കോണ്‍ഗ്രസ് മെലിഞ്ഞ് മെലിഞ്ഞ് അമിതാഭ് ബച്ചനില്‍ നിന്ന് ഇന്ദ്രന്‍സിനെ പോലെയായെന്ന് നിയമസഭയില്‍ പറഞ്ഞ സാംസ്‌കാരിക വകുപ്പു മന്ത്രി വി.എന്‍ വാസവന് യോജിച്ച ‘ചക്കിക്കൊത്ത ചങ്കരന്‍ ‘ തന്നെയാണ് സംസ്ഥാന ചലച്ചിത്ര അക്കാദമി ചെയര്‍മാന്‍ രഞ്ജിത്. അന്താരാഷ്ട്ര ചലച്ചിത്ര മേളയുടെ സമാപനത്തില്‍ തന്നെ കൂവിയ വരെ നായ്ക്കളോടാണ് രഞ്ജിത് ഉപമിച്ചിരിക്കുന്നത്. ‘ഞാന്‍ താമസിക്കുന്നത് കോഴിക്കോടാണ്. എനിക്ക് വയനാട്ടില്‍ വീടുണ്ട്. ഞാനവിടെ ചെല്ലുമ്പോള്‍ ഉടമസ്ഥനാണെന്നറിയാതെ വീട്ടിലെ നായ്ക്കള്‍ കുരക്കും ‘ .എന്നാണ് രഞ്ജിത് കൂവിയവരെ വിശേഷിപ്പിച്ചത്. താന്‍ എസ്.എഫ്.ഐയില്‍ പ്രവര്‍ത്തിച്ചയാളാണെന്നും കൂവി പരാജയപ്പെടേണ്ടെന്നും രഞ്ജിത് പ്രസംഗത്തില്‍ പറഞ്ഞിരുന്നു. ഇതേതുടര്‍ന്ന് ഒരു മാധ്യമത്തോട് സംസാരിക്കവെയാണ് യുവാക്കളെ നായ്ക്കളോട് സംവിധായകന്‍ ഉപമിച്ചത്.

ഐ.എഫ്.എഫ്.കെ 2022 ല്‍ ഇത്തവണ 1000 രൂപ നല്‍കി പാസെടുത്തിട്ടും സിനിമ കാണാന്‍ കഴിയാതെ വന്നവരാണ് സംഘാടനത്തിലെ പിഴവുകള്‍ ചൂണ്ടിക്കാട്ടി അക്കാദമി ചെയര്‍മാനെ കൂവിയത്. കഴിഞ്ഞ വര്‍ഷങ്ങളിലൊന്നും ഉണ്ടാകാത്ത രീതിയില്‍ പരാതി പ്രവാഹമായിരുന്നു ഇത്തവണ. നന്‍ പകല്‍ നേരത്ത് മയക്കം ‘ എന്ന മമ്മൂട്ടി ചിത്രത്തിന് റിസര്‍വേഷന്‍ ചെയ്തവര്‍ക്ക് പോലും സീറ്റ് ലഭിക്കാതിരുന്നതാണ് തര്‍ക്കം രൂക്ഷമാക്കിയത്. 13500 പേര്‍ക്ക് പാസ് നല്‍കിയതും ഇഷ്ടപ്പെട്ടവരെ റിസര്‍വേഷനില്ലാതെ തന്നെ കടത്തിവിട്ടതുമാണ് കാരണം. 6500 പേര്‍ക്ക് മാത്രം സീറ്റ് ഉള്ളപ്പോള്‍ അതിന്റെ ഇരട്ടി പേര്‍ക്ക് പാസ് നല്‍കിയതാണ് കാരണം .ലോകസിനിമയെ ഗൗരവമായി കണ്ട് എത്തുന്നവര്‍ക്ക് തടസ്സമാകുകയാണ് പാര്‍ട്ടി വിധേയത്വര്‍ .

