അബുദാബിയിലെ വി.പി.എസ് ഹെല്‍ത്ത് കെയര്‍ അധികൃതര്‍ നേരത്തെ ഇമാന് ചികിത്സ വാഗ്ദാനം ചെയ്തിരുന്നെങ്കിലും അന്ന് മുംബൈയിലെ ചികിത്സ തെരഞ്ഞെടുക്കുകയായിരുന്നു. എന്നാല്‍ നിലവിലെ അവസ്ഥയില്‍ ചികിത്സ അബുദാബിയിലേക്ക് മാറ്റുന്നതാണ് ഉചിതമെന്നാണ് ബന്ധുക്കളുടെ നിലപാട്. അബുദാബിയില്‍ നിന്നെത്തിയ ഡോക്ടര്‍മാര്‍ മുംബൈയിലെ ആസ്പത്രിയിലെത്തി ഇമാനെ പരിശോധിച്ചതായാണ് വിവരം. ഇമാന്റെ ശരീരഭാരം 171 കിലോഗ്രാമിലെത്തിയിട്ടുണ്ടെന്നും നേരത്തെയുണ്ടായ പക്ഷാഘാതത്തിനാണ് ഇനി ചികിത്സ നല്‍കേണ്ടതെന്നുമാണ് മുംബൈ ആസ്പത്രിയിലെ ബാരിയാട്രിക് വിഭാഗം ഡോക്ടര്‍മാര്‍ പറയുന്നത്.

രാജിവെക്കുന്നതായി അറിയിച്ച് ഇമാന്റെ ബാരിയാട്രിക് സര്‍ജറിയില്‍ ഉള്‍പ്പെട്ട ഡോ.അപര്‍ണ ഗോവില്‍ ഭാസ്‌കര്‍ ഫേസ്ബുക്കില്‍ പോസ്റ്റിടുകയും ചെയ്തിട്ടുണ്ട്. ആസ്പത്രിയുടെ വിശ്വാസ്യത തകര്‍ക്കാന്‍ വേണ്ടിയാണ് ഇത്തരം വ്യാജ പ്രചാരണങ്ങളെന്നാണ് ഡോക്ടര്‍മാര്‍ പറയുന്നത്. എന്നാല്‍ ആസ്പത്രിയില്‍ പ്രവേശിപ്പിച്ച് ഇത്ര ദിവസം പിന്നിട്ടിട്ടും ഇമാന് സ്വതന്ത്ര്യമായി ചലിക്കാനോ സംസാരിക്കാനോ സാധിച്ചിട്ടില്ലെന്ന് സഹോദരി ഷൈമ പറയുന്നു. ആസ്പത്രി അധികൃതര്‍ തങ്ങളെ കബളിപ്പിക്കുകയായിരുന്നുവെന്ന് ഷൈമ പറഞ്ഞു. ആസ്പത്രി അധികൃതരുടെ വാദം മാധ്യമങ്ങള്‍ക്കും സമൂഹത്തിനും മുന്നില്‍ മേനി കാണിക്കാനുള്ള തട്ടിപ്പ് മാത്രമാണെന്നും സഹോദരി ആരോപിക്കുന്നു. കഴിഞ്ഞ ദിവസം ഷൈമ പുറത്തു വിട്ട വീഡിയോയിലാണ് ഇമാന് ഇപ്പോഴും തൂക്കം കുറഞ്ഞിട്ടില്ലെന്ന് ആരോപണം ഉയര്‍ന്നത്.