ഹജ്ജ് സീറ്റിന്റെ അഭാവം ഇന്ത്യയില്‍നിന്നുള്ള തീര്‍ത്ഥാടകര്‍ക്ക് പ്രയാസം സൃഷ്ടിക്കുന്നതായ വിവരം സഊദിയുടെ ശ്രദ്ധയില്‍പെടുത്തിയിരുന്നു. ഇതിനെതുടര്‍ന്നാണ് ഹജ്ജ് ക്വാട്ട വര്‍ധിപ്പിക്കാമെന്ന് സഊദി അറിയിച്ചത്. വ്യാപാരം, നിക്ഷേപം തുടങ്ങി നയതന്ത്രപരമായ വിഷയങ്ങളില്‍ ഇരു നേതാക്കളും തമ്മില്‍ ചര്‍ച്ച നടന്നതായി സര്‍്ക്കാര്‍ വൃത്തങ്ങള്‍ അറിയിച്ചു.

ഇരു രാഷ്ട്രങ്ങള്‍ക്കുമിടയില്‍ കൂടുതല്‍ വിമാന സര്‍വീസുകള്‍ ആരംഭിക്കാനും ധാരണയായി. വര്‍ഷാവസാനം റിയാദില്‍ നടക്കുന്ന അന്താരാഷ്ട്ര സമ്മേളനത്തിലേക്ക് പ്രധാനമന്ത്രിയെ സഊദി രാജകുമാരന്‍ ക്ഷണിച്ചതായും പ്രധാനമന്ത്രി ക്ഷണം സ്വീകരിച്ചതായും വിദേശകാര്യ സെക്രട്ടറി വ്യക്തമാക്കി.

അതേസമയം വിമാനക്കൂലി കുറച്ചെങ്കിലും അത് വിമാന കമ്പനികള്‍ ഈടാക്കുന്ന നിരക്കിന് ആനുപാതികമായിരിക്കും. എയര്‍ ഇന്ത്യ, സൗദി എയര്‍ലൈന്‍സ്, സൗദിയിലെ മറ്റൊരു വിമാന കമ്പനിയായ ഫ്‌ലൈനാസ് തുടങ്ങിയവ്ക്കാണ് നിരക്ക് കുറച്ചത്. ഇന്ത്യയിലെ 21 വിമാനത്താവളങ്ങളില്‍ നിന്ന് ജിദ്ദ, മദീന എന്നിവിടങ്ങളിലേക്കുള്ള യാത്രയ്ക്കാണ് ഇളവ് പ്രഖ്യാപിച്ചിട്ടുള്ളത്. ഇത്തവണ ഇന്ത്യയില്‍നിന്ന് ഹജ്ജ് തീര്‍ഥാടനത്തിനായി രജിസ്റ്റര്‍ ചെയ്തിരിക്കുന്നത് 1.75 ലക്ഷം ആളുകളാണ്.

കഴിഞ്ഞ മാസമാണ് ഹജ്ജ് തീര്‍ഥാടനത്തിന് നല്‍കിവന്നിരുന്ന സബ്‌സിഡി കേന്ദ്രസര്‍ക്കാര്‍ നിര്‍ത്തലാക്കിയത്. 2012 ലെ സുപ്രീം കോടതി ഉത്തരവ് പ്രകാരമാണ് കേന്ദ്രസര്‍ക്കാര്‍ ഈ തീരുമാനമെടുത്തത്. ഇതിന് പിന്നാലെയാണ് ഇപ്പോള്‍ ഹജ്ജ് യാത്രികര്‍ക്ക് ആശ്വാസമുണ്ടാകുന്ന നീക്കം കേന്ദ്രത്തിന്റെ ഭാഗത്തുനിന്നുണ്ടാകുന്നത്.

ഫെബ്രുവരി രണ്ടുവരെ നറുക്കെടുപ്പ് നിര്‍ത്തിവെക്കാനുള്ള കേരളത്തിന്റെ അഭ്യര്‍ത്ഥന അംഗീകരിക്കുന്നത് പ്രായോഗിക ബുദ്ധുമുട്ടുണ്ടാക്കുമെന്നതിനാല്‍ അംഗീകരിക്കാനാവാത്ത സ്ഥിതിയാണ്. എല്ലാ സംസ്ഥാനങ്ങളും 23 ന് മുമ്പ് തന്നെ നറുക്കെടുപ്പ് പൂര്‍ത്തിയാക്കിയിരിക്കണമെന്ന മാര്‍ഗ രേഖയില്‍ നിന്ന് വ്യതിചലിക്കാനാവില്ലെന്നും കേരളം നറുക്കെടുപ്പ് നടത്തിയില്ലെങ്കില്‍ കേന്ദ്ര ഹജ്ജ് കമ്മിറ്റി നേരിട്ട് നറുക്കെടുപ്പിന് നിര്‍ബന്ധമാകും.
ഹജ്ജ് സബ്‌സിഡി ഥൃതിപ്പെട്ട് എടുത്തു കളഞ്ഞപ്പോഴുള്ള ഹജ്ജ് തീര്‍ത്ഥാടകരുടെ പ്രയാസങ്ങള്‍ ലഘൂകരിക്കാന്‍ ക്രിയാത്മക ഇടപെടല്‍ വേണമെന്നും ഇ.ടി മുഹമ്മദ് ബഷീര്‍ യോഗത്തില്‍ ആവശ്യപ്പെട്ടു.കേന്ദ്ര ഹജ്ജ് കമ്മിറ്റി യോഗത്തില്‍ ചെയര്‍മാന്‍ ചൗധരി മെഹ്്ബൂബ് അലി കൗസര്‍ അധ്യക്ഷത വഹിച്ചു.

