hajj 2019 – Chandrika Daily

ഹാജിമാരുടെ മടക്കയാത്ര തുടങ്ങി; ആദ്യ ദിനം നാലുവിമാനങ്ങളിലായി 1200 ഹാജിമാര്‍

chandrika — Sun, 18 Aug 2019 03:34:06 +0000

കൊണ്ടോട്ടി:സംസ്ഥാന ഹജ്ജ് കമ്മിറ്റി വഴി പുറപ്പെട്ട ഹാജിമാരുടെ മടക്കയാത്ര ഇന്നു മുതല്‍ ആരംഭിക്കും. 300 ഹാജിമാരുമായുളള ആദ്യവിമാനം ജിദ്ദയില്‍ നിന്ന് രാവിലെ എട്ടു മണിയോടെ കരിപ്പൂരിലെത്തും. ആദ്യ ദിനത്തില്‍ തന്നെ നാലുവിമാനങ്ങളിലായി 1200 ഹാജിമാര്‍ മടങ്ങിയെത്തും. രാവിലെ 11, ഉച്ചക്ക് 1.30, 1.50 സമയങ്ങളിലാണ് മറ്റു വിമാനങ്ങള്‍ കരിപ്പൂരിലെത്തുന്നത്. സെപ്റ്റംബര്‍ മൂന്നിനാണ് അവസാന സംഘം മടങ്ങിയെത്തുക. കരിപ്പൂര്‍, നെടുമ്പാ ശ്ശേരി വിമാനത്താവളങ്ങള്‍ വഴി 13829 പേരാണ് ഇത്തവണ ഹജ്ജിന് പുറപ്പെട്ടത്. ഇവരില്‍ 20 കുട്ടികളും ഉള്‍പ്പെടും.