കോവിഡ് കാലത്ത് തിരക്ക് നിയന്ത്രിക്കാനായി മൂന്ന് ജില്ലകളിലായി മേള നടത്തിയിരുന്നു. അത് നടപ്പാക്കുകയാണ് തിരക്ക് നിയന്ത്രിക്കാനുള്ള മാര്‍ഗം. അതേ സമയം തിരുവനന്തപുരത്ത് തന്നെ മേള നടത്തണമെന്ന വാശി ചില ലോബികള്‍ക്കുണ്ടെന്നും അവരാണ് ചലച്ചിത്ര അക്കാദമിയെ വഴി തെറ്റിക്കുന്നതെന്നുമാണ് പരാതി. അതില്‍ എണ്ണയൊഴിക്കുകയാണ് ചെയര്‍മാന്‍ തന്നെ ‘നായ ‘ പരാമര്‍ശത്തിലൂടെ ചെയ്തിരിക്കുന്നത്. ഇത്തരക്കാരെ പാര്‍ട്ടി പരിഗണനകള്‍ മറന്ന് സാംസ്‌കാരിക സ്ഥാപനങ്ങളുടെ പടിക്ക് പുറത്താക്കണമെന്നാണ് ആവശ്യം.

മലയാള ചിത്രമായ നന്‍പകല്‍ നേരത്ത് മയക്കമാണ് മേളയിലെ പ്രേക്ഷകപ്രീതി നേടിയ ചിത്രം. മികച്ച മലയാള ചിത്രത്തിനുള്ള നെറ്റ്പാക് പുരസ്‌കാരം മഹേഷ് നാരായണന്‍ സംവിധാനം ചെയ്ത അറിയിപ്പ് സ്വന്തമാക്കി.

മികച്ച നവാഗത സംവിധായകനുള്ള രജതചകോരവും മികച്ച ഏഷ്യന്‍ ചിത്രത്തിനുള്ള നെറ്റ്പാക് പുരസ്‌കാരവും അറബിക് ചിത്രമായ ആലത്തിനാണ് .ഫിറാസ് ഹൗരിയാണ് ചിത്രത്തിന്റെ സംവിധായകന്‍.റോമി മെയ്‌തെയ് സംവിധാനം ചെയ്ത അവര്‍ ഹോം മികച്ച ചിത്രത്തിനുള്ള ഫിപ്രസി രാജ്യാന്തര പുരസ്‌കാരം നേടി .നെറ്റ്പാക് സ്പെഷ്യല്‍ ജൂറി പരാമര്‍ശവും അവര്‍ ഹോമിനാണ്.

മികച്ച നവാഗത സംവിധായകനുള്ള ഫിപ്രസി പുരസ്‌കാരം ഇന്ദു വി എസ് സംവിധാനം ചെയ്ത മലയാള ചിത്രം 19 (1 )(എ) നേടി . ഇന്ത്യയിലെ മികച്ച നവാഗത സംവിധായകനുള്ള എഫ്.എഫ്എസ്.ഐ – കെ.ആര്‍ മോഹനന്‍ പുരസ്‌കാരത്തിന് അമര്‍ കോളനിയുടെ സംവിധായകന്‍ സിദ്ധാര്‍ഥ് ചൗഹാന്‍ തെരെഞ്ഞെടുക്കപ്പെട്ടു. ഏക്താര കളക്റ്റീവ് ഒരുക്കിയ എ പ്ലേസ് ഓഫ് അവര്‍ ഓണ്‍ ആണ് ഈ വിഭാഗത്തിലെ മികച്ച ചിത്രം.രാജ്യാന്തര മത്സര വിഭാഗത്തിലെ ചിത്രങ്ങളില്‍ മികച്ച പ്രകടനത്തിനുള്ള പ്രത്യേക പരാമര്‍ശത്തിന് ഈ ചിത്രത്തില്‍ അഭിനയിച്ച മനീഷാ സോണിയും മുസ്‌ക്കാനും തെരഞ്ഞെടുക്കപ്പെട്ടു.

വിവിധ തിയേറ്ററുകളിലായി 9600 സീറ്റുകളാണ് മേളയ്ക്കായി സജ്ജമാക്കിയിട്ടുള്ളത്. 2500 സീറ്റുകള്‍ ഉള്ള ഓപ്പണ്‍ തിയേറ്റര്‍ ആയ നിശാഗന്ധിയാണ് ഏറ്റവും വലിയ പ്രദര്‍ശന വേദി. മിഡ്‌നൈറ്റ് സ്‌ക്രീനിങ് ചിത്രമായ സാത്താന്‍സ് സ്ലേവ്‌സ് 2 കമ്മ്യൂണിയന്‍ ഉള്‍പ്പടെ പ്രധാന ചിത്രങ്ങള്‍ ഇവിടെ പ്രദര്‍ശിപ്പിക്കും.

