hike – Chandrika Daily

പന്നിയങ്കരയില്‍ ഏപ്രില്‍ മുതല്‍ ടോള്‍ നിരക്ക് ഉയരും: പ്രതിഷേധം

webdesk13 — Thu, 28 Mar 2024 05:28:42 +0000

പന്നിയങ്കര ടോള്‍ പ്ലാസയില്‍ ഏപ്രില്‍ ഒന്നു മുതല്‍ ടോള്‍ നിരക്കില്‍ വര്‍ദ്ധന ഏര്‍പ്പെടുത്തും. ഒറ്റയാത്രയ്ക്കും മടക്കയാത്ര ചേര്‍ത്തുളള യാത്രയ്ക്കും മാസപ്പാസിനും നിരക്കുയരും.

പണികള്‍ പൂര്‍ത്തിയാക്കാതെ അമിത ടോള്‍ ഈടാക്കുന്നുവെന്ന് ആക്ഷേപം ഉയരുന്നുണ്ട്. ഇതേത്തുടർന്ന് പ്രതിഷേധം ശക്തമാക്കാനാണ് പ്രാദേശിക സംഘടനകളുടെ തീരുമാനം.

കുതിരാന്‍ തുരങ്കത്തിന്റെ പണി പൂര്‍ത്തിയാകാത്തതിലെ പ്രതിഷേധം നിലനില്‍ക്കെയാണ് ടോള്‍ ഉയര്‍ത്താൻ തീരുമാനമായത്. തുരങ്കത്തിലൂടെ കടന്ന് പോകാനാണ് ടോള്‍ തുകയുടെ 60 ശതമാനവും. ടോളിന് സമീപത്തെ പഞ്ചായത്തുകളിലെ യാത്രക്കാര്‍ക്ക് അനുവദിച്ചിട്ടുളള സൗജന്യവും ഉടന്‍ പിന്‍വലിച്ചേക്കും.

ഇന്ധനവില വീണ്ടും കൂട്ടി; ഡീസല്‍വിലയില്‍ റെക്കോര്‍ഡ്

ചന്ദ്രിക വെബ് ഡെസ്‌ക്‌ — Fri, 22 Jan 2021 04:51:46 +0000

തിരുവനന്തപുരം: ഇന്ധനവിലയില്‍ വീണ്ടും വര്‍ധന. പെട്രോളിനും ഡീസലിനും 25 പൈസ വീതമാണ് കൂടിയത്. ഒരുലിറ്റര്‍ പെട്രോളിന് 85 രൂപ 72 പൈസയാണ് വില. ഡീസലിന് 80രൂപ കടന്നു.

ഡീസല്‍വിലയില്‍ റെക്കോര്‍ഡ് രൂപയാണ് രേഖപ്പെടുത്തിയത്. ഈമാസം ഇത് അഞ്ചാംതവണയാണ് പെട്രോള്‍, ഡീസല്‍ വില വര്‍ധിക്കുന്നത്.

ഇന്ധന വില വീണ്ടും കൂട്ടി; രണ്ടു വര്‍ഷത്തെ ഏറ്റവും ഉയര്‍ന്ന നിരക്കില്‍

web desk 1 — Sun, 06 Dec 2020 02:18:14 +0000

തിരുവനന്തപുരം: രാജ്യത്ത് പെട്രോള്‍, ഡീസല്‍ വിലയിലെ കുതിപ്പ് തുടരുന്നു. പെട്രോള്‍, ഡീസല്‍ വിലയില്‍ ഇന്നും വര്‍ധനയുണ്ടായി. പെട്രോളിന് 27 പൈസയും ഡീസലിന് 31 പൈസയുമാണ് കൂട്ടിയത്. ഇതോടെ പെട്രോള്‍ വില പലയിടത്തും 85 രൂപയിലെത്തി.

രണ്ട് വര്‍ഷത്തെ ഏറ്റവും ഉയര്‍ന്ന നിലയിലാണ് ഇന്ധന വിലയുള്ളത്. രണ്ടാഴ്ച കൊണ്ട് മൂന്ന് രൂപയോളമാണ് വര്‍ദ്ധിച്ചിരിക്കുന്നത്.

അന്താരാഷ്ട്ര വിപണിയില്‍ വില കൂടിയതാണ് വിലവര്‍ധനക്ക് കാരണമായതായി കമ്പനികള്‍ പറയുന്നത്.