കേന്ദ്ര സര്‍ക്കാര്‍ നല്‍കിവരുന്ന ഹജ്ജ് സബ്‌സിഡി കുറച്ച് കൊണ്ടുവന്ന് 2022 ഓടെ പൂര്‍ണമായും നിര്‍ത്തലാക്കണമെന്ന ജസ്റ്റിസ് ആഫ്താബ് ആലം, ജസ്റ്റിസ് രഞ്ജനാ പി. ദേശായി എന്നിവരടങ്ങിയ സുപ്രീംകോടതി ബെഞ്ചിന്റെ 2012ലെ നിര്‍ദേശം, രാജാവിനേക്കാള്‍ വലിയ രാജഭക്തിയോടെ എന്‍.ഡി.എ സര്‍ക്കാര്‍ നാല് വര്‍ഷം മുമ്പേ നടപ്പിലാക്കിയിരിക്കുകയാണ്.
രാജ്യം നേരിടുന്ന കടുത്ത അസഹിഷ്ണുതയും പൗരന്മാരുടെ നീറുന്ന പ്രശ്‌നങ്ങളുമൊന്നും തിരിഞ്ഞുനോക്കാന്‍ സമയമില്ലാഞ്ഞിട്ടുപോലും മുത്ത്വലാഖ് വിഷയത്തിലും ഹജ്ജ് സബ്‌സിഡി പ്രശ്‌നത്തിലുമെല്ലാം ‘പ്രാമാണിക നിര്‍ദേശങ്ങള്‍’ നടപ്പിലാക്കാനുള്ള മോദി സര്‍ക്കാറിന്റെ പ്രതിജ്ഞാബദ്ധത ആരെയും അമ്പരപ്പിക്കുന്നതാണ്. ഗവണ്‍മെന്റ് നല്‍കിവരുന്ന ഹജ്ജ് സബ്‌സിഡി നിര്‍ത്തലാക്കിയാല്‍ ഇസ്‌ലാമിന്റെ പഞ്ചസ്തംഭങ്ങളിലൊന്ന് ഇടിഞ്ഞുവീഴുമെന്ന ധാരണയിലാണ് വിമര്‍ശകരിലും ഗുണകാംക്ഷികളിലും പെട്ട വലിയൊരു വിഭാഗം. ആണ്ടിലൊരിക്കല്‍ പരിശുദ്ധ കര്‍മത്തിനായി ഇന്ത്യയില്‍ നിന്ന് പോകുന്ന മുഴുവന്‍ ഹജ്ജാജിമാര്‍ക്കും സര്‍ക്കാര്‍ നല്‍കി വരുന്ന മഹാ ഔദാര്യം എന്ന നിലക്കാണ് ഇത്തരക്കാര്‍ ഈ കീഴ്‌വഴക്കത്തെ നോക്കിക്കാണുന്നത്. യഥാര്‍ഥത്തില്‍ ഓരോ വര്‍ഷവും ഹജ്ജിന് പോകുന്ന ലക്ഷക്കണക്കിന് ആളുകളില്‍ ചെറിയൊരു ശതമാനത്തിന് മാത്രമെ സര്‍ക്കാര്‍ സംവിധാനങ്ങള്‍ വഴി പോകാന്‍ അര്‍ഹതയുള്ളൂ. അതിന്റെ സെലക്ഷനാണെങ്കില്‍ ഏറെ പ്രയാസകരമാണ് താനും. ഇവര്‍ക്ക് മാത്രമാണ് സര്‍ക്കാര്‍ സബ്‌സിഡി നല്‍കുന്നു എന്ന് പറയപ്പെടുന്നത്. ഇതാകട്ടെ വിമാനയാത്രാ ചെലവില്‍ മാത്രം പരിമിതമാണുതാനും. ഭക്ഷണം, താമസം, ലഗേജ്… തുടങ്ങി മറ്റു ചെലവുകള്‍ മുഴുവനും ഹാജിമാര്‍ സ്വയം വഹിക്കുകയാണ് ചെയ്യുന്നത്.
തീര്‍ഥ യാത്രാ സബ്‌സിഡികള്‍ മുസ്‌ലിംകള്‍ക്ക് മാത്രം നല്‍കിവരുന്ന ആനുകൂല്യമെന്ന നിലക്കാണ് ചില വിഭാഗീയ സംഘടനകള്‍ ചിത്രീകരിക്കാറ്. ഈ പ്രചാരണം തീര്‍ത്തും അവാസ്തവവും ദുരുദ്ദേശ്യപരവുമാണ്. ഇന്ത്യക്ക് പുറത്തുള്ള എല്ലാ തീര്‍ഥാടന കേന്ദ്രങ്ങളിലേക്കുമുള്ള യാത്രാ ചെലവിലും സര്‍ക്കാര്‍ സബ്‌സിഡി നല്‍കുന്നുണ്ട്. ഇന്ത്യക്ക് പുറത്തുള്ള ഹിന്ദു തീര്‍ഥാടന കേന്ദ്രമായ ടിബറ്റിലെ മാനസ സരോവരത്തിലേക്ക് പോകാനും ക്രൈസ്തവ വിശുദ്ധ നഗരമായ ജറൂസലേം ദേവാലയത്തിലേക്ക് പോകാനും സര്‍ക്കാര്‍ സബ്‌സിഡി നല്‍കാറുണ്ടെന്നും 2014ല്‍ കേരളത്തിലെ 42 പേരടക്കം ഇന്ത്യക്കാരായ 1042 ഹിന്ദു തീര്‍ഥാടകര്‍ മാനസ സരോവരിലേക്ക് തീര്‍ഥയാത്ര നടത്തിയിട്ടുണ്ടെന്നും കമ്യൂണിസ്റ്റായ പി.കെ പ്രേംനാഥ് വിവരാവകാശ രേഖകള്‍ വെച്ച് സമര്‍ഥിക്കുന്നുണ്ട്. മാത്രമല്ല ഹരിദ്വാര്‍, ഉജ്ജയിന്‍, നാസിക്, കുംഭമേള, അമര്‍നാഥ്, കൈലാഷ്, തിബറ്റ് തുടങ്ങിയ ഇടങ്ങളിലേക്കെല്ലാം തീര്‍ഥയാത്ര നടത്താന്‍ ഭക്തര്‍ക്ക് ധാരാളം ഫണ്ടുകള്‍ കേന്ദ്ര സര്‍ക്കാര്‍ നീക്കിവെക്കാറുമുണ്ട്. മാനസ സരോവര്‍ യാത്രക്ക് നല്‍കുന്ന സബ്‌സിഡി 25,000 രൂപയില്‍നിന്ന് 30,000 രൂപയായി ഉയര്‍ത്താന്‍ ഉത്തരാഖണ്ഡ് സര്‍ക്കാര്‍ തീരുമാനമെടുത്തത് അടുത്തിടെയാണ്. മാറിയ സാഹചര്യത്തില്‍ മുസ്‌ലിംകളുടെ തീര്‍ഥയാത്രയെ പോലെ ഇതര മതസ്ഥരുടെ തീര്‍ഥാടനങ്ങള്‍ക്കും ഈ നിയമം ബാധകമാക്കാന്‍ സര്‍ക്കാര്‍ ആര്‍ജവം കാണിക്കുമോയെന്ന് കണ്ടറിയണം.
1932ല്‍ ബോംബെ, കല്‍ക്കത്ത തുറമുഖങ്ങള്‍ വഴി ഹജ്ജിന് പോകുന്നവര്‍ക്ക് പൊതുഖജനാവില്‍ നിന്ന് ഇളവ് അനുവദിച്ച് കൊണ്ടുള്ള ‘ദി പോര്‍ട്ട് ഹജ്ജ് കമ്മിറ്റി ആക്ട്’ നിലവില്‍ വന്നതോടെയാണ് ഹജ്ജ് സബ്‌സിഡിക്ക് തുടക്കം കുറിക്കുന്നത്. സ്വാതന്ത്ര്യാനന്തരം, ജവഹര്‍ലാല്‍ നെഹ്‌റു പ്രധാനമന്ത്രിയായിരുന്ന 1959ല്‍ പാസാക്കിയ ഹജ്ജ് കമ്മിറ്റി ആക്ടിലൂടെ ബ്രിട്ടീഷ് ഭരണകാലത്തെ ഇളവുകള്‍ നിയമ പ്രാബല്യത്തോടെ തുടരുകയായിരുന്നു. മൂന്ന് മാര്‍ഗങ്ങളില്‍ കൂടിയാണ് തീര്‍ഥാടനത്തിനായി സഊദി ഗവണ്‍മെന്റ് സൗകര്യമൊരുക്കിയിരിക്കുന്നത്. കപ്പല്‍, വിമാനം, റോഡ് എന്നിവയാണത്. ഇതില്‍ വ്യോമ-നാവിക രൂപത്തിലുള്ള യാത്രകളാണ് ഇന്ത്യയില്‍ നിന്നുണ്ടായിരുന്നത്. 1995ന് ശേഷം കപ്പല്‍ മുഖേനയുള്ള സര്‍വീസ് നിര്‍ത്തലാക്കുകയും വിമാനയാത്ര കാര്യക്ഷമമാക്കുകയുമാണ് സര്‍ക്കാര്‍ ചെയ്തത്.
യഥാര്‍ഥത്തില്‍, ഹജ്ജ് സബ്‌സിഡി നല്‍കുന്നത് ഹജ്ജാജിമാര്‍ക്കാണോ അതോ യാത്രാവാഹനത്തിനോ എന്ന്കൂടി പരിശോധന നടത്തിയാല്‍ എത്തിച്ചേരുന്ന വസ്തുത ഇതിനേക്കാളേറെ ഞെട്ടിക്കുന്നതാണ്. നഷ്ടത്തില്‍ നിന്ന് നഷ്ടത്തിലേക്ക് കൂപ്പുകുത്തുന്ന എയര്‍ഇന്ത്യയെ രക്ഷിക്കാന്‍ സര്‍ക്കാര്‍ നടത്തുന്ന ‘സംഘടിത കൊള്ള’ യാണ് ഹജ്ജ് സബ്‌സിഡിയുടെ ഉള്ളുകള്ളികള്‍ ചികഞ്ഞാല്‍ പുറത്ത്‌വരിക. ഇന്ത്യയില്‍ നിന്ന് ഹജ്ജ് സര്‍വീസ് നടത്താന്‍ ഏകപക്ഷീയമായി എയര്‍ ഇന്ത്യക്കാണ് ഭാരത സര്‍ക്കാര്‍ അനുമതി നല്‍കിയിരിക്കുന്നത്. മറ്റൊരു വിമാന സര്‍വീസിനും ഈ സമയത്ത് സ്വയം ഹജ്ജ് യാത്ര നടത്തുക സാധ്യമല്ല. ആഗോള ടെണ്ടര്‍ വിളിക്കാതെയും മറ്റു വിമാന സര്‍വീസുകള്‍ നടത്തുന്ന കമ്പനികളുടെ നിരക്കുകള്‍ പരിഗണിക്കാതെയുമുള്ള ഈ ധാരണയുടെ വിശദാംശങ്ങള്‍ പഠിച്ചാല്‍ ആ രംഗത്ത് നടക്കുന്ന ചൂഷണങ്ങള്‍ ബോധ്യപ്പെടും.
സീസണെന്ന പേര് വെച്ച് നടക്കുന്ന കഴുത്തറപ്പന്‍ പരിപാടികളോടെ തുടങ്ങുന്നു ഈ രംഗത്തെ ചൂഷണം. ഉദാഹരണമായി, സാധാരണ സമയങ്ങളില്‍ കരിപ്പൂര്‍ എയര്‍പോര്‍ട്ടില്‍ നിന്ന് ജിദ്ദ എയര്‍പോര്‍ട്ടിലേക്ക് 4063 കിലോമീറ്റര്‍ യാത്ര ചെയ്യുന്ന ഒരു യാത്രക്കാരന് നടപ്പുമാസത്തില്‍ നല്‍കേണ്ട തുക 29000ത്തില്‍ താഴെയാണ്. എന്നാല്‍ ഹജ്ജ് സീസണില്‍ ഇത് 62000ത്തിന് മുകളിലേക്ക് വരും. ഇതില്‍ നിന്നാണ് എയര്‍ഇന്ത്യക്ക് സര്‍ക്കാര്‍ സബ്‌സിഡി നല്‍കുന്നത്. ഇതാകട്ടെ സബ്‌സിഡി കുറച്ചാല്‍ പോലും ഹജ്ജ് സീസണിലല്ലാത്ത ടിക്കറ്റ് നിരക്കുമായി താരതമ്യം ചെയ്താല്‍ വളരെ കൂടുതലാണുതാനും. ചുരുക്കത്തില്‍ സര്‍ക്കാറിനെ സംബന്ധിച്ചിടത്തോളം ഹജ്ജ് സബ്‌സിഡി എന്നത് കീശയിലെ പണമെടുത്ത് മേശയിലേക്ക് മാറ്റുന്നത് പോലെ നിസാരമായ ഒരു പ്രവര്‍ത്തനം മാത്രമാണ്. ഹജ്ജ് സബ്‌സിഡി 2022 ഓട് കൂടി പാടെ നിര്‍ത്തലാക്കുന്ന രൂപത്തില്‍ ഘട്ടംഘട്ടമായി കുറച്ചുകൊണ്ട് വരാനുള്ള സുപ്രീംകോടതിയുടെ നിര്‍ദേശം പഠിച്ച് നടപ്പിലാക്കുന്നതിന്റെ പ്രായോഗിക രൂപം ആവിഷ്‌കരിക്കാനായി കേന്ദ്രസര്‍ക്കാര്‍ ആറംഗ സമിതിയെ ചുമതലപ്പെടുത്തിയിരുന്നെങ്കിലും അതിന് അവധാനത കാണിക്കാതെ ചാടിവീണ് തീരുമാനമെടുക്കുകയാണ് മോദി സര്‍ക്കാര്‍ ചെയ്തത്. തീര്‍ച്ചയായും, ഹജ്ജ് സബ്‌സിഡി റദ്ദാക്കുന്ന സാഹചര്യത്തില്‍ ഇത്രയും കാലം അതിന്റെ ഗുണഭോക്താക്കള്‍ എന്ന് വിളിച്ചിരുന്ന ആളുകള്‍ക്ക് അക്കാര്യത്തില്‍ മുന്നോട്ട്‌വെക്കാനുള്ള നിര്‍ദേശങ്ങള്‍കൂടി പരിഗണിക്കേണ്ടതുണ്ട്.
