ന്യൂഡല്‍ഹി:ഹജ്ജ്എംബാര്‍ക്കേഷന്‍ പോയിന്റ് കരിപ്പൂരിലേക്കു മാറ്റുന്ന കാര്യത്തില്‍ കേന്ദ്ര ന്യൂനപക്ഷ ക്ഷേമ-ഹജ്ജ് വകുപ്പ് മന്ത്രി മുക്താര്‍ അബ്ബാസ് നഖ് വിയില്‍ നിന്നും ഉറപ്പ് ലഭിച്ചതായി പി.കെ കുഞ്ഞാലിക്കുട്ടി എം.പി. ഇക്കാര്യമാവശ്യപ്പെട്ട് മന്ത്രിയുമായി നടത്തിയ ചര്‍ച്ചയിലാണ് ഇതുസംബന്ധിച്ച തീരുമാനം അറിയിച്ചത്.
റണ്‍വേ നവീകരണ ജോലികളെ തുടര്‍ന്ന് നെടുമ്പാശേരി വിമാനത്താവളത്തിലേക്ക് മാറ്റിയ ഹജ്ജ് സര്‍വീസുകള്‍ അടുത്ത വര്‍ഷം മുതല്‍ കരിപ്പൂരിലേക്ക് മാറ്റാമെന്ന് മന്ത്രി ഉറപ്പ് നല്‍കിയതായി പി.കെ കുഞ്ഞാലിക്കുട്ടി പറഞ്ഞു. പി.വി അബ്ദുല്‍ വഹാബ് എം.പി, വി.കെ ഇബ്രാഹീം കുഞ്ഞ് എം. എല്‍.എ എന്നിവരും സംഘത്തിലുണ്ടായിരുന്നു.
കരിപ്പൂരില്‍ നിന്നും വലിയ വിമാനങ്ങളുടെ സര്‍വീസ് പുനരാരംഭിക്കുന്നത് സംബന്ധിച്ച് എയര്‍ ഇന്ത്യ ചെയര്‍മാനും മാനേജിങ് ഡയറക്ടറുമായ പ്രദീപ് സിങ് ഖറോളയുമായും സംഘം ചര്‍ച്ച നടത്തി.
റണ്‍വേ വികസന പ്രവര്‍ത്തനം പൂര്‍ത്തിയാക്കിയതോടെ പുനരാരംഭിക്കണമെന്നാണ് ആവശ്യപ്പെട്ടത്. ഡി.ജി.സിഎയുടെ അനുമതി അടക്കം ലഭിച്ചിട്ടും എയര്‍ ഇന്ത്യയുടെ ഭാഗത്തു നിന്ന് വിമാന സര്‍വീസുകള്‍ പുനരാരംഭിക്കുന്നതിനുള്ള നടപടി വൈകുന്നതിനാലാണ് എയര്‍ ഇന്ത്യ സി. എം. ഡിയെ കണ്ട് നടപടികള്‍ വേഗത്തിലാക്കാന്‍ ആവശ്യപ്പെട്ടതെന്ന് കുഞ്ഞാലിക്കുട്ടി പറഞ്ഞു. കോഴിക്കോട്ട് നിന്ന് ജിദ്ദ, റിയാദ് എന്നിവിടങ്ങളിലേക്ക് നേരിട്ട് വിമാന സര്‍വീസ് എയര്‍ ഇന്ത്യ പുനരാരംഭിക്കണമെന്നാണ് എം.പിമാര്‍ ഉള്‍പ്പെടെയുള്ള സംഘം ആവശ്യപ്പെട്ടത്.
അനുകൂലമായ മറുപടിയാണ് അദ്ദേഹത്തില്‍ നിന്നും ലഭിച്ചതെന്ന് കുഞ്ഞാലിക്കുട്ടി പറഞ്ഞു. കരിപ്പൂര്‍ വിമാനത്താവളത്തില്‍ നിന്നും വലിയ വിമാനങ്ങളുടെ സര്‍വീസുകള്‍ വൈകുന്നതുമായി ബന്ധപ്പെട്ട് കഴിഞ്ഞ ദിവസം ഇതേ സംഘം വ്യോമയാന വകുപ്പ് സെക്രട്ടറി രാജീവ് നയാന്‍ ചൗബേയുമായി ചര്‍ച്ച നടത്തിയിരുന്നു.

കോഴിക്കോട്: വര്‍ഷങ്ങള്‍ മികച്ച രീതിയില്‍ കരിപ്പൂരില്‍ പ്രവര്‍ത്തിച്ച ഹജ്ജ് എമ്പാര്‍ക്കേഷന്‍ പോയിന്റ് കണ്ണൂരിലേക്ക് തട്ടിയെടുക്കാനുള്ള സംസ്ഥാന സര്‍ക്കാര്‍ ശ്രമം നന്ദി കേടാണെന്ന് കരിപ്പൂര്‍ എയര്‍പോര്‍ട്ട് അഡൈ്വസറി ബോര്‍ഡ് മെമ്പര്‍ ടി.പി.എം ആഷിറലി. ഇതുവരെ ആരംഭിക്കുക പോലും ചെയ്യാത്ത കണ്ണൂരിലെ സ്വകാര്യ വിമാത്താവളത്തിലേക്ക് ഹജ്ജ് എമ്പാര്‍ക്കേഷന്‍ പോയിന്റ് അനുവദിക്കണമെന്ന് സംസ്ഥാന സര്‍ക്കാര്‍ കേന്ദ്രത്തിന് കത്ത് നല്‍കിയത് പൊതു മേഖലയിലുള്ള കരിപ്പൂരിന്റെ ചിറകരിയാനാണ്.
പിണറായി വിജയന്‍ കണ്ണൂരിന്റെ മാത്രം മുഖ്യമന്ത്രിയായി സ്വകാര്യ ലോബിക്കായി പൊതുമേഖലയിലെ കരിപ്പൂരിനെ തകര്‍ക്കുന്നത് നീതിയല്ല. 2015ല്‍ അറ്റകുറ്റ പണിക്കായി നിയന്ത്രണം ഏര്‍പ്പെടുത്തിയപ്പോള്‍ ഹജ്ജ് എമ്പാര്‍ക്കേഷന്‍ പോയിന്റ് നെടുമ്പാശ്ശേരിയിലേക്ക് മാറ്റിയത് താല്‍ക്കാലികമാണെന്ന് അധികൃതര്‍ വ്യക്തമാക്കിയതാണ്. ആറു മാസത്തിനകം റീ കാര്‍പ്പറ്റിംഗും റണ്‍വെ സ്ട്രങ്ങ്തനിംഗും പൂര്‍ത്തിയാക്കുമെന്നും എല്ലാം പഴയപടിയാവുമെന്നുമായിരുന്നു ഉറപ്പ്.
മൂന്നു വര്‍ഷത്തിനൊടുവില്‍ അറ്റ കുറ്റ പണി തീര്‍ത്ത് മികച്ച നിലവാരത്തിലേക്ക് കരിപ്പൂര്‍ മാറിയിട്ടും ചില കള്ളക്കളികള്‍ തുടരുകയാണ്. തിരുവനന്തപുരത്തേക്ക് മാറ്റിയ സഊദി സര്‍വ്വീസുകളും നെടുമ്പാശ്ശേരിയിലേക്ക് മാറ്റിയ ഹജ്ജ് എമ്പാര്‍ക്കേഷന്‍ പോയിന്റും കരിപ്പൂരിലേക്ക് പുനഃസ്ഥാപിക്കുന്നത് അട്ടിമറിക്കാന്‍ ശ്രമം നടക്കുന്നതായി സംശയമുണ്ട്.
സഊദി സര്‍വ്വീസിന്റെ എട്ടാം സ്റ്റേഷന്‍ പദവി കരിപ്പൂരില്‍ പുനഃസ്ഥാപിക്കുകയോ തിരുവന്തപുരത്തിന് പുറമെ ഒമ്പതാം സ്റ്റേഷനായി അംഗീകരിപ്പിക്കുകയോ ചെയ്യേണ്ടത് അടിയന്തര ആവശ്യമാണ്. ഇക്കാര്യത്തിലുള്ള നടപടികള്‍ നീട്ടുന്നത് ഗൂഢാലോചനയാണ്. ജനങ്ങളുടെ സ്വന്തം വിമാനത്താവളമായ കരിപ്പൂരിനെ സംരക്ഷിക്കാന്‍ അഡൈ്വസറി ബോര്‍ഡ് ചെയര്‍മാന്‍ പി.കെ കുഞ്ഞാലിക്കുട്ടി ഉള്‍പ്പെടെയുള്ള ജനപ്രതിനിധികള്‍ നടത്തുന്ന ശ്രമങ്ങള്‍ക്ക് കരുത്ത് പകരേണ്ടത് അനിവാര്യമാണെന്നും ടി.പി.എം ആഷിറലി പറഞ്ഞു.