മന്ത്രിമാരായ നാനു വാനാനി, ജയന്തി കാവടിയ, വല്ലഭ് വഗാഷ്യ എന്നിവര്‍ ലിസ്റ്റില്‍ ഉള്‍പ്പെട്ടിട്ടില്ല. മുന്‍ മന്ത്രിയായ ആനന്ദി ബെന്‍ പട്ടേലിന്റെ അടുത്ത സുഹൃത്തും മുന്‍ മന്ത്രി കൂടിയായ വസുഭന്‍ ത്രിവേദി, ഐ,കെ ജഡേജ, ആനന്ദിബെന്‍ തുടങ്ങിയവര്‍ക്കും ലിസ്റ്റില്‍ ഇടമില്ല. സ്പീക്കര്‍ രാമന്‍ലാല്‍, മുന്‍ ഊര്‍ജ്ജമന്ത്രി സൗരഭ് പട്ടേല്‍, മുന്‍ സംസ്ഥാന അധ്യക്ഷന്‍ ആര്‍.സി ഫാല്‍ദ് തുടങ്ങിയവരെ മണ്ഡലം മാറ്റി പരീക്ഷിക്കാനുമാണ് ബി.ജെ.പിയുടെ തീരുമാനം. പട്ടീദാര്‍ വിഭാഗങ്ങള്‍ ശക്തമായ മണ്ഡലങ്ങളില്‍ അതീവശ്രദ്ധയോടെയാണ് ബി.ജെ.പിയുടെ നീക്കം. ഗുജറാത്തില്‍ ഹാര്‍ദ്ദിക് പട്ടേലിന്റെ നേതൃത്വത്തില്‍ പട്ടീദാര്‍ വിഭാഗം ഇളകിമറിഞ്ഞു നില്‍ക്കുന്ന സാഹചര്യത്തിലാണ് പാര്‍ട്ടിയുടെ ആത്മവിശ്വാസക്കുറവ് വെളിപ്പെടുന്ന രീതിയിലുള്ള സ്ഥാനാര്‍ത്ഥി നിര്‍ണ്ണയമുണ്ടാവുന്നത്. 182 മണ്ഡലങ്ങളിലേക്കുള്ള 134 സ്ഥാനാര്‍ത്ഥികളെ ബി.ജെ.പി നേരത്തെതന്നെ തെരഞ്ഞെടുത്തു കഴിഞ്ഞിരുന്നു. ഇതില്‍ നിലവിലുള്ള 30 എം.എല്‍.എമാരെ ഉള്‍പ്പെടുത്തിയിട്ടില്ല. 20 പട്ടേല്‍ വിഭാഗക്കാരടക്കം 77 സ്ഥാനാര്‍ത്ഥികളുടെ പട്ടിക കോണ്‍ഗ്രസ് പുറത്തിറക്കിയതിനു ശേഷമാണ് ബി.ജെ.പിയുടെ മൂന്നാംഘട്ട പട്ടിക പുറത്തുവരുന്നത്.

ഡിസംബര്‍ 9നും 14 നുമായി രണ്ട് ഘട്ടങ്ങളിലായി നടക്കുന്ന തെരഞ്ഞെടുപ്പിന്റെ ഫലം ഡിസംബര്‍ 18നറിയാം. ഹാര്‍ദ്ദിക് പട്ടേല്‍, ജിഗ്‌നേഷ് മേവാനി തുടങ്ങിയ നേതാക്കളെ ഒപ്പം കൂട്ടി നിയമസഭാ തെരഞ്ഞെടുപ്പില്‍ മുന്നേറാനാണ് കോണ്‍ഗ്രസ്സിന്റെ ശ്രമം.

