വിവാദ പരാമര്‍ശം; അലഹാബാദ് ഹൈക്കോടതി ജസ്റ്റിസ് യാദവിനെ ഇംപീച്ച് ചെയ്യണമെന്ന് ആവശ്യം

webdesk17 — Fri, 13 Dec 2024 06:59:13 +0000

വിവാദ പരാമര്‍ശം ഉന്നയിച്ച അലഹബാദ് ഹൈക്കോടതി ജഡ്ജി ജസ്റ്റിസ് ശേഖര്‍ കുമാര്‍ യാദവിനെ ഇംപീച്ച് ചെയ്യണമെന്ന് ആവശ്യം. കേരളത്തിലെ അടക്കം 55 എംപിമാര്‍ ഒപ്പിട്ട ഇംപീച്ച്‌മെന്റ് പ്രമേയം രാജ്യസഭ സെക്രട്ടറി ജനറലിന് കൈമാറി.

യുപിയില്‍ നടന്ന വിശ്വഹിന്ദു പരിഷത്ത് പരിപാടിയിലാണ് ജസ്റ്റിസ് യാദവ് വിവാദ പരാമര്‍ശം നടത്തിയത്. ജഡ്ജി നടത്തിയ വിദ്വേഷ പ്രസംഗത്തില്‍ കഴിഞ്ഞ ദിവസം സുപ്രീംകോടതി ഇടപെട്ടിരുന്നു. ഹൈക്കോടതിയില്‍ നിന്നും സുപ്രീംകോടതി വിശദാംശങ്ങള്‍ തേടിയിരുന്നു.

യാദവിനെ ഇംപീച്ച് ചെയ്യണമെന്ന് സുപ്രീംകോടതി ബാര്‍ അസോസിയേഷന്‍ പ്രസിഡന്റും രാജ്യസഭാ എംപിയുമായ കപില്‍ സിബല്‍ ആവശ്യപ്പെട്ടു. ഭരണഘടനാലംഘനം ചൂണ്ടിക്കാട്ടി ബൃന്ദാകാരാട്ട് ചീഫ് ജസ്റ്റിസിന് കത്തയച്ചിരുന്നു.

‘യൂണിഫോം സിവില്‍ കോഡ് നടപ്പാക്കും, ഭൂരിപക്ഷത്തിന്റെ ആഗ്രഹമനുസരിച്ച് രാജ്യം പ്രവര്‍ത്തിക്കും. ബഹുഭാര്യത്വവും മുത്തലാഖും തങ്ങളുടെ അവകാശമായി ഒരു സമുദായം കണക്കാക്കുന്നു” എന്നുമായിