ആരെങ്കിലും സ്‌നേഹത്തോടെ ഒരു സമ്മാനം തന്നാല്‍ വാങ്ങിക്കാന്‍ പാടില്ലാത്ത ഒരു കൂട്ടരുണ്ടായിരുന്നു ഇന്ത്യയില്‍. അത് ഇവിടുള്ള പൊതുസേവകരാണ്. പൊതുസേവനം നടത്തുന്നവര്‍ ആരും തന്നെ നിയമപരമായി കിട്ടുന്ന വരുമാനത്തിന് പുറമേ ഏതെങ്കിലും തരത്തിലുള്ള എന്തെങ്കിലും ഗുണം പറ്റുന്നത് 1988 ലെ അഴിമതി നിരോധന നിയമപ്രകാരം ക്രിമിനല്‍ കുറ്റമായിരുന്നു. ആരൊക്കെ ഇതിന്റെ പരിധിയില്‍ വരുമെന്ന് വകുപ്പ് 2(ര) പറയുന്നുണ്ട്. എം.പിമാരും എം.എല്‍.എമാരും ഒക്കെ പെടും.

എന്റെ നാട്ടിലെ എം.പിയോ എം.എല്‍.എയോ മന്ത്രിയോ കളക്ടറോ നന്നായി ജോലി ചെയ്തതിനോ ചെയ്യുന്നതിനോ എനിക്ക് ഇഷ്ടംതോന്നി 50 രൂപയില്‍ കൂടിയ ഒരു സമ്മാനം വാങ്ങി കൊടുക്കാമെന്നു വെച്ചാല്‍, അവര്‍ക്ക് അത് സ്വീകരിക്കാന്‍ പാടില്ല എന്നായിരുന്നു നിയമം. സ്വീകരിച്ചാല്‍ 7ആം വകുപ്പ് അനുസരിച്ച് അവര്‍ക്കെതിരെ ക്രിമിനല്‍ കേസ് വരുമായിരുന്നു. അവര്‍ക്ക് വേണ്ടി മാത്രമല്ല, മറ്റൊരാള്‍ക്ക് വേണ്ടി അവര്‍ വാങ്ങിച്ചാലും, വാങ്ങിക്കാന്‍ ശ്രമിച്ചാലും, വാങ്ങിക്കാമെന്നു സമ്മതിച്ചാലും ഇതേ നിയമപ്രകാരം കുറ്റകരമായിരുന്നു !!

എന്നാല്‍, 2018 ജൂലൈ 26 ന്റെ ഭേദഗതിയോടെ അത് മാറി. ജോലിയില്‍ വീഴ്ച വരുത്താന്‍ വാങ്ങുന്ന സമ്മാനമേ കുറ്റമാകൂ. ജോലി സത്യസന്ധമായി ചെയ്യുന്നതിന് ഏത് സമ്മാനവും ഇനി വാങ്ങാം.

ആലത്തൂര്‍ എം.പി ശ്രീ.രമ്യയ്ക്ക് തന്റെ ഒൗദ്യോഗിക കൃത്യം നന്നായി ചെയ്യാനായി സ്വന്തം പാര്‍ട്ടിക്കാര്‍ പിരിവിട്ട് ഒരു കാര്‍ വാങ്ങിക്കൊടുക്കാം എന്നു തീരുമാനിച്ചാല്‍, 2 ലക്ഷം രൂപയോളം ശമ്പളം കിട്ടുന്ന എം.പി ആണ് എന്നത് കൊണ്ട് അതില്‍ നിയമപരമായ തെറ്റൊന്നും ഞാന്‍ കാണുന്നില്ല. ധര്‍മ്മികമായും ഇല്ല. ക്രിമിനല്‍ കേസ് നടത്താന്‍ കാശ് പിരിക്കുന്നതാകാം ചിലരുടെ പ്രയോറിറ്റി. അതും കൊടുക്കാന്‍ ഈ നാട്ടില്‍ ആളുണ്ട് എന്നതുപോലെ ഇതിനും കുറേയാളുണ്ട്. ആവശ്യവും അനവശ്യവുമൊക്കെ കൊടുക്കുന്നവരുടെ കാര്യമാണ്. കാര്‍ വാങ്ങാന്‍ സാമ്പത്തികശേഷിയുള്ള ജോലിയുള്ള ഒരാള്‍ക്ക് ഞാനാണെങ്കില്‍ കൊടുക്കില്ല എന്നതിനപ്പുറം പറയാന്‍ മൂന്നാം കക്ഷിക്ക് അവകാശമില്ല. കൊടുക്കുന്നവര്‍ക്കും പിരിക്കുന്നവര്‍ക്കും പരാതിയില്ലെങ്കില്‍ പിരിവിട്ട് കാര്‍ വാങ്ങുന്നതില്‍ ഒരു തെറ്റുമില്ല. പിണറായി വിജയനോ നരേന്ദ്രമോദിയ്‌ക്കോ ഒക്കെ ഓരോ കാര്‍ വാങ്ങിക്കൊടുക്കാമെന്നു കരുതുന്ന എത്രയോ പണക്കാര്‍ നാട്ടിലുണ്ടാകും. അത് ദുരൂപയോഗിക്കപ്പെടുമോ ഇല്ലയോ എന്നത് കാലം തെളിയിക്കട്ടെ.

