helicopter scam – Chandrika Daily

മുഖ്യമന്ത്രിയുടെ ഹെലികോപ്റ്റര്‍ യാത്രാ വിവാദം; പണം നല്‍കി തടിയൂരാന്‍ സി.പി.എം ശ്രമം

chandrika — Wed, 10 Jan 2018 10:32:17 +0000

തിരുവനന്തപുരം: ഓഖി ദുരിതാശ്വാസ ഫണ്ട് ഉപയോഗിച്ച മുഖ്യമന്ത്രിയുടെ ഹെലികോപ്റ്റര്‍ യാത്രാ വിവാദത്തില്‍ നിന്നും ചിലവായ പണം നല്‍കി തടിയൂരാന്‍ സി.പി.എം ശ്രമം. വിവാദമായ യാത്രയ്ക്ക് ചിലവായ എട്ടുലക്ഷം രൂപ പാര്‍ട്ടി ഫണ്ടില്‍ നിന്ന് നല്‍കിയേക്കുമെന്നാണ് വിവരം.

യാത്രാ വിവാദത്തിന്റെ പശ്ചാത്തലത്തില്‍, വിഷയത്തില്‍ നാളെ ചേരുന്ന സെക്രട്ടേറിയേറ്റ് യോഗത്തില്‍ തീരുമാനമുണ്ടാകുമെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍ മാധ്യമങ്ങളോട് പ്രതികരിച്ചു. മുഖ്യമന്ത്രിയുടെ ഹെലികോപ്റ്റര്‍ യാത്രയ്ക്കു ചെലവായ എട്ടുലക്ഷം രൂപ നല്‍കാനുള്ള ശേഷി സിപിഎമ്മിനുണ്ടെന്ന് സഹകരണമന്ത്രി കടകംപള്ളി സുരേന്ദ്രന്‍ നേരത്തെ വ്യക്തമാക്കിയിരുന്നു.

പൊതു ഖജനാവില്‍ നിന്ന് പണം ചിലവാക്കുന്ന കാര്യത്തില്‍ ഭിന്നമായ അഭിപ്രായങ്ങളാണ് വന്നിട്ടുള്ളത്. ഇക്കാര്യത്തില്‍ എന്തുചെയ്യാന്‍ പറ്റുമെന്ന് പാര്‍ട്ടി ആലോചിക്കും. നാളെ ചേരുന്ന പാര്‍ട്ടി സംസ്ഥാന സെക്രട്ടേറിയേറ്റില്‍ വിഷയം ചര്‍ച്ച ചെയ്ത് വേണ്ടത് ചെയ്യുമെന്നും കോടിയേരി പറഞ്ഞു.

തൃശൂരില്‍ സിപിഎമ്മിന്റെ ജില്ല സമ്മേളന വേദിയില്‍ നിന്നാണ് മുഖ്യമന്ത്രി തിരുവനന്തപുരത്തേക്ക് ഹെലികോപ്റ്ററില്‍ യാത്ര ചെയ്തത്. ഇതിനായി ഹെലികോപ്റ്ററിന് എട്ട് ലക്ഷം വാടക നല്‍കി. 13 ലക്ഷമായിരുന്നു കമ്പനി ചോദിച്ചത്. എന്നാല്‍ വിലപേശി ഇത് എട്ട് ലക്ഷമാക്കുകയായിരുന്നു.

ഓഖി ദുരിതാശ്വാസ ഫണ്ട് വകമാറ്റി മുഖ്യമന്ത്രിയുടെ ഹെലിക്കോപ്റ്റര്‍ യാത്ര; രൂക്ഷ പരിഹാസവുമായി ഡി.ജി.പി ജേക്കബ് തോമസ്