ശുഭ്ര സാഗരമായി അറഫ: രണ്ടര ദശലക്ഷം തീര്‍ത്ഥാടകര്‍ സംഗമിച്ചു

ചന്ദ്രിക വെബ് ഡെസ്‌ക്‌ — Sun, 11 Aug 2019 01:22:43 +0000

മുജീബ് പൂക്കോട്ടൂര്‍
മക്ക: വിശ്വ മാനവികതയുടെ മഹാ വിളംബരമായി ലോകത്തിന്റെ നാനാ ഭാഗങ്ങളില്‍ നിന്ന് ഒഴുകിയെത്തിയ ഇരുപത്തഞ്ച് ലക്ഷത്തോളം തീര്‍ത്ഥാടകര്‍ ഒത്തുചേര്‍ന്നപ്പോള്‍ അറഫ മൈതാനം ശുഭ്രസാഗരമായി. വംശ വര്‍ഗ വര്‍ണ്ണ ദേശ ഭാഷ വേഷ വിത്യാസങ്ങള്‍ക്ക് അതീതമായി രാജാവെന്നോ പ്രജയെന്നോ ഭരണാധികാരിയെന്നോ ഭരണീയനെന്നോ ധനികനെന്നോ ദരിദ്രനെന്നോ പണ്ഡിതനെന്നോ പാമരനെന്നോ വിത്യാസമില്ലാതെ ദശ ലക്ഷങ്ങള്‍ അറഫയുടെ ശുഭ്രതയില്‍ തങ്ങളുടെ പാപഭാരം ഇറക്കിവെച്ചു . ഭൗതിക ജീവിതത്തിന്റെ നശ്വരതയും പാരത്രിക ജീവിതത്തിന്റെ അനശ്വരതയും നിശബ്ദമായി വിളംബരം ചെയ്ത പവിത്ര ഭൂമിയില്‍ തങ്ങളുടെ നിസ്സഹായതയും ദുര്‍ബലതയും തിരിച്ചറിയാനും പാപപങ്കിലമായ ജീവിതത്തോട് വിടചൊല്ലി ലോകത്തിന്റെ സൃഷ്ടാവിനു മുമ്പില്‍ പരിപൂര്‍ണ്ണമായി ശിഷ്ട ജീവിതം സമര്‍പ്പിക്കാനുമുള്ള പ്രതിജ്ഞയുമായിട്ടാണ് ഹാജിമാര്‍ അറഫയോട് വിടവാങ്ങിയത്.
വെള്ളിയാഴ്ച പ്രാര്‍ത്ഥനകളും ഖുര്‍ആന്‍ പാരായണവുമായി മിനായില്‍ രാപാര്‍ത്ത ഹാജിമാര്‍ ഇന്നല സൂര്യോദയത്തോടെ അറഫയെ ലക്ഷ്യമാക്കി യാത്ര തുടങ്ങിയിരുന്നു. മിനായില്‍ നിന്ന് അറഫയിലേക്കുള്ള പതിനാലു കിലോമീറ്റര്‍ ദൂരം പാല്‍കടലായി മാറിയപ്പോള്‍ പുണ്യഭൂമി തല്‍ബിയത്തിന്റെ മാസ്മരിക ധ്വനികളാല്‍ മുഖരിതമായിരുന്നു. മശാഇര്‍ ട്രെയിനുകളിലും മുത്തവിഫിന്റെ ബസ്സുകളിലും മറ്റു വാഹനങ്ങയിലും കാല്‌നടയായുമാണ് തീര്‍ത്ഥാടകര്‍ ളുഹര്‍ നിസ്‌കാരത്തിനു മുമ്പായി അറഫ മൈതാനിയില്‍ എത്തിച്ചേര്‍ന്നത്. ഉച്ചയോടെ അറഫയുടെ കുന്നിന്‍ ചെരിവ് തൂവെള്ള വസ്ത്രമണിഞ്ഞ വിശ്വാസികളെ കൊണ്ട് നിറഞ്ഞു കവിഞ്ഞു.
അറഫയിലെ മസ്ജിദുന്നമിറയില്‍ ളുഹര്‍ നമസ്‌കാരത്തിന് മുമ്പായി സഊദി പണ്ഡിത സഭയിലെ ഉന്നത പണ്ഡിതനായ ഷെയ്ഖ് മുഹമ്മദ് ബിന്‍ ഹസന്‍ ആലു ശൈഖ് അറഫ ഖുതുബ നിര്‍വഹിച്ചു. പ്രവാചകന്റെ ചരിത്രപ്രസിദ്ധമായ വിടവാങ്ങല്‍ പ്രസംഗത്തെ അനുസ്മരിപ്പിക്കുമാറ് ലോക മുസ്ലിംകള്‍ ഖുര്‍ആന്റെയും സുന്നത്തിന്റെയും പേരില്‍ ഒന്നിക്കണമെന്നും നന്മയുടെ മാര്‍ഗത്തില്‍ ഐക്യപ്പെടണമെന്നും ഷെയ്ഖ് മുഹമ്മദ് ആഹ്വനം ചെയ്തു. അല്ലാഹുവിന്റെ ഏകത്വവും ഇസ്ലാമിന്റെ മതമൂല്യങ്ങളും വിശുദ്ധ ഖുര്‍ആനിന്റെ മഹത് സന്ദേശവും മുറുകെപ്പിടിച്ചാല്‍ ലോകത്ത് സമാധാനവും സാഹോദര്യവും സന്തോഷവും കളിയാടും. നിര്‍ഭാഗ്യവശാല്‍ മനുഷ്യ സമൂഹം മതമൂല്യങ്ങളെ നെഞ്ചോട് ചേര്‍ത്ത് പിടിക്കുന്നതില്‍ അലംഭാവം കാണിക്കുകയാണ്. ഇത് മൂലം പരസ്പരം വെറുപ്പും വിദ്വേഷവും അസഹിഷ്ണുതയും ശത്രുതയും വളരുകയാണ് . മുസ്ലിം സമൂഹം സമാധാനത്തിന്റെയും സാഹോദര്യത്തിന്റെയും സഹിഷ്ണുതയുടെയും മാതൃക കാണിക്കുന്നവരാകണം.മനുഷ്യ സമൂഹം ഖുര്‍ആനിലേക്ക് മടങ്ങുക മാത്രമാണ് ലോകത്ത് നിലനില്‍ക്കുന്ന പ്രതിസന്ധികള്‍ക്കുള്ള പരിഹാരമെന്നും ഖുതുബയില്‍ ഷെയ്ഖ് മുഹമ്മദ് ചൂണ്ടിക്കാട്ടി.
