പാരാമെഡിക്കല്‍ ഡിഗ്രി അല്ലെങ്കില്‍ ഡിപ്ലോമ കോഴ്‌സുകള്‍ പഠിക്കാന്‍ പ്ലസ്‌ ടു സയന്‍സാണ്‌ യോഗ്യത. എന്നാല്‍ പ്ലസ്‌ടു സയന്‍സ്‌ പഠിക്കാത്ത വിദ്യാര്‍ഥികള്‍ക്കും ഇവര്‍ അഡ്‌മിഷന്‍ നല്‌കുമെന്നുള്ളതാണ്‌ പ്രത്യേകത. കേന്ദ്ര സര്‍ക്കാര്‍ അംഗീകാരമുണ്ടെന്ന അവകാശവാദത്തോടെ ഏതെങ്കിലും ഒരു യൂണിവേഴ്‌സിറ്റിയുടെ പേരില്‍ ഒരു കെട്ടിടത്തില്‍ ബോര്‍ഡും സ്‌ഥാപിച്ച്‌ ക്‌ളാസ്‌ നടത്തുന്ന നിരവധി സ്‌ഥാപനങ്ങളാണുള്ളത്‌.

യു.ജി.സി അംഗീകൃത യൂണിവേഴ്‌സിറ്റിയുടേത്‌ എന്ന വ്യാജേനയും കോഴ്‌സുകള്‍ നടത്തുന്നുണ്ട്‌. ജോലിക്ക്‌ ശ്രമിക്കുമ്ബോഴാണ്‌ സര്‍ട്ടിഫിക്കറ്റിന്‌ അംഗീകാരമില്ലാതെ കമ്ബളിപ്പിക്കപ്പെട്ടതായി പലരും തിരിച്ചറിയുന്നത്‌. കോഴ്‌സുകളെകുറിച്ച്‌ വ്യക്‌തമായ ധാരണയില്ലാത്ത രക്ഷിതാക്കളേയും കുട്ടികളെയുമാണ്‌ ഇത്തരം തട്ടിപ്പ്‌ സംഘങ്ങള്‍ വിദേശത്ത്‌ ഉള്‍പ്പടെ ജോലി വാഗ്‌ദാനം നല്‍കി കെണിയിലാക്കുന്നത്‌. കേരളത്തില്‍ പാരാമെഡിക്കല്‍ ഡിഗ്രി കോഴ്‌സുകള്‍ക്ക്‌ ഡയറക്‌ടര്‍ ഓഫ്‌ മെഡിക്കല്‍ എഡ്യൂക്കേഷന്‍ വഴിയാണ്‌ അപേക്ഷ സ്വീകരിക്കുന്നതും സീറ്റ്‌ അലോട്ട്‌മെന്റ്‌ നടത്തുന്നതും.