സര്‍വ്വേപ്രകാരം ഗുജറാത്തില്‍ ബി.ജെ.പി തന്നെ അധികാരത്തില്‍ വരുമെന്നാണ് പറയുന്നത്. 113-മുതല്‍ 121സീറ്റുകള്‍ ബി.ജെ.പിക്ക് ലഭിക്കുമ്പോള്‍ 58-64സീറ്റുകളാണ് കോണ്‍ഗ്രസ്സിന് ലഭിക്കുക. എന്നാല്‍ ആഗസ്റ്റില്‍ നടത്തിയ സര്‍വ്വേയില്‍ നിന്നും ബി.ജെ.പി താഴോട്ടുപോയതായാണ് റിപ്പോര്‍ട്ട്. ആദ്യതവണ നടത്തിയ സര്‍വ്വേയില്‍ 59ശതമാനം വോട്ടുകള്‍ ബി.ജെ.പിക്ക് ലഭിക്കുമെന്നായിരുന്നുപ്രവചനം. എന്നാല്‍ പുതിയ സര്‍വ്വേ പ്രകാരം അത് 47ശതമാനമായിമാറി. കോണ്‍ഗ്രസ്സിന് 41ശതമാനം വോട്ടും ലഭിക്കുവെന്നും സര്‍വ്വേ പ്രവചിക്കുന്നു.

സൗരാഷ്ട്ര കച്ച്, വടക്കന്‍ ഗുജറാത്ത് എന്നിവിടങ്ങളില്‍ ബി.ജെ.പിക്ക് വലിയ തിരിച്ചടിയുണ്ടാവുമെന്നും സര്‍വ്വേ പറയുന്നു. എന്നാല്‍ അവിടെ ബി.ജെ.പിക്കും കോണ്‍ഗ്രസ്സിനും 42% വോട്ടുനേടാന്‍ കഴിയും. ബി.ജെ.പിയുടെ ശക്തികേന്ദ്രമായി കണക്കാക്കപ്പെടുന്ന വടക്കന്‍ ഗുജറാത്തില്‍ കോണ്‍ഗ്രസ് 49% വോട്ടുകള്‍ നേടും. ബി.ജെ.പിയുടെ വോട്ടുഷെയര്‍ 44% ആയി കുറയുമെന്നും അഭിപ്രായ സര്‍വ്വേ പറയുന്നു.

അതേസമയം, തെരഞ്ഞെടുപ്പില്‍ ബി.ജെ.പിക്കൊപ്പം നില്‍ക്കാതെ ഒറ്റക്ക് മത്സരിക്കുമെന്നാണ് ശിവസേനയുടെ നിലപാട്. പാര്‍ട്ടിയുടെ ഔദ്യോഗിക വൃത്തങ്ങള്‍ ഇക്കാര്യം അറിയിച്ചു. എന്നാല്‍ മറ്റേതെങ്കിലും പാര്‍ട്ടി സഖ്യത്തിനൊപ്പം നില്‍ക്കുമോ എന്നതിനെക്കുറിച്ച് ശിവസേന വ്യക്തമാക്കിയിട്ടില്ല. പാര്‍ട്ടിയുടെ ശക്തി കേന്ദ്രങ്ങളായ സൂററ്റ് മുതല്‍ അഹമ്മദാബാദ് വരെയുള്ള മണ്ഡലങ്ങളില്‍ ശിവസേന ഒറ്റക്ക് മത്സരിക്കുമെന്ന് ഗുജറാത്ത് വിംഗ് കോര്‍ഡിനേറ്റര്‍ രാജുല്‍ പട്ടേല്‍ പറഞ്ഞു. രാജ്‌കോട്ടിലുള്‍പ്പെടെ സ്ഥാനാര്‍ഥികളെ നിര്‍ത്തുന്നതിനെക്കുറിച്ചുള്ള ചര്‍ച്ച നടക്കുകയാണ്. എന്നാല്‍ തെരഞ്ഞെടുപ്പില്‍ ഏതെങ്കിലും രാഷ്ട്രീയപാര്‍ട്ടിക്കൊപ്പം നില്‍ക്കുമോ എന്നത് പാര്‍ട്ടി അധ്യക്ഷന്‍ ഉദ്ധവ് താക്കറെയുടെ അന്തിമതീരുമാനത്തിനനുസരിച്ചാണെന്നും പട്ടേല്‍ കൂട്ടിച്ചേര്‍ത്തു. ഗുജറാത്തില്‍ ബി.ജെ.പിയുമായി അകന്ന ശിവസേന നേതാവ് താക്കറെ എന്‍.സി.പി നേതാവ് ശരത് പവാറുമായും മമതബാനര്‍ജിയുമായും കൂടിക്കാഴ്ച്ച നടത്തിയിരുന്നു. ഡിസംബര്‍ ഒന്‍പതിനും പതിനാലിനുമാണ് ഗുജറാത്തില്‍ തെരഞ്ഞെടുപ്പ്.