മാര്‍ക്കണ്ഡേയ കഠ്ജു അടക്കമുള്ള തലമുതിര്‍ന്ന ന്യായാധിപന്മാര്‍ അടങ്ങുന്ന ബെഞ്ച് ഹജ്ജ് സബ്‌സിഡി നിര്‍ത്തലാക്കരുതെന്നും അഭംഗുരം തുടരണമെന്നും ഉത്തരവിട്ടതിനെ മറികടന്ന് പുറപ്പെടുവിച്ച സുപ്രീംകോടതിവിധിയുടെ മറപിടിച്ച് സര്‍ക്കാര്‍ ധൃതിപ്പെട്ട് നടപ്പാക്കിയ തീരുമാനം ആത്മാര്‍ഥമാണെങ്കില്‍ പ്രസ്തുത തുക അവര്‍ മുന്നോട്ട് വെച്ച പോലെ മുസ്‌ലിം വിദ്യാര്‍ഥിനികളുടെ വിദ്യാഭ്യാസ സ്‌കോളര്‍ഷിപ്പിലേക്ക് നീക്കിവെക്കുന്നതിന് പ്രായോഗികമായ നടപടികള്‍ കൈക്കൊള്ളണം. അത് നല്‍കാമെന്ന് അറിയിച്ച ന്യൂനപക്ഷ ക്ഷേമ വകുപ്പ് മന്ത്രി മുഖ്താര്‍ അബ്ബാസ് നഖ്‌വിക്ക് പോലും ഇക്കാര്യത്തില്‍ വ്യക്തതയില്ല എന്ന് മാത്രമല്ല നിരവധി ആശങ്കകള്‍ ബാക്കി കിടപ്പുണ്ടെന്നാണ് അദ്ദേഹത്തിന്റെ പത്രസമ്മേളനം കണ്ടാല്‍ ബോധ്യപ്പെടുക. മാധ്യമങ്ങള്‍ കൊട്ടിഘോഷിക്കുന്നത് പോലെ മുസ്‌ലിം പെണ്‍കുട്ടികളുടെ വിദ്യാഭ്യാസ സ്‌കോളര്‍ഷിപ്പിനാണ് പ്രസ്തുത തുക ഉപയോഗിക്കുക എന്ന കാര്യത്തില്‍ പോലും തീര്‍ച്ചയില്ല എന്നാണ് സര്‍ക്കാരിന്റെ സമീപനം കണ്ടാല്‍ മനസ്സിലാവുക. ജനരോഷം ഭയന്ന് പകരംവെക്കുന്ന നിര്‍ദേശങ്ങള്‍ പലപ്പോഴും ഭംഗിവാക്കുകളായി പര്യവസാനിക്കുകയും ഒരിക്കലും നടപ്പിലാകാതെ പോവുകയുമാണുണ്ടാവാറ്. പുതിയ നയം സ്ഥിരപ്പെടുത്താനാണ് സര്‍ക്കാര്‍ തീരുമാനമെങ്കില്‍ ഇക്കാര്യത്തില്‍ വ്യക്തമായ ചിത്രം പൊതുസമൂഹത്തിന് നല്‍കാന്‍ തയ്യാറാവേണ്ടതുണ്ട്. മാത്രമല്ല കോടതി തന്നെ ഇത് നേരിട്ട് മോണിറ്റര്‍ ചെയ്യുന്ന തരത്തിലേക്ക് കാര്യങ്ങള്‍ ക്രമീകരിക്കുകയും വേണം.
വേ്യാമ മാര്‍ഗമുള്ള ഹജ്ജ് തീര്‍ഥാടനത്തിന് ആനുകൂല്യങ്ങള്‍ തുടരാന്‍ ഗവണ്‍മെന്റ് താല്‍പര്യമെടുക്കാനുള്ള കാരണമായി പറഞ്ഞത് അക്കാലം വരെ രാജ്യാന്തര സര്‍വീസായി നിലനിന്നിരുന്ന കപ്പല്‍ വഴിയുള്ള ഹജ്ജ്‌യാത്ര നിര്‍ത്തലാക്കിയതായിരുന്നു. ദീര്‍ഘദൂര യാത്രാസൗകര്യമുള്ള ആഡംബരക്കപ്പലുകള്‍ വ്യാപകമായ സ്ഥിതിക്ക് വ്യോമ ഗതാഗതത്തോടൊപ്പം നാവികയാത്രാ സൗകര്യവും കുറ്റമറ്റ രീതിയിലും ചെലവ് കുറഞ്ഞ രൂപത്തിലും പുനരാരംഭിക്കുന്നത് നല്ലതാണ്. നിത്യച്ചെലവിന് വകയില്ലെങ്കില്‍ പോലും മതത്തിലെ ഹജ്ജിന്റെ പ്രാധാന്യം മനസ്സിലാക്കി, അന്നന്നത്തെ അന്നത്തിന് വകയിരുത്തിയതില്‍ നിന്ന് മിച്ചം വെച്ച് പണം സ്വരുക്കൂട്ടിയവര്‍ക്ക് ഇതൊരു ആശ്വാസമായിരിക്കും. നിലവില്‍ ഹജ്ജ് വിമാനങ്ങള്‍ നിശ്ചയിക്കാനുള്ള അവകാശം ഇന്ന് എയര്‍ഇന്ത്യയില്‍ പരിമിതമാണ്. എയര്‍ഇന്ത്യയോ അവര്‍ നിശ്ചയിക്കുന്ന വിമാന സര്‍വീസ് കമ്പനികളോ ആണ് ഹജ്ജ് യാത്രാസൗകര്യം ഒരുക്കുന്നത്. അതായത് ഇന്ത്യയില്‍ നിന്ന് പുറപ്പെടുന്ന മറ്റു വിമാന കമ്പനികളുടെ സേവനത്തിന് പോലും എയര്‍ ഇന്ത്യക്കാണ് സര്‍ക്കാര്‍ ഭീമമായ സബ്‌സിഡി നല്‍കുന്നതെന്നര്‍ഥം. അത് തന്നെ എയര്‍ഇന്ത്യ നിശ്ചയിക്കുന്ന നിരക്കിന്. സാധാരണ വിമാന ചാര്‍ജിനെ അപേക്ഷിച്ച് മൂന്ന് ഇരട്ടിയോളം വരുന്ന എയര്‍ഇന്ത്യയുടെ ഹജ്ജ് നിരക്ക്, ആരോപിക്കപ്പെട്ട പോലെ കൊള്ള ലാഭമെടുക്കലല്ല എങ്കില്‍ ആഗോള ടെണ്ടര്‍ വിളിച്ച് ആത്മാര്‍ഥത തെളിയിക്കേണ്ടതുണ്ട്. മതപരമായ പ്രാധാന്യംകൂടി കണക്കിലെടുത്ത് ഈ സീസണില്‍ സഊദി എയര്‍ലൈന്‍സ് പോലുള്ള കമ്പനികള്‍ കുറഞ്ഞ നിരക്കില്‍ യാത്രാസൗകര്യമൊരുക്കുന്നതില്‍ മത്സരിക്കുന്ന സമയത്ത് മെച്ചപ്പെട്ട സേവനവും മാന്യമായ നിരക്കും പ്രയാസമില്ലാതെ കണ്ടെത്താന്‍ കഴിയുമെന്ന കാര്യത്തില്‍ സംശയമില്ല. നിലവില്‍ ഹജ്ജ് സബ്‌സിഡിയുടെ പേരില്‍ നീക്കിവെച്ചുകൊണ്ടിരിക്കുന്ന തുകയും അതിന്റെ കൈമാറ്റ സമയത്തെ കണക്കുകളും തമ്മില്‍ ഏറെ അന്തരമുണ്ടെന്ന ആക്ഷേപം നിലനില്‍ക്കുന്നുണ്ട്. ഇത് ശരിയാണെങ്കില്‍ വ്യക്തമായ പകല്‍കൊള്ളയാണ് ബന്ധപ്പെട്ടവര്‍ നടത്തിക്കൊണ്ടിരിക്കുന്നത്. ഈയിടെ ഓണ്‍ലൈനില്‍ ഗുജറാത്തിലെ ഒരു ഐ.പി.എസ് ഉദ്യോഗസ്ഥന്റെതായി വന്ന ചില കണക്കുകള്‍ ഞെട്ടിപ്പിക്കുന്നതാണ്. പ്രസ്തുത കണക്ക് ഇങ്ങനെയാണ്:
ഹജ്ജിനു വേണ്ടി ഒരു ഹാജി സര്‍ക്കാരിനു കൊടുക്കുന്ന തുക: 185000 രൂപ. സഊദിയില്‍ എത്തിയാല്‍ ഹാജിക്ക് ഹജ്ജ് കമ്മിറ്റി തിരിച്ച് നല്‍കുന്ന തുക: 2100 റിയാല്‍ അഥവാ 38000 രൂപ. ഹജ്ജ് കമ്മിറ്റിയുടെ കയ്യില്‍ ഒരു ഹാജിയുടെ തുകയായി ബാക്കി വരുന്നത്: 147000 രൂപ. ഹജ്ജ് കമ്മിറ്റി എടുക്കുന്ന മറ്റ് ചെലവുകള്‍ (എകദേശം): മക്കയിലെ താമസം: 50000 രൂപ, മദീനയിലെ താമസം: 20000 രൂപ, വിമാനടിക്കറ്റ് (ചൂഷണമുക്തമായ സാധാരണ നിരക്ക്): 28000 രൂപ, മറ്റ് ചെലവുകള്‍: 25000 രൂപ. ഒരു ഹാജിയുടെ ഹജ്ജ് കഴിയാനുള്ള തുക, മൊത്തം = 123000 രൂപ. എല്ലാ ചെലവും കിഴിച്ച് ഒരു ഹാജിയുടെ കയ്യില്‍ നിന്നും ഹജ്ജ് കമ്മിറ്റിക്ക് കിട്ടുന്ന തുക: 147000 – 123000 = 24000 രൂപ. ഇന്ത്യന്‍ ഗവണ്‍മെന്റ് നല്‍കുന്ന ഹജ്ജ് സബ്‌സിഡി: 691 കോടി (2016ലെ കണക്ക്). മൊത്തം ഹാജിമാര്‍: 136000 പേര്‍, 6910000000 / 136000 = 50808 രൂപ. ഒരു ഹാജിയുടെ സബ്‌സിഡിയും ചെലവ് കിഴിച്ച് ബാക്കി വരുന്ന തുകയും കൂട്ടിയാല്‍ 50808 + 24000= 74808 രൂപ. മൊത്തം ഹാജിമാരുടെ ചെലവ് കിഴിച്ച് ബാക്കി വരുന്ന തുകയും സബ്‌സിഡിയും കൂട്ടിയാല്‍ 74808 ഃ 136000 =10173888000 (ആയിരത്തി പതിനേഴ് കോടിയില്‍ പരം). ബാക്കി വരുന്ന 3263888000 (മുന്നൂറ്റിയിരുപത്തിയാറ് കോടി മുപ്പത്തിയെട്ട് ലക്ഷത്തി എണ്‍പെത്തിയെണ്ണായിരം) രൂപയുടെ കണക്കുകള്‍ എവിടെ?! ഈ കണക്കുകളുടെ നിജസ്ഥിതി വ്യക്തമാക്കേണ്ടത് കേന്ദ്ര സര്‍ക്കാരാണ്. മറ്റു മുഴുവന്‍ വിവരങ്ങളും സുതാര്യമായി ലഭ്യമാവുന്ന സര്‍ക്കാര്‍ വെബ്‌സൈറ്റിലൂടെ ഇതിന്റെ വിശദാംശങ്ങളും ജനങ്ങള്‍ക്ക് ലഭ്യമാക്കേണ്ടതുണ്ട്. ഈ വസ്തുതകളെയെല്ലാം മുന്നില്‍വെച്ച് ഹജ്ജ് സബ്‌സിഡി നിര്‍ത്തലാക്കിയതിനെ അവലോകനം ചെയ്താല്‍ ആര്‍ക്കും ബോധ്യമാകും കച്ചവടത്തിലെ ലാഭ നഷ്ടവും സര്‍ക്കാറിന്റെ ഉള്ളിലിരിപ്പും.

