heat in kerala – Chandrika Daily

ചൂട് കനക്കുന്നു; ആലപ്പുഴയില്‍ 14 പേര്‍ക്ക് പൊള്ളലേറ്റു

chandrika — Thu, 28 Mar 2019 11:01:29 +0000

തിരുവനന്തപുരം: സംസ്ഥാനത്ത് ചൂട് കനക്കുന്നു. ആലപ്പുഴയില്‍ മാത്രമായി ഇന്ന് 14 പേര്‍ക്ക് പൊള്ളലേറ്റു. ഇടുക്കിയിലും കോഴിക്കോടുമായി മൂന്ന് പേര്‍ക്ക് പൊള്ളലേറ്റു. കേരളത്തില്‍ മൊത്തമായി ഇന്ന് 23 പേര്‍ക്ക് പൊള്ളലേറ്റിട്ടുണ്ട്. അതേസമയം, സൂര്യാതപ മുന്നറിയിപ്പ് നീട്ടുമെന്നാണ് സൂചന.പാലക്കാട് ഇന്നും 40 ഡിഗ്രിക്ക് മുകളിലാണ് ചൂട്.

വേനല്‍ മഴ ഉടന്‍ പെയ്യില്ലെന്ന സൂചനയാണ് കാലാവസ്ഥ നിരീക്ഷണ കേന്ദ്രം നല്‍കുന്നത്. തിരുവനന്തപുരം, കൊല്ലം ആലപ്പുഴ, കോട്ടയം, കോഴിക്കോട് ജില്ലകളില്‍ ഉയര്‍ന്ന താപനില 36 ഡിഗ്രി സെല്‍ഷ്യസിന് മുകളിലാണ്. പാലക്കാട് 40 ഡിഗ്രിക്ക് മുകളിലും. ആലപ്പുഴ ജില്ലയില്‍ അംഗനവാടികള്‍ക്ക് ഏപ്രില്‍ ആറുവരെ അവധി പ്രഖ്യാപിച്ചു.

ഇടുക്കിയില്‍ രാജാക്കാട് സ്വദേശി ബിനു എന്ന കര്‍ഷകനാണ് സൂര്യാതപമേറ്റത്. കോഴിക്കോട് മുക്കത്ത് 2 പേര്‍ക്ക് പൊള്ളലേറ്റു. ചേന്നമംഗല്ലൂര്‍ സ്വദേശി ഇല്യാസിന് പാടത്ത് വച്ച് കഴുത്തിലാണ് പൊള്ളലേറ്റത്. പൊയില്‍ സ്വദേശി വര്‍ക്കിക്ക് റോഡിലൂടെ നടന്നു പോകുമ്പോഴാണ് സൂര്യാതപമേറ്റത്. ഇരുവരെയും മുക്കം സാമൂഹികാരോഗ്യ കേന്ദ്രത്തില്‍ പ്രവേശിപ്പിച്ചു. 29 വരെ സൂര്യാതപ മുന്നറിയിപ്പ് നീട്ടി. കൂടുതല്‍ ദിവസത്തേക്ക് നീടുമെന്നാണ് അറിയാന്‍ കഴിഞ്ഞത്.