അറഫയിലെ ഖുതുബക്ക് ശേഷം ളുഹര്‍, അസര്‍ നമസ്‌കാരങ്ങള്‍ രണ്ട് റകഅത്ത് വീതമാക്കി ഇമാമിനൊപ്പം ചുരുക്കി നമസ്‌കരിച്ച ഹാജിമാര്‍ പിന്നീടുള്ള സമയം പാപമോചന പ്രാര്‍ഥനകളും ദിക്റുകളും ഉരുവിട്ടു ഇന്നലെ സൂര്യാസ്തമയം വരെ അറഫയില്‍ കഴിച്ചുകൂട്ടി. പിന്നീട് അടുത്ത കര്‍മ്മമായ മുസ്ദലിഫയില്‍ രാപ്പാര്‍ക്കുന്നതിനായി നീങ്ങി.മുസ്ദലിഫയില്‍ വെച്ചാണ് ഹാജിമാര്‍ മഗ്രിബ്, ഇശാ നമസ്‌കാരങ്ങള്‍ നിര്‍വഹിച്ചത്. മുസ്ദലിഫയില്‍ നിന്ന് കല്ലുകള്‍ ശേഖരിക്കുന്ന ഹാജിമാര്‍ ഇന്ന് പുലര്‍ച്ചെ സുബ്ഹി നിസ്‌കാരത്തിനു ശേഷം മിനയിലെത്തി പ്രധാന ജംറയായ ജംറത്തുല്‍ അഖ്ബയില്‍ പിശാചിനെ കല്ലെറിയല്‍ ചടങ്ങ് നിര്‍വഹിക്കും. തുടര്‍ന്നുള്ള മൂന്ന് ദിവസങ്ങളില്‍ നിശ്ചയിക്കപ്പെട്ട സമയത്ത് മൂന്ന് ജംറകളിലും കല്ലേറ് നടത്തി ചൊവ്വാഴ്ചയോടെ ഹാജിമാര്‍ മിനയില്‍ നിന്ന് മടങ്ങും. ആദ്യ കല്ലെറിയല്‍ കര്‍മത്തിന് ശേഷം സൗകര്യപ്രദമായ സമയം തെരഞ്ഞെടുത്ത് മസ്ജിദുല്‍ ഹറാമിലെത്തി ഹജ്ജിന്റെ ത്വവാഫും സഅ്യും നിര്‍വഹിക്കുകയും ബലിയറുക്കുകയും ചെയ്ത ശേഷം ഇഹ്റാമില്‍ നിന്ന് വിടവാങ്ങും. ചില ഹാജിമാര്‍ കല്ലേറ് മുഴുവന്‍ പൂര്‍ത്തിയാക്കിയാണ് ഇഫാദയുടെ ത്വവാഫും സഅ്യും നിര്‍വഹിക്കുക. ആഭ്യന്തര ഹാജിമാര്‍ ഇന്നും നാളെയും കല്ലേറ് പൂര്‍ത്തിയാക്കി സ്വദേശങ്ങളിലേക്ക് മടങ്ങും.
കര്‍മ്മങ്ങള്‍ പൂര്‍ത്തിയാകുന്നതോടെ അചഞ്ചലമായ ദൈവ വിശ്വാസവും പരസ്പര സ്‌നേഹവും ആദരവും സല്‍സ്വഭാവങ്ങളും ഏതൊരു പരീക്ഷണങ്ങളെയും അതിജീവിക്കാനുള്ള മനക്കരുത്തും നേടി മാനവികതയിലൂന്നിയ സാമൂഹികബോധം ആര്‍ജിച്ചാണ് പുണ്യ നഗരങ്ങളോട് ഹാജിമാര്‍ വിടവാങ്ങുക. അറഫയില്‍ ജനലക്ഷങ്ങള്‍ സംഗമിക്കുമ്പോള്‍ ഐക്യദാര്‍ഢ്യം പ്രകടിപ്പിച്ചു കൊണ്ട് ലോകത്തുള്ള മുസ്ലിം സമൂഹം ഇന്നലെ വ്രതമെടുത്തിരുന്നു.
ഇന്ത്യന്‍ ഹാജിമാര്‍ക്ക് സുഗമമായ രീതിയില്‍ കര്‍മ്മങ്ങള്‍ പൂര്‍ത്തിയാക്കാന്‍ എല്ലാവിധ സൗകര്യങ്ങളും ഒരുക്കിയതായി ഇന്ത്യന്‍ അംബാസഡര്‍ ഡോ. ഔസാഫ് സയീദ് , കോണ്‍സല്‍ ജനറല്‍ മുഹമ്മദ് നൂര്‍ റഹ്മാന്‍ ഷെയ്ഖ് എന്നിവര്‍ അറിയിച്ചു. ഹാജിമാര്‍ക്ക് സുരക്ഷയും സഹായങ്ങളുമായി സഊദി ഗവര്‍മെന്റ് മൂന്നര ലക്ഷം സുരക്ഷാ ഉദ്യോഗസ്ഥരെ നിയോഗിച്ചതായി മക്ക ഗവര്‍ണ്ണര്‍ പ്രിന്‍സ് ഖാലിദ് അല്‍ ഫൈസല്‍ പറഞ്ഞു . കൂടാതെ വിവിധ സന്നദ്ധ സേവകരായി ആയിരങ്ങളും പുണ്യ ഭൂമിയില്‍ സേവനത്തിനായി രംഗത്തുണ്ട്. അല്ലാഹുവിന്റെ അതിഥികള്‍ക്ക് കൈത്താങ്ങുമായി സഊദി കെഎംസിസി ഹജ്ജ് സെല്ലിന്റെ കീഴില്‍ മുവ്വായിരത്തിലധികം പരിശീലനം ലഭിച്ച വളന്റിയര്മാര് പുണ്യ ഭൂമിയിലുണ്ട്. 45 ഡിഗ്രിയോളമുള്ള കനത്ത ചൂടില്‍ കര്‍മ്മങ്ങള്‍ പൂര്‍ത്തിയാക്കി അവശരായി ടെന്റുകളില്‍ എത്തുന്ന ഹാജിമാര്‍ക്ക് സഊദി കെഎംസിസി വക കഞ്ഞി വിതരണം വിവിധ ടെന്റുകളില്‍ വിപുലമായ തോതില്‍ നല്‍കി വരുന്നുണ്ട് . സഊദി കെഎംസിസി നേതാക്കളായ കെ പി മുഹമ്മദ് കുട്ടി , ഖാദര്‍ ചെങ്കള , കുഞ്ഞിമോന്‍ കാക്കിയ , അഹമ്മദ് പാളയാട്ട്, മുജീബ് പൂക്കോട്ടൂര്‍ , അബൂബക്കര്‍ അരിമ്പ്ര , പി എം അബ്ദുല്‍ ഹഖ് , ഉമ്മര്‍ അരിപ്പാമ്പ്ര എന്നിവരുടെ നേതൃത്വത്തിലാണ് കെഎംസിസി വളണ്ടിയര്‍ സംഘം പുണ്യ നഗരിയില്‍ സേവന രംഗത്തുള്ളത്.