off: അംബാനിക്ക് ശമ്പളവര്‍ധനവില്ലാതെ കഷ്ടപ്പെടുകയാണെന്നു മാതൃഭൂമി വാര്‍ത്ത. അങ്ങേരെപ്പറ്റി പാര്‍ലമെന്റില്‍ മിണ്ടരുതെന്നു ബി.ജെ.പിയുടെ താക്കീതും. എന്നാല്‍ അങ്ങേര്‍ക്ക് വേണ്ടി ഒരു പിരിവ്കുറ്റി അടിക്കുന്നതിനെപ്പറ്റി ആലോചിച്ചാലോ?

മോഷ്ടിച്ചു കിട്ടിയതെന്ന് ആക്ഷേപമുള്ള രേഖകള്‍പോലും തെളിവായി കോടതിക്ക് പരിശോധിക്കാം എന്നത് ഇന്ത്യന്‍ തെളിവ് നിയമത്തില്‍ ഒരു ലെേേഹലറ ഹമം ആണെന്ന കാര്യം അറിയാഞ്ഞിട്ടല്ല ബി.ജെ.പി സര്‍ക്കാര്‍ കോടതിയില്‍ അതിനെ ശക്തിയുക്തം എതിര്‍ത്തത്. അതും നമ്മുടെ ചെലവില്‍. പലരും പറയുന്നത് പോലെ റഫാല്‍ ഡീലില്‍ അഴിമതിയുണ്ടോ എന്നല്ല കോടതി ഈ കേസില്‍ പരിശോധിച്ചത്. റഫാല്‍ ഡീലില്‍ അഴിമതിയുണ്ടോ എന്ന കാര്യത്തില്‍ ഒരു ഏജന്‍സിയുടെ അന്വേഷണം വേണ്ടതാണ് എന്ന പരാതിയില്‍ മെറിറ്റ് പരിശോധിക്കാതെ തള്ളിയോ അതില്‍ ശരികേടുണ്ടോ എന്ന കാര്യം പരിശോധിക്കുന്ന റിവ്യൂ ഹരജി മെറിറ്റില്‍ കോടതി കേള്‍ക്കണോ വേണ്ടയോ എന്ന കാര്യമാണ് ഇന്നലത്തെ വിധിക്ക് ആധാരം. റിവ്യൂ ഹരജിയുടെ മെറിറ്റ് പോലും കേള്‍ക്കാനേ പാടില്ല എന്ന് വാശിയുള്ളത്‌കൊണ്ടാണ് നിലനില്‍ക്കില്ലെന്ന് അറിഞ്ഞിട്ടും മോദി സര്‍ക്കാര്‍ ഈ മുടന്തന്‍ വാദവുമായി വന്നത്.
അഴിമതി സംബന്ധിച്ച നിര്‍ണ്ണായക രേഖകള്‍ സര്‍ക്കാര്‍ സ്വമേധയാ പുറത്തുവിടേണ്ടതാണ്. അതുണ്ടായില്ല. അപേക്ഷിച്ച ആളുകള്‍ക്കോ പാര്‍ലമെന്റിനോ അത് ലഭ്യമാക്കേണ്ടതാണ്. അതുമുണ്ടായില്ല. സി.എ.ജി പരിശോധിച്ചില്ല, പബ്ലിക് അക്കൗണ്ട്‌സ് കമ്മിറ്റി കണ്ടിട്ടില്ല. എന്നാല്‍ ഇല്ലാത്ത സി.എ.ജി റിപ്പോര്‍ട്ട് പി.എ.സി കണ്ടെന്നു കേന്ദ്ര സര്‍ക്കാര്‍ സീല്‍ഡ് കവറില്‍ നല്‍കിയ റിപ്പോര്‍ട്ട് വഴി കോടതിയെ തെറ്റിദ്ധരിപ്പിച്ചു എന്നതാണ് റിവ്യൂ ഹരജിയുടെ കാതല്‍.