ന്യൂഡല്‍ഹി: കേന്ദ്ര സര്‍ക്കാറിന്റെ ഹജ്ജ് സബ്‌സിഡി നിര്‍ത്തലാക്കിയ തീരുമാനത്തെ ചോദ്യം ചെയ്ത് എഐഎംഐഎം നേതാവ് അസാദ്ദദീന്‍ ഒവൈസി. സര്‍ക്കാര്‍ ഹജ്ജ് സബ്‌സിഡി വെട്ടിക്കുറച്ച തീരുമാനത്തെ താന്‍ എതിര്‍ക്കുന്നില്ലെന്നും എന്നാല്‍ രാജ്യത്ത് ഹിന്ദു തീര്‍ഥാടകര്‍ക്കുള്ള സബ്‌സിഡി നിര്‍ത്തിലാക്കാന്‍ മോദി തയ്യാറാണോ ഒവൈസി ചോദിച്ചു.

സര്‍ക്കാര്‍ ഹജ്ജ് സബ്‌സിഡി വെട്ടിക്കുറച്ച തീരുമാനത്തെ താന്‍ എതിര്‍ക്കുന്നില്ല. പക്ഷേ കേന്ദ്ര സര്‍ക്കാര്‍ ഇപ്പോള്‍ സ്വീകരിക്കുന്ന നടപടി പക്ഷപാതപരമായ നയമാണ്. കുംഭമേളയ്ക്ക് സര്‍ക്കാര്‍ സബ്‌സിഡി നല്‍കുന്നുണ്ട്. ഹജ്ജ് സബ്‌സിഡി നിര്‍ത്തലാക്കിയ സര്‍ക്കാര്‍ എന്തുകൊണ്ടാണ് കുംഭമേളയുടെ സബ്‌സിഡി അവസാനിപ്പിക്കാത്തത്. ഇതിനു പുറമെ യുപിയിലെ യോഗി ആദിത്യനാഥ് സര്‍ക്കാര്‍ 800 കോടി രൂപയാണ് അയോധ്യ, കാശി, മഥുര തീര്‍ഥാടനത്തിനു വേണ്ടി അനുവദിച്ചിരിക്കുന്നത്. വിവാദ ആള്‍ദൈവമായ റാം റഹിം സിങ്ങിന്റെ ദേരാ സച്ചാ സൗദയ്ക്കു ഹരിയാന സര്‍ക്കാര്‍ ഒരു കോടി രൂപ അനുവദിച്ചിട്ടുണ്ട്. ഇതു അവസാനിപ്പിക്കാന്‍ മോദി നിര്‍ദേശിക്കുമോ എന്നും ഒവൈസി ചോദിച്ചു. രാജ്യത്ത് മോദി സര്‍ക്കാര്‍ ഹൈന്ദവ പ്രീണനം നടത്തുകയാണ്. ഇങ്ങനെ ഹൈന്ദവ പ്രീണനം നടത്തുന്ന നടപടി മോദി സര്‍ക്കാര്‍ അവസാനിപ്പിക്കണമെന്നു ഒവൈസി അഭിപ്രായപ്പെട്ടു.

