സിറിയന്‍ ആഭ്യന്തര യുദ്ധത്തിന് സൈനിക പരിഹാരം സാധ്യമല്ലെന്നും രാഷ്ട്രീയ പ്രക്രിയ മാത്രമാണ് ഏക വഴിയെന്നും മൂവരും അന്തിമ പ്രസ്താവനയില്‍ വ്യക്തമാക്കി. തെഹ്‌റാനില്‍ ത്രിരാഷ്ട്ര ഉച്ചകോടി നടക്കുമ്പോള്‍ റഷ്യന്‍, സിറിയന്‍ പോര്‍വിമാനങ്ങള്‍ ഇദ്്‌ലിബില്‍ ബോംബ് വര്‍ഷിക്കുകയായിരുന്നു. വെടിനിര്‍ത്തല്‍ പ്രഖ്യാപിക്കണമെന്ന ഉര്‍ദുഗാന്റെ നിര്‍ദേശത്തെ പുടിനും റൂഹാനിയും എതിര്‍ത്തു. സൈനിക നടപടി കൂട്ടക്കുരുതിക്ക് കാരണമാകുമെന്നും വന്‍ അഭയാര്‍ത്ഥി പ്രവാഹമുണ്ടാകുമെന്നും ഉര്‍ദുഗാന്‍ മുന്നറിയിപ്പ് നല്‍കി.

ഐ.എസിനെപ്പോലുള്ള ഭീകരവാദികളെ ഒഴിവാക്കിക്കൊണ്ടുള്ള വെടിനിര്‍ത്തല്‍ ഫലം ചെയ്യില്ലെന്നായിരുന്നു പുടിന്റെ വാദം. അതിര്‍ത്തിയില്‍ മുഴുക്കെ സിറിയക്ക് നിയന്ത്രണാധികാരമുണ്ടെന്നും വിഘടനവാദികളാണ് ഇദ്‌ലിബ് കൈയടക്കിവെച്ചിരിക്കുന്നതെന്നും റുഹാനിയും പറഞ്ഞു. ഇറാന്റെയും റഷ്യയുടെയും ശക്തമായ പിന്തുണയോടെയാണ് പ്രസിഡന്റ് ബഷാറുല്‍ അസദ് വിമതരുമായി പോരാടുന്നത്. ഇദ്‌ലിബ് ആക്രമണം തുര്‍ക്കിയിലേക്ക് വീണ്ടും അഭയാര്‍ത്ഥി പ്രവാഹത്തിന് കാരണമാകുമെന്ന് ഉര്‍ദുഗാന്‍ ഭയക്കുന്നു. സിറിയയില്‍നിന്ന് വിമതരെ തുരത്തുന്നതുവരെ പോരാട്ടം തുടരുമെന്ന് റൂഹാനി വ്യക്തമാക്കി.

പ്രശ്‌നത്തില്‍ പ്രതിഷേധിച്ച് റഷ്യയിലെയും ഇറാനിലെയും അംബാസഡര്‍മാരെ തുര്‍ക്കി തിരിച്ചുവിളിച്ചു. സിറിയന്‍ യുദ്ധത്തിന് പരിഹാരം കാണാന്‍ തുര്‍ക്കിയും റഷ്യയും ഇറാനും സഹകരിച്ചു പ്രവര്‍ത്തിച്ചുകൊണ്ടിരിക്കെയാണ് ഇദ്‌ലിബില്‍ വ്യോമാക്രമണം ശക്തമാക്കിയിരിക്കുന്നത്.
ഇറാനും റഷ്യയും ഉത്തരവാദിത്തം നിര്‍വഹിക്കണമെന്ന് തുര്‍ക്കി വിദേശകാര്യ മന്ത്രി മെവ്‌ലൂത് കാവുസോഗ്ലു പറഞ്ഞു. പ്രസിഡന്റ് ബഷാറുല്‍ അസദിന്റെ സേന ഇദ്‌ലിബില്‍ മുന്നേറ്റം നടത്തിക്കൊണ്ടിരിക്കുകയാണ്.

അവരുടെ ഉദ്ദേശ്യം വ്യത്യസ്തമാണ്. വ്യോമാക്രമണത്തെ ലളിതമായി കാണാനാവില്ല-അദ്ദേഹം വ്യക്തമാക്കി. തുര്‍ക്കി അതിര്‍ത്തിക്കു സമീപമാണ് ഇദ്‌ലിബ്. സിറിയന്‍ സമാധാന പ്രക്രിയയില്‍ ഇറാനും റഷ്യയും ഭരണകൂടത്തോടൊപ്പവും തുര്‍ക്കി പ്രതിപക്ഷത്തോടൊപ്പവുമാണ്.
ഇദ്‌ലിബിലെ അക്രമങ്ങളില്‍ 95 ശതമാനത്തിനും പിന്നില്‍ സിറിയന്‍ ഭരണകൂടവും അവരെ പിന്തുണക്കുന്ന സായുധ ഗ്രൂപ്പുകളോ ആണെന്ന് കാവുസോഗ്ലു ആരോപിച്ചു.

റഷ്യന്‍ വ്യോമാക്രണങ്ങളുടെ പിന്‍ബലത്തില്‍ മുന്നേറിക്കൊണ്ടിരിക്കുന്ന സിറിയന്‍ സേനക്കു മുന്നില്‍ വിമതര്‍ക്ക് പിടിച്ചുനില്‍ക്കാന്‍ സാധിക്കാത്ത സ്ഥിതിയാണുള്ളത്. നിരവധി നഗരങ്ങള്‍ ഇതിനകം വിമതര്‍ക്ക് നഷ്ടപ്പെട്ടുകഴിഞ്ഞു.