‘വില വര്‍ദ്ധിച്ചിട്ടുണ്ടെങ്കില്‍ ഉള്ളി കുറച്ച് കഴിച്ചാല്‍ മതി’; വിലവര്‍ദ്ധനവിനെ ന്യായീകരിച്ച് ബിജെപി മന്ത്രി

Test User — Mon, 30 Sep 2019 13:39:45 +0000

ഉള്ളിയുടെ വില വര്‍ദ്ധിച്ചെങ്കില്‍ ഉള്ളി കുറച്ച് കഴിച്ചാല്‍ മതിയെന്ന് ഉത്തര്‍ പ്രദേശ് ആരോഗ്യവകുപ്പ് ഉപമന്ത്രി അതുല്‍ ഗാര്‍ഗ്. ഉള്ളിവില വര്‍ദ്ധിക്കുന്നത് സംബന്ധിച്ച മാധ്യമപ്രവര്‍ത്തകരുടെ ചോദ്യങ്ങള്‍ക്ക് മറുപടി പറയുകയായിരുന്നു അദ്ദേഹം.

ഉത്തര്‍ പ്രദേശില്‍ ഒരു കിലോ ഉള്ളിയുടെ വില 20 രൂപയില്‍ നിന്ന് ഒരു മാസത്തിനകം 65 കിലോയിലേയ്ക്ക് വര്‍ദ്ധിച്ച സാഹചര്യത്തിലായിരുന്നു ചോദ്യം. ഒരാള്‍ക്ക് ആഹാരത്തിന് രുചി ലഭിക്കാനായി അന്‍പത് ഗ്രാമോ നൂറോ ഗ്രാമോ അതിലധികമോ ഉള്ളി വേണ്ടി വരില്ലെന്നാണ് തോന്നുന്നത്. കുറച്ച് ഉള്ളി കഴിക്കൂ എന്നാണ് എനിക്ക് ജനങ്ങളോട് പറയാനുള്ളത് മന്ത്രി പറഞ്ഞു.

മന്ത്രിയുടെ പ്രതികരണത്തിനെതിരെ പ്രതിപക്ഷം രംഗത്തെത്തി. കേന്ദ്രസര്‍ക്കാരിന്റെയും സംസ്ഥാന സര്‍ക്കാരിന്റെയും സമീപനമാണ് മന്ത്രിയുടെ പ്രതികരണത്തിലൂടെ വ്യക്തമായതെന്നും അവര്‍ കൂട്ടിച്ചേര്‍ത്തു. ബിജെപി നേതാക്കളെ ചോദ്യം ചെയ്യുന്ന മാധ്യമപ്രവര്‍ത്തകരെ വായടപ്പിക്കുകയോ അവരെയും ജനങ്ങളെയും കളിയാക്കുകയോ ആണ് ബിജെപി നേതാക്കള്‍ ചെയ്യുന്നതെന്ന് സംസ്ഥാന കോണ്‍ഗ്രസ് വക്താവ് ദ്വിജേന്ദ്ര ത്രിപാഠി ആരോപിച്ചു.

ഇന്ധനവില കുതിക്കുന്നു; ആറ് ദിവസം കൊണ്ട് ഉണ്ടായത് വന്‍ വര്‍ധന

Test User — Sun, 22 Sep 2019 08:13:56 +0000

സൗദി അറേബ്യയിലെ അരാംകോയിലുണ്ടായ ആക്രമണത്തിന് പിന്നാലെ ഇന്ധനവില കുതിക്കുന്നു. ആറ് ദിവസം കൊണ്ട് പെട്രോളിന് 1.59 രൂപയും ഡീസലിന് 1.31 രൂപയുമാണ് വര്‍ധിച്ചത്. ദിവസവും ഇന്ധനവില പരിഷ്‌കരിക്കാന്‍ ആരംഭിച്ച ശേഷം തുടര്‍ച്ചയായി ഉണ്ടായ ഏറ്റവും വലിയ വര്‍ധനവാണിത്.ഇന്ന് പെട്രോള്‍ വിലയില്‍ 27 പൈസയുടെ വര്‍ധനവാണ് ഉണ്ടായത്. ഡീസല്‍ വിലയില്‍ 18 പൈസയും.

