ഇന്നലെ നിശബ്ദപ്രചാരണ ദിവസമായിരുന്നിട്ടും വിവാദങ്ങള്‍ക്ക് കുറവൊന്നുമുണ്ടായിരുന്നില്ല. രാഹുല്‍ ഗാന്ധിയുടെ ഗുജറാത്ത് സമാചാര്‍ ടിവിക്കു നല്‍കിയ അഭിമുഖം തെരഞ്ഞെടുപ്പ് ചട്ടലംഘനമാണെന്ന് ചൂണ്ടിക്കാട്ടി ബി.ജെ.പി രംഗത്തെത്തുകയായിരുന്നു. രാഹുല്‍ഗാന്ധിക്കെതിരെ തെരഞ്ഞെടുപ്പ് കമ്മീഷന്റെ നോട്ടീസും ലഭിച്ചു. കമ്മീഷന്റെ മോഡല്‍ കോഡ് ഓഫ് കണ്ടക്ട് പ്രകാരം അഭിമുഖങ്ങള്‍ ചാനലുകള്‍ക്ക് നല്‍കുന്നത് അനുവദനീയമല്ല. ഇത്തരം അഭിമുഖങ്ങള്‍ നല്‍കുന്നത് ഗുരുതരമായ ചട്ടലംഘനമാണ്. എന്നാല്‍ ഗുജറാത്ത് സമാചാര്‍ ടിവിക്കു നല്‍കിയ രാഹുലിന്റെ അഭിമുഖം രണ്ടാംഘട്ട വോട്ടെടുപ്പിന് 48 മണിക്കൂര്‍ മാത്രം ബാക്കി നില്‍ക്കെയാണ് സംപ്രേക്ഷണം ചെയ്തത്. അഭിമുഖത്തില്‍ ഗുജറാത്തില്‍ കോണ്‍ഗ്രസിന്റെ വിജയം സുനിശ്ചിതമാണെന്നും ബി.ജെ.പിക്ക് ഗുജറാത്തിനെകുറിച്ചുള്ളത് നല്ല കാഴ്ചപ്പാടല്ലെന്നും രാഹുല്‍ പ്രതികരിച്ചിരുന്നു.

നോട്ടീസിന്റെ മറുപടി ഡിസംബര്‍ 18നകം നല്‍കണമെന്നും അല്ലാത്തപക്ഷം തുടര്‍നടപടികള്‍ കമ്മീഷന്‍ കൈക്കൊള്ളുമെന്നും നോട്ടീസില്‍ പറയുന്നതായാണ് റിപ്പോര്‍ട്ടുകള്‍. കൂടാതെ അഭിമുഖം സംപ്രേക്ഷണം ചെയ്ത ചാനലുകള്‍ക്ക് തെരഞ്ഞെടുപ്പ് ചട്ടം സെക്ഷന്‍ 126 (1) (ബി) വകുപ്പുകള്‍ ലംഘനം ചുമത്തി കേസെടുക്കാനും ഉത്തരവിട്ടുണ്ട്. അതേസമയം ഇത്തരം അഭിമുഖങ്ങള്‍ സംപ്രേക്ഷണം ചെയുന്ന ചാനലുക്കള്‍ക്കെതിരെ ശക്തമായ നിയമനടപടി സ്വീകരിക്കുമെന്നും കമ്മീഷന്‍ മുന്നറിയിപ്പ് നല്‍കി. അതേസമയം, റോഡ്‌ഷോക്കുള്ള അനുമതി നിഷേധിച്ചതോടെ പ്രധാനമന്ത്രി നരേന്ദ്രമോദി സബര്‍മതി നന്ദിയില്‍ നിന്നു ജലവിമാനത്തില്‍ പറന്നുപൊങ്ങി രണ്ടാംഘട്ട പരസ്യപ്രചാണം നടത്തിയത് വിവാദത്തിലായി. പണം നല്‍കിയാണ് അണികളെ എത്തിച്ചതെന്ന് ബി.ജെ.പി നേതാവും എം.എല്‍.എയുമായ ഭൂഷണ്‍ ഭട്ടിന്റെ ആഹ്വാനത്തില്‍ നിന്നും വ്യക്തമായതോടെ തെരഞ്ഞെടുപ്പ് കമ്മീഷന്‍ നോട്ടീസ് നല്‍കുകയായിരുന്നു.

മെഹ്‌സാനയില്‍ ഉപമുഖ്യമന്ത്രി നിധിന്‍ പട്ടേല്‍, വഡ്ഗാമില്‍ ദളിത് സമരനായകന്‍ ജിഗ്‌നേഷ് മേവാനി രാധന്‍പൂരില്‍ ഒബിസി നേതാവ് അല്‍പേഷ് ഠാക്കൂര്‍ എന്നിവരാണ് രണ്ടാംഘട്ട വോട്ടെടുപ്പിലെ പ്രമുഖ സ്ഥാനാര്‍ത്ഥികള്‍. 22 വര്‍ഷമായി ഗുജറാത്ത് ഭരിക്കുന്നത് ബിജെപിയാണ്. അധികാരം നിലനിര്‍ത്തണമെന്ന ലക്ഷ്യത്തോടെയാണ് ബി.ജെ.പി കച്ചകെട്ടിയിട്ടുള്ളതും. നിയുക്ത അധ്യക്ഷന്‍ രാഹുല്‍ ഗാന്ധിയുടെ രാഷ്ട്രീയ വിജയം കൂടിയായിരിക്കും ഗുജറാത്തിലെ വിജയം. അടുത്ത തിങ്കളാഴ്ചയാണ് വോട്ടെണ്ണല്‍.

