ഒരു അന്താരാഷ്ട്ര കരാറിനോടുള്ള പ്രതിബദ്ധതയാണ് യു.എസ് അട്ടിമറിച്ചിരിക്കുന്നത്. ചൈനയുമായും റഷ്യയുമായും യൂറോപ്യന്‍ യൂണിയനുമായും ചര്‍ച്ച നടത്താന്‍ വിദേശകാര്യ മന്ത്രാലയത്തിന് നിര്‍ദേശം നല്‍കിയിട്ടുണ്ട്. കരാര്‍ പരാജയപ്പെടുകയാണെങ്കില്‍ ആണവ പദ്ധതി ശക്തമാക്കുന്നതിനെക്കുറിച്ച് ആലോചിക്കാന്‍ ഇറാന്‍ ആണവോര്‍ജ സംഘടനയോട് ആവശ്യപ്പെട്ടിട്ടുണ്ടെന്നും റൂഹാനി പറഞ്ഞു.

2015ല്‍ ആണവ കരാറില്‍ ഒപ്പുവെച്ച ശേഷം ഇറാന്‍ അന്താരാഷ്ട്ര ഒറ്റപ്പെട്ടലില്‍നിന്ന് രക്ഷപ്പെട്ടിരുന്നു. എണ്ണയും വാതകവും ലോകവ്യാപകമായി വില്‍ക്കാനും വിദേശത്ത് കൂടുതല്‍ നിക്ഷേപം നടത്താനും ഇറാന് അവസരം കിട്ടി. സാമ്പത്തികമായി പതുക്കെ പുരോഗതിയിലേക്ക് നീങ്ങിക്കൊണ്ടിരിക്കെയാണ് അമേരിക്കയുടെ പിന്മാറ്റം.

ജര്‍മനിയും യു.എന്‍ രക്ഷാസമിതിയിലെ സ്ഥിരാംഗങ്ങളും ഒപ്പുവെച്ച ആണവ കരാര്‍ ഇറാന് അനുകൂലമാണെന്നാണ് ട്രംപിന്റെ വാദം. ചരിത്രത്തിലെ ഏറ്റവും മോശപ്പെട്ട കരാറാണ് ഇതെന്നും അദ്ദേഹം കുറ്റപ്പെടുത്തുന്നു. വ്യവസ്ഥകളില്‍ മാറ്റം വരുത്തി കരാര്‍ അട്ടിമറിക്കാന്‍ യു.എസ് പ്രസിഡന്റായി ചുമതലയേറ്റതു മുതല്‍ ട്രംപ് ശ്രമിച്ചുകൊണ്ടിരിക്കുകയാണ്. കരാര്‍ റദ്ദാക്കുന്നതിനെതിരെ യൂറോപ്യന്‍ രാജ്യങ്ങളും റഷ്യയും ചൈനയും അദ്ദേഹത്തിന് മുന്നറിയിപ്പ് നല്‍കിയിട്ടുണ്ട്. എന്നാല്‍ ആണവ കരാര്‍ ദുര്‍ബലമാക്കാനുള്ള ട്രംപിന്റെയും മക്രോണിന്റെയും നീക്കത്തെ തിരിച്ചറിയണമെന്ന് ഇറാന്‍ പ്രസിഡന്റ് ഹസന്‍ റൂഹാനി മറ്റു രാജ്യങ്ങളോട് ആവശ്യപ്പെട്ടു. കരാറില്‍നിന്ന് പിന്‍വലിയുന്നതിലൂടെ അമേരിക്ക വന്‍ അബദ്ധമായിരിക്കും ചെയ്യുന്നതെന്ന് അദ്ദേഹം പറഞ്ഞു.