വിസില്‍ ബ്ലോവര്‍ സംരക്ഷണ നയമുള്ളപ്പോള്‍ ഏതോ ഉദ്യോഗസ്ഥന്‍ അത് ലീക്ക് ചെയ്തു, ദി ഹിന്ദു, കാരവന്‍ ഉള്‍പ്പെടെ ചിലര്‍ മാത്രം അത് വാര്‍ത്തയാക്കി. ആ രേഖകള്‍കൂടി പരാതിക്കാര്‍ ഹാജരാക്കി. മോഷണം പോയവയാണെന്നു ആദ്യവും അതല്ല രഹസ്യസ്വഭാവമുള്ള രേഖകളാണെന്നു പിന്നീടും പറഞ്ഞു സോളിസിറ്റര്‍ ജനറല്‍ തന്നെ നാണംകെട്ടു. രാജ്യം മുഴുവന്‍ പത്രത്തില്‍ വായിച്ച, കോടതിയിലെത്തിയ രേഖകള്‍ ജഡ്ജിമാര്‍ പരിശോധിക്കാന്‍ പാടില്ലത്രേ. റിവ്യൂ കേള്‍ക്കാന്‍ പോലും പാടില്ലത്രേ. അഴിമതി നടന്നോയെന്നു അന്വേഷണം പാടുണ്ടോയെന്നു കോടതി പരിശോധിക്കാന്‍പോലും പാടില്ലത്രേ. അതും വാദിക്കുന്നത് ജനങ്ങളുടെ ചെലവില്‍. പൊളിഞ്ഞു പാളീസായി ആ വാദം. ‘മോഷ്ടിച്ച രേഖകള്‍ പോലും കോടതിക്ക് പരിശോധിക്കാമെന്ന് വ്യവസ്ഥയുള്ള കാര്യം അറിയില്ലേ’ എന്ന് കെ.കെ വേണുഗോപാലിനോട് ജസ്റ്റിസ്. കെ.എം ജോസഫിന്റെ ഒരൊറ്റ ചോദ്യത്തില്‍ തീര്‍ന്നു വാദം. കെ.എം ജോസഫിന്റെ സുപ്രീംകോടതി നിയമനം ഇത്രമേല്‍ കേന്ദ്ര സര്‍ക്കാര്‍ എതിര്‍ത്തത് എന്തിനായിരുന്നു എന്ന് ഈ നിലപാടുകള്‍ കാണുമ്പോള്‍ വരികള്‍ക്കിടയില്‍ വായിക്കാം.
ഒരു ഗുണം ഉണ്ടായി. ഏത് സര്‍ക്കാര്‍ ഉദ്യോഗസ്ഥര്‍ക്കും ഏത് മാധ്യമപ്രവര്‍ത്തകനും അഴിമതിയുമായി ബന്ധപ്പെട്ടതാണെങ്കില്‍ ഏത് രഹസ്യ സ്വഭാവമുള്ള രേഖയും പരസ്യമാക്കാം, കോടതിയില്‍ എത്തിക്കാം. ഹിന്ദുവിന്റെ ചെയര്‍മാന്‍ റാം പറഞ്ഞതുപോലെ, കേസെടുത്താല്‍ നേരിടാനുള്ള ആര്‍ജ്ജവം ഉണ്ടായാല്‍ മതി. ഫോര്‍ത്ത് എസ്‌റ്റേറ്റിനു ഒരു കൈത്താങ്ങ്. ഈ രാജ്യം സുതാര്യതയിലേക്കുള്ള ഒരു ചവിട്ടുപടി കൂടി താണ്ടി.