ഹജ്ജ് സബ്‌സിഡി നിര്‍ത്തലാക്കിയ കേന്ദ്ര സര്‍ക്കാരിന്റെ തീരുമാനത്തിനു എതിരെ കടുത്ത പ്രതിഷേധമാണ് വിവിധ കോണുകളില്‍ നിന്നു ഉയരുന്നത്.

മലപ്പുറം: ഹജ്ജ് സബ്‌സിഡി നിറുത്തലാക്കിയ കേന്ദ്ര സര്‍ക്കാര്‍ നടപടി രാഷ്ട്രീയ പ്രേരിതമെന്ന് മുസ്‌ലിംലീഗ് ദേശീയ ജനറല്‍ സെക്രട്ടറി പി.കെ കുഞ്ഞാലിക്കുട്ടി. ന്യൂനപക്ഷങ്ങളെ വേദനിപ്പിക്കുന്ന തീരുമാനം എടുത്തത് എന്ത് ലക്ഷ്യം വെച്ചാണെന്ന് എല്ലാവര്‍ക്കും വ്യക്തമാണ്.

സുപ്രീംകോടതി 2022 വരെ സമയമനുവദിച്ച് ഘട്ടം ഘട്ടമായി നിറുത്തലാക്കണമെന്നാവശ്യപ്പെട്ട സബ്‌സിഡി ഒറ്റയടിക്ക് നിറുത്തലാക്കിയത് സാധാരണക്കാരുടെ ഹജ്ജ് സ്വപ്‌നങ്ങളെ ബാധിക്കുമെന്നും അദ്ദേഹം പറഞ്ഞു. യു.പി.എ സഖ്യകക്ഷികളുമായി ചേര്‍ന്ന് വിഷയത്തില്‍ തുടര്‍ നടപടി ആലോചിക്കും. പാര്‍ലമെന്റിലും മുസ്‌ലിംലീഗ് വിഷയം ഉന്നയിക്കും. ആഗോള ടെന്‍ഡര്‍ വിളിച്ച് ഹജ്ജ് യാത്രാ ചെലവ് കുറക്കാനുള്ള നിര്‍ദേശം ചെവികൊള്ളാത്ത കേന്ദ്ര സര്‍ക്കാര്‍ ധൃതിപിടിച്ച് സബ്‌സിഡി മാത്രം എടുത്ത് കളയുന്നത് ദുഷ്ട ലാക്കോടെയാണ്. ന്യൂനപക്ഷങ്ങള്‍ക്കെതിരായ നീക്കമാണിത്. മറ്റു പല തീര്‍ഥാടനത്തിനും ഉള്ള സബ്‌സിഡി നിലനിറുത്തി കൊണ്ടാണ് ഹജ്ജ് സബ്‌സിഡി മാത്രം എടുത്തു കളയുന്നത്. സബ്‌സിഡി തുക ന്യൂനപക്ഷ വിദ്യാര്‍ഥികളുടെ ക്ഷേമത്തിന് വിനിയോഗിക്കുമെന്ന് പറയുന്നത് കണ്ണില്‍ പൊടിയിടല്‍ മാത്രമാണെന്നും അദ്ദേഹം പറഞ്ഞു.

ഹജ്ജ് സബ്‌സിഡി നിറുത്തലാക്കിയ തീരുമാനത്തെ അനുകൂലിക്കുന്നവര്‍ അതുകൊണ്ട് ആരാണ് ഗുണമുണ്ടാക്കുന്നതെന്ന് തിരിച്ചറിയുന്നില്ല. സംസ്ഥാന സര്‍ക്കാര്‍ എടുക്കുന്ന പല തീരുമാനങ്ങളും ബി.ജെ.പിക്ക് ഗുണമായി ഭവിക്കുകയാണെന്ന് വിഷയത്തില്‍ സംസ്ഥാന സര്‍ക്കാര്‍ കൈക്കൊണ്ട നിലപാടിനെ വിമര്‍ശിച്ച് അദ്ദേഹം പറഞ്ഞു.

ന്യൂഡല്‍ഹി: ഹജ്ജ് കമ്മിറ്റി വഴിയുള്ള തീര്‍ത്ഥാടകര്‍ക്ക് വര്‍ഷങ്ങളായി നല്‍കി വന്നിരുന്ന ഹജ്ജ് സബ്‌സിഡി കേന്ദ്ര സര്‍ക്കാര്‍ നിര്‍ത്തലാക്കി. കേന്ദ്ര ന്യൂനപക്ഷ ക്ഷേമ വകുപ്പ് മന്ത്രി മുഖ്താര്‍ അബ്ബാസ് നഖ്‌വിയാണ് ഇക്കാര്യം അറിയിച്ചത്. ഈ വര്‍ഷം മുതലുള്ള ഹജ്ജ് തീര്‍ത്ഥാടകര്‍ക്ക് സബ്‌സിഡി ലഭിക്കില്ല. സബ്‌സിഡി എടുത്തു കളഞ്ഞാലും 1.75 ലക്ഷം തീര്‍ത്ഥാടകര്‍ ഇത്തവണ ഇന്ത്യയില്‍നിന്ന് ഹജ്ജിന് പുറപ്പെടുമെന്നും ഇത് റെക്കോര്‍ഡ് സംഖ്യയാണെന്നും മന്ത്രി അവകാശപ്പെട്ടു.

ഹജ്ജ് സബ്‌സിഡി ഘട്ടം ഘട്ടമായി (2022നകം) അവസാനിപ്പിക്കണമെന്ന സുപ്രീംകോടതിയുടെ 2012ലെ വിധിയുടെ ചുവടു പിടിച്ചാണ് കേന്ദ്ര സര്‍ക്കാര്‍ നടപടി. ഹജ്ജ് സബ്‌സിഡി നിര്‍ത്തലാക്കുമെന്ന് നരേന്ദ്രമോദി സര്‍ക്കാര്‍ കൊണ്ടുവന്ന പുതിയ ഹജ്ജ് നയത്തിലും വ്യക്തമാക്കിയിരുന്നു. എന്നാല്‍ ഈ വര്‍ഷത്തെ ഹജ്ജ് അപേക്ഷ സ്വീകരിക്കുന്നത് പൂര്‍ത്തിയാക്കുകയും വിവിധ സംസ്ഥാന കമ്മിറ്റികള്‍ക്കുള്ള ക്വാട്ട വീതിച്ചു നല്‍കുന്നതിനുള്ള നടപടികളിലേക്ക് കടക്കുകയും ചെയ്ത ശേഷമാണ് ഹജ്ജ് സബ്‌സിഡി ലഭിക്കില്ലെന്ന കേന്ദ്ര സര്‍ക്കാര്‍ പ്രഖ്യാപനം. ഇത് സബ്‌സിഡി ലഭിക്കുമെന്ന പ്രതീക്ഷയില്‍ ഹജ്ജ് കമ്മിറ്റി വഴി അപേക്ഷ നല്‍കിയ തീര്‍ത്ഥാടകരെ ദുരിതത്തിലാക്കും. നാലു ലക്ഷത്തോളം പേരാണ് ഇന്ത്യയില്‍നിന്ന് ഇത്തവണ ഹജ്ജിന് അപേക്ഷ സമര്‍പ്പിച്ചിരിക്കുന്നത്. 1,75,000 പേര്‍ക്കാണ് ഇന്ത്യയില്‍നിന്ന് ഹജ്ജിന് അവസരം ലഭിക്കുക. ഇതില്‍ ഒന്നേകാല്‍ ലക്ഷത്തോളം പേരും ഹജ്ജ് കമ്മിറ്റി വഴി തീര്‍ത്ഥാടനത്തിന് പുറപ്പെടുന്നവരാണ്. കേരളത്തില്‍നിന്ന് മാത്രം 10,981 പേര്‍ക്കാണ് കഴിഞ്ഞ വര്‍ഷം അവസരം ലഭിച്ചത്. ഇത്തവണ ഇതില്‍ കൂടുതല്‍ പേര്‍ക്ക് അവസരം ലഭിക്കുമെന്നാണ പ്രതീക്ഷ. ഇവരെയെല്ലാം തീരുമാനം ബാധിക്കും.