വ്യവസ്ഥകള്‍ ലംഘിക്കുന്നതിന് രാഷ്ട്രീയവും ധാര്‍മികവുമായ വില നല്‍കേണ്ടിവരുമെന്നും റൂഹാനി മുന്നറിയിപ്പ് നല്‍കി. ട്രംപിനെതിരെ യൂറോപ്യന്‍ യൂണിയന്‍ ശക്തമായി രംഗത്തെത്തിയിട്ടുണ്ട്. നിലവിലുള്ള കരാറിന് യാതൊരു കുഴപ്പവുമില്ലെന്ന് യൂറോപ്യന്‍ യൂണിയന്‍ നയതന്ത്രവിഭാഗം മേധാവി ഫെഡറിക്ക മൊഗെരിനി പറഞ്ഞു. അത് തുടരുന്ന കാര്യം ഉറപ്പാക്കുകയാണ് വേണ്ടത്. ഭാവിയില്‍ എന്തെങ്കിലും പ്രശ്‌നങ്ങളുണ്ടായാല്‍ അപ്പോള്‍ നോക്കാമെന്നും അവര്‍ കൂട്ടിച്ചേര്‍ത്തു. ദൈര്‍ഘ്യമേറിയ ചര്‍ച്ചകള്‍ക്കൊടുവിലാണ് 2015ല്‍ കരാറുണ്ടാക്കിയതെന്നും അതെല്ലാം ഇനി ആവര്‍ത്തിക്കാന്‍ ബുദ്ധിമുട്ടാണെന്നും റഷ്യ വ്യക്തമാക്കി.

പശ്ചിമേഷ്യയില്‍ ആണവായുധങ്ങള്‍ തള്ളി സംഘര്‍ഷം സൃഷ്ടിക്കുന്നതിനെതിരെ അദ്ദേഹം പാശ്ചാത്യ ശക്തികള്‍ക്ക് മുന്നറിയിപ്പ് നല്‍കി. നയതന്ത്ര മാര്‍ഗങ്ങളിലൂടെ മാത്രമേ മേഖലയില്‍ സമാധാനം സ്ഥാപിക്കാന്‍ സാധിക്കൂ എന്ന് റൂഹാനി അഭിപ്രായപ്പെട്ടു. മിസൈല്‍ പദ്ധതിയുടെ കാര്യത്തില്‍ വിട്ടുവീഴ്ചക്കില്ലെന്ന് ഇറാന്‍ വ്യക്തമാക്കിയിട്ടുണ്ട്. ബാലിസ്റ്റിക് മിസൈല്‍ പദ്ധതിയുമായി ബന്ധപ്പെട്ട് ഇറാനെതിരെ യൂറോപ്യന്‍ രാജ്യങ്ങള്‍ നടപടി ആലോചിക്കുന്നുണ്ടെന്ന റിപ്പോര്‍ട്ടും ശക്തമാണ്. പ്രതിരോധ ആവശ്യങ്ങള്‍ക്ക് മാത്രമാണ് മിസൈലുകള്‍ വികസിപ്പിക്കുന്നതെന്നും ആണവായുധങ്ങള്‍ പ്രയോഗിക്കാന്‍ അല്ലെന്നും ഇറാന്‍ പറയുന്നു.

കഴിഞ്ഞ ദിവസം ഇന്ത്യയിലെത്തിയ റൂഹാനി ഇന്ന് രാവിലെ ഗാല്‍ക്കൊണ്ടയിലെ ഖുത്തബ് ഷാഹി ഭരണാധികാരികളുടെ ശവകുടീരങ്ങളില്‍ സന്ദര്‍ശിച്ചിരുന്നു. ഏഴ് ശവകുടീരങ്ങള്‍ എന്നറിയപ്പെടുന്ന ഈ സ്മാരകങ്ങള്‍ ഇറാനിയന്‍ വാസ്തുവിദ്യ ശൈലിയിലാണ് നിര്‍മ്മിച്ചിരിക്കുന്നത്. തുടര്‍ന്നാണ് ഹൈദരാബാദിലെ ചരിത്ര പ്രസിദ്ധമായ മക്ക മസ്ജിദില്‍ ജുമുഅ നിസ്‌കാരത്തിനു വേണ്ടി പോയത്.

ഇന്നത്തെ പരിപാടികള്‍ക്കു ശേഷം വൈകീട്ട് റുഹാനി ഡല്‍ഹിയിലേക്ക് തിരിക്കും. ഇരു രാജ്യങ്ങളും തമ്മിലുള്ള ഉഭയകക്ഷി ചര്‍ച്ചകള്‍ക്കായി നാളെ ഇന്ത്യന്‍ പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തും. 2016ല്‍ നരേന്ദ്ര മോദി ഇറാന്‍ സന്ദര്‍ശിച്ചിരുന്നു. അന്ന് ഇറാനുമായി ഇന്ത്യ പത്തോളം സുപ്രാധ കരാറുകളില്‍ ഒപ്പു വെച്ചിരുന്നു.