അഡ്വ. ഹരീഷ് വാസുദേവന്‍

നോട്ടിന്റെ കാര്യത്തില്‍ അവസാന വാക്കായിരുന്ന റിസര്‍വ് ബാങ്ക് പോലും പറയുന്നത് കേള്‍ക്കാതെ, അഹങ്കാരവും വിവരമില്ലായ്മ്മയും താന്‍പോരിമയും കൊണ്ടാണ് നോട്ടുനിരോധനം നടപ്പാക്കിയത്. കള്ളപ്പണം നോട്ടുകളായല്ല എന്ന കേന്ദ്ര സര്‍ക്കാരിന്റെ രണ്ട് ഉന്നതതല പഠന റിപ്പോര്‍ട്ടുകള്‍ പോലും ബാധകമായിരുന്നില്ല. നോട്ടുകള്‍ അപ്പടി തിരിച്ചുവരില്ലെന്ന് കോറസ് പാടിയ സംഘികളും അല്ലാത്തവരും ഇപ്പോള്‍ മിണ്ടുന്നില്ല. ലക്ഷക്കണക്കിന് ആളുകളുടെ ജീവിതം തന്റെ അധികാര പ്രമത്തതകൊണ്ട് മരവിപ്പിച്ചുനിര്‍ത്തിയിട്ട് ആളുകള്‍ ഞെട്ടുമ്പോള്‍ ആ ഞെട്ടലില്‍ സന്തോഷിക്കുന്ന ഫാസിസ്റ്റിന്റെ ചിരി കാണാന്‍ അന്നത്തെ വീഡിയോ നെറ്റില്‍ ലഭ്യമാണ്. ‘നിങ്ങളുടെ പോക്കറ്റിലെ നോട്ട് കടലാസായി’ എന്നു പറഞ്ഞ ശേഷമുള്ള ആ ചിരി. അത് നോക്കിയാല്‍ മതി. ഗുജറാത്ത് കലാപത്തിനിടെ രക്ഷിക്കാനായി ഫോണില്‍ വിളിച്ച ആളോട് ‘നിങ്ങളിതുവരെ ചത്തില്ലേ’ എന്നു തിരിച്ചു ചോദിച്ച ആളെപ്പറ്റി വായിച്ച വാര്‍ത്തകള്‍ അവിശ്വസിക്കേണ്ടതില്ല.
2012 ല്‍ ഇന്ത്യ കൈവരിച്ചിരുന്ന കഴിവാണ് ഉപഗ്രഹവേധ മിസൈല്‍. എന്തുകൊണ്ട് ഇതുവരെ പരീക്ഷിച്ചില്ല? സര്‍ക്കാര്‍ അനുമതി നല്‍കിയില്ല. എന്തുകൊണ്ട്? ബഹിരാകാശം നമ്മുടെമാത്രം സ്വന്തമല്ല. മാനവരാശിയുടെ ഭാവി തലമുറകള്‍ക്ക്കൂടി അവകാശപ്പെട്ടതാണ്. തകര്‍ക്കുന്ന ഉപഗ്രഹം നൂറുകണക്കിന് കഷണങ്ങളായി ചിതറും. ആ മാലിന്യം കിലോമീറ്ററുകള്‍ ചിതറി തെറിക്കുകയും ഓരോ കഷണങ്ങളും മണിക്കൂറില്‍ 17,000 മൈല്‍ വേഗതയില്‍ സഞ്ചരിക്കുകയും ചെയ്യും. അവ കൂട്ടിയിടിക്കുകയും അതുവഴി ആ മാലിന്യം മറ്റു ഉപഗ്രഹങ്ങളില്‍ ചെന്നിടിച്ചു കേടുപാടുകള്‍ വരുത്തും. തീരെ ചെറിയ കഷണങ്ങള്‍ ആണെങ്കില്‍ റഡാറില്‍ കാണാനാവില്ലത്രേ. നിര്‍ണ്ണായക ആവശ്യങ്ങള്‍ക്കായി ഉപയോഗിക്കുന്ന ഉപഗ്രഹങ്ങളില്‍ ചിലത് ഇതുമൂലം ഉപയോഗശൂന്യമാകാം. എന്നുമാത്രമല്ല, മാലിന്യം കാരണം ചില ഭ്രമണപഥങ്ങള്‍ ശാസ്ത്രലോകത്തിനു