മലയാളി ഹാജിമാര്‍ ഇന്നു മുതല്‍ മക്കയിലേക്ക്

chandrika — Tue, 16 Jul 2019 08:31:19 +0000

ഗഫൂര്‍ പട്ടാമ്പി
ജിദ്ദ: മദീന വിമാനത്താവളം വഴിയെത്തിയ ഇന്ത്യന്‍ ഹജ്ജ് തീര്‍ഥാടകരുടെ മക്കയിലേക്കുള്ള യാത്ര തുടരുകയാണ്. കരിപ്പൂരില്‍ നിന്നും എത്തിയ മലയാളി ഹാജിമാര്‍ പ്രവാചക നഗരി സന്ദര്‍ശനം പൂര്‍ത്തിയാക്കി ഇന്ന് മുതല്‍ മക്കയിലക്ക് യാത്ര തിരിക്കും. കരിപ്പൂരില്‍ നിന്നും ആദ്യ ദിവസമെത്തിയ രണ്ട് വിമാനങ്ങളിലെ 600 ഹാജിമാര്‍ ഇന്ന് സുബഹി നമസ്‌ക്കാരം നിര്‍വ്വഹിച്ച ശേഷം രാവിലെ 8 മണിക്കും രണ്ടാം ദിവസമെത്തിയ ആദ്യ വിമാനത്തിലെ 300 ഹാജിമാര്‍ ഇന്ന് അസര്‍ നമസ്‌കാരാനന്തരം നാല് മണിക്കും പ്രവാചക നഗരിയോട് സലാം പറഞ്ഞ് മക്കയിലേക്ക് യാത്രയാവും. മസ്ജിദുനബവ്വിയുടെ പരിസരത്തുള്ള ഹാജിമാരുടെ താമസ കേന്ദ്രങ്ങളില്‍ നിന്ന് പ്രത്യക ബസ്സുകളില്‍ ഇഹ്‌റാം വേഷത്തിലാവും ഹാജിമാര്‍ പുറപ്പെടുക. പിന്നീട് മീക്കാത്ത് മസ്ജിദില്‍ നിന്ന് ഇഹ്‌റാമില്‍ പ്രവേശിച്ച് യാത്ര തുടരും. മക്കയിലെത്തുന്ന തീര്‍ഥാടകരില്‍ ഗ്രീന്‍ കാറ്റഗറിയിലുള്ളവര്‍ മസ്ജിദുല്‍ ഹറാമിന്റെ പരിസരത്തുള്ള താമസ കേന്ദ്രങ്ങളിലും അസീസിയ കാറ്റഗറിയിലുള്ളവര്‍ മഹത്തത്തുല്‍ബങ്കിന്റെയും അബ്ദുള്ള ഹിയാത്ത റോഡിന്റെയും പരിസരത്തുള്ള താമസ കേന്ദ്രങ്ങളില്‍ ലഗേജുകളിറക്കി ഉംറ കര്‍മ്മം നിര്‍വ്വഹിച്ച ശേഷമാണ് താമസ കേന്ദ്രങ്ങളിലെത്തുക.
ഇന്ന് പുറപ്പെടുന്ന ആദ്യ സംഘങ്ങളെ കോര്‍ഡിനേറ്റര്‍ ടീം ലീഡര്‍ സൈതലവി, ഗവണ്‍മെന്റ് വളണ്ടിയര്‍മാരായ മുജീബ്, അബ്ദുല്‍ ജലീല്‍, അബൂബക്കര്‍, ഇബ്രാഹിം എന്നിവര്‍ അനുഗമിക്കും. തുടര്‍ന്നുള്ള ദിവസങ്ങളില്‍ ആദ്യമെത്തുന്ന സംഘങ്ങള്‍ യഥാക്രമത്തില്‍ മക്കയിലക്ക് തിരിച്ചുകൊണ്ടിരിക്കും. മദീന വഴി എത്തിയ മലയാളികളടക്കമുള്ള ഇന്ത്യന്‍ തീര്‍ഥാടകര്‍ പരിശുദ്ധ ഹജ്ജ് കര്‍മ്മം നിര്‍വ്വഹിച്ച ശേഷം ജിദ്ദ വിമാനത്താവളം വഴിയായിരിക്കും നാട്ടിലേക്ക് മടങ്ങുക.

പ്രായം കുറഞ്ഞ തീര്‍ത്ഥാടകയായി 45 ദിവസം പ്രായമായ കുഞ്ഞും പുണ്യഭൂമിയിലേക്ക്

chandrika — Tue, 16 Jul 2019 08:21:15 +0000

നെടുമ്പാശ്ശേരി: കൊച്ചി അന്താരാഷ്ട്ര വിമാനത്താവളത്തിന് സമീപം പ്രവര്‍ത്തിക്കുന്ന ഹജ്ജ് ക്യാമ്പില്‍ നിന്ന് ഹജ്ജ് നിര്‍വഹിക്കാന്‍ ഏറ്റവും പ്രായം കുറഞ്ഞ ഹജ്ജ് തീര്‍ത്ഥാടക മക്കയിലേക്ക് പുറപ്പെട്ടു. ഏറ്റവും പ്രായം കുറഞ്ഞ തീര്‍ത്ഥാടകയായ 45 ദിവസം പ്രായമായ ആദില മര്‍ജാന്‍ ആണ് ഇന്നലെ 5 മണിക്ക് പുറപ്പെട്ട എ ഐ 5183 എന്ന വിമാനത്തില്‍ പുണ്യനഗരിയിലേക്ക് യാത്രയായത്. തീര്‍ത്ഥാടക ആലുവ എടത്തല അബ്ദുല്‍ റഹ്മാന്‍ അല്‍ഫിയ ദമ്പതികളുടെ മ കളാണ്. സംസ്ഥാന ഹജ്ജ് കമ്മിറ്റി മുന്‍ ചെയര്‍മാന്‍ തൊടിയൂര്‍ മുഹമ്മദ് കുഞ്ഞ് മൗലവി, ക്യാമ്പ് ഓഫിസര്‍ എന്‍ പി ഷാജഹാന്‍, സ്വാഗതസംഘം വൈസ് ചെയര്‍മാന്‍ കെ എം കുഞ്ഞുമോന്‍, ഭാരവാഹികളായ ഷംജല്‍, ഇബ്രാംഹിം കുഞ്ഞ്, സലിം, സെല്ല് ഓഫിസര്‍ ജസില്‍ തോട്ടത്തികുളം, ഷബീര്‍ മണക്കാടന്‍, എം എ സുധീര്‍ എന്നിവരുടെ നേതൃത്വത്തിലാണ് കുഞ്ഞ് തീര്‍ത്ഥാടകയെ യാത്രയാക്കിയത്.

അതേസമയം കരിപ്പൂരില്‍ നിന്ന് ഇന്നലെ രണ്ടു വിമാനങ്ങളിലായി 600 തീര്‍ത്ഥാടകര്‍ കൂടി പുറപ്പെട്ടു. 285 പുരുഷ ന്മാരും, 315 സ്ത്രീകളുമാണ് സംഘത്തിലുള്ളത്. എം.പി അബ്ദുസ്സമദ് സമദാനി, അദൃശ്ശേരി ഹംസക്കുട്ടി മുസ്‌ലിയാര്‍, മുളളൂര്‍ക്കര മുഹമ്മദലി സഖാഫി എന്നിവര്‍ ഹജ്ജ് ക്യാമ്പിലെത്തി. ഇന്ന് മൂന്ന് വിമാനങ്ങളിലായി 900 പേര്‍ യാത്രയാവും. ആദ്യ വിമാനം രാവിലെ 8.40നും രണ്ടാമത്തേത് 10.45നും മൂന്നാമത്തെ വിമാനം 1.55നും പുറപ്പെടും. സംസ്ഥാന ഹജ്ജ് കമ്മിറ്റിക്ക് കീഴില്‍ കരിപ്പൂരില്‍ നിന്ന് ഇനി 12 വിമാന സര്‍വ്വീസുകള്‍ കൂടിയാണ് ബാക്കിയുളളത്. കഴിഞ്ഞ 7 ന് ആരംഭിച്ച സര്‍വ്വീസുകള്‍ 20ന് അവസാനിക്കും.

