haryanariots – Chandrika Daily

ഹരിയാനയിൽ പ്രകോപനപരമായ പ്രഖ്യാപനങ്ങളുമായി മഹാപഞ്ചായത്ത്‌ ;വിഎച്ച്പി ജാഥ പുനരാരംഭിക്കാൻ നീക്കം

webdesk15 — Mon, 14 Aug 2023 01:23:26 +0000

വിദ്വേഷ പ്രസംഗങ്ങൾ പാടില്ലെന്ന നിർദ്ദേശത്തോടെ പോലീസ് അനുമതി നൽകിയ സംഘപരിവാർ സംഘടനകളുടെ മഹാപഞ്ചായത്തിൽ പ്രകോപനപരമായ പ്രഖ്യാപനങ്ങൾ.ഹിന്ദുക്കൾക്ക്‌ തോക്ക്‌ ലൈസൻസിന്‌ ഇളവ്‌ നൽകുക, നൂഹിന്റെ ജില്ലാപദവി എടുത്തുകളയുക, നൂഹിനെ ഗോഹത്യാ വിമുക്ത മേഖലയായി പ്രഖ്യാപിക്കുക, കലാപക്കേസുകളിൽ അറസ്റ്റിലായ ഹിന്ദു യുവാക്കളെ വിട്ടയക്കുക തുടങ്ങി വിവിധ ആവശ്യങ്ങൾ വിഎച്ച്‌പിയും ബജ്‌റംഗദളും ചേർന്ന്‌ സംഘടിപ്പിച്ച മഹാപഞ്ചായത്ത്‌ മുന്നോട്ടുവച്ചു. കലാപത്തിന്‌ ഇടയാക്കിയ ‘ബ്രജ്‌മണ്ഡൽ ജലാഭിഷേക്‌ യാത്ര’ ആഗസ്‌ത്‌ 28ന്‌ നൂഹിൽനിന്ന്‌ പുനരാരംഭിക്കുമെന്ന പ്രഖ്യാപനവും മഹാപഞ്ചായത്തിൽ ഉണ്ടായി.കഴിഞ്ഞ 31ന് വിഎച്ച്പി നടത്തിയ ബ്രജ് മണ്ഡൽ ജലാഭിഷേക് യാത്രയ്ക്കിടെ ഉണ്ടായ അക്രമത്തിൽ 2 സുരക്ഷാ ഉദ്യോഗസ്ഥരും ഒരു പള്ളി ഇമാമും അടക്കം 6 പേരാണ് മരിച്ചത്.

നൂഹ്‌–- പൽവൽ അതിർത്തിയിലെ പോണ്ഡ്‌രി ഗ്രാമത്തിലാണ്‌ പൊലീസ്‌ കാവലിൽ സംഘപരിവാർ മഹാപഞ്ചായത്ത്‌ സംഘടിപ്പിച്ചത്‌.മഹാപഞ്ചായത്തിലെ തീരുമാനങ്ങൾ നടപ്പാക്കുന്നതിനായി 51 അംഗ സമിതിക്ക്‌ രൂപം നൽകി. ഉപാധികളോടെയാണ്‌ മഹാ പഞ്ചായത്തിന്‌ അനുമതി നൽകിയതെന്ന്‌ ഹരിയാന പൊലീസ്‌ അവകാശപ്പെട്ടു. പ്രകോപനപരമായ പ്രസംഗങ്ങൾ പാടില്ല, ആയുധങ്ങൾ പാടില്ല, പങ്കെടുക്കുന്നവർ അഞ്ഞൂറിൽ കൂടരുത്‌, പകൽ രണ്ടിന്‌ അവസാനിപ്പിക്കണം എന്നീ ഉപാധികളാണ്‌ പൊലീസ്‌ വച്ചത്‌. എന്നാൽ, ഇതെല്ലാം ലംഘിക്കപ്പെട്ടു. ഹിന്ദുക്കൾക്കെതിരെ വിരൽ ഉയർത്തിയാൽ കൈവെട്ടും എന്നതടക്കം പ്രകോപനപരമായ പ്രസംഗങ്ങളുമുണ്ടായി