ഗുജറാത്ത് തെരഞ്ഞെടുപ്പ് അടുത്തിരിക്കെയാണ് ബി.ജെ.പിയുടെ അടിസ്ഥാന രഹിതമായ ആരോപണമുണ്ടാവുന്നത്. ഇതിന് പിന്നാലെ ബി.ജെ.പിക്ക് മറുപടിയുമായി പട്ടേല്‍ രംഗത്തെത്തി. ഗുജറാത്ത് തെരഞ്ഞെടുപ്പ് മനസ്സില്‍ കണ്ട് ദേശീയ സുരക്ഷയുമായി ബന്ധപ്പെട്ട കാര്യങ്ങളില്‍ ബി.ജെ.പി രാഷ്ട്രീയം കളിക്കുകയാണെന്ന് പട്ടേല്‍ പറഞ്ഞു. അറസ്റ്റിലായ വ്യക്തിയുടെ നിയമനവുമായി തന്നെ ബന്ധപ്പെടുത്താനാവില്ലെന്നും പട്ടേല്‍ വ്യക്തമാക്കി. അതേസമയം, അറസ്റ്റിലായ വ്യക്തി താല്‍ക്കാലിക ജീവനക്കാരനാണ്. ഒക്ടോബര്‍ നാലിന് രാജിവെക്കുകയും ചെയ്തിരുന്നു. പട്ടേലിനോ അദ്ദേഹത്തിന്റെ കുടുംബാംഗങ്ങള്‍ക്കോ ആസ്പത്രിയുമായി ബന്ധമില്ലെന്നും അധികൃതര്‍ വ്യക്തമാക്കി.

സൂററ്റില്‍ നിന്നും ഐ.എസ് ബന്ധമുണ്ടെന്നാരോപിച്ച് അറസ്റ്റിലായവരില്‍ ഒരാള്‍ക്ക് അഹമ്മദ് പട്ടേലുമായി ബന്ധമുണ്ടെന്നായിരുന്നു ആരോപണം. ഗുജറാത്ത് മുഖ്യമന്ത്രി വിജയ് രൂപാനിയാണ് ആരോപണവുമായി രംഗത്തെത്തിയത്. അറസ്റ്റിലായവരില്‍ ഒരാള്‍ അങ്കലേശ്വറിലെ സര്‍ദാര്‍ പട്ടേല്‍ ആസ്പത്രിയില്‍ ലാക് ടെക്‌നീഷ്യനായിരുന്നുവെന്നും അറസ്റ്റിലാവുന്നിന് രണ്ടു ദിവസം മുമ്പ് മാത്രമാണ് ജോലിയില്‍ നിന്നും രാജിവെക്കുന്നതെന്നുമായിരുന്നു ബി.ജെ.പിയുടെ വാദം. ആസ്പത്രിയുടെ ട്രസ്റ്റില്‍ ഒരാളാണ് പട്ടേല്‍. പട്ടേല്‍ നടത്തുന്ന ആസ്പത്രിയിലെ ഒരാള്‍ ഇത്തരത്തില്‍ പിടിക്കപ്പെടുന്നത് ഗുരുതരമാണെന്നും ബി.ജെ.പി പറഞ്ഞിരുന്നു. സോണിയാഗാന്ധിയും രാഹുല്‍ഗാന്ധിയും ഇതിന് മറുപടി പറയണമെന്നുമായിരുന്നു ബി.ജെ.പിയുടെ ആവശ്യം. കൂടാതെ പട്ടേല്‍ എം.പി സ്ഥാനം രാജിവെക്കണമെന്നും ബി.ജെ.പി ആവശ്യപ്പെട്ടിരുന്നു. അടിസ്ഥാന രഹിതമായ ആരോപണത്തിന് ശക്തമായ തിരിച്ചടി നല്‍കാനാണ് കോണ്‍ഗ്രസ്സിന്റെ തീരുമാനം. വിജയ് രൂപാനിക്കെതിരെ മാനനഷ്ടക്കേസ് നല്‍കാനാണ് കോണ്‍ഗ്രസ് തീരുമാനിച്ചിരിക്കുന്നത്. ഇതിനായി കോണ്‍ഗ്രസ് നിയമോപദേശം തേടി. ഇതോടെ ബി.ജെ.പിയുടെ നില പരുങ്ങലിലാവുകയായിരുന്നു.