തലമുറകളോളം ഉപേക്ഷിക്കേണ്ടിവരും. നാസയുടെ വിഖ്യാത ശാസ്ത്രജ്ഞനായ ഡോ. കെസ്ലര്‍ ഇതേപ്പറ്റി പഠിച്ചിട്ടുണ്ട്. നൂറുകണക്കിന് കോടി രൂപ മുടക്കി രാജ്യം വിവര സാങ്കേതിക വിദ്യക്ക് വേണ്ടി വിട്ട ഉപഗ്രഹങ്ങളുടെ പാതകളാണ് ഈ മാലിന്യത്തില്‍ വരിക. നഷ്ടം പ്രവചനാതീതമാണ്. ഇപ്പോള്‍ നടത്തിയ ഉപഗ്രഹവേധത്തില്‍ മാലിന്യം കിലോമീറ്ററുകള്‍ പരക്കാന്‍ സാധ്യതയുണ്ടെന്നും നല്ല ലക്ഷണമല്ല എന്നും ഈ രംഗത്ത് വൈദഗ്ധ്യമുള്ളവര്‍ പറഞ്ഞു കഴിഞ്ഞു. ഒരു വര്‍ഷത്തിനകം മാലിന്യങ്ങള്‍ ഭൂമിയില്‍ പതിച്ചേക്കാമെങ്കിലും, ഇതെന്തോ മാതൃകയായ കാര്യമായി അവതരിപ്പിക്കുന്നത്, മറ്റു രാജ്യങ്ങളെ ഇതിനു പ്രേരിപ്പിക്കുന്നത് മാനവരാശിയോട് ചെയ്യുന്ന പാതകമാണത്രേ. അതേപ്പറ്റി വൈശാഖന്‍ തമ്പിയെപ്പോലുള്ള വിദഗ്ധര്‍ പറയട്ടെ. ലാഭനഷ്ടങ്ങളെപ്പറ്റി, ഗുണദോഷങ്ങളെപ്പറ്റി എന്ത് പഠനം നടത്തിയിട്ടാണ് ഇപ്പോഴീ ഇലക്ഷന്‍ സ്റ്റണ്ടിനു ഇറങ്ങിയത്? ഏതൊക്കെ പഠനങ്ങളുടെ അടിസ്ഥാനത്തിലാണ് ഈ തീരുമാനം? എന്തായിരുന്നു ആ പ്രോസസ്? അതീ രാജ്യത്തെ ജനത്തെ അറിയിക്കാന്‍ ബാധ്യതയില്ലേ? വനം പരിസ്ഥിതി സംബന്ധിച്ച 39 നിര്‍ണ്ണായക നിയമങ്ങളില്‍ പാര്‍ലമെന്റിനെയോ ജനങ്ങളേയോ അറിയിക്കാതെ വെള്ളം ചേര്‍ത്തത് ഇന്നാട്ടിന്റെ ദീര്‍ഘകാല ഭാവിയെ ഇങ്ങനെയൊക്കെ ദോഷകരമായി ബാധിക്കും? 1,70,000 ഹെക്ടര്‍ വനം ചങ്ങാത്ത മുതലാളിക്ക് ഖനനത്തിന് നല്‍കിയത് എത്ര പേര്‍ക്ക് അറിയാം? ഭരണത്തില്‍ ഇരുന്നവരാരും ഈ രാജ്യവും ഇവിടുത്തെ തലമുറയും നശിക്കുംവിധമുള്ള ദ്രോഹം ആലോചനാരഹിതമായി ഈ രാജ്യത്തോട് ചെയ്തിട്ടില്ല. അവനവന്റെ പെറ്റി തെരഞ്ഞെടുപ്പ് താല്‍പര്യങ്ങള്‍ക്ക്‌വേണ്ടി ഭാവിയെക്കുറിച്ച് ഒരാലോചനയും ഇല്ലാതെ അധികാരം ദുരുപയോഗിക്കുന്ന വരും കൂട്ടാളികളും ഈ രാജ്യത്ത് ഭരണത്തില്‍ എന്നല്ല, പ്രതിപക്ഷത്ത്‌പോലും വരുന്നത് സമാധാനം കാംക്ഷിക്കുന്ന മനുഷ്യര്‍ക്കെല്ലാം അപകടകരമാണ്.

അഡ്വ. ഹരീഷ് വാസുദേവന്‍

പോസ്റ്റിന്റെ പൂര്‍ണ്ണരൂപം: