ഇന്ത്യന്‍ ഫുട്‌ബോളിലെ പ്രമുഖ ലീഗുകളായ ഐ.എസ്.എല്ലിലേയും ഐ.ലീഗിലേയും ക്ലബുകളെ അണി നിരത്തി തുടങ്ങുന്ന പുതിയ ടൂര്‍ണമെന്റായ സൂപ്പര്‍ കപ്പിന് രൂപരേഖയായി. 16 ടീമുകള്‍ അണി നിരക്കുന്ന ലീഗില്‍ ഐ.എസ്.എല്‍ -ഐ ലീഗ് എന്നീ ലീഗുകളില്‍
ആദ്യ ആറു സ്ഥാനങ്ങളില്‍ ഫിനീഷ് ചെയ്യുന്ന ടീമുകള്‍ സൂപ്പര്‍ കപ്പിന് നേരിട്ട് യോഗ്യത നേടും. ബാക്കി നാലു സ്ഥാനങ്ങള്‍ക്കായി ഇരു ലീഗുകളിലെയും അവസാന സ്ഥാനത്തുള്ള ടീമുകള്‍ തമ്മില്‍ പ്ലോ ഓഫിലൂടെ യോഗ്യത നേടേണ്ടിവരും.

മാര്‍ച്ച് 12 മുതല്‍ 31 വരെ നടക്കുന്ന യോഗ്യതാ മത്സരങ്ങളോടെയാണ് സൂപ്പര്‍ കപ്പ് ആരംഭിക്കുക. അതിന് ശേഷം മാര്‍ച്ച് 31 മുതല്‍ ഏപ്രില്‍ 22 വരെ ഫൈനല്‍ റൗണ്ടും നടക്കും.എ ഐ എഫ് എഫ് ആസ്ഥാനമായ ഡല്‍ഹി ഫുട്‌ബോള്‍ ഹൗസില്‍ നടന്ന മീറ്റീംഗിലാണ് ഇക്കാര്യം തീരുമാനമായത്. നിലവില്‍ കട്ടക്കിലോ കൊച്ചിയിലോ ആയി മത്സരം നടത്താനാണ് തീരുമാനമായിട്ടുള്ളത്. ഇക്കാര്യത്തില്‍ കൂടുതല്‍ നിരീക്ഷണങ്ങള്‍ക്ക് ശേഷം ഫുട്‌ബോള്‍ ഫെഡറേഷന്‍ അന്തിമതീരുമാനമെടുക്കും.

അതേസമയം ടൂര്‍ണമെന്റിന്റെ ഘടനക്കെതിരെ പല ക്ലബുകളും രംഗത്തെത്തി. നോക്കൗട്ട് രീതിയിലുള്ള ടൂര്‍ണമെന്റ് ക്ലബുകള്‍ക്ക് അധിക ബാധ്യത മാത്രമാകും സമ്മാനിക്കുകയെന്നാണ് ഐലീഗ് ക്ലബായ മോഹന്‍ ബഗാന്‍ അഭിപ്രായപ്പെട്ടത്. നിലവിലെ സൂചനകളനുസരിച്ച് മിക്ക ഐ-ലീഗ് ഐ.എസ്.എല്‍ ക്ലബുകളും കളിക്കാരുമായി കരാറിലെത്തിയിരിക്കുന്നത് മാര്‍ച്ച് പകുതി വരെയാണ്. ഇതിനുശേഷമാണ് സൂപ്പര്‍ കപ്പിലെ നോക്കൗട്ട് മത്സരങ്ങള്‍. നോക്കൗട്ട് റൗണ്ടായതിനാല്‍ വെറും ഒരു മത്സരം മാത്രമാണ് ടീമുകള്‍ക്ക് കളിക്കാമെന്ന് ഉറപ്പുള്ളത്. ഇതിനായി കളിക്കാരുമായി രണ്ടു മാസത്തെ അധിക കരാറില്‍ ഏര്‍പ്പെടേണ്ടിവരും. വലിയ സാമ്പത്തിത ശേഷിയില്ലാത്ത ക്ലബുകളെ സംബന്ധിച്ചിടത്തോളം ലക്ഷങ്ങള്‍ മുടക്കി താരങ്ങളുമായി കരാര്‍ പുതുക്കുകയെന്നത് അധിക ബാധ്യതയാണ്. കൂടാതെ ഐ.പി.എല്‍ ക്രിക്കറ്റ് ടൂര്‍ണമെന്റും ഈ സമയത്തു തന്നെ നടക്കുന്നതിനാല്‍ ടൂര്‍ണമെന്റിന്റെ എത്രത്തോളം വിജയകരമാവുമെന്നതും ആശങ്കയിലാഴ്ത്തുന്നുണ്ട്.