രാജ്യസഭാ എംപിയായി തിരിച്ചെത്തിയ പട്ടേല്‍ പ്രധാനമന്ത്രി നരേന്ദ്രമോദിക്കും ബി.ജെ.പി ദേശീയ അധ്യക്ഷ്യന്‍ അമിത് ഷാക്കുമെതിരെ കടുത്ത ആരോപണങ്ങളാണ് ഉയര്‍ത്തിയത്.

കോണ്‍ഗ്രസ് ഗുജറാത്തില്‍ ഭരണം തിരിച്ചുപിടിക്കുമെന്ന് പറഞ്ഞ പട്ടേല്‍, ബിജെപി സര്‍ക്കാര്‍ രാജ്യത്തെ അന്വേഷണ ഏജന്‍സികളെ രാഷ്ട്രീയ ലക്ഷ്യങ്ങള്‍ക്കുവേണ്ടി ദുരുപയോഗം ചെയ്യുകയാണെന്നും ആരോപിച്ചു. ഗുജറാത്തിലെ രാജ്യസഭാ തിരഞ്ഞെടുപ്പില്‍ ബി.ജെ.പി തന്ത്രങ്ങള്‍ മറികടന്ന് വിജയം നേടിയതിന് പിന്നാലെയാണ് മുതിര്‍ന്ന കോണ്‍ഗ്രസ് നേതാവ് കൂടിയായ പട്ടേല്‍ വരാനിരിക്കുന്ന ഗുജറാത്ത് തെരഞ്ഞെടുപ്പില്‍ പ്രവര്‍ത്തകരില്‍ ആത്മവിശ്വാസം പ്രകടിപ്പിച്ചത്. ജന്ദര്‍മന്തറില്‍ യൂത്ത് കോണ്‍ഗ്രസ് സംഘടിപ്പിച്ച പ്രതിഷേധ മാര്‍ച്ചിന്റെ ഉദ്ഘാടന ചടങ്ങിനെത്തിയതായിരുന്നു അദ്ദേഹം.

പ്രധാനമന്ത്രി നരേന്ദ്രമോദിയെയും ബി.ജെ.പി അധ്യക്ഷന്‍ അമിത് ഷായെയും ലക്ഷ്യംവച്ചാണ് അദ്ദേഹം പരോക്ഷ വിമര്‍ശം ഉന്നയിച്ചത്.
”ബി.ജെ.പിക്കാര്‍ പോലും ഈ രണ്ടു പേരെ ഭയക്കുകയാണ്. നിങ്ങള്‍ക്ക് അറിയാം ആ രണ്ടു പേരെ. ഒരാള്‍ നിയമമേഖയിലെ അധികാരിയാണ് രണ്ടാമന്‍ അതിനു മുകളിലെ അധികാരിയുമാണ്. അവര്‍ എല്ലാ ഏജന്‍സികളേയും ദുരുപയോഗം ചെയ്യുകയാണ്”, ബി.ജെ.പി നേതൃത്വത്തിന്റെ പേര് പറയാതെ പട്ടേല്‍ പറഞ്ഞു.