ഹരിയാനയിൽ മുസ്ലീങ്ങളെ ബഹിഷ്കരിക്കണമെന്ന് ആഹ്വാനം ചെയ്‌ത്‌ പഞ്ചായത്തുകള്‍; നടപടിയുണ്ടാവുമെന്ന് സർക്കാർ

webdesk15 — Sun, 13 Aug 2023 05:28:13 +0000

ഹരിയാനയിലെ സംഘർഷബാധിത പ്രദേശങ്ങളിൽ മുസ്ലീങ്ങളെ ബഹിഷ്കരിക്കണമെന്ന് ആഹ്വാനം ചെയ്ത് പഞ്ചായത്തുകൾ പ്രമേയം പാസാക്കി. പഞ്ചായത്തുകൾക്കെതിരെ നടപടിയുണ്ടാകുമെന്ന് ഹരിയാന സർക്കാർ വ്യക്തമാക്കി.3 ജില്ലകളിലെ ഗ്രാമ പഞ്ചായത്ത് സർപഞ്ചുമാർക്ക് ഷോകോസ് നോട്ടീസ് അയച്ചതായി അധികൃതർ അറിയിച്ചു.സംഘർഷമുണ്ടായതിന് പിന്നാലെ അൻപതിലധികം പഞ്ചായത്തുകളാണ് യോഗം ചേർന്ന് മുസ്ലീംങ്ങളെ ബഹിഷ്കരിക്കണമെന്ന പ്രമേയം പാസാക്കിയത്.സംഘർഷത്തിന് പിന്നാലെ ക്യത്യമായ രേഖകളുള്ള മുസ്ലീം വിഭാഗക്കാരുടെ കെട്ടിടങ്ങളും വീടുകളും സർക്കാർ ഇടിച്ചുനിരത്തുന്നതിനെതിരെ വ്യാപക പ്രതിഷേധം ഉയർന്നിട്ടുണ്ട്. ലോക്സഭാ തെരഞ്ഞെടുപ്പിന് മുന്നോടിയായി നടന്ന വർഗീയവൽകരണത്തിൻ്റെ ഫലമാണ് ഹരിയാനയിൽ കണ്ടതെന്നും, സർക്കാർ കൂട്ടുനിന്ന കലാപമാണിതെന്നും സ്ഥലം സന്ദർശിച്ച പ്രതിപക്ഷ പാർട്ടികളിലെ എംപിമാർ ആരോപിച്ചു.

പ്രത്യേക സമുദായത്തിന്റെ കെട്ടിടങ്ങൾ ഇടിച്ചു ‌നിരത്തുന്നത് അംഗീകരിക്കാനാകില്ലെന്ന് പഞ്ചാബ് ഹരിയാന ഹൈക്കോടതി

webdesk15 — Tue, 08 Aug 2023 06:22:12 +0000

ഹരിയാനയിലെ നൂഹിലെ കെട്ടിടം പൊളിക്കൽ സംഭവത്തിൽ രൂക്ഷ വിമർശനവുമായി പഞ്ചാബ് ഹരിയാന ഹൈക്കോടതി. ക്രമസമാധാന പ്രശ്‌നത്തിന്റെ മറവിൽ പ്രത്യേക സമുദായത്തിന്റെ കെട്ടിടങ്ങൾ ഇടിച്ചുനിരത്തുകയും വംശീയ ഉന്മൂലനം നടത്തുകയും ചെയ്യുന്നുണ്ടോ എന്ന് കോടതി ചോദിച്ചു.നിയമം പാലിക്കാതെ കെട്ടിടം പൊളിക്കുന്നത് അംഗീകരിക്കാനാകില്ലെന്ന് കോടതി വ്യക്തമാക്കി. നൂഹ് ജില്ലയുടെ വിവിധ ഭാഗങ്ങളില്‍ സംഘര്‍ഷവുമായി ബന്ധപ്പെട്ട് 94 സ്ഥിരമായ നിര്‍മ്മിതികളും 212 താല്‍ക്കാലിക നിര്‍മ്മിതികളും സര്‍ക്കാര്‍ പൊളിച്ച് നീക്കിയിരുന്നു.തദ്ദേശീയരായ ആളുകളുടെ ശക്തമായ പ്രതിഷേധങ്ങള്‍ക്കിടെയായിരുന്നു കെട്ടിടങ്ങള്‍ പൊളിച്ച് നീക്കിയത്. രണ്ട് ഹോം ഗാർഡുകളും മതപണ്ഡിതനുമടക്കം ആറ് പേരാണ് സംഘര്‍ഷത്തില്‍ കൊല്ലപ്പെട്ടത്. സംഘർഷങ്ങളുമായി ബന്ധപ്പെട്ട് ഇതുവരെ 202 പേരെ അറസ്റ്റ് ചെയ്തതായും 80 പേരെ കരുതൽ തടങ്കലിൽ പാർപ്പിച്ചതായും ഹരിയാന ആഭ്യന്തര മന്ത്രി അനിൽ വിജ് കഴിഞ്ഞ ദിവസം വ്യക്തമാക്കിയിരുന്നു.