കോഴിക്കോട്: ഐ ലീഗിലെ ആവേശ പോരില്‍ കരുത്തരായ ഈസ്റ്റ് ബംഗാളിനെതിരെ ഗോകുലം എഫ്.സിക്ക് ത്രസിപ്പിക്കുന്ന ജയം. ഒന്നിനെതിരെ രണ്ടു ഗോളുകള്‍ക്കാണ് സ്വന്തം കാണികള്‍ക്കു മുന്നില്‍ ഈസ്റ്റ് ബംഗാളിനെ കേരളം മുട്ടകുത്തിച്ചത്. ആദ്യ പകുതിയില്‍ ഒരു ഗോളിന് പിന്നിട്ടുനിന്ന ശേഷം രണ്ടാം പകുതിയില്‍ ഗോകുലം രണ്ട് ഗോളുകള്‍ മടക്കുകയായിരുന്നു.

Salam wrongfully nets an own goal to hand @GokulamKeralaFC a vital lead in the dying minutes of the game. #HeroILeague #GKFCvKEB pic.twitter.com/qMSmvvuIjr

— Hero I-League (@ILeagueOfficial) February 17, 2018

കോഴിക്കോട് ഇ.എം.എസ് സ്‌റ്റേഡിയത്തില്‍ ആദ്യ പകുതിയുടെ അവസാന മിനുട്ടില്‍ പെനാല്‍ട്ടി ലക്ഷ്യത്തിലെത്തിച്ച് കട്‌സുമി യുസ ഈസ്റ്റ് ബംഗാളിനെ മുന്നിലെത്തിച്ചു. എന്നാല്‍ രണ്ടാം പകുതിയുടെ തുടക്കത്തില്‍ തന്നെ ഗോകുലം തിരിച്ചടിച്ച് ഒപ്പമെത്തി. 51-ാം മിനുട്ടില്‍ കിവി സിമാമിയാണ് ബംഗാള്‍ വല കുലുക്കി ഗോകുലത്തെ കളിയിലേക്ക് മടക്കിക്കൊണ്ടു വന്നത്. പിന്നീട് വിജയ ഗോളിനായി പരിശ്രമിച്ച ഗോകുലത്തിനായി 87ാം മിനുട്ടില്‍ ഹെന്റിയും സല്‍മാനും അര്‍ജുനും ചേര്‍ന്ന് നടത്തിയ മുന്നേറ്റത്തിനൊടുവില്‍ ഈസ്റ്റ് ബംഗാള്‍ താരം സലാം രഞ്ജന്റെ കാലില്‍ തട്ടി വിജയ ഗോള്‍ പിറക്കുകയായിരുന്നു.

.@GokulamKeralaFC come from behind and topple @eastbengalfc to notch up a landmark victory and in the process seriously dent the title chances of the Kolkata side. #HeroILeague #GKFCvKEB pic.twitter.com/O2vvYTOcmU

— Hero I-League (@ILeagueOfficial) February 17, 2018

നേരത്തെ കൊല്‍ക്കത്തയില്‍ മോഹന്‍ ബഗാനെ തോല്‍പ്പിച്ചിരുന്നു. ഇതിന് പിന്നാലെയാണ് മറ്റൊരു ബംഗാള്‍ ടീമിനെ ഗോകുലം പരാജയപ്പെടുത്തിയിരിക്കുന്നത്. അതേസമയം ഐ ലീഗ് കിരീടം ലക്ഷ്യമിടുന്ന ഈസ്റ്റ് ബംഗാളിന് ഇന്നു വിജയം അനിവാര്യമായിരുന്നു. 15 മല്‍സരങ്ങളില്‍നിന്ന് 26 പോയിന്റുമായി മൂന്നാം സ്ഥാനത്താണ് ഈസ്റ്റ് ബംഗാള്‍. 16 കളികളില്‍ നിന്നായി 31 പോയിന്റുള്ള നെരോക്ക എഫ്.സിയാണ് തലപ്പത്ത്. 16 പോയന്റുള്ള ഗോകുലം എട്ടാം സ്ഥാനത്താണ്