് ചെയ്തു.

നെഹൃവിന്‌ വള്ളംകളി അറിയാമോയെന്ന് ചോദിച്ചാൽ ബാജ്പയിയ്ക്ക്‌ തുരങ്കംപണി അറിയാമോയെന്ന് തിരിച്ചു ചോദിക്കേണ്ടി വരും

— N.S. Madhavan (@NSMlive) December 7, 2020

പ്രതിപക്ഷനേതാവ് രമേശ് ചെന്നിത്തലയും വി. മുരളീധരന്റെ പ്രസ്താവനക്കെതിരെ രംഗത്തെത്തി. വിവരക്കേട് പറയരുത്, അറിയില്ലെങ്കില്‍ ചരിത്രം പഠിക്കുകയാണ് വേണ്ടതെന്നും ചെന്നിത്തല മുരളീധരനെ ഓര്‍മ്മിപ്പിച്ചു.

അതേസമയം ഗോള്‍വാള്‍ക്കറെ ഒളിച്ചുകടത്താനുള്ള തീരുമാനം അക്ഷരാര്‍ത്ഥത്തില്‍ സംഘപരിവാറിന് വിനയായി. കേരളം ഒറ്റക്കെട്ടായി ഈ നീക്കത്തിനെതിരെ രംഗത്ത് വന്നതോടെ സര്‍ക്കാറും ബിജെപി നേതൃത്വവും പ്രതിരോധത്തിലായി. കടുത്ത വര്‍ഗീയവാദിയായിരുന്ന ഗോള്‍വാള്‍ക്കറുടെ യഥാര്‍ത്ഥമുഖം വെളിപ്പെട്ടതോടെ അതിനെ പ്രതിരോധിക്കേണ്ട ബാധ്യതയിലാണ് കേരളത്തിലെ ബിജെപി നേതാക്കള്‍.

ഗോള്‍വാള്‍ക്കറെ തൊലിയുരിച്ചുകാണിച്ച് കേരളം- പേരിട്ടില്ലെങ്കില്‍ വേണ്ട ഞങ്ങളുടെ ആരാധ്യനായ ജിയെ അപമാനിക്കരുതെന്ന് കെ. സുരേന്ദ്രന്‍

ചന്ദ്രിക വെബ് ഡെസ്‌ക്‌ — Mon, 07 Dec 2020 11:21:17 +0000

തിരുവനന്തപുരം: സംഘപരിവാറിന് ഇടം കൊടുക്കാത്ത കേരളത്തിലേക്ക് കേന്ദ്ര ഭരണത്തിന്റെ മറവില്‍ ആര്‍എസ്എസ് ആചാര്യനെ ഒളിച്ചുകടത്താനുള്ള സംഘപരിവാര്‍ ശ്രമം അവര്‍ക്ക് തന്നെ വിനയായി. രാജ്യം കണ്ട ഏറ്റവും വലിയ വര്‍ഗീയവാദിയും വംശീയവാദിയുമായി ഗോള്‍വാള്‍ക്കറുടെ യഥാര്‍ത്ഥ മുഖം കേരളം തുറന്നു കാട്ടിയതോടെ സംഘപരിവാര്‍ നേതാക്കള്‍ ശരിക്കും വെട്ടിലായി. ഭരണപ്രതിപക്ഷ ഭേദമന്യെ കേരളം ഒറ്റക്കെട്ടായി ഗോള്‍വാള്‍ക്കെതിരെ രംഗത്ത് വന്നതോടെ ന്യായീകരിക്കാനാവാതെ സംഘപരിവാര്‍ കേന്ദ്രങ്ങള്‍ കുഴങ്ങി.

ആര്‍എസ്എസിന്റെ രണ്ടാമത്തെ സര്‍സംഘ്ചാലകായ ഗോള്‍വാള്‍ക്കറാണ് ആര്‍എസ്എസ് പിന്തുടരുന്ന വര്‍ഗീയവും വംശീയവുമായ ആശയങ്ങള്‍ക്ക് രൂപം നല്‍കിയത്. അദ്ദേഹം രചിച്ച വിചാരധാര, നാം നമ്മുടെ രാഷ്ട്രം നിര്‍വചിക്കപ്പെടുന്നു എന്നീ പുസ്തകങ്ങളാണ് ആര്‍എസ്എസ് പിന്തുടരുന്ന വര്‍ഗീയ നിലപാടുകളുടെ അടിസ്ഥാന ഗ്രന്ഥങ്ങള്‍. ആര്‍എസ്എസ് മുഖപത്രമായ ഓര്‍ഗനൈസറില്‍ അദ്ദേഹമെഴുതിയ ലേഖനങ്ങളും കടുത്ത വര്‍ഗീയ നിലപാടുകള്‍ ഉള്ളതാണ്.

ഗോള്‍വാള്‍ക്കറുടെ പേരിടാനുള്ള തീരുമാനം വന്നതോടെ കേരളത്തിലെ രാഷ്ട്രീയ നേതാക്കളും ബുദ്ധിജീവികളും അദ്ദേഹത്തിന്റെ അടിത്തറ മാന്തി പുറത്തിട്ടു. കടുത്ത വംശീയവാദിയായിരുന്ന ഗോള്‍വാള്‍ക്കറുടെ യഥാര്‍ത്ഥ മുഖം വെളിപ്പെട്ടതോടെ ബിജെപി നേതാക്കള്‍ ശരിക്കും പ്രതിരോധത്തിലായി. ഗോള്‍വാള്‍ക്കര്‍ക്കെതിരെ ഉയര്‍ന്ന ഒരു ആരോപണത്തിനും കൃത്യമായി മറുപടി പറയാന്‍ ബിജെപി നേതാക്കള്‍ക്കായില്ല. പകരം നെഹ്‌റു വള്ളം തുഴഞ്ഞിട്ടാണോ നെഹ്‌റു ട്രോഫി വള്ളംകളിയെന്ന് പേരിട്ടത് എന്നത് പോലുള്ള മുടന്തന്‍ ന്യായങ്ങളാണ് ബിജെപിയുടെ മുതിര്‍ന്ന നേതാക്കള്‍ പോലും ഉന്നയിച്ചത്. ട്രോളന്‍മാര്‍ക്ക് മറുപടി പറയാവുന്ന തരത്തിലുള്ള വിശദീകരണങ്ങളാണ് ഈ വിഷയത്തില്‍ ബിജെപി നേതാക്കളില്‍ നിന്നുണ്ടായത്.

ഗോള്‍വാള്‍ക്കറുടെ യഥാര്‍ത്ഥമുഖം തുറന്നുകാട്ടപ്പെട്ടതോടെ ബിജെപി നേതാക്കള്‍ അടവുമാറ്റി. പേരിട്ടില്ലെങ്കില്‍ വേണ്ട ഞങ്ങളുടെ ആരാധ്യനായ ജിയെ അപമാനിക്കരുതെന്നായിരുന്നു കഴിഞ്ഞ ദിവസം കെ.സുരേന്ദ്രന്‍ പറഞ്ഞത്. രാജീവ് ഗാന്ധി സെന്റര്‍ ഫോര്‍ ബയോടെക്‌നോളജിയുടെ ആക്കുളത്തുള്ള പുതിയ ക്യാമ്പസിന് ഗോള്‍വാള്‍ക്കറുടെ പേരിടാനായിരുന്നു കേന്ദ്രത്തിന്റെ തീരുമാനം. ഇതാണ് പുതിയ വിവാദങ്ങള്‍ക്ക് കാരണമായത്.

രാജീവ് ഗാന്ധി സെന്ററിന് ഗോള്‍വോള്‍ക്കറുടെ പേര്; രൂക്ഷ വിമര്‍ശനവുമായി കോണ്‍ഗ്രസ്

ചന്ദ്രിക വെബ് ഡെസ്‌ക്‌ — Sat, 05 Dec 2020 13:02:27 +0000

തിരുവനന്തപുരം: രാജീവ് ഗാന്ധി സെന്റര്‍ ഫോര്‍ ബയോടെക്നോളജി (ആര്‍ജിസിബി) രണ്ടാം ക്യമ്പസിന് ആര്‍എസ്എസ് സൈദ്ധാന്തികന്റെ പേരിടുന്നതിനെതിരെ രൂക്ഷ വിമര്‍ശനവുമായി കോണ്‍ഗ്രസ്. അധികാരം കിട്ടുമ്പോള്‍ എന്തുമാകാമെന്ന അവസ്ഥയാണുള്ളതെന്ന് മുന്‍ മുഖ്യമന്ത്രി ഉമ്മന്‍ചാണ്ടി പറഞ്ഞു. എം എസ് ഗോള്‍വാള്‍ക്കറിന്റെ പേര് നല്‍കിയതിനെതിരെ പ്രതിപക്ഷ നേതാവ് രമേശ് ചെന്നിത്തല പ്രധാനമന്ത്രിക്ക് കത്തയച്ചു. മതവിദ്വേഷവും, ഫാസിസവും, അസഹിഷ്ണുതയും മാത്രം മുഖമുദ്രയാക്കുകയും, ഇന്ത്യയിലെ നിരവധി വര്‍ഗീയ കലാപങ്ങള്‍ക്ക് പിന്നില്‍ പ്രവര്‍ത്തിക്കുകയും ചെയ്തുവെന്ന ആരോപണം നേരിടുന്ന സംഘടനയാണ് ആര്‍എസ്എസ് എന്ന് ചെന്നിത്തല ചൂണ്ടിക്കാട്ടി.

ഇത് വര്‍ഗ്ഗീയത വളര്‍ത്താനേ ഉപകരിക്കൂ. രാജ്യത്തെ ശാസ്ത്ര സാങ്കേതിക മേഖലകളില്‍ എന്ത് സംഭാവന നല്‍കിയിട്ടാണ് ഗോള്‍വാള്‍ക്കറുടെ പേര് ഈസ്ഥാപനത്തിന് നല്‍കാന്‍ കേന്ദ്ര സര്‍ക്കാര്‍ തയ്യാറായതെന്നു വ്യക്തമാക്കണം. അതുകൊണ്ട് തന്നെ ഈ തീരുമാനത്തില്‍ നിന്ന് കേന്ദ്ര സര്‍ക്കാര്‍ പിന്‍വാങ്ങണമെന്നും ചെന്നിത്തല കൂട്ടിച്ചേര്‍ത്തു.

ഗോള്‍വോള്‍ക്കറുടെ പേരിടാനുള്ള നീക്കത്തിനെതിരെ ശശി തരൂരും വിമര്‍ശനവുമായി രംഗത്ത് വന്നിരുന്നു. വര്‍ഗീയത പ്രചരിപ്പിച്ചു എന്നതല്ലാതെ ശാസ്ത്രത്തിന് എന്ത് സംഭാവനയാണ് ഗോള്‍വോള്‍ക്കര്‍ നല്‍കിയതെന്ന് ശശി തരൂര്‍ ചോദിച്ചു.

ശശി തരൂര്‍ പറഞ്ഞത്:

തിരുവനന്തപുരത്തെ രാജീവ് ഗാന്ധി ബയോടെക്നോളജി സെന്ററിന്റെ രണ്ടാമത്തെ കാമ്പസിന് ‘ശ്രീ ഗുരുജി മാധവ് സദാശിവ ഗോള്‍വാള്‍ക്കര്‍ നാഷണല്‍ സെന്റര്‍ ഫോര്‍ കോംപ്ലക്സ് ഡിസീസ് ഇന്‍ കാന്‍സര്‍ ആന്‍ഡ് വൈറല്‍ ഇന്‍ഫെക്ഷന്‍’ എന്ന് പേരിടാന്‍ തീരുമാനിച്ചിരിക്കുന്നുവെന്ന് വാര്‍ത്ത വര്‍ഗീയത എന്ന രോഗം പ്രോത്സാഹിപ്പിച്ചു എന്നതല്ലാതെ എം എസ് ഗോള്‍വാള്‍കര്‍ക്ക് ശാസ്ത്രവുമായി എന്താണ് ബന്ധമെന്ന് എത്ര ആലോചിച്ചിട്ടും മനസ്സിലാകുന്നില്ല!

രാജീവ് ഗാന്ധിക്ക് ശാസ്ത്രവുമായി എന്താണ് ബന്ധമെന്നത് രാജീവ് ഗാന്ധിയുടെ ചരിത്രമറിയുന്നവര്‍ക്ക് അറിയാം അദ്ദേഹം ശാസ്ത്ര സംബന്ധിയായ എല്ലാ നവീകരണ പദ്ധതികള്‍ക്കും പ്രവര്‍ത്തനങ്ങള്‍ക്കും പ്രചോദനമായിരുന്നു എന്ന്; അതിനായി ഫണ്ടും അദ്ദേഹം നീക്കിവെച്ചിരുന്നു. ഇത്തരം കാര്യങ്ങള്‍ ചെയ്യാന്‍ ശ്രമിച്ച ബി ജെ പി യുടെ മറ്റു നേതാക്കള്‍ ആരുമില്ലായിരുന്നോ? ഗോള്‍വാള്‍ക്കര്‍ എന്ന ഹിറ്റ്ലര്‍ ആരാധകന്‍ ഓര്‍മ്മിക്കപ്പെടേണ്ടത് 1966ല്‍ വി എച്ച് പി യുടെ ഒരു പരിപാടിയില്‍ അദ്ദേഹം നടത്തിയ ‘മതത്തിന് ശാസ്ത്രത്തിന് മേല്‍ മേധാവിത്വം വേണമെന്ന’ പരാമര്‍ശത്തിന്റെ പേരിലല്ലേ?