റിയാദ്: സൗദി അറേബ്യക്കു നേരെ വീണ്ടും ഹൂതികളുടെ ഡ്രോണ്‍ ആക്രമണം. ജനവാസ കേന്ദ്രങ്ങള്‍ ലക്ഷ്യമിട്ടാണ് ആക്രമണം. എന്നാല്‍ ലക്ഷ്യസ്ഥാനത്തെത്തുന്നതിന് മുന്‍പുതന്നെ വ്യോമ പ്രതിരോധ സംവിധാനം ഉപയോഗിച്ച് അറബ് സഖ്യസേന ഡ്രോണ്‍ തകര്‍ത്തതായി സൗദിയുടെ ഔദ്യോഗിക വാര്‍ത്താ ഏജന്‍സി അറിയിച്ചു.

ഖമീസ് മുശൈത്തിലെ ജനവാസ മേഖലകള്‍ ലക്ഷ്യമിട്ടാണ് വ്യാഴാഴ്ച ആക്രമണമുണ്ടായത്. യമനിലെ സനായില്‍ നിന്നാണ് സ്‌ഫോടക വസ്തുക്കളുമായി ഡ്രോണുകള്‍ സൗദി അതിര്‍ത്തികടന്നെത്തിയതെന്ന് അറബ് സഖ്യസേനാ വക്താവ് കേണല്‍ തുര്‍കി അല്‍ മാലികി പറഞ്ഞു. അതേസമയം സൗദിയിലെ കിങ് ഖാലിദ് എയര്‍ബേസില്‍ ആക്രമണം നടത്തിയെന്ന ഹൂതികളുടെ അവകാശവാദം തെറ്റാണെന്നും സൗദി അറിയിച്ചു. ഹൂതികളുടെ നിരാശയില്‍ നിന്നാണ് ഇത്തരം അവകാശവാദങ്ങളുണ്ടാകുന്നതെന്ന് തുര്‍കി അല്‍ മാലികി പറഞ്ഞു.

ജനവാസ മേഖലകളും സാധരണക്കാരെയും ലക്ഷ്യമിട്ട് ഹൂതികള്‍ നടത്തുന്ന ആക്രമണം അന്താരാഷ്ട്ര മനുഷ്യാവകാശ ചട്ടങ്ങളുടെ ലംഘനമാണെന്നും ഇതിനെതിരെ അറബ് സഖ്യസേന ശക്തമായി പ്രതികരിക്കുമെന്നും സൗദി അറിയിച്ചു. ഈയാഴ്ച തന്നെ സൗദിയിലെ അസിറില്‍ മറ്റൊരു ഡ്രോണ്‍ അറബ് സഖ്യസേന തകര്‍ത്തിരുന്നു.

ജിസാന്‍ പ്രവിശ്യയിലെ ജനവാസ കേന്ദ്രങ്ങളെ ലക്ഷ്യമാക്കിയായിരുന്നു ഹൂത്തികള്‍ മിസൈല്‍ തെടുത്തതെന്നും യെമന്‍ യുദ്ധത്തില്‍ ഇറാന്‍ ഭരണകൂടത്തിന്റെ പങ്ക് കൂടുതല്‍ വ്യക്തമാക്കുന്നതാണ് ഹൂത്തികളുടെ നടപടികളെന്നും സഖ്യസേനാ വക്താവ് കേണല്‍ തുര്‍ക്കി അല്‍ മാലികി പറഞ്ഞു. ചാവ്വാഴ്ച ഉച്ചക്ക് ശേഷമായിരുന്നു മിസൈല്‍ ആക്രമണം.

ആയുധങ്ങളടക്കം എല്ലാ സഹായങ്ങളും എത്തിച്ച് യെമനിലെ സായുധ സംഘത്തിന് ഇറാന്‍ എല്ലാ പിന്തുണയും നല്‍കുകയാണെന്നും, ഇത് സഊദി അറേബ്യയെ മാത്രമല്ല, മേഖലയിലെ തന്നെ സുരക്ഷക്ക് ഭീക്ഷണിയാണ്. യു.എന്‍ പ്രമേയങ്ങളായ 2216, 2231 എന്നിവ ലംഘിച്ചുകൊണ്ടുള്ളതാണ് ഇറാന്റെ നടപടിയെന്നും അദ്ദേഹം കൂട്ടിച്ചേര്‍ത്തു.