നെടുമ്പാശേരി ഹജ്ജ് ക്യാമ്പില്‍ നിന്നും സംസ്ഥാന ഹജ്ജ് കമ്മിറ്റിയുടെ നേതൃത്വത്തില്‍ ഇന്നലെ 680 തീര്‍ഥാടകര്‍ കൂടി യാത്രയായി. 340 പേരുമായി എഐ 5181 നമ്പര്‍ എയര്‍ ഇന്ത്യ വിമാനം ഉച്ചക്ക് 2 മണിക്കും എഐ 5183 നമ്പര്‍ വിമാനം വൈകീട്ട് 5.35 നുമാണ് പുറപ്പെട്ടത്. 1360 തീര്‍ഥാടകര്‍ കൂടിയാണ് ഇനി നെടുമ്പാശേരി എംബാര്‍ക്കേഷന്‍ പോയന്റില്‍ നിന്നും യാത്ര തിരിക്കാനുള്ളത്. ഇന്ന് പുറപ്പെടുന്ന രണ്ട് വിമാനങ്ങളിലെ തീര്‍ഥാടകര്‍ ഇന്നലെ വൈകീട്ടോടെ ഹജ്ജ് ക്യാമ്പില്‍ എത്തി. തീര്‍ഥാടകര്‍ക്ക് യാത്രാമംഗളങ്ങള്‍ നേരാന്‍ ജനപ്രതിനിധികളടക്കം നിരവധി പ്രമുഖരാണ് ഹജ്ജ് ക്യാമ്പിലെത്തിയത്. എം.പിമാരായ ബെന്നി ബഹനാന്‍, ഹൈബി ഈഡന്‍, എ.എം.ആരിഫ്, വി.കെ.ശ്രീകണ്ഠന്‍, മലപ്പുറം ജില്ലാ കളക്ടറും ഹജ്ജ് കമ്മിറ്റി എക്‌സിക്യൂട്ടീവ് ഓഫീസറുമായ ജാഫര്‍ മാലിക് ഐ എ എസ് തുടങ്ങിയവര്‍ യാത്രാമംഗളങ്ങള്‍ നേര്‍ന്നു. ഇന്നലെയും പ്രാര്‍ഥനകളില്‍ പങ്കെടുക്കാന്‍ വന്‍ ജനാവലിയാണ് എത്തിച്ചേര്‍ന്നത്.

നെടുമ്പാശേരിയില്‍ ഹജ്ജ് ക്യാമ്പിന് ഇന്ന് തുടക്കം; ആദ്യ സംഘം നാളെ യാത്രയാകും

web desk 1 — Sat, 13 Jul 2019 07:55:54 +0000

കൊച്ചി: നെടുമ്പാശേരിയില്‍ ഹജ്ജ് ക്യാമ്പിന് ഇന്ന് തുടക്കം. ആദ്യ സംഘം തീര്‍ഥാടകരുമായി നാളെ ഉച്ചക്ക് രണ്ട് മണിക്ക് വിമാനം പുറപ്പെടും.

നാളെ മുതല്‍ ഈ മാസം 17 വരെ എട്ട് സര്‍വീസുകളാണ് ഇക്കുറി നെടുമ്പാശേരിയില്‍ നിന്നുണ്ടാവുക. ഉച്ചക്കുശേഷമാണ് എല്ലാ ദിനസവും സര്‍വീസുകള്‍. ഓരോ വിമാനത്തിലും 340 തീര്‍ത്ഥാടകരാണുണ്ടാവുക. 2,740 തീര്‍ഥാടകരാണ് ഈ വര്‍ഷം നെടുമ്പാശേരി ഹജ്ജ് ക്യാമ്പില്‍ നിന്ന് യാത്ര പുറപ്പെടുന്നത്.

സംസ്ഥാനത്ത് നിന്നുള്ള തീര്‍ത്ഥാടകര്‍ക്ക് പുറമെ ലക്ഷദ്വീപില്‍ നിന്നുള്ള ഹാജിമാരും നെടുമ്പാശേരി വഴി ഹജ്ജിനായി യാത്ര തിരിക്കും.
മദീനയില്‍ എത്തുന്ന തീര്‍ത്ഥാടകര്‍ അവിടെ നിന്നാണ് ഹജ്ജ് കര്‍മം നിര്‍വഹിക്കുന്നതിനായി മക്കയില്‍ എത്തുക. ഓഗസ്റ്റ് 29 മുതല്‍ സെപ്റ്റംബര്‍ ഒന്നു വരെയാണ് ഹജ്ജ്. ജിദ്ദ വിമാനത്താവളത്തില്‍നിന്നാണ് തീര്‍ത്ഥാടകര്‍ മടങ്ങുക.