ഓരോ വര്‍ഷവും രണ്ട് കോടി തൊഴിലവസരങ്ങള്‍ സൃഷ്ടിക്കുമെന്നായിരുന്നു ബി.ജെ.പിയുടെ വാഗ്ദാനം. കര്‍ഷകരുടെ വരുമാനം വര്‍ധിക്കും, വിലക്കയറ്റവും അഴിമതിയും കുറച്ചുകൊണ്ടുവരും തുടങ്ങി അനേകം വാഗ്ദാനങ്ങളുമായാണ് ബിജെപി എത്തിയത്. എന്നാല്‍ ബി.ജെ.പി എല്ലാ മേഖലയിലും പരാജയപ്പെട്ടുവെന്ന് പട്ടേല്‍ കുറ്റപ്പെടുത്തി. രാജ്യത്തെ യുവാക്കള്‍തന്നെ ബി.ജെ.പിയോട് അധികാരം വിട്ടൊഴിയാന്‍ ആവശ്യപ്പെടുമെന്നും അഹമദ് പട്ടേല്‍ ബിജെപിയെ പരിഹസിച്ചു.

അമിത്ഷായുടെ എക്കാലത്തേയും എതിരാളിയായിരുന്നു കോണ്‍ഗ്രസ് നേതാവും സോണിയാഗാന്ധിയുടെ വിശ്വസ്തനുമായ അഹമ്മദ് പട്ടേല്‍. സോണിയയുടെ വിശ്വസ്തന്‍ ആയതുകൊണ്ടുമാത്രമല്ല, അമിത്ഷായെ പല കേസുകളിലും കുടുക്കിയത് പട്ടേല്‍ ആണെന്നുമാണ് ഷായുടെ വിശ്വാസം. ഈ കാരണങ്ങള്‍ കൊണ്ട്തന്നെ താന്‍ രാജ്യസഭയിലുണ്ടാവുമ്പോള്‍ പട്ടേല്‍ ഉണ്ടാവരുതെന്നത് ഷായുടെ വാശിയായിരുന്നു. കോണ്‍ഗ്രസ് സ്ഥാനാര്‍ത്ഥിയായി തന്റെ ഏറ്റവും വലിയ രാഷ്ട്രീയ എതിരാളിയായ പട്ടേല്‍ എത്തുന്നുവെന്നറിഞ്ഞതു മുതല്‍ അമിത് ഷാ രംഗത്തിറങ്ങി. ഏതുനിലക്കും പട്ടേലിനെ തോല്‍പ്പിക്കാനായിരുന്നു പദ്ധതി. വഗേലയടക്കമുള്ള കോണ്‍ഗ്രസ് വിമത നേതാക്കളെ കണ്ട് ചര്‍ച്ച നടത്തുകയും ചെയ്തു അമിത് ഷാ. എന്നാല്‍ നാടകീയ രംഗങ്ങള്‍ക്കൊടുവില്‍ വിജയം പട്ടേലിനായിരുന്നു. ഗുജറാത്തില്‍ നിന്നും ഡല്‍ഹിയിലെത്തിയ തെരഞ്ഞെടുപ്പ് ചൂട് ഏറെ വൈകി പുലര്‍ച്ചയോടെ അവസാനിക്കുമ്പോള്‍ രണ്ട് വോട്ടുകള്‍ റദ്ദ് ചെയ്ത നടപടിയില്‍ വിജയം പട്ടേലിനൊപ്പമെത്തി. ഇതോടെ താന്‍ രാജ്യസഭയിലെത്തുമ്പോള്‍ തന്റെ കടുത്ത രാഷ്ട്രീയ എതിരാളി അവിടെ ഉണ്ടാവരുതെന്നുള്ള അമിത് ഷായുടെ ആഗ്രഹം പൊലിയുകയായിരുന്നു.

വോട്ട് രേഖപ്പെടുത്തി കഴിഞ്ഞാല്‍ അസാധുവാക്കാന്‍ കഴിയില്ല, പാര്‍ട്ടി മാറി വോട്ട് ചെയ്യുന്നത് തടയാന്‍ നിയമില്ല, പാര്‍ട്ടിക്ക് വേണമെങ്കില്‍ എം.എല്‍.എമാര്‍ക്ക് നേരെ നടപടി എടുക്കാം, ഈ ഘട്ടത്തില്‍ കൂറുമാറ്റ നിയമം ബാധകമാകില്ല തുടങ്ങിയവയാണ് കമ്മീഷന്റെ വാദം.