ലോക സിനിമയില്‍ നിശ്ശബ്ദതയുടെ സൗന്ദര്യം വിളിച്ചോതുന്ന അപൂര്‍വചിത്രങ്ങളും യുദ്ധവും ജീവിതത്തിന്റെ അതിജീവനവും പ്രമേയമാക്കിയ സെര്‍ബിയന്‍ ചിത്രങ്ങളുമാണ് മേളയുടെ മുഖ്യ ആകര്‍ഷണം.സെര്‍ബിയയില്‍ നിന്നുള്ള ആറു ചിത്രങ്ങളാണ് മേളയില്‍ പ്രദര്‍ശിപ്പിക്കുക.

അന്താരാഷ്ട്ര മത്സര വിഭാഗം, ലോക പ്രസിദ്ധ സംവിധായകരുടെ ഏറ്റവും പുതിയ ചിത്രങ്ങള്‍ ഉള്‍പ്പെടുന്ന ലോകസിനിമാ വിഭാഗം,ക്ലാസിക്കുകളുടെ വീണ്ടെടുപ്പ് , ഇന്ത്യന്‍ സിനിമ നൗ, മലയാള സിനിമ റ്റുഡേ ,കണ്‍ട്രി ഫോക്കസ് ,ഹോമേജ് തുടങ്ങി 17 വിഭാഗങ്ങളിലായാണ് ചിത്രങ്ങള്‍ പ്രദര്‍ശിപ്പിക്കുന്നത്. എഫ് ഡബ്ലിയൂ മുര്‍ണോ,എമിര്‍ കുസ്റ്റുറിക്ക ,ബേലാ താര്‍ ,അലഹാന്ദ്രോ ഹോഡറോവ്‌സ്‌കി, പോള്‍ ഷ്രെഡര്‍ എന്നിവരുടെ ചിത്രങ്ങള്‍ അടങ്ങിയ പ്രത്യേക പാക്കേജുകള്‍, സൈലന്റ് ഫിലിംസ് വിത്ത് ലൈവ് മ്യൂസിക് എന്നിവയും ഇത്തവണത്തെ മേളയില്‍ ഉള്‍പ്പെടുത്തിയിട്ടുണ്ട് .

സംഘര്‍ഷഭരിതമായ ദേശങ്ങളിലെ ജീവിതം പകര്‍ത്തുന്ന കണ്‍ട്രി ഫോക്കസ് വിഭാഗത്തില്‍ ഇത്തവണ സെര്‍ബിയന്‍ ചിത്രങ്ങളാണ് പ്രദര്‍ശിപ്പിക്കുന്നത്. അന്തരിച്ച ഫ്രഞ്ച് സംവിധായകനായ ഴാങ് ലൂക് ഗൊദാര്‍ദ് , ടി പി രാജീവന്‍ തുടങ്ങിയവര്‍ക്ക് മേളയില്‍ ആദരമര്‍പ്പിക്കും. ലോകപ്രസിദ്ധ സംവിധായകരായ ഹോംഗ് സാങ്സു ,ബഹ്മാന്‍ ഗൊബാഡി,ഹിറോഖാസു കൊറീദ,ഇറാനിയന്‍ സംവിധായകനായ ജാഫര്‍ പനാഹി,കൊറിയന്‍ സംവിധായകന്‍ കിം-കി-ഡുക്ക് തുടങ്ങിയവരുടെ ചിത്രങ്ങളും മേളയില്‍ പ്രദര്‍ശിപ്പിക്കും .സിനിമാക്കാഴ്ചകള്‍ക്കൊപ്പം സംഗീത നിശകള്‍ക്കും വേദിയൊരുക്കുന്ന ചലച്ചിത്ര മേള ഡിസംബര്‍ 16 നു സമാപിക്കും