ഹജ്ജ്: കേരളത്തില്‍നിന്നുള്ള ആദ്യ സംഘം മദീനയില്‍; ഇന്ന് മൂന്ന് വിമാനങ്ങള്‍

chandrika — Mon, 08 Jul 2019 05:08:27 +0000

കൊണ്ടോട്ടി/മദീന: ദൈവവിളിക്കുത്തരം നല്‍കി നാഥനോടുള്ള നിലയ്ക്കാത്ത പ്രാര്‍ത്ഥനകളുമായി കേരളത്തില്‍നിന്നുള്ള ഹാജിമാരുടെ ആദ്യം സംഘം പ്രവാചക നഗരിയായ മദീനയിലെത്തി. സംസ്ഥാന ഹജ്ജ് കമ്മറ്റി വഴിയുള്ള രണ്ട് സംഘങ്ങളാണ് ഇന്നലെ കരിപ്പൂരില്‍ നിന്നും പുറപ്പെട്ടത്. ഉച്ചക്ക് 2.25ന് പുറപ്പെട്ട എസ്.വി 5749 വിമാനത്തില്‍ 167 സ്ത്രീകളും 133 പുരുഷന്‍മാരും മൂന്ന് മണിക്ക് പുറപ്പെട്ട രണ്ടാമത്തെ സംഘത്തില്‍ 160 സ്ത്രീകളും140 പുരഷന്മാരും എടക്കം 600 പേരാണ് ആദ്യ ദിനം യാത്ര തിരിച്ചത്. സഊദി സമയം വൈകീട്ട് 4.40ന് മദീനയിലെത്തിയ ആദ്യ സംഘത്തെ ഇന്ത്യന്‍ ഹജ്ജ് മിഷന്‍ ഉദ്യോഗസ്ഥരും കെ.എം.സി.സി വിവിധ സംഘടനാ പ്രതിനിധികളും ചേര്‍ന്ന് സ്വീകരിച്ചു. മുന്‍ വര്‍ഷങ്ങളില്‍ നിന്ന് ഭിന്നമായി മദീനയിലേക്കാണ് ഇത്തവണ ഹജ്ജ് സര്‍വീസ്. രണ്ട് സംഘങ്ങളിലും കോഴിക്കോട് ജില്ലകളില്‍ നിന്നുള്ളവരാണ് കൂടുതല്‍. 305 പേര്‍. കണ്ണൂര്‍ ജില്ലയില്‍ നിന്ന് 139പേരും മലപ്പുറം ജില്ലയില്‍ നിന്ന് 121 പേരുമാണ് ഇന്നലെ പുറപ്പെട്ടത്. 64പേര്‍ കാസര്‍ ക്കോട് ജില്ലക്കാരും അഞ്ചുപേര്‍ പാലക്കാട് ജില്ലക്കാരുമാണ്. ആലപ്പുഴ, വയനാട് ജില്ലകളില്‍ നിന്ന് നാലുവീതവും, ഇടുക്കി, കോട്ടയം ജില്ലകളില്‍നിന്ന് രണ്ടു പേര്‍ വീതവുമാണ് സംഘത്തിലുള്ളത്.
എന്‍.പി സൈതലവി, മുജീബ്‌റഹ്മാന്‍ പൂഞ്ചീരി എന്നിവരാണ് ആദ്യ സംഘത്തിലെ വളണ്ടിയര്‍മാര്‍. രണ്ടാമത്തെ സംഘത്തില്‍ ടി അബ്ദുല്‍ജലീലും അബൂബക്കര്‍. വി.മക്കാറും വളണ്ടിയര്‍മാരായി പുറപ്പെട്ടു. ആദ്യസംഘത്തില്‍ 85 സ്ത്രീകളും രണ്ടാമത്തെ വിമാനത്തില്‍ 41 പേരും മെഹറമില്ലാത്ത യാത്രക്കാരാണ്.
ഇന്ന് മൂന്ന് വിമാനങ്ങളിലായി 900 പേര്‍കൂടി യാത്ര തിരിക്കും. രാവിലെ 8.40നും ഉച്ചക്ക് ഒരു മണിക്കും വൈകീട്ട് 3 മണിക്കുമാണ് ഹജ്ജ് വിമാനങ്ങള്‍ സര്‍വീസ് നടത്തുക. ഒരു മണിയോടെ ആദ്യ സംഘത്തെ ഹജ്ജ് ഹൗസില്‍ നിന്നും പ്രത്യേക ബസ്സുകളിലായി വിമാനത്താവളത്തില്‍ എത്തിച്ചു. ഹജ്ജ് മന്ത്രി കെ.ടി ജലീല്‍ ആദ്യ സംഘത്തിന് #ാഗ് ഓഫ് നല്‍കി. ടി.വി ഇബ്രാഹീം എം.എല്‍.എ, പി.അബ്ദുല്‍ ഹമീദ് എം.എല്‍.എ, ജില്ലാ കലക്ടര്‍ ജാഫര്‍ മാലിക്, ഹജ്ജ് കമ്മറ്റി ചെയര്‍മാന്‍ സി.മുഹമ്മദ് ഫൈസി തുടങ്ങിയവര്‍ ചടങ്ങില്‍ പങ്കെടുത്തു.