chandrika — Wed, 10 Jan 2018 07:26:31 +0000

തിരുവനന്തപുരം: ഓഖി ദുരന്തം വിലയിരുത്താനെത്തിയ കേന്ദ്രസംഘത്തെ കാണാന്‍ മുഖ്യമന്ത്രി പിണറായി വിജയന്‍ നടത്തിയ ഹെലികോപ്റ്റര്‍ യാത്ര വിവാദമായിരിക്കെ പിണറായിയെ കടന്നാക്രമിച്ച് ഡിജിപി ജേക്കബ് തോമസ്. ഓഖി ദുരിതാശ്വാസ ഫണ്ട് വകമാറ്റി ഹെലിക്കോപ്റ്റര്‍ യാത്ര നടത്തിയ മുഖ്യമന്ത്രിയുടെ നടപടിക്കെതിരെ രൂക്ഷ പരിഹാസവുമായി ഫെയ്‌സ്ബുക്കിലൂടെയാണ് ഡിജിപി ജേക്കബ് തോമസ്. ‘പാഠം – 4 ഫണ്ട് കണക്ക്’ എന്ന പേരില്‍ സമൂഹമാധ്യമമായ ഫെയ്‌സ്ബുക്കിലൂടെയാണ് മുന്‍ വിജിലന്‍സ് ഡയറക്ടര്‍ രംഗത്തെത്തിയത്.

“ജീവന്റെ വില 25 ലക്ഷം
അല്‍പ്പജീവനുകള്‍ക്ക് 5 ലക്ഷം
അശരണരായ മാതാപിതാക്കള്‍ക്ക് 5 ലക്ഷം
ആശ്രയമറ്റ സഹോദരിമാര്‍ക്ക് 5 ലക്ഷം
ചികില്‍സയ്ക്ക് 3 ലക്ഷം
കാത്തിരിപ്പു തുടരുന്നത് 210 കുടുംബങ്ങള്‍
ഹെലിക്കോപ്റ്റര്‍ കമ്പനി കാത്തിരിക്കുന്നത് 8 ലക്ഷം
പോരട്ടേ പാക്കേജുകള്‍..!!”

എന്നാണ് ഡിജിപി ജേക്കബ് തോമസ് ഫെയ്‌സ്ബുക്കില്‍ തുറന്നടിച്ചത്.

ഓഖി പണം ഉപയോഗിച്ച് പിണറായി വിജയന്റെ ആകാശയാത്ര; അതൃപ്തി തുറന്നടിച്ച് റവന്യുമന്ത്രി

chandrika — Wed, 10 Jan 2018 04:27:39 +0000

തിരുവനന്തപുരം: മുഖ്യമന്ത്രി പിണറായി വിജയന്റെ ഹെലികോപ്റ്റര്‍ യാത്രക്ക് ഓഖി ദുരിതാശ്വാസ ഫണ്ടില്‍ നിന്ന് പണം നല്‍കിയ സംഭവത്തില്‍ അതൃപ്തി അറിയിച്ച് റവന്യൂ മന്ത്രി ഇ.ചന്ദ്രശേഖരന്‍. സംഭവം നടക്കാന്‍ പാടില്ലാത്തതാണെന്ന് അദ്ദേഹം പറഞ്ഞു. ഉത്തരവ് ഉദ്യോഗസ്ഥ വീഴ്ചയാണെന്നും മന്ത്രി പറഞ്ഞു. എന്നാല്‍ സംഭവം വിവാദമായതോടെ മുഖ്യമന്ത്രിയുടെ യാത്രക്കു ഫണ്ട് അനുവദിച്ചു കൊണ്ടുള്ള ഉത്തരവ് സര്‍ക്കാര്‍ റദ്ദാക്കി. പാര്‍ട്ടി സമ്മേളന വേദിയില്‍ നിന്ന് തിരുവനന്തപുരത്തേക്ക് പോകാന്‍ ഹെലികോപ്റ്ററിന് പണം ചെലവഴിച്ചത് ഓഖി ദുരിതാശ്വാസ ഫണ്ടില്‍ നിന്നാണെന്ന് വാര്‍ത്ത വന്നിരുന്നു. ഇതിനു പിന്നാലെയാണ് വിവാദ ഉത്തരവ് ചീഫ് സെക്രട്ടറി റദ്ദക്കി.
തൃശൂരിലെ പാര്‍ട്ടി സമ്മേളന വേദിയില്‍ നിന്നും തലസ്ഥാനത്തെത്താന്‍ നടത്തിയ ഹെലികോപ്റ്റര്‍ യാത്രക്കു ദുരന്തനിവരാണ ഫണ്ട് ഉപയോഗിച്ചുവെന്നായിരുന്നു റിപ്പോര്‍ട്ടുകള്‍. ഇതിനായി എട്ടു ലക്ഷം രൂപ അനുവദിച്ചായിരുന്നു ഉത്തരവ്.