സംഭവവുമായി ബന്ധപ്പെട്ട് സാമൂഹികമാധ്യമങ്ങളിലൂടെ പ്രചരിക്കുന്ന കാര്യങ്ങള്‍ ശരിയല്ലെന്ന് അദ്ദേഹം പറഞ്ഞു. ഇരുകുടുംബങ്ങളും തമ്മിലുള്ള അഭിപ്രായ വ്യത്യാസമാണ് വിവാഹം വേണ്ടെന്ന് വെച്ചതിന് കാരണമെന്നും അദ്ദേഹം കൂട്ടിച്ചേര്‍ത്തു.

വിവാഹം മുടങ്ങിയത് പെണ്‍കുട്ടി കാമുകനൊപ്പം പോയതുകൊണ്ടാണെന്ന് സാമൂഹിക മാധ്യമങ്ങളിലൂടെ പരന്നതോടെ പെണ്‍കുട്ടിയെ അധിക്ഷേപിച്ചും പരിഹസിച്ചും പോസ്റ്റുകള്‍ പ്രചരിച്ചു. ഈ സമയത്ത് വിശദീകരണവുമായി പെണ്‍കുട്ടിയുടെ ബന്ധുക്കളും കാമുകനെന്ന് പറയപ്പെടുന്ന ആണ്‍കുട്ടിയും രംഗത്തെത്തിയിരുന്നു. എന്നിട്ടും ഇവരെ അനുകൂലിച്ചും പ്രതികൂലിച്ചും വാദങ്ങള്‍ നടക്കുന്നതിനിടെയാണ് സ്ഥലം എം.എല്‍.എ വിവാദ വിവാഹത്തില്‍ വിശദീകരണം നല്‍കുന്നത്.

വിവാഹത്തിന് മുമ്പ് തന്നെ പെണ്‍കുട്ടി വീട്ടുകാരെ പ്രണയബന്ധം അറിയിച്ചിരുന്നുവെന്ന് ബന്ധുക്കള്‍ പറയുന്നു. വിവാഹം കഴിക്കാന്‍ പോകുന്ന ചെറുക്കനേയും ഇത് അറിയിച്ചിരുന്നു. എന്നാല്‍ വീട്ടുകാര്‍ പ്രണയബന്ധത്തെ എതിര്‍ക്കുകയായിരുന്നു. വീട്ടുകാര്‍ എതിര്‍ത്തതോടെ ബന്ധത്തെക്കുറിച്ച് വരനോടും പെണ്‍കുട്ടി പറഞ്ഞു. എന്നാല്‍ വരനും കാര്യങ്ങള്‍ മനസ്സിലാക്കിയില്ല. നീ പഴയകാര്യം മറന്നേക്കെന്നായിരുന്നു വരന്റെ ഭാഗമെന്നും ബന്ധുക്കള്‍ വെളിപ്പെടുത്തുന്നു. തുടര്‍ന്നാണ് കാര്യങ്ങള്‍ കുഴയുന്നത്. താലികെട്ടിനുശേഷം മണ്ഡപത്തിലെത്തിയ കാമുകനൊത്ത് പെണ്‍കുട്ടി പോകുകയായിരുന്നു. വരന്റെ ചെവിയില്‍ കാര്യം പറഞ്ഞ് ഇറങ്ങുമ്പോഴായിരുന്നു വരന്‍ പെണ്‍കുട്ടിയോട് ദേഷ്യപ്പെട്ടത്. പിന്നീട് ചിത്രങ്ങളുള്‍പ്പെടെ വ്യാപകമായി പ്രചരിക്കുകയായിരുന്നു.

ഗുരുവായൂരില്‍ വെച്ച് കഴിഞ്ഞ ഞായറാഴ്ച്ചയായിരുന്നു വിവാഹം. കാമുകനൊപ്പം പെണ്‍കുട്ടി ഇറങ്ങിപ്പോയതോടെ ബന്ധുക്കള്‍ തമ്മില്‍ അടിപിടിയായെന്നായിരുന്നു വാര്‍ത്ത. പെണ്‍കുട്ടിയുടെ ചിത്രവുമുള്‍പ്പെടെ സാമൂഹികമാധ്യമങ്ങളും പരിഹാസവും അധിക്ഷേപവുമായി രംഗത്തെത്തി. പിറകെ വധുവില്ലാതെ റിസപ്ഷന്‍ ആഘോഷിക്കുന്ന വരനും ആഘോഷങ്ങളായി. ‘തേപ്പുകാരി’ പെണ്‍കുട്ടി തലയില്‍ നിന്ന് പോയതിന്റെ ആഘോഷങ്ങളാണെന്നായിരുന്നു തലക്കെട്ട് വാചകങ്ങള്‍. സാമൂഹിക മാധ്യമങ്ങളിലെ പ്രചാരണങ്ങള്‍ അതിരുവിട്ടപ്പോഴാണ് സംഭവത്തില്‍ ഇങ്ങനെയൊരു തെറ്റിദ്ധാരണയുണ്ടെന്ന് വെളിപ്പെടുത്തി പെണ്‍കുട്ടിയുടെ ബന്ധുക്കളും സുഹൃത്തുക്കളും രംഗത്തെത്തുന്നത്. നഷ്ടപരിഹാരമായി എട്ടുലക്ഷം രൂപ വരന് നല്‍കിയെന്നാണ് റിപ്പോര്‍ട്ട്.