ഹജ്ജ്ക്യാമ്പിന് ഭക്തിനിര്‍ഭര തുടക്കം; ആദ്യ സംഘം ഇന്ന് യാത്ര തിരിക്കും

chandrika — Sun, 07 Jul 2019 05:07:10 +0000

കൊണ്ടോട്ടി: നാല് വര്‍ഷത്തെ കാത്തിരിപ്പിന് ശേഷം കരിപ്പൂരില്‍ ഒരിക്കല്‍കൂടി സംസ്ഥാന ഹജ്ജ് ക്യാമ്പിന് തുടക്കം. ഭക്തിനിര്‍ഭരമായ ചടങ്ങിലായിരുന്നു ഹജ്ജ് ക്യാമ്പിന്റെ ഉദ്ഘാടനം. 300 പേരടങ്ങുന്ന ആദ്യ സംഘം ഇന്ന് ഉച്ചകഴിഞ്ഞ് 2.25ന് യാത്ര തിരിക്കും. മദീന സന്ദര്‍ശനത്തിനു ശേഷമാണ് തീര്‍ത്ഥാടകര്‍ മക്കിയിലെത്തുക. രണ്ടാമത്തെ സംഘം മൂന്ന് മണിക്കും യാത്ര തിരിക്കും. ഇരു സംഘവും ഇന്നലെ ക്യാമ്പിലെ ത്തി. 20 വരെ 36 സര്‍വ്വീസുകളാണ് ഹജ്ജ് യാത്രക്കായി സഊദി എയര്‍ലൈന്‍സ് ഒരുക്കുന്നത്. 2014ലാണ് കരിപ്പൂരില്‍ അവസാനമായി ഹജ്ജ് സര്‍വ്വീസ് നടന്നത്. സംസ്ഥാന ചരിത്രത്തില്‍ ഏറ്റവും കൂടുതല്‍ തീര്‍ത്ഥാടകര്‍ ഉള്ളതും ഈ വര്‍ഷമാണ്. നെടുമ്പാശ്ശേരിയും ഇത്തവണ ഹജ്ജ് എംബാര്‍ക്കേഷന്‍ പോയന്റ് ആണങ്കിലും ആകെയുള്ള 13,472 തീര്‍ത്ഥാടകരില്‍ 11,094 പേരും കരിപ്പൂര്‍ വഴിയാണ് തിരിക്കുന്നത്. 2378 പേര്‍ ജൂലൈ 14 മുതല്‍ 17 വരെ നെടുമ്പാശ്ശേരി വഴി പുറപ്പെടും. കരിപ്പൂര്‍ ഹജ്ജ് ഹൗസ് അങ്കണത്തില്‍ വൈകിട്ട് 5 മണിക്ക് നടന്ന പ്രൗഢ ചടങ്ങില്‍ മുഖ്യമന്ത്രി പിണറായി വിജയന്‍ ഹജ്ജ് ക്യാമ്പ് ഉദ്ഘാടനം നിര്‍വഹിച്ചു. പുതുതായി നിര്‍മ്മിക്കുന്ന വനിതാ ബ്ലോക്കിന്റെ തറക്കല്ലിടല്‍ കര്‍മ്മവും മുഖ്യമന്ത്രി നിര്‍വ്വഹിച്ചു.

ഹജ്ജ്: കോഴിക്കോട്ടു നിന്നുള്ള ആദ്യ സംഘം നാളെ പുറപ്പെടും

web desk 1 — Sat, 06 Jul 2019 10:29:54 +0000

കോഴിക്കോട്: സംസ്ഥാനത്തെ ഹജ്ജ് തീര്‍ഥാടകരുടെ ആദ്യ സംഘം നാളെ കോഴിക്കോട് കരിപ്പൂര്‍ വിമാനത്താവളം വഴി പുറപ്പെടും. രണ്ടു വിമാനങ്ങളിലായി 600 തീര്‍ഥാടകരാണ് നാളെ പുറപ്പെടുന്നത്. ഉച്ചയ്ക്ക് 2.25നാണ് ആദ്യ ഹജ്ജ് വിമാന സര്‍വീസ്. ഉച്ചയ്ക്ക് മൂന്നിന് രണ്ടാം വിമാന സര്‍വീസും മദീനയിലേക്ക് പോകും.

13,472 തീര്‍ഥാടകര്‍ക്കാണ് കേരളത്തില്‍ നിന്ന് ഇത്തവണ അവസരം ലഭിച്ചത്. ഇതില്‍ 10,732 പേരും കോഴിക്കോട് വിമാനത്താവളം വഴിയാണ് പുറപ്പെടുക. ബാക്കി വരുന്ന 2,740 പേര്‍ നെടുമ്പാശേരി വിമാനത്താവളം വഴിയും യാത്രയാകും. നെടുമ്പാശേരിയില്‍ നിന്ന് 14 മുതല്‍ 17 വരെയാണ് വിമാന സര്‍വീസ്.

ഹജ്ജ്; ഇന്ത്യയില്‍ നിന്ന് ആദ്യ സംഘം പുറപ്പെട്ടു

web desk 1 — Thu, 04 Jul 2019 03:46:52 +0000

ന്യൂഡല്‍ഹി: ഈ വര്‍ഷം ഹജ്ജ് കര്‍മം നിര്‍വഹിക്കുന്നതിനായി ഇന്ത്യയില്‍ നിന്നുള്ള ആദ്യ സംഘം മക്കയിലേക്ക് പുറപ്പെട്ടു. ഡല്‍ഹി വിമാനത്താവളത്തില്‍ നിന്നാണ് ആദ്യ സംഘം പുറപ്പെട്ടത്.

കേന്ദ്ര ന്യൂനപക്ഷ കാര്യ മന്ത്രി മുഖ്താര്‍ അബ്ബാസ് നഖ്വി ഫഌഗ് ഓഫ് ചെയ്തു. രണ്ട് ലക്ഷം ഹജ്ജ് തീര്‍ഥാടകരാണ് ഇന്ത്യയില്‍ നിന്ന് ഈ വര്‍ഷം പുറപ്പെടുന്നത്. തീര്‍ഥാടകര്‍ക്കു വേണ്ട എല്ലാ വിധ സൗകര്യങ്ങളും പൂര്‍ത്തീകരിച്ചതായി കേന്ദ്ര മന്ത്രി അറിയിച്ചു.

സര്‍ക്കാറിന്റെ ‘സ്റ്റാമ്പ് കച്ചവടം’ ഹജ്ജ് കുത്തിവെപ്പ് ക്യാമ്പിലും; വിവാദമായപ്പോള്‍ നിറുത്തിവെച്ചു