സംസ്ഥാനത്ത് ചൂടു കൂടുന്നതിന് പിന്നിലെന്ത്?; സൂര്യാഘാത മുന്നറിയിപ്പ് തുടരുന്നു

chandrika — Mon, 25 Mar 2019 04:42:27 +0000

തിരുവനന്തപുരം: സംസ്ഥാനത്ത് ചൂടുവര്‍ധിക്കുന്നിനെ തുടര്‍ന്ന് സൂര്യാഘാത മുന്നറിയിപ്പ് തുടരുന്നു. പതിനൊന്ന് ജില്ലകളില്‍ ഇന്നും നാളെയും സൂര്യഘാതത്തിന് സാധ്യതയുണ്ടെന്നാണ് മുന്നറിയിപ്പ്. 25, 26 തീയ്യതികളില്‍ കൊല്ലം, ആലപ്പുഴ, കോട്ടയം, എറണാകുളം, തൃശ്ശൂര്‍ ജില്ലകളില്‍ ഉയര്‍ന്ന താപനില ശരാശരിയില്‍ നിന്ന് 3 മുതല്‍ 4 ഡിഗ്രി സെല്‍ഷ്യസ് വരെ ഉയരും. തിരുവനന്തപുരം, പത്തനംതിട്ട, പാലക്കാട്, മലപ്പുറം, കോഴിക്കോട്, കണ്ണൂര്‍ എന്നീ ജില്ലകളില്‍ ഉയര്‍ന്ന താപനില ശരാശരിയില്‍ നിന്ന് 2 മുതല്‍ 3 ഡിഗ്രി സെല്‍ഷ്യസ് വരെയും ഉയരാന്‍ സാധ്യതയുണ്ടെന്ന് സംസ്ഥാന ദുരന്ത നിവാരണ അതോറിറ്റി അറിയിച്ചു.

അതേസമയം, ചൂടുകൂടുന്നതിന് പിന്നില്‍ ഇക്വിനോക്‌സ് പ്രതിഭാസമാണെന്ന നിഗമനവും സജീവമായിട്ടുണ്ട്. ഭൂമധ്യരേഖക്കുനേരെ സൂര്യന്‍ എത്തുമ്പോഴുണ്ടാകുന്ന അവസ്ഥയാണ് ഇക്വിനോക്‌സ്. ദക്ഷിണാര്‍ധ ഗോളത്തില്‍ നിന്ന് ഉത്തരാര്‍ധ ഗോളത്തിലേക്കുള്ള സൂര്യന്റെ പ്രയാണത്തിലാണ് സൂര്യന്‍ ഭൂമധ്യരേഖക്ക് നേരെയെത്തുന്നത്. ഇതുകൊണ്ടാണ് ഉത്തരദിക്കില്‍ ചൂട് കൂടുന്നതിന് കാരണം. സാധാരണയായി മാര്‍ച്ച് 21നും 26നും മധ്യേയുള്ള തീയതികളിലാണ് ഇങ്ങനെ സംഭവിക്കുക. ഇതിന്റെ തുടര്‍ച്ചയാണ് കടുത്ത ചൂട് നിലനില്‍ക്കുന്നതെന്നുമാണ് കാലാവസ്ഥാ നിരീക്ഷണ കേന്ദ്രത്തിന്റെ നിഗമനം.

ഇന്നലെ മാത്രം സൂര്യാഘാതമേറ്റ് സംസ്ഥാനത്ത് മൂന്നുപേര്‍ മരിച്ചു. പത്തുപേര്‍ക്ക് സൂര്യതാപമേറ്റിട്ടുണ്ട്. തിരുവനന്തപുരം, കണ്ണൂര്‍, പത്തനംതിട്ട ജില്ലകളിലാണ് മൂന്നുപേര്‍ മരിച്ചത്. ഞായറാഴ്ച്ച കൊല്ലത്ത് നാലുപേര്‍ക്കും പത്തനംതിട്ടയില്‍ മൂന്നുപേര്‍ക്കും ആലപ്പുഴ, മലപ്പുറം കാസര്‍കോട് എന്നിവിടങ്ങളില്‍ ഒരോരുത്തര്‍ക്കും സൂര്യതാപമേറ്റു. കഴിഞ്ഞ പത്ത് ദിവസത്തിനിടെ 111 പേര്‍ക്ക് സൂര്യതാപമേറ്റെന്നാണ് ആരോഗ്യവകുപ്പിന്റെ റിപ്പോര്‍ട്ട്.