ഹരിയാനയിലെ വർഗീയ കലാപം ; ഡൽഹിയിൽ ശക്തമായ സുരക്ഷയും സിസിടിവി നിരീക്ഷണവും ഉറപ്പാക്കണമെന്ന് സുപ്രീം കോടതി

webdesk15 — Wed, 02 Aug 2023 10:46:53 +0000

ഹരിയാനയിലെ വർഗീയ കലാപത്തിൽ വിശ്വഹിന്ദു പരിഷത്ത് ബജ്റംഗ്ദൾ അനുകൂലികൾ ഡൽഹിയിൽ പ്രതിഷേധം സംഘടിപ്പിക്കുന്ന സാഹചര്യത്തിൽ, പ്രശ്നനങ്ങൾ ഉണ്ടാവാതിരിക്കാൻ ശക്തമായ സുരക്ഷയും സിസിടിവി നിരീക്ഷണവും ഉറപ്പാക്കാൻ സുപ്രീം കോടതി അധികാരികളോട് ആവശ്യപ്പെട്ടു.
ഈ പ്രതിഷേധങ്ങളിൽ അക്രമങ്ങളും വിദ്വേഷ പ്രസംഗങ്ങളും ഉണ്ടാകാതിരിക്കാൻ നടപടികൾ സ്വീകരിക്കണമെന്ന് കോടതി നിർദ്ദേശം നൽകി. അർദ്ധസൈനിക വിഭാഗത്തിൽ നിന്നുള്ള ഉദ്യോഗസ്ഥരെ ഉൾപ്പെടെ മതിയായ സേനയെ നിലത്ത് വിന്യസിക്കാനും അധികാരികൾക്ക് നിർദ്ദേശം നൽകിയിട്ടുണ്ട്.

ഹരിയാനയിൽ തിങ്കളാഴ്ച രാത്രി ഒരു മസ്ജിദ് കത്തിക്കുകയും അതിലെ പുരോഹിതൻ കൊല്ലപ്പെടുകയും ചെയ്തു. കഴിഞ്ഞ രണ്ട് ദിവസങ്ങളിലായി നിരവധി കടകളും വ്യാപാര സ്ഥാപനങ്ങളും ആക്രമിക്കപ്പെട്ടു. ഇൻറർനെറ്റ് താൽക്കാലികമായി നിർത്തിവച്ചിരിക്കുകയാണ്, കൂടാതെ നിരവധി പ്രദേശങ്ങളിൽ നിരോധന ഉത്തരവുകൾ നിലവിലുണ്ട്.ഗുരുഗ്രാമിലെ സ്ഥിതിഗതികൾ ഡൽഹി അധികൃതർ സൂക്ഷ്മമായി നിരീക്ഷിച്ചുവരികയാണ്. പ്രതിഷേധങ്ങൾ ഉണ്ടാകാനിടയുള്ള റോഡുകളിലെ താമസക്കാർക്ക് ജാഗ്രതാ നിർദേശം നൽകി ഡൽഹി പോലീസ് ഇന്ന് രാവിലെ ട്രാഫിക്ക് മുന്നറിയിപ്പും നൽകിയിട്ടുണ്ട്.