2002-ലെ കലാപത്തിനു ശേഷമുള്ള ഗുജറാത്തില്‍ എല്ലാ തെരഞ്ഞെടുപ്പുകളിലും മുസ്‌ലിം വോട്ടിംങ് ശതമാനം കുറഞ്ഞുവരുന്നതായാണ് കണക്ക്. അരികുവല്‍ക്കരിക്കപ്പെട്ട സമൂഹത്തെ വേണ്ട രീതിയില്‍ മുന്നോട്ട് നയിക്കാന്‍ ഒരുപാര്‍ട്ടിയും തയ്യാറാവുന്നില്ലെന്നാണ് യാഥാര്‍ത്ഥ്യം. നിലവില്‍ കേന്ദ്ര-സംസ്ഥാന സര്‍ക്കാരുകളുടെ ഭരണത്തില്‍ അസ്വസ്ഥരാണ് ഗുജറാത്തിലെ മുസ്‌ലിംകള്‍. എന്നാല്‍ കോണ്‍ഗ്രസ് ഉപാധ്യക്ഷന്‍ രാഹുല്‍ഗാന്ധിയുള്‍പ്പെടെയുള്ള കോണ്‍ഗ്രസ് നേതാക്കളുടെ ഗുജറാത്ത് തിരിച്ചുപിടിക്കാനുള്ള ശ്രമത്തില്‍ മുസ്ലിംങ്ങള്‍ പ്രതീക്ഷയിലാണ്. ബറൂച്ച്, സൂററ്റ്, അഹമ്മദാബാദ്, വഡോദര, മെഹ്‌സാന,മോര്‍ബി,രാജ്‌കോട്ട് തുടങ്ങി മുസ്‌ലിം ഭൂരിപക്ഷ പ്രദേശങ്ങളിലുള്ളവര്‍ കോണ്‍ഗ്രസ്സിനെ പിന്തുണക്കുന്നുണ്ട്. രാഹുല്‍ഗാന്ധിയുടെ റാലിയില്‍ ജനപങ്കാളിത്തം കൂടിയതും മോദിയുടെ റാലിയില്‍ കുറഞ്ഞതും ശ്രദ്ധേയമായിരുന്നു. ഹാര്‍ദ്ദിക് പട്ടേല്‍, ജിഗ്നേഷ് മേവ്‌നാനി, അല്‍പേഷ് താക്കൂര്‍ എന്നിവരുമായി മുന്നോട്ട് പോകാനുള്ള രാഹുലിന്റെ തീരുമാനം ഗുജറാത്ത് തെരഞ്ഞെടുപ്പില്‍ നിര്‍ണ്ണായകമാണ്.

അതേസമയം, തെരഞ്ഞെടുപ്പിനുള്ള ആദ്യഘട്ട സ്ഥാനാര്‍ത്ഥി പട്ടിക പുറത്തിറക്കിയതിന് പിന്നാലെ, ഹര്‍ദിക് പട്ടേലിന്റെ നേതൃത്വത്തിലുള്ള പട്ടേല്‍ അനാമത് ആന്ദോളന്‍ സമിതിയും (പാസ്) കോണ്‍ഗ്രസും തമ്മിലുള്ള ബന്ധം മോശമായി. പട്ടികയില്‍ തങ്ങള്‍ക്ക് വേണ്ടത്ര പ്രാതിനിധ്യം ലഭിച്ചില്ലെന്ന് ആരോപിച്ച് പാസ് പ്രവര്‍ത്തകര്‍ സംസ്ഥാനത്തിന്റെ വിവിധ ഭാഗങ്ങളില്‍ കോണ്‍ഗ്രസിനെതിരെ പ്രതിഷേധവുമായി രംഗത്തെത്തുകയായിരുന്നു. കോണ്‍ഗ്രസ്സിന്റെ സൂററ്റിലെ ഇതോടെ ഇന്നലെ നടക്കാനിരുന്ന കോണ്‍ഗ്രസുമായുള്ള ധാരണ പ്രഖ്യാപിക്കേണ്ടിയിരുന്ന രാജ്‌കോട്ടിലെ റാലി ഹര്‍ദിക് പട്ടേല്‍ മാറ്റി.

20 സീറ്റുകള്‍ ആവശ്യപ്പെട്ട സ്ഥാനത്ത് വെറും രണ്ടു സീറ്റുകള്‍ മാത്രമാണ് തങ്ങള്‍ക്ക് അനുവദിച്ചത് എന്നാണ് പാസിന്റെ ആരോപണം. ലളിത് വസോയ, അമിത് തുമ്മര്‍ എന്നീ നേതാക്കള്‍ക്കാണ് കോണ്‍ഗ്രസ് പട്ടികയില്‍ ഇടം നല്‍കിയത്. വസോയ ധരോജി സീറ്റിലും തുമ്മാര്‍ ജുനാഗഥ് സീറ്റിലുമാണ് ജനവിധി തേടുന്നത്. അതേസമയം, പട്ടികയില്‍ മൊത്തം 18 പട്ടേല്‍ സമുദായക്കാരുണ്ട്. സൂറത്തിലും അഹമ്മദാബാദിലും ഇരുപക്ഷത്തെയും പ്രവര്‍ത്തകര്‍ തമ്മില്‍ ഉന്തും തള്ളും നടന്നിരുന്നു. സംസ്ഥാനത്തെ ഒരു കോണ്‍ഗ്രസ് ഓഫീസും പ്രവര്‍ത്തിക്കാന്‍ അനുവദിക്കില്ലെന്നാണ് സൂറത്ത് സിറ്റി പാസ് കണ്‍വീനര്‍ ധര്‍മിക് മാളവ്യയുടെ ഭീഷണി.