റിയാദ്: സഊദി അറേബ്യയെ ലക്ഷ്യമിട്ട് യമനിലെ ഹൂഥി വിമതര്‍ വീണ്ടും മിസൈലാക്രമണം നടത്തി. തലസ്ഥാനമായ റിയാദ് ലക്ഷ്യമിട്ടെത്തിയ ബാലിസ്റ്റിക് മിസൈല്‍ ആകാശത്തുവെച്ച് തകര്‍ത്തു. ആക്രമണത്തിന്റെ ഉത്തരവാദിത്തം ഹൂഥികള്‍ ഏറ്റെടുത്തു. സഊദി പ്രതിരോധ മന്ത്രാലത്തിനും എണ്ണ സംഭരണ കേന്ദ്രങ്ങള്‍ക്കും നേരെയാണ് മിസൈല്‍ തൊടുത്തുവിട്ടതെന്ന് ഹൂഥികളുടെ നിയന്ത്രണത്തിലുള്ള അല്‍ മാസിറ ടെലിവിഷന്‍ അറിയിച്ചു.

രാജ്യത്തിന്റെ തെക്കന്‍ മേഖലയിലെത്തിയ രണ്ട് ഡ്രോണുകളും വെടിവെച്ചിട്ടതായി സഊദി സഖ്യസേന പറഞ്ഞു. ഖാസിഫ്-1 ഡ്രോണുകളാണ് തെക്കന്‍ സഊദിയിലേക്ക് അയച്ചതെന്ന് ഹൂഥികള്‍ സ്ഥിരീകരിച്ചിട്ടുണ്ട്. ഹൂഥികള്‍ക്ക് മിസൈലുകളും ഡ്രോണുകളും മറ്റും നല്‍കുന്നത് ഇറാനാണെന്ന് സഊദി ആരോപിക്കുന്നു.

ഇറാന്റെ അബാബീല്‍-2 ഡ്രോണിനോട് സാമ്യമുള്ളതാണ് ഖാസിഫ്-1 ഡ്രോണെന്ന് റിപ്പോര്‍ട്ടുണ്ട്. ലോകത്തെ ദരിദ്ര രാജ്യങ്ങളിലൊന്നായ യമനില്‍ 2014 മുതലാണ് ആഭ്യന്തര യുദ്ധം തുടങ്ങിയത്. തലസ്ഥാനമായ സന്‍ആ ഹൂഥി വിമതര്‍ പിടിച്ചെടുക്കുകയും പ്രസിഡന്റ് അബ്ദുറബ്ബ് മന്‍സൂര്‍ ഹാദിയുടെ നേതൃത്വത്തിലുള്ള ഭരണകൂടത്തെ അധികാരഭ്രഷ്ടമാക്കുകയും ചെയ്തു. ഹാദി ഭരണകൂടത്തെ തിരിച്ച് അധികാരത്തില്‍ എത്തിക്കുന്നതിനും ഹൂഥികളെ തുരത്തുന്നതിനും സഊദിയുടെ നേതൃത്വത്തിലുള്ള അറബ് രാജ്യങ്ങള്‍ യമനില്‍ വ്യോമാക്രമണം തുടരുകയാണ്. ആഭ്യന്തര യുദ്ധത്തില്‍ ഇതുവരെ പതിനായിരത്തിലേറെ പേര്‍ കൊല്ലപ്പെടുകയും 40,000 പേര്‍ക്ക് പരിക്കേല്‍ക്കുകയും ചെയ്തിട്ടുണ്ടെന്നാണ് ഔദ്യോഗിക കണക്ക്.