ചന്ദ്രിക വെബ് ഡെസ്‌ക്‌ — Wed, 03 Jul 2019 05:26:16 +0000

കണ്ണൂര്‍: ഹജ്ജ് യാത്രക്ക് മുന്നോടിയായി കുത്തിവെപ്പിനെത്തിയവരില്‍ നിന്നും പണം വാങ്ങി സര്‍ക്കാറിന്റെ സ്റ്റാമ്പ് കച്ചവടം. വിവാദമായതോടെ സ്റ്റാമ്പ് വില്‍പ്പന നിറുത്തിവെച്ചു.
ഇന്നലെ കണ്ണൂര്‍ ജില്ലാ ആസ്പത്രിയില്‍ സംസ്ഥാന ഹജ്ജ് കമ്മിറ്റി മുഖേന ഹജ്ജ് കര്‍മത്തിന് പോകുന്നവര്‍ക്ക് ശിശുക്ഷേമ സമിതിയുടെ ശിശുദിന സ്റ്റാമ്പ് നല്‍കി പണം ഈടാക്കിയതാണ് പ്രതിഷേധത്തിന് വഴിവെച്ചത്. ‘തണല്‍-കുട്ടികളുടെ അഭയ കേന്ദ്രം’ പദ്ധതിക്ക് പണം കണ്ടെത്താന്‍ സംസ്ഥാന ശിശുക്ഷേമ സമിതി 2017-18 വര്‍ഷം പുറത്തിറക്കിയതാണ് സ്റ്റാമ്പ്. ജില്ലയിലെ ആദ്യ ഹജ്ജ് കുത്തിവെപ്പ് ക്യാമ്പാണ് ജില്ലാ ആസ്പത്രിയില്‍ നടന്നത്. കണ്ണൂര്‍, അഴീക്കോട്, ധര്‍മടം, കല്യാശ്ശേരി മണ്ഡലങ്ങളില്‍ നിന്ന് ആയിരത്തോളം പേര്‍ ക്യാമ്പിനെത്തിയിരുന്നു.
10 രൂപയുടെ 10 സ്റ്റാമ്പുകള്‍ നല്‍കി ഒരാളില്‍ നിന്ന് 100 രൂപ വരെ ഈടാക്കുകയായിരുന്നു. മുന്നറിയിപ്പില്ലാതെ നടന്ന സ്റ്റാമ്പ് വില്‍പ്പന വിമര്‍ശനത്തിനുമിടയാക്കി. കുത്തിവെപ്പിനെത്തിയവര്‍ക്ക് സഹായവുമായെത്തിയ മുസ്‌ലിം യൂത്ത്‌ലീഗ് പ്രവര്‍ത്തകര്‍ പ്രതിഷേധവുമായെത്തിയതോടെയാണ് സ്റ്റാമ്പ് വില്‍പ്പന നിറുത്തിവെച്ചത്. വിവരമറിഞ്ഞ് മുസ്‌ലിംലീഗ് ജില്ലാ ജനറല്‍ സെക്രട്ടറി അബ്ദുല്‍ കരീം ചേലേരിയും സെക്രട്ടറി കെടി സഹദുല്ലയും സ്ഥലത്തെത്തി.
വിഷയത്തില്‍ ജില്ലാ മെഡിക്കല്‍ ഓഫീസര്‍ ഇടപെട്ടു. ഹജ്ജ് കുത്തിവെപ്പിനെത്തിയവര്‍ക്ക് സ്റ്റാമ്പ് നല്‍കി പണം ഈടാക്കിയ കാര്യം അറിഞ്ഞില്ലെന്നായിരുന്നു അദ്ദേഹത്തിന്റെ ആദ്യ പ്രതികരണം. പിന്നീട് വിഷയത്തെ കുറിച്ച് അന്വേഷിച്ചു. കുട്ടികള്‍ക്ക് നല്‍കുന്ന കുത്തിവെപ്പിനോടനുബന്ധിച്ചാണ് സ്റ്റാമ്പ് വില്‍പ്പന നടത്തുന്നത്. ശിശു ക്ഷേമവുമായി ബന്ധപ്പെട്ട് സര്‍ക്കാര്‍ ഫണ്ടിലേക്ക് പണം കണ്ടെത്തുന്നതിനാണിതെന്നും മെഡിക്കല്‍ ഓഫീസര്‍ പറഞ്ഞു. എന്നാല്‍ ഹജ്ജ് കുത്തിവെപ്പിനെത്തുന്നവര്‍ക്ക് സ്റ്റാമ്പ് വില്‍പ്പന നടത്തിയത് ബന്ധപ്പെട്ടവരുടെ അറിവില്ലായ്മ കാരണമായിരിക്കാം. ഹജ്ജ് കുത്തിവെപ്പിനെത്തുന്നവര്‍ക്ക് സ്റ്റാമ്പ് വില്‍പ്പന നടത്തുന്നുവെങ്കില്‍ നിറുത്തിവെക്കണമെന്ന് നിര്‍ദ്ദേശം നല്‍കിയതായും മെഡിക്കല്‍ ഓഫീസര്‍ വ്യക്തമാക്കി.
സംസ്ഥാന ശിശുക്ഷേമ സമിതി പ്രവര്‍ത്തനവുമായി ബന്ധപ്പെട്ട സ്റ്റാമ്പ് വില്‍പ്പനയ്ക്ക് സര്‍ക്കാര്‍ ആതുരാലയങ്ങള്‍ക്ക് ക്വാട്ട നിശ്ചയിച്ച് നല്‍കിയിരുന്നു. കുത്തിവെപ്പ് വേളകളിലാണ് ഇത്തരം സ്റ്റാമ്പുകള്‍ വില്‍പ്പന നടത്തി പണം സര്‍ക്കാറിലേക്ക് അടക്കുന്നത്. എന്നാല്‍ ഹജ്ജ് കുത്തിവെപ്പിനെത്തിയവര്‍ക്കും സ്റ്റാമ്പ് നല്‍കി വില്‍പ്പന പൂര്‍ത്തിയാക്കാമെന്ന കണക്കുകൂട്ടലാണ് പാളിയത്. അതേസമയം സര്‍ക്കാര്‍ പദ്ധതികളുമായി ബന്ധപ്പെട്ട് സ്റ്റാമ്പ് വില്‍പ്പന കൂടി നടത്തേണ്ട ഉത്തരവാദിത്തം ഡോക്ടര്‍മാര്‍ ഉള്‍പ്പെടെയുള്ളവരെ പ്രയാസത്തിലാക്കുകയാണ്.