കോണ്‍ഗ്രസിന്റെ പരാതി തിരഞ്ഞെടുപ്പ് കമ്മീഷന്‍ പരിശോധിക്കുന്നതിനിടെ നാടകീയ നീക്കങ്ങളാണ് രാജ്യതലസ്ഥാനത്ത് അരങ്ങേറിയത്. കേന്ദ്രമന്ത്രിമാരും മുതിര്‍ന്ന ബി.ജെ.പി നേതാക്കളും അടക്കമുള്ളവര്‍ സമ്മര്‍ദ്ദ നീക്കങ്ങളുമായി തിരഞ്ഞെടുപ്പ് കമ്മീഷന്‍ ആസ്ഥാനത്തെത്തി. അരുണ്‍ ജെയ്റ്റ്‌ലി, ആര്‍.എസ് പ്രസാദ്, നിര്‍മല സീതാരാമന്‍, മുക്താര്‍ അബ്ബാസ് നഖ്വി, പീയുഷ് ഗോയല്‍, ധര്‍മേന്ദ്ര ഗോയല്‍ എന്നിവരാണ് തിരഞ്ഞെടുപ്പ് കമ്മീഷന്‍ ആസ്ഥാനത്തെത്തിയത്. കോണ്‍ഗ്രസ് നേതാക്കളായ ആനന്ദ് ശര്‍മ, രണ്‍ദീപ് സുര്‍ജേവാല എന്നിവരും തൊട്ടുപിന്നാലെ അവിടെയെത്തി.

വോട്ടെണ്ണല്‍ അഞ്ചു മണിക്ക് തുടങ്ങുമെന്നാണ് കരുതിയിരുന്നത്. എന്നാല്‍ രാഘവ്ജി പട്ടേല്‍, ഭോല ഗോഹില്‍ എന്നിവര്‍ ബാലറ്റ് പേപ്പര്‍ കോണ്‍ഗ്രസിന്റെയും ബി.ജെ.പിയുടെയും ഏജന്റുമാരെ കാണിച്ചുവെന്നാണ് ആരോപണം. ബി.ജെ.പി അധ്യക്ഷനും രാജ്യസഭാ സ്ഥാനാര്‍ഥിയുമായ അമിത് ഷായെയും ബാലറ്റ് പേപ്പര്‍ കാണിച്ചുവെന്ന് കോണ്‍ഗ്രസ് നേതാക്കള്‍ ആരോപിക്കുന്നു. ഇതിന്റെ വീഡിയോ ദൃശ്യങ്ങള്‍ ഉണ്ടെന്നും കോണ്‍ഗ്രസ് അവകാശപ്പെടുന്നു.

കോണ്‍ഗ്രസ് ഉന്നയിച്ച പരാതിയില്‍ തീരുമാനമാകാതെ വോട്ടെണ്ണല്‍ തുടങ്ങില്ലെന്ന് പ്രിസൈഡിങ് ഓഫീസര്‍ ഡി.എം പാട്ടില്‍ പറഞ്ഞു. പരാജയപ്പെടുമെന്ന് ഉറപ്പായ നിരാശയിലാണ് കോണ്‍ഗ്രസ് പരാതിയുമായി രംഗത്തെത്തിയിട്ടുള്ളതെന്ന് ബി.ജെ.പി ആരോപിച്ചു. കോണ്‍ഗ്രസിന്റെ രാജ്യസഭാ സ്ഥാനാര്‍ഥി കടുത്ത ഭീഷണി നേരിടുന്നതിനിടെയാണ് അവര്‍ പരാതിയുമായി രംഗത്തെത്തിയിട്ടുള്ളത്. കോണ്‍ഗ്രസില്‍നിന്ന് ബി.ജെ.പിയിലെത്തിയ ബല്‍വന്ത് സിങ് രാജ്പുട്ടാണ് പട്ടേലിന്റെ എതിരാളി.

മുന്‍പ് രാജസ്ഥാനിലും ഹരിയാനയിലും സമാന സാഹചര്യത്തില്‍ വോട്ടിങ് റദ്ദാക്കിയിരുന്നു.