സഊദി അറേബ്യക്കെതിരെ ഹൂഥികള്‍ നടത്തുന്ന ആക്രമണത്തില്‍ ഇറാന് നേരിട്ട് പങ്കുള്ളതായി സഊദി മന്ത്രിസഭയും ഇന്നലെ കുറ്റപ്പെടുത്തി. സഊദിക്കെതിരെ ആക്രമണങ്ങള്‍ നടത്തുന്നതിനുള്ള ആയുധങ്ങള്‍ ഹൂഥികള്‍ക്ക് നല്‍കുന്നത് ഇറാനാണ്. യു.എന്‍ രക്ഷാ സമിതി പ്രമേയം ലംഘിച്ചാണ് ഹൂഥികളെ ഇറാന്‍ ആയുധമണിയിക്കുന്നതെന്നും മന്ത്രിസഭ പറഞ്ഞു.
അതേസമയം, സഊദി അറേബ്യക്കെതിരായ യുദ്ധത്തില്‍ ലെബനോന്‍ ഉള്‍പ്പെടുന്നത് ഒരിക്കലും അംഗീകരിക്കുന്നതിന് കഴിയില്ലെന്ന് ഗള്‍ഫ് കാര്യങ്ങള്‍ക്കുള്ള സഹമന്ത്രി സാമിര്‍ അല്‍സബ്ഹാന്‍ പറഞ്ഞു. ലെബനോന്‍ ഗവണ്‍മെന്റ് കൈക്കൊള്ളുന്ന എല്ലാ തീരുമാനങ്ങളെയും ഹിസ്ബുല്ല സ്വാധീനിക്കുകയാണ്. സഊദി അറേബ്യക്കെതിരെ യുദ്ധപ്രഖ്യാപനം നടത്തിയ ഗവണ്‍മെന്റ് എന്നോണം ലെബനോനെ തങ്ങള്‍ കാണും. സഊദി അറേബ്യക്കെതിരായ ഹിസ്ബുല്ല ആക്രമണങ്ങളുടെ വിശദാംശങ്ങള്‍ രാജിവെച്ച പ്രധാനമന്ത്രി സഅദ് അല്‍ഹരീരിയെ സല്‍മാന്‍ രാജാവ് അറിയിച്ചിട്ടുണ്ട്. ഹിസ്ബുല്ല മിലീഷ്യ ലെബനോന് സൃഷ്ടിക്കുന്ന ഭീഷണിയെ കുറിച്ച് ലെബനോന്‍ ഗവണ്‍മെന്റിന് അവബോധമുണ്ടായിരിക്കണമെന്ന് രാജാവ് സൂചിപ്പിച്ചു. സഊദി അറേബ്യക്കെതിരായ മുഴുവന്‍ ഭീകരാക്രമണ ഭീഷണികളിലും ഹിസ്ബുല്ലക്ക് പങ്കുണ്ട്. ഹിസ്ബുല്ലയെ ചെറുക്കുന്നതിന് രാഷ്ട്രീയവും അല്ലാത്തതുമായ മാര്‍ഗങ്ങള്‍ ഉപയോഗപ്പെടുത്തും. ലെബനീസ് ഗവണ്‍മെന്റ് ഹിസ്ബുല്ലയെ തടയുമെന്നാണ് തങ്ങള്‍ പ്രതീക്ഷിച്ചിരുന്നത്. ഹിസ്ബുല്ല സഊദിയിലേക്ക് മയക്കുമരുന്ന് കടത്തുകയും ഭീകരാക്രമണങ്ങള്‍ക്ക് സഊദി യുവാക്കളെ പരിശീലിപ്പിക്കുകയുമാണ്. രാജിവെക്കുന്നതിന് സഅദ് അല്‍ഹരീരിക്ക് മേല്‍ സമ്മര്‍ദമുണ്ടാവുകയായിരുന്നെന്ന വാദം ലെബനോനികളുടെ ശ്രദ്ധ തിരിക്കുന്നതിനുള്ള പച്ചക്കള്ളമാണ്. ഇറാന്‍ പിന്തുണയുള്ള ഹിസ്ബുല്ല മിലീഷ്യകള്‍ ലെബനോനെ ഹൈജാക്ക് ചെയ്തിരിക്കുകയാണെന്നും സാമിര്‍ അല്‍സബ്ഹാന്‍ പറഞ്ഞു. ശനിയാഴ്ചയാണ് സഅദ് അല്‍ഹരീരി രാജിവെച്ചത്.