”ന്യൂനപക്ഷങ്ങളുടെ ശാക്തീകരണവും അന്തസ്സ് ഉയര്‍ത്താനും ലക്ഷ്യമിട്ടുള്ളതാണ് തീരുമാന”മെന്ന് കേന്ദ്രമന്ത്രി അവകാശപ്പെട്ടു. ”ആരുടേയും ഔദാര്യമില്ലാതെ മുസ്്‌ലിംകള്‍ക്ക് ഹജ്ജിന് അവസരം ഒരുക്കുകയാണ് ലക്ഷ്യം. ഇതിനു വേണ്ടിയാണ് സബ്‌സിഡി എടുത്തു കളയുന്നത്. ഈ വര്‍ഷം മുതല്‍ കപ്പല്‍ മാര്‍ഗം ഹജ്ജ് തീര്‍ത്ഥാടനത്തിന് അവസരം ഒരുക്കാന്‍ സഊദിഭരണകൂടം തത്വത്തില്‍ അനുമതി നല്‍കിയിട്ടുണ്ടെ”ന്നും മന്ത്രി പറഞ്ഞു.
ചെറു പട്ടണങ്ങളില്‍നിന്ന് ഹജ്ജിനു പുറപ്പെടുന്നവര്‍ക്കുണ്ടാകുന്ന അസൗകര്യം കണക്കിലെടുത്ത് ഘട്ടം ഘട്ടമായേ സബ്‌സിഡി നിര്‍ത്തലാക്കാവൂ എന്ന് സുപ്രീംകോടതി ഉത്തരവിട്ടിരുന്നു. ഇതിന് വിരുദ്ധമായി സബ്‌സിഡി കേന്ദ്ര സര്‍ക്കാര്‍ ഒറ്റയടിക്ക് പിന്‍വലിക്കുകയായിരുന്നു. ഇതോടെ സബ്‌സിഡി ഇനത്തില്‍ ലഭിച്ചിരുന്ന തുക കൂടി ഇനി അധികം നല്‍കേണ്ടി വരും. ഹജ്ജ് കമ്മിറ്റി – സ്വകാര്യ ഗ്രൂപ്പുകള്‍ തമ്മിലുള്ള നിരക്കിലെ അന്തരം കുറയാനും ഇത് കാരണമാകും. സ്വകാര്യ ഗ്രൂപ്പുകള്‍ക്കാണ് ഇതിന്റെ ഗുണം ലഭിക്കുക.

ഹജ്ജ് സബ്‌സിഡി നിര്‍ത്തലാക്കുമ്പോള്‍ തിരക്കുള്ള സീസണുകളില്‍ വിമാനയാത്രാകൂലി കുത്തനെ ഉയര്‍ത്തുന്ന വിമാനക്കമ്പനികളുടെ പകല്‍കൊള്ള അവസാനിപ്പിക്കാനും നടപടി വേണമെന്ന് മുസ്്‌ലിം സംഘടനകള്‍ നേരത്തെ ആവശ്യപ്പെട്ടിരുന്നു. ഇക്കാര്യത്തില്‍ യാതൊരു നടപടിയും എടുക്കാതെയാണ് ഹജ്ജ് സബ്‌സിഡി നിര്‍ത്തിലാക്കാനുള്ള കേന്ദ്ര സര്‍ക്കാര്‍ തീരുമാനം എന്നത് ദുരിതം ഇരട്ടിയാക്കും.

ഹജ്ജ് സബ്‌സിഡിക്കായി ചെലവിട്ടിരുന്ന തുക ഇനി മുതല്‍ ന്യൂനപക്ഷ സമുദായങ്ങളിലെ വനിതകളുടെ വിദ്യാഭ്യാസ, ശാക്തീകരണ പദ്ധതികള്‍ക്കായി നീക്കിവെക്കുമെന്ന് മന്ത്രി പറഞ്ഞു. മുസ്്‌ലിം വനിതകളുടെ ശാക്തീകരണത്തിനു മാത്രമാണോ തുക വിനിയോഗിക്കുകയെന്ന കാര്യം അദ്ദേഹം വ്യക്തമാക്കിയില്ല. കഴിഞ്ഞ വര്‍ഷം 450 കോടിയോളം രൂപയാണ് ഹജ്ജ് സബ്‌സിഡിക്കായി കേന്ദ്ര സര്‍ക്കാര്‍ നീക്കിവെച്ചിരുന്നത്.

ഹജ്ജ് സബ്‌സിഡി നിര്‍ത്തലാക്കിയ കേന്ദ്ര സര്‍ക്കാര്‍ നീക്കത്തില്‍ എതിര്‍പ്പുമായി കോണ്‍ഗ്രസ് ഉള്‍പ്പെടെയുള്ള കക്ഷികള്‍ രംഗത്തെത്തി. നിക്ഷിപ്ത താല്‍പര്യത്തോടെയുള്ള നടപടിയാണ് കേന്ദ്രത്തിന്റേതെന്ന് കോണ്‍ഗ്രസ് ആരോപിച്ചു.

ഹജ്ജ് യാത്രക്ക് മാത്രമല്ല, ഹരിദ്വാര്‍, ഉജ്ജയിന്‍, നാസിക്, അലഹാബാദ് കുംഭ മേളകളില്‍ പങ്കെടുക്കാനും കൈലാഷ് മാനസ സരോവര്‍ യാത്രക്കും തിബറ്റന്‍ യാത്രക്കും സര്‍ക്കാര്‍ സബ്‌സിഡി നല്‍കുന്നുണ്ട്. മാനസ സരോവര്‍ യാത്രക്ക് നല്‍കുന്ന സബ്‌സിഡി 25,000 രൂപയില്‍നിന്ന് 30,000 രൂപയായി ഉയര്‍ത്താന്‍ ഉത്തരാഖണ്ഡ് സര്‍ക്കാര്‍ തീരുമാനമെടുത്തത് അടുത്തിടെയാണ്. ഇവയിലൊന്നും തൊടാതെയാണ് ഹജ്ജ് സബ്‌സിഡി മാത്രം നിര്‍ത്തലാക്കാനുള്ള തീരുമാനം. പണമുള്ളവര്‍ക്ക് മാത്രം നിര്‍ബന്ധമായ കര്‍മ്മം എന്ന നിലയാണ് ഹജ്ജ് സബ്‌സിഡി എടുത്തു കളയുന്നത്. സാമ്പത്തികമായി പിന്നാക്കം നില്‍ക്കുന്നവര്‍ക്ക് ഹജ്ജ് കര്‍മ്മത്തിന് മതപരമായ വിലക്കില്ലെന്നിരിക്കെ, ജീവിതത്തില്‍ ഒരിക്കലെങ്കിലും ഹജ്ജ് കര്‍മ്മം നിര്‍വഹിക്കുകയെന്ന മുസ്്‌ലിംകളുടെ ജീവിതാഭിലാഷത്തിനാണ് കേന്ദ്ര സര്‍ക്കാര്‍ തീരുമാനം തുരങ്കം വെക്കുന്നത്.

ആറു പതിറ്റാണ്ടിലധികമായി ഇന്ത്യയിലെ മുസ്‌ലിംകള്‍ അനുഭവിച്ചുകൊണ്ടിരുന്ന ഹജ്ജ് തീര്‍ത്ഥാടനത്തിനുള്ള സബ്‌സിഡി നിര്‍ത്തലാക്കുന്നതായി കേന്ദ്ര സര്‍ക്കാര്‍ പ്രഖ്യാപിച്ചിരിക്കുകയാണ്. മുസ്‌ലിംകളെ ശാക്തീകരിക്കാനാണ് സബ്‌സിഡി നിര്‍ത്തലാക്കുന്നതെന്നും അവരെ വോട്ടു ബാങ്കാക്കി പ്രീണിപ്പിക്കുന്ന ഇതരകക്ഷികള്‍ക്കെതിരെയുള്ള നയപ്രഖ്യാപനമാണെന്നുമൊക്കെയാണ് കേന്ദ്രസര്‍ക്കാര്‍ വ്യക്തമാക്കിയിരിക്കുന്നത്. കേന്ദ്ര ന്യൂനപക്ഷ കാര്യ വകുപ്പുമന്ത്രി മുക്താര്‍ അബ്ബാസ് നഖ്‌വിയാണ് വാര്‍ത്ത സ്ഥിരീകരിച്ചത്.

