H1 B visa – Chandrika Daily

എച്ച് -1 ബി വിസ നടപടി ക്രമങ്ങള്‍ യുഎസ് കര്‍ശനമാക്കുന്നു

chandrika — Fri, 23 Feb 2018 15:35:38 +0000

വാഷിങ്ടണ്‍: വിദഗ്ധ മേഖലയില്‍ ജോലി ചെയ്യുന്നവര്‍ക്കായി അനുവദിക്കുന്ന എച്ച് -1 ബി വിസ നടപടിക്രമങ്ങള്‍ യുഎസ് കൂടുതല്‍ കര്‍ശനമാക്കുന്നു. മാതൃകമ്പനിയില്‍ നിന്നു മറ്റു കമ്പനികളിലേക്ക് ഡെപ്യൂട്ടേഷനില്‍ പോകുന്ന ജീവനക്കാര്‍ക്ക് നല്‍കുന്ന വിസക്കുള്ള നടപടിക്രമങ്ങളാണ് കര്‍ശനമാക്കിയത്. യുഎസിലെ ഇന്ത്യന്‍ കമ്പനികളെയും ജീവനക്കാരെയും ബാധിക്കുന്ന തരത്തിലാണ് മാറ്റം. ജീവനക്കാരെ മറ്റൊരു കമ്പനിയിലേക്ക് എന്തിനാണ് വിടുന്നതെന്നുള്ള വിശദീകരണം കമ്പനി തന്നെ നല്‍കണം. ഒപ്പം ജോലിയില്‍ ഇയാള്‍ക്കുള്ള നൈപുണ്യവും വ്യക്തമാക്കണം. തുടര്‍ന്ന് അവര്‍ കമ്പനിയില്‍ ജോലി ചെയ്യുന്ന അത്രയും കാലത്തേക്കുള്ള വിസ അനുവദിക്കാമെന്നാണ് പുതിയ ഉത്തരവ്.
യുഎസിലെ ബാങ്കിങ്-ട്രാവല്‍ ഏജന്‍സി-കൊമേഴ്‌സ്യല്‍ സര്‍വീസ് വിഭാഗങ്ങളിലായി ഒട്ടേറെ ഇന്ത്യക്കാരാണ് എച്ച്1 ബി വിസയില്‍ ജോലി ചെയ്യുന്നത്. ഡെപ്യൂട്ടേഷന്റെ ഭാഗമായി മറ്റു കമ്പനികളിലേക്കു പോകുന്നവര്‍ക്ക് മൂന്നു വര്‍ഷത്തില്‍ താഴെ മാത്രമേ വിസ നല്‍കുകയുള്ളു എന്നും ഉത്തരവില്‍ പറയുന്നു. ജോലികളില്‍ നാട്ടുകാര്‍ക്ക് മുന്‍ഗണന നല്‍കുകയെന്ന പ്രസിഡന്റ് ഡൊണാള്‍ഡ് ട്രംപിന്റെ നയത്തിന്റെ അടിസ്ഥാനത്തിലാണ് പുതിയ നിയന്ത്രണങ്ങള്‍.

എച്ച് 1 ബി വിസ നയത്തില്‍ ട്രംപ് ഒപ്പുവച്ചു; ഇന്ത്യക്കാര്‍ ആശങ്കയില്‍

chandrika — Wed, 19 Apr 2017 17:50:55 +0000

വാഷിങ്ടണ്‍: അമേരിക്കന്‍ കമ്പനികളെ പ്രോത്സാഹിപ്പിക്കുക, അമേരിക്കക്കാര്‍ക്ക് തൊഴില്‍ ഉറപ്പു വരുത്തുക തുടങ്ങിയ ലക്ഷ്യങ്ങളോടെ നടപ്പാക്കുന്ന പുതിയ എച്ച് 1 ബി വിസ നയത്തിന്റെ ഉത്തരവില്‍ യു.എസ് പ്രസിഡന്റ് ഡൊണാള്‍ഡ് ട്രംപ് ഒപ്പുവച്ചു. വിസ്‌കോണ്‍സിനിലെ മില്‍വോ കീയില്‍ വെച്ചാണ് ട്രംപ് ഉത്തരവില്‍ ഒപ്പുവെച്ചത്. എച്ച് 1 ബി വിസ പദ്ധതി അമേരിക്കക്കാരുടെ അവസരം നഷ്ടപ്പെടുത്തുന്നുവെന്ന് വൈറ്റ് ഹൗസ് നേരത്തെ വ്യക്തമാക്കിയിരുന്നു. ഫെഡറല്‍ കരാറുകളിലൂടെ അമേരിക്കയുടെ ഉല്‍പന്നങ്ങള്‍ വാങ്ങുന്നത് വര്‍ധിപ്പിക്കുക എന്ന ലക്ഷ്യത്തോടെയാണ് എച്ച് 1 ബി വിസയില്‍ മാറ്റം കൊണ്ടുവരുന്നത്. അതേസമയം, വീസ നടപടി ക്രമങ്ങള്‍ പൂര്‍ത്തിയാകുന്നതിനാല്‍ പുതിയ നിയമം നിലവില്‍ അനുവദിച്ച 8500 എച്ച്1 ബി വീസകളെ ബാധിക്കില്ല. എന്നാല്‍ വരും വര്‍ഷങ്ങളില്‍ ഇന്ത്യന്‍ ഐ.ടി കമ്പനികള്‍ക്കും ജീവനക്കാര്‍ക്കും നിയമം തിരിച്ചടിയാകുമെന്നാണ് വിലയിരുത്തല്‍. ചില കമ്പനികള്‍ കൂടുതല്‍ വിദേശ തൊഴിലാളികള്‍ക്ക് അവസരം നല്‍കുകയും ശമ്പള നിരക്ക് കുറക്കുകയും ചെയ്യുന്ന സാഹചര്യത്തിലാണ് പുതിയ നിയമം അവതരിപ്പിച്ചത്. ഐ.ടി കമ്പനികള്‍ സാധാരണ ഉപയോഗപ്പെടുത്താറുള്ള ഗസ്റ്റ് വര്‍ക്കര്‍ സംവിധാനം കാരണം സ്വദേശികള്‍ക്ക് തൊഴില്‍ നഷ്ടപ്പെടുന്നതായും വേതന നിരക്ക് കുറയുന്നതായും യു.എസ് ഭരണകൂടം കണ്ടെത്തിയിരുന്നു. പുതിയ നിയമത്തിലൂടെ അതിവിദഗ്ധരായ വിദേശ തൊഴിലാളികള്‍ക്കു മാത്രമായി തൊഴില്‍ അവസരങ്ങള്‍ നിജപ്പെടുത്താനാണ് ഉദ്ദേശ്യം. പ്രത്യേക വൈദഗ്ധ്യം ആവശ്യമുള്ള തൊഴിലുകളില്‍ ഏര്‍പ്പെടാന്‍ വിദേശികള്‍ക്ക് യു.എസ് സര്‍ക്കാര്‍ നല്‍കുന്ന താല്‍ക്കാലിക വിസയാണ് എച്ച് 1 ബി. ബിരുദമെങ്കിലും ഉള്ളവരെയാണ് ഇതിനു പരിഗണിക്കുക. 65,000 എച്ച് 1 ബി വിസയാണ് നിയമപ്രകാരം ഒരു വര്‍ഷം അനുവദിക്കാവുന്നത്. എന്നാല്‍ നിയമത്തിലെ ഇളവുകള്‍ ഉപയോഗിച്ച് 1.3 ലക്ഷത്തിലേറെ വീസകള്‍ നല്‍കാറുണ്ട്. എച്ച് 1 ബി വീസ സംവിധാനം ഇന്ത്യന്‍ ഐടി കമ്പനികള്‍ ദുരുപയോഗിക്കുകയാണെന്ന് നേരത്തെ തന്നെ യുഎസ് കോണ്‍ഗ്രസ് ആരോപിച്ചിരുന്നു. അമേരിക്കക്കാരെ ഒഴിവാക്കാന്‍ കമ്പനികള്‍ കുറഞ്ഞ ശമ്പളത്തില്‍ ജോലി ചെയ്യുന്ന വിദേശ പ്രൊഫഷണലുകളെ രാജ്യത്തേക്ക് കൊണ്ടുവരുന്നുവെന്നായിരുന്നു ട്രംപ് ക്യാമ്പിന്റെ ആരോപണം.

ട്രംപ് നടപടി വീണ്ടും; എച്ച് 1 ബി വിസ നിര്‍ത്തലാക്കി അമേരിക്ക

chandrika — Sat, 04 Mar 2017 08:47:15 +0000

വാഷിങ്ടണ്‍: എച്ച് 1 ബി വിസ അനുവദിക്കുന്നത് അമേരിക്ക നിര്‍ത്തിവെച്ചു. ഏപ്രില്‍ ഒന്നു മുതല്‍ ആറു മാസത്തേക്കാണ് താല്‍കാലികമായി വിസ നല്‍കുന്നത് നിര്‍ത്തലാക്കിയത്. യു.എസ് സിറ്റിസണ്‍ഷിപ്പ് ആന്റ് എമിഗ്രേഷന്‍ സര്‍വീസസിന്റേതാണ് ഉത്തരവ്.
ഇതോടെ 1-907 ഫോം പ്രകാരം എച്ച് 1 ബി വിസക്കുള്ള അപേക്ഷ ഇനി പരിഗണിക്കില്. ഫോം 1-129 പ്രകാരമുള്ള അപേക്ഷയും പരിഗണിക്കില്ലെന്നാണ് വിവരം. ഇന്ത്യയുടെ എതിര്‍പ്പ് അവഗണിച്ചാണ് നടപടി. ജീവനക്കാരെ അമേരിക്കയിലേക്ക് അയക്കുന്നതിന് ഇന്ത്യന്‍ ഐടി കമ്പനികള്‍ എച്ച് 1 ബി വിസയാണ് ആശ്രയിച്ചിരുന്നത്. പ്രതിവര്‍ഷം 60000 എച്ച് 1 ബി വിസയാണ് അമേരിക്ക പതിച്ചു നല്‍കുന്നത്. ഇതില്‍ ഏറിയ പങ്കും ഇന്ത്യയുടേതാണ്. അമേരിക്കയില്‍ സ്വദേശിവല്‍ക്കരണം നടപ്പാക്കുന്നതിന് പ്രസിഡന്റ് ഡൊണാള്‍ഡ് ട്രംപിന്റെ നീക്കമാണ് ഇന്ത്യയുള്‍പ്പെടെയുള്ള രാഷ്ട്രങ്ങള്‍ക്ക് വെല്ലുവിളിയായിരിക്കുന്നത്.