ദിവസേന 50 ലക്ഷം ബാരല്‍ എണ്ണ പമ്പു ചെയ്യാന്‍ ശേഷിയുള്ള 1200 കിലോമീറ്റര്‍ നീളമുള്ള പ്രധാന പൈപ്പ്‌ലൈനിനു നേരെയായിരുന്നു അരാംകോയ്‌ലുണ്ടായ ആക്രമണം. ഇതിലൂടെയുള്ള എണ്ണ പംമ്പിങ് താല്‍കാലികമായി നിര്‍ത്തിവച്ചിരിക്കുകയാണ്.

മുട്ട വില സര്‍വകാല റെക്കോഡില്‍; രണ്ടു മാസത്തേക്ക് വില കുറയില്ലെന്ന് സൂചന

chandrika — Tue, 21 Nov 2017 18:22:38 +0000

കൊച്ചി: ഉപഭോഗം വര്‍ധിക്കുകയും ഉത്പാദനം കുറയുകയും ചെയ്തതിനെ തുടര്‍ന്ന് കോഴിമുട്ട വിലയില്‍ രാജ്യമൊട്ടാകെ വന്‍ വില വര്‍ധനവ്. ഒരു കോഴിമുട്ടക്ക് വില ഏഴു രൂപക്കടുത്തെത്തിയതോടെ മുട്ട വില സര്‍വകാല റെക്കോഡായി. മൂന്നാഴ്ച്ച മുമ്പ് നാലു രൂപ അറുപത് പൈസയായിരുന്നു ഒരു മുട്ടയുടെ വില. ആറു രൂപ അമ്പത് പൈസയായിരുന്നു ഇന്നലെ ഒരു കോഴിമുട്ടക്ക് കൊച്ചിയിലെ ചില്ലറ വില.
ആറു രൂപക്കാണ് വ്യാപാരികള്‍ ഒരു കോഴി മുട്ട വാങ്ങിയത്. പ്രമുഖ മുട്ട ഉത്പാദന കേന്ദ്രമായ തമിഴ്‌നാട്ടിലെ നാമക്കലില്‍ കഴിഞ്ഞ രണ്ടു ദിവസങ്ങളിലായി 5.50 രൂപയാണ് ഒരു മുട്ടക്ക് ഈടാക്കുന്നത്. നാലു മാസം മുമ്പ് 100 മുട്ടക്ക് 360 രൂപയായിരുന്നു റീട്ടെയ്ല്‍ മാര്‍ക്കറ്റ് വിലയെങ്കില്‍ ഇന്നലെ 100 മുട്ടക്ക് വ്യാപാരികള്‍ക്ക് നല്‍കേണ്ടി വന്നത് 600 രൂപ. താറാവ് മുട്ടയുടെ വിലയിലും വര്‍ധനവുണ്ട്. ഒരു മുട്ടക്ക് പത്തു രൂപയോളമായി. അടുത്ത രണ്ടു മാസത്തേക്ക് കോഴിമുട്ട വിലയില്‍ മാറ്റമുണ്ടാകാന്‍ സാധ്യതയില്ലെന്ന് കൊച്ചിയിലെ പ്രധാന മുട്ട വ്യാപാരികളായ ഇ.വി ജോസ് എഗ്ഗ് മര്‍ച്ചന്റ്‌സ് ഉടമ ഇ.ജെ ചാര്‍ലി പറഞ്ഞു.