സൂര്യാഘാതത്തിന് സാധ്യത; ജാഗ്രതാ മുന്നറിയിപ്പ്

chandrika — Sun, 24 Mar 2019 05:48:16 +0000

തിരുവനന്തപുരം: സംസ്ഥാനത്ത് ഇന്ന് സൂരാഘാതാത്തിന് സാധ്യയുണ്ടെന്ന് മുന്നറിയിപ്പ്. ചൊവ്വാഴ്ച്ച വരെ ചൂട് കൂടാനിടയുണ്ടെന്ന് കാലാവസ്ഥാ കേന്ദ്രം മുന്നറിയിപ്പ് നല്‍കി. കൊല്ലം, ആലപ്പുഴ, കോട്ടയം, എറണാകുളം, തൃശൂര്‍ ജില്ലകളില്‍ ഉയര്‍ന്ന താപനില ശരാശരിയില്‍ നിന്ന് 3 മുതല്‍ 4 ഡിഗ്രി സെല്‍ഷ്യസ് വരെയും തിരുവനന്തപുരം, പത്തനംതിട്ട, പാലക്കാട്, മലപ്പുറം, കോഴിക്കോട്, കണ്ണൂര്‍ ജില്ലകളില്‍ ഉയര്‍ന്ന താപനില ശരാശരിയില്‍ നിന്ന് 2 മുതല്‍ 3 ഡിഗ്രി സെല്‍ഷ്യസ് വരെയും ഉയരാന്‍ സാധ്യതയുണ്ട്.

ചൂട് വര്‍ധിക്കുന്നു; നിര്‍ദ്ദേശങ്ങളുമായി ദുരന്തനിവാരണ അതോറിറ്റി

chandrika — Mon, 04 Mar 2019 11:19:22 +0000

കോഴിക്കോട്: കേരളത്തില്‍ വിവിധ പ്രദേശങ്ങളില്‍ വരും ദിവസങ്ങളില്‍ ചൂട് ശരാശരിയില്‍ നിന്നും കൂടുവാന്‍ ഉള്ള സാധ്യതയുണ്ടെന്ന കാലാവസ്ഥാ മുന്നറിയിപ്പിനെ തുടര്‍ന്ന് ജാഗ്രത പുലര്‍ത്തണമെന്ന് സംസ്ഥാന ദുരന്തനിവാരണ അതോറിറ്റി. കേരളത്തില്‍ പൊതുവില്‍ 2 മുതല്‍ 4 ഡിഗ്രീ വരെ ചൂട് കൂടാനുള്ള സാധ്യത കാലാവസ്ഥാ നിരീക്ഷകര്‍ പ്രവചിക്കുന്നത്. പാലക്കാട്, തൃശൂര്‍, മലപ്പുറം, കോഴിക്കോട് മേഖലയില്‍ മാര്‍ച്ച് 5 ന് ശരാശരിയില്‍നിന്നും 8 ഡിഗ്രീയില്‍ അധികം ചൂട് വര്‍ദ്ധിക്കുവാന്‍ സാധ്യതയുണ്ടെന്നാണ് അനുമാനം. ഈ സാഹചര്യത്തില്‍ സൂര്യാഘാതം ഒഴിവാക്കാന്‍ ജാഗ്രത പാലിക്കണമെന്നാണ് സംസ്ഥാന ദുരന്തനിവാരണ അതോറിറ്റിയുടെ നിര്‍ദ്ദേശം.

പൊതുജനങ്ങള്‍ രാവിലെ 11 മണി മുതല്‍ 3 മണി വരെ നേരിട്ട് സൂര്യപ്രകാശം എല്‍ക്കുന്നതിന് ഒഴിവാക്കണം

നിര്‍ജലീകരണം തടയാന്‍ കുടിവെള്ളം എപ്പോഴും ഒരു കയ്യില്‍ കരുതുക

പരമാവധി ശുദ്ധജലം കുടിക്കുക

അയഞ്ഞ, ലൈറ്റ് കളര്‍ പരുത്തി വസ്ത്രങ്ങള്‍ ധരിക്കുക

വിദ്യാര്‍ത്ഥികളുടെ പരീക്ഷാക്കാലമായതിനാല്‍ സ്‌കൂള്‍ അധിക!ൃതരും രക്ഷിതാക്കളും പ്രത്യേക ശ്രദ്ധ പുലര്‍ത്തേണ്ടതാണ്

തൊഴില്‍ സമയം ക്രമീകരിച്ച ഉത്തരവ് കര്‍ശനമായി നടപ്പാക്കുക

ദുരന്തനിവാരണ അതോറിറ്റിയും ആരോഗ്യവകുപ്പും തൊഴില്‍ വകുപ്പും നല്‍കുന്ന നിര്‍ദ്ദേശങ്ങള്‍ എല്ലാവരും പാലിക്കണം.