അഹമ്മദാബാദ് : ഗുജറാത്തില്‍ ബി.ജെ.പി പൊട്ടിത്തെറിയിലേക്ക്, മന്ത്രിസഭാ രൂപീകരണത്തില്‍ പ്രധാനവകുപ്പുകള്‍ ഉപമുഖ്യമന്ത്രി നിതിന്‍ പട്ടേല്‍ ലഭിക്കാത്തതിനു പിന്നാലെ പാര്‍ട്ടിയുമായ ഇടഞ്ഞ നിതിന്‍ പട്ടേലിന് പിന്തുണ കൂടുന്നു. നിതിന്‍ പിന്തുണ പ്രഖ്യാപിച്ച് സര്‍ദാര്‍ പട്ടേല്‍ ഗ്രൂപ്പ് (എസ്.പി.ജി) കണ്‍വീനര്‍ ലാല്‍ജി പട്ടേലാണ് ഒടുവില്‍ രംഗത്തെത്തിയത്. ഇതോടെ വിജയ് രൂപാണിക്ക് കീഴിലുള്ള പുതിയ മന്ത്രിസഭയുടെ ഭാവി അനിശ്ചിത്വത്തിലായി. പിന്തുണ പ്രഖ്യാപിച്ച ലാല്‍ജി പട്ടേല്‍ പുതുവര്‍ഷ ദിനത്തില്‍ മെഹ്‌സാന മണ്ഡലത്തില്‍ ബന്ദ് ആചരിക്കാനും അദ്ദേഹം ആഹ്വാനം ചെയ്തു. നിതിന്‍ പട്ടേലിനെ മുഖ്യമന്ത്രിയാക്കിയില്ലെങ്കില്‍ സംസ്ഥാന വ്യാപകമായി ബന്ദ് ആചരിക്കുമെന്നും ലാല്‍ജി പട്ടേല്‍ മുന്നറിയിപ്പും നല്‍കി. ഗുജറാത്ത് മുഖ്യമന്ത്രിയാവാന്‍ നിതിന്‍ പട്ടേലാണ് ഏറ്റവും യോഗ്യനെന്നും അദ്ദേഹം അഭിപ്രായപ്പെട്ടു.അനുയായികളോടൊപ്പം നിതിന്‍ പട്ടേലിനെ അദ്ദേഹത്തിന്റെ ഔദ്യോഗിക വസതിയിലെത്തി സന്ദര്‍ശിച്ച ശേഷമാണ് ലാല്‍ജി പട്ടേല്‍ മെഹ്‌സാനയില്‍ ബന്ദ് പ്രഖ്യാപിച്ചത്.

ഞാന്‍ ഇന്ന് നിതിന്‍ പട്ടേലിനെ സന്ദര്‍ശിച്ചിരുന്നു. എന്താണ് ചെയ്യേണ്ടതെന്ന് ആരായുകയും ചെയ്തു. അന്തിമ തീരുമാനം അദ്ദേഹത്തിന്റേതാണ്. രണ്ടു ദിവസത്തിനുള്ളില്‍ ഉചിതമായ തീരുമാനമെടുക്കുമെന്ന് പാര്‍ട്ടി ദേശീയ നേതൃത്വം അറിയിച്ചതയാണ് അദ്ദേഹം ഞങ്ങളോട് പറഞ്ഞത് ലാല്‍ജി പട്ടേല്‍ വ്യക്തമാക്കി.

മുഖ്യമന്ത്രി വിജയ് രൂപാനിയുടെ വസതിയില്‍ ചേര്‍ന്ന യോഗത്തില്‍ ധനവകുപ്പും നഗരവികസന വകുപ്പും വേണമെന്ന പട്ടേലിന്റെ ആവശ്യം തള്ളിയതാണ് പ്രശ്നങ്ങള്‍ക്ക് കാരണം. പ്രധാന വകുപ്പുകളില്‍ നിന്നും തന്നെ മാറ്റിയ രൂപാനിയുടെ നടപടിക്കെതിരെ മാധ്യമങ്ങള്‍ക്കു മുന്നില്‍ രൂക്ഷമായാണ് പട്ടേല്‍ പ്രതികരിച്ചത്. ഇതിനു പിന്നാലെ മന്ത്രിസഭയില്‍ ഉള്‍പ്പെടുത്തിയില്ലെങ്കില്‍ പത്ത് എം.എല്‍.എമാര്‍ക്കൊപ്പം താനും രാജിവെക്കുമെന്ന് മുന്‍മന്ത്രിയും വഡോദര എം.എല്‍.എയുമായ രാജേന്ദ്ര ത്രിവേദിയും ഭീഷണി മുഴക്കിയിട്ടുണ്ട്. ആവശ്യപ്പെട്ട വകുപ്പുകള്‍ കിട്ടിയില്ലെങ്കില്‍ രാജിവയ്ക്കുമെന്നറിയിച്ച് നിതിന്‍ പട്ടേല്‍ പ്രധാനമന്ത്രി നരേന്ദ്ര മോദിക്കും പാര്‍ട്ടി അധ്യക്ഷന്‍ അമിത് ഷായ്ക്കും കത്തയച്ചതായും വിവരമുണ്ട്.

മറ്റു മന്ത്രിമാര്‍ക്ക് ബ്ലോക്ക് ഒന്നിലാണ് ഓഫീസ് നല്‍കിയിരിക്കുന്നത്. എന്നാല്‍ ദളിത് മന്ത്രിയായ ഈശ്വര്‍ പാര്‍മറിന് മറ്റൊരു കെട്ടിടത്തില്‍ മുറി നല്‍കുകയായിരുന്നു. നടപടി സാമൂഹ്യമാധ്യമങ്ങളില്‍ പ്രചരിച്ചതോടെ വിവാദമാവുകയും ചെയ്തു. വിവാദത്തെത്തുടര്‍ന്ന് തനിക്ക് താല്കാലികമായാണ് ബ്ലോക്ക് രണ്ടില്‍ മുറി നല്‍കിയിരിക്കുന്നതെന്ന് ഈശ്വര്‍ പര്‍മാര്‍ പറഞ്ഞു. മന്ത്രിമാരുടെ എണ്ണക്കൂടുതല്‍കൊണ്ടാണ് മുറി ഇങ്ങനെ തന്നത്. വിവാദങ്ങള്‍ അനാവശ്യമാണെന്നും മന്ത്രി പ്രതികരിച്ചു.

വിജയ് രൂപാനിയാണ് ഗുജറാത്ത് മുഖ്യമന്ത്രി. 100 അംഗബലത്തോടെയാണ് ബി.ജെ.പി ഇത്തവണ സര്‍ക്കാര്‍ രൂപീകരിച്ചിരിക്കുന്നത്.