മുട്ടയുടെ വില വര്‍ധനവ് ക്രിസ്മസ് കേക്ക് വിപണിയെയും ബാധിക്കും. കഴിഞ്ഞ വര്‍ഷത്തേക്കാള്‍ കൂടുതല്‍ വില ഇത്തവണ കേക്കുകള്‍ക്ക് നല്‍കേണ്ടി വരും. മറ്റു ബേക്കറി ഉത്പന്നങ്ങളെയും വില ബാധിച്ചേക്കും. ക്രിസ്മസും പുതുവത്സരവും അടുത്തതിനാല്‍ ബേക്കറികള്‍ അടക്കമുള്ളവര്‍ക്ക് മുട്ട വാങ്ങാതെ നിവൃത്തിയില്ല. വില കുറയാന്‍ അടുത്ത മാര്‍ച്ച് വരെ കാത്തിരിക്കേണ്ടി വരുമെന്നാണ് വ്യാപാരികള്‍ നല്‍കുന്ന സൂചന.
ശൈത്യം കാരണം ഡല്‍ഹി അടക്കമുള്ള ഉത്തരേന്ത്യന്‍ സംസ്ഥാനങ്ങളില്‍ മുട്ട ഉപഭോഗം കൂടിയതാണ് വില വര്‍ധനവിന് പ്രധാന കാരണമായത്. വന്‍ ഡിമാന്‍ഡ് മുന്‍കൂട്ടി കണ്ട് ഇവിടെയുള്ള വ്യാപാരികള്‍ പ്രധാന മുട്ട ഉത്പാദന കേന്ദ്രങ്ങളായ നാമക്കല്‍, ഹൈദരാബാദ്, വിജയവാഡ എന്നിവിടങ്ങളില്‍ നിന്ന് കൂടുതല്‍ മുട്ടകള്‍ ശേഖരിച്ചു വച്ചു. ഇതേ തുടര്‍ന്ന് കേരളത്തിലുള്‍പ്പെടെയുള്ള വ്യാപാരികള്‍ക്ക് ആവശ്യത്തിന് മുട്ട ലഭിക്കാതായി. ഇതാണ് വില വര്‍ധനക്ക് കാരണമായതെന്ന് വ്യാപാരികള്‍ പറയുന്നു. രാജ്യത്തെ ഒട്ടുമിക്ക പൗള്‍ട്രിഫാമുകളിലും മുട്ട ഉത്പാദാനം കുറഞ്ഞതും വില വര്‍ധനവിന് കാരണമായി. നാമക്കലില്‍ നിന്നാണ് കേരളത്തിലേക്ക് പ്രധാനമായും മുട്ട എത്തുന്നത്.
ഹൈദരാബാദ്, വിജയവാഡ എന്നിവിടങ്ങളില്‍ വില കുറവാണെങ്കിലും ചരക്കു കൂലി കണക്കിലെടുക്കുമ്പോള്‍ നാമക്കലാണ് വ്യാപാരികള്‍ക്ക് ലാഭകരം. നാമക്കല്‍ മേഖലയില്‍ നിന്ന് കഴിഞ്ഞ ജൂലൈ വരെ എല്ലാ ദിവസവും 2.88 കോടി മുട്ടകളാണ് വിപണിയില്‍ എത്തിയിരുന്നത്. ജൂലൈക്ക് ശേഷം ഇതില്‍ ഗണ്യമായ കുറവുണ്ടായി. ഒക്‌ടോബറില്‍ ഇവിടെ നിന്നും വിപണിയിലെത്തിയത് 2.81 കോടി മുട്ടകള്‍ മാത്രം.

പെട്രോള്‍, ഡീസല്‍ വിലയില്‍ വര്‍ധന

Web Desk — Sat, 05 Nov 2016 19:14:26 +0000

ന്യൂഡല്‍ഹി: ഇന്ധന വിലയില്‍ വീണ്ടും വര്‍ധന. പെട്രോള്‍ ലിറ്ററിന് 89 പൈസയും ഡീസലിന് 86 പൈസയുമാണ് വര്‍ധിപ്പിച്ചത്. ഡീസലില്‍ ഈ മാസത്തെ മൂന്നാമത്തെയും പെട്രോളില്‍ സെപ്തംബറിന് ശേഷമുള്ള ആറാമത്തെയും വര്‍ധനയാണിത്. ഇന്നലെ അര്‍ധരാത്രി മുതല്‍ പുതിയ നിരക്കുകള്‍ പ്രാബല്യത്തില്‍ വന്നതായി ഇന്ത്യന്‍ ഓയില്‍ കോര്‍പറേഷന്‍ പ്രസ്താവനയില്‍ വ്യക്തമാക്കി.

വാറ്റ്, പ്രാദേശിക നികുതി എന്നിവ കൂടി പരിഗണിക്കുമ്പോള്‍ പെട്രോളിനും ഡീസലിനും ഒരു രൂപയിലധികം വര്‍ധനയുണ്ടാകും. രണ്ടുമാസത്തിനിടെ പെട്രോളില്‍ 7.53 രൂപയുടെയും ഡീസലില്‍ 6.67 രൂപയുടെയും വര്‍ധനയാണ് രേഖപ്പെടുത്തിയത്. ഡോളറുമായുള്ള വിനിമയത്തില്‍ രൂപയുടെ മൂല്യം ഇടിഞ്ഞതാണ് വില വര്‍ധനയ്ക്ക് കാരണമെന്നാണ് എണ്ണക്കമ്പനികള്‍ പുറത്തിറക്കിയ പത്രക്കുറിപ്പില്‍ പറയുന്നത്.