കേന്ദ്രത്തിലെ ബി.ജെ.പി സര്‍ക്കാരിന്റെ പ്രഖ്യാപിത നയ നിലപാടാണ് ഇതെന്നതിനാല്‍ ഇക്കാര്യത്തില്‍ അല്‍ഭുതത്തിന് അവകാശമില്ല. എന്നാല്‍ അതിന് തെരഞ്ഞെടുത്ത സമയവും ന്യായവും ഏറെ സന്ദേഹം ഉയര്‍ത്തുന്നതാണ്. ഹജ്ജ് സബ്‌സിഡി നിര്‍ത്തുന്നതിനുള്ള തീരുമാനത്തെക്കുറിച്ച് പരിശോധിക്കാന്‍ 2012ല്‍ സുപ്രീംകോടതി ഉത്തരവിട്ടതിന്റെ പശ്ചാത്തലത്തിലാണ് ഇത്തരമൊരു തീരുമാനമെന്നാണ് കേന്ദ്രത്തിന്റെയും ബി.ജെ.പിയും പക്ഷം. അതേസമയം അതേ വിധിയില്‍ തന്നെ സബ്‌സിഡി 2022നുള്ളില്‍ നിര്‍ത്തിവെക്കണമെന്ന ഭാഗത്തെ ഇക്കൂട്ടര്‍ തീരെ കാര്യമാക്കിയതേയില്ല. ന്യൂനപക്ഷ പ്രീണനത്തെക്കുറിച്ച് വാതോരാതെ സംസാരിക്കുന്നവര്‍ അഞ്ചുവര്‍ഷം മുമ്പേതന്നെ സുപ്രീംകോടതി വിധി നടപ്പാക്കാന്‍ തീരുമാനിച്ചതിന്റെ രാഷ്ട്രീയത്തെക്കുറിച്ച് ബി. ജെ.പിയെ അറിയുന്നവര്‍ക്കാര്‍ക്കും സംശയം ഉണ്ടാകാന്‍ വഴിയില്ല.

ഇനിയും അഞ്ചുവര്‍ഷം ബാക്കിയിരിക്കെ ഇത്ര ധൃതിപിടിച്ച് തീരുമാനം ഒറ്റയടിക്ക് നടപ്പാക്കിയതിനു പിന്നിലെ ചേതോവികാരം അറിയേണ്ടതുണ്ട്. ഒരു മുസ്്‌ലിമിന്റെ ചിരകാല സ്വപ്‌നമാണ് ഇസ്്‌ലാമിലെ പഞ്ചഅനുഷ്ഠാന സ്തംഭങ്ങളിലൊന്നായ ഹജ്ജ്. പരിശുദ്ധ ഹജ്ജ് കര്‍മത്തിന് സര്‍ക്കാരോ മറ്റാരെങ്കിലുമോ സാമ്പത്തികമായ ഔദാര്യം തരണമെന്ന് ആരും ആവശ്യപ്പെട്ടിട്ടില്ല. അങ്ങനെ അവര്‍ ആഗ്രഹിക്കുന്നുമില്ല. വളരെ മുമ്പുമുതല്‍ നിലവിലിരുന്ന ഹജ്ജ് തീര്‍ത്ഥാടകര്‍ക്കുള്ള കപ്പല്‍യാത്ര നിര്‍ത്തലാക്കിയതോടെ വന്നുഭവിച്ച ഭാരിച്ച വിമാനയാത്രാ ചെലവാണ് ഹജ്ജ് സബ്‌സിഡി എന്ന ആശയത്തിലേക്ക് 1954ല്‍ പണ്ഡിറ്റ് നെഹ്‌റുവിനെ പോലുള്ള ഭരണാധികാരികളെ നയിച്ചത്. മുംബൈയിലാണ് ആദ്യാനുകൂല്യം നല്‍കിയത്. പിന്നീടത് വിവിധ സംസ്ഥാനങ്ങളിലേക്ക് വ്യാപിപ്പിക്കുകയായിരുന്നു. ഹജ്ജാജികളുടെ ഭാരിച്ച യാത്രാചെലവ് മുന്നില്‍ കണ്ടുകൊണ്ട് ദീര്‍ഘദൃക്കുകളായ നേതാക്കള്‍ വിഭാവനം ചെയ്ത് നടപ്പാക്കിയ ഒന്നാണ് ഇതെന്നര്‍ത്ഥം. ഇക്കാര്യത്തില്‍ ഒരു ഹര്‍ജിയുടെ പേരില്‍ ഉന്നത കോടതി പുറപ്പെടുവിച്ച ഉത്തരവിനെ മാനിച്ചുകൊണ്ടാണ് മുസ്‌ലിംകള്‍ക്കിടയില്‍ നിന്നുള്ള പ്രതികരണങ്ങള്‍. വിധിയില്‍ അപ്പീലിന് പോകുന്നതില്‍ പോലും ഇതു പ്രകടമാണ്. എന്നാല്‍ ഇപ്പോഴത്തെ തീരുമാനം കോടതി വിധിയുടെ അന്തസ്സത്തക്ക് എതിരാണ്.

പടിപടിയായി കുറച്ചതുമൂലം നൂറുകോടി രൂപയാണ് പ്രതിവര്‍ഷം ഹജ്ജ് സബ്‌സിഡിയായി കേന്ദ്രസര്‍ക്കാര്‍ കഴിഞ്ഞവര്‍ഷം അനുവദിച്ചത്. ഇന്ത്യയിലെ വിവിധ തീര്‍ത്ഥാടനകേന്ദ്രങ്ങള്‍ക്ക് സര്‍ക്കാര്‍ഖജനാവില്‍ നിന്ന് ചെലവഴിക്കുന്ന പണത്തിന്റെ എത്രയോ ചെറുതാണിതെന്നോര്‍ക്കണം. പൊടുന്നനെ നിര്‍ത്തലാക്കുമ്പോള്‍ സര്‍ക്കാര്‍ ക്വാട്ടയില്‍ ഹജ്ജിന് പോകുന്നവരുടെ യാത്രയെയാണ് താല്‍കാലികമായെങ്കിലും പ്രതികൂലമായി ബാധിക്കുക. ഈ വര്‍ഷം ഹജ്ജ്തീര്‍ത്ഥാടനത്തിനുള്ള പട്ടികയും യാത്രാ ഷെഡ്യൂളുകളും വരെ തയ്യാറായിരിക്കെ ഇപ്പോള്‍ പ്രഖ്യാപിച്ചിരിക്കുന്ന സബ്‌സിഡി നിരോധനം കുറെപേരെ ആശങ്കയുടെ മുള്‍മുനയിലാക്കും. സബ്‌സിഡി കൊണ്ട് ഒരു ഹജ്ജ് തീര്‍ത്ഥാടകന് ലഭിക്കുന്ന ആനുകൂല്യം യാത്രാ ചെലവിലുള്ള ഇളവാണ്. ഇത് കേരളത്തില്‍ ശരാശരി ഇരുപതിനായിരം രൂപയോളമേ വരൂ. ഭാരിച്ച യാത്രാനിരക്കാണ് പൊതുവെ ഇത്തരത്തിലുള്ള ചെലവിന് കാരണമാകുന്നതെന്നിരിക്കെ അക്കാര്യത്തില്‍ സര്‍ക്കാര്‍ എന്തുചെയ്യാന്‍ പോകുന്നുവെന്ന് ഉത്തരവില്‍ പറയുന്നില്ല. മുസ്്‌ലിംകളുടെ പഠനച്ചെലവിലേക്ക് പണം മാറ്റിവെക്കുന്നെങ്കിലത് നല്ല കാര്യം തന്നെ. എന്നാലത് പൊടുന്നനെ ഇത്രയും തീര്‍ത്ഥാടകരെ പതിനൊന്നാം മണിക്കൂറില്‍ മുള്‍മുനയില്‍ നിര്‍ത്തി വേണ്ടതില്ലായിരുന്നു. സഊദി അറേബ്യന്‍ എയര്‍ലൈന്‍സിന്റെയും ഇന്ത്യന്‍ എയര്‍ലൈന്‍സിന്റെയും വിമാനങ്ങളിലാണ് സര്‍ക്കാര്‍ ക്വാട്ടയിലെ ഹാജിമാര്‍ ഹജ്ജിന് പോകുന്നത്. അവരുടെ ഈ സീസണിലെ നിരക്ക് അമ്പതിനായിരം രൂപയോളമാണ്. പൂരക്കച്ചവടം പോലെയാണ് വിമാനക്കമ്പനികള്‍ ഹജ്ജ് സീസണില്‍ നിരക്ക് ഈടാക്കുന്നത്. ഹജ്ജ് യാത്രികര്‍ക്കായി ആഗോള ടെണ്ടര്‍ വിളിച്ച് താങ്ങാവുന്ന നിരക്കില്‍ യാത്രാസൗകര്യം ഏര്‍പ്പെടുത്തുകയാണ് ജനങ്ങളോടും ഭരണഘടന അനുശാസിക്കുന്ന മതന്യൂനപക്ഷ താല്‍പര്യത്തോടും പ്രതിബദ്ധതയുളളവര്‍ ചെയ്യേണ്ടിയിരുന്നത്. എന്നാല്‍ ആഗോള ടെണ്ടര്‍ എന്ന നിരന്തര ആവശ്യത്തെക്കുറിച്ച് കേന്ദ്രം മിണ്ടാതിരിക്കുന്നതിന് പിന്നിലെന്താണ് ?

മുസ്്‌ലിംകളുടെ സര്‍വതോന്മുഖമായ പുരോഗതിക്ക് വിവിധ കേന്ദ്രസര്‍ക്കാര്‍ സമിതികള്‍ നല്‍കിയിട്ടുള്ള ശുപാര്‍ശകളുടെയും നിര്‍ദേശങ്ങളുടെയും കാര്യത്തില്‍ കേന്ദ്രസര്‍ക്കാരിലെ ബി.ജെ.പി മന്ത്രിമാര്‍ക്ക് ഇന്നും ഞഞ്ഞാപിഞ്ഞ നയമാണുള്ളത്. രാജ്യത്തെ മുസ്്‌ലിംകളുടെ അവസ്ഥ പൊതുവില്‍ പട്ടികവിഭാഗങ്ങള്‍ക്ക് തുല്യമാണൈന്നായിരുന്നു കേന്ദ്രസര്‍ക്കാര്‍ നിയോഗിച്ച സച്ചാര്‍ കമ്മിഷന്‍ റിപ്പോര്‍ട്ടിലെ പഠനവിവരം. മദ്രസ നവീകരണ സംവിധാനം, മൗലാനാ ആസാദ് ഫൗണ്ടേഷന്‍ സംബന്ധിച്ച ആനുകൂല്യങ്ങള്‍, വിവിധ സ്‌കോളര്‍ഷിപ്പുകള്‍ തുടങ്ങിയവയുടെ കാര്യങ്ങളിലൊന്നിലും കേന്ദ്രസര്‍ക്കാരിന് ഒരുവിധ മനശ്ചാഞ്ചല്യവുമില്ലാതിരിക്കെ പൊടുന്നനെ സര്‍ക്കാര്‍ സബ്‌സിഡി നിര്‍ത്തിക്കളഞ്ഞുവെന്ന് പ്രഖ്യാപിക്കുന്നത് തികച്ചും രാഷ്ട്രീയ-വര്‍ഗീയ പ്രേരിതമായേ നിഷ്പക്ഷമതികള്‍ക്ക് കാണാന്‍ കഴിയൂ. രാജ്യത്തെ 21 വിവിധ ഹജ്ജ് എംബാര്‍ക്കേഷന്‍ കേന്ദ്രങ്ങള്‍ ഒന്‍പതായി ചുരുക്കാനുള്ള തീരുമാനവും മോദിയുടെ പെട്ടിയിലാണ്. ഏതായാലും ഇസ്രാഈല്‍ പ്രധാനമന്ത്രിയുടെ സന്ദര്‍ശന ദിവസം തന്നെ മുസ്്‌ലിം വിരുദ്ധമായൊരു തീരുമാനം പ്രഖ്യാപിക്കപ്പെട്ടത് കൗതുകമായി തോന്നുന്നു.

ഇതുസംബന്ധിച്ച വാര്‍ത്ത പുറത്തുവന്നയുടന്‍ ബി.ജെ.പിയുമായി ബന്ധപ്പെട്ട നേതാക്കളുടെ ട്വിറ്ററില്‍ പറയുന്നത് തീരുമാനം വളരെ സ്വാഗതാര്‍ഹമാണെന്നാണ്. പല മുസ്‌ലിം സംഘടനകളും ഇക്കാര്യത്തില്‍ കേന്ദ്രസര്‍ക്കാര്‍ തീരുമാനത്തിന്റെ മെറിറ്റിനെ കുറ്റപ്പെടുത്തുന്നില്ല. എന്നാല്‍ മറ്റു ചിലര്‍ ഇതിലും വര്‍ഗീയത കലര്‍ത്തി വിമാനത്താവളങ്ങളിലെ ഹജ്ജ് കാലത്തെ താല്‍കാലിക പള്ളികള്‍ പോലും പൊളിച്ചുമാറ്റണമെന്ന് രേഖപ്പെടുത്തിക്കാണുന്നു. സബ്‌സിഡി റദ്ദാക്കിയതിനേക്കാള്‍ രാജ്യത്തെ മുസ്‌ലിംകളെ ഭീതിപ്പെടുത്തുന്നത് ഈ മതവിദ്വേഷത്തിന്റെ രാഷ്ട്രീയകാഴ്ചപ്പാടാണ്. ആത്മാര്‍ത്ഥത ഉണ്ടെങ്കില്‍ ന്യൂനപക്ഷങ്ങളുടെ ക്ഷേമത്തിന് പദ്ധതികള്‍ നടപ്പാക്കുമ്പോള്‍ തീര്‍ത്തും ദരിദ്രമായ സംസ്ഥാനങ്ങളുടെ പിന്നാക്ക മേഖലകളില്‍ അത് നടപ്പാക്കാന്‍ കേന്ദ്ര-സംസ്ഥാന സര്‍ക്കാരുകള്‍ ആര്‍ജവം കാട്ടണം. ജീവനും ഭക്ഷണവും വസ്ത്രവും പാര്‍പ്പിടവും കഴിഞ്ഞിട്ടേ വിദ്യാഭ്യാസം വരുന്നുള്ളൂ. പാവപ്പെട്ട മുസ്‌ലിം ഗ്രാമീണര്‍ക്ക് സര്‍ക്കാര്‍ ഖജനാവില്‍നിന്ന് കൊടുക്കാനുള്ള പണമാകട്ടെ ഹജ്ജ് സബ്‌സിഡിയില്‍ നിന്നു റദ്ദാക്കിയ ആ നൂറുകോടി. പശുവിന്റെയും മറ്റും പേരില്‍ മുസ്‌ലിംകളുടെ ജീവന്‍ ഏതുസമയവും കവര്‍ന്നെടുക്കപ്പെടുന്ന അതിഭീതിതമായ വടക്കേ ഇന്ത്യന്‍ അന്തരീക്ഷത്തില്‍ ഹജ്ജ് സബ്‌സിഡി നിര്‍ത്തലാക്കലിനു പിറകെ അവരെ തുറിച്ചുനോക്കുന്ന വിഷയങ്ങളാണ് ഇനിയും മോദി സര്‍ക്കാരില്‍ നിന്ന ്‌വരാനിരിക്കുന്ന മുസ്‌ലിം, ന്യൂനപക്ഷ ദലിത് വിരുദ്ധ തീരുമാനങ്ങള്‍.

സുപ്രീംകോടതി വിധിയില്‍ തന്നെ നാല് വര്‍ഷം കൂടി അവശേഷിച്ചിരിക്കേ ഹജ്ജ് സബ്‌സിഡി നിര്‍ത്തലാക്കിക്കൊണ്ടുള്ള തിടുക്കപ്പെട്ട തീരുമാനവുമായി വന്നത് കേന്ദ്രസര്‍ക്കാരിന്റെ ഭരണപരമായ അനൗചിത്വവും ഔദ്ധത്യവും അപക്വതയുമാണ് പ്രകടമാക്കുന്നത്.ഒരു പ്രശ്‌നം എങ്ങനെ മോശമായി കൈകാര്യം ചെയ്യാം എന്ന് ഒരിക്കല്‍ കൂടി വ്യക്തമാക്കുന്നതാണ് കേന്ദ്ര ഗവണ്മെന്റിന്റെ തീരുമാനമെന്നും വി.എം സുധീരന്‍ പറഞ്ഞു.

കാലങ്ങളായി നിലനില്‍ക്കുന്ന ഒരു ആനുകൂല്യം ഇതു പോലെ നിര്‍ത്തല്‍ ചെയ്യുന്ന ഈ രീതി സര്‍ക്കാറിലെ ജനാധിപത്യ മതേതര വിരുദ്ധ മനോഭാവത്തിന്റെ ഭാഗമാണ്. ഇത് പുനഃപരിശോധിക്കാനും ബന്ധപ്പെട്ട സംഘടനകളുമായി ആശയവിനിമയം നടത്തി ഒരു സമവായത്തിന്റെ അടിസ്ഥാനത്തില്‍ അനന്തരനടപടിയിലേക്ക് പോകാനും തയ്യാറാകുന്നതാണ് ഉചിതമെന്നും അദ്ദേഹം അഭിപ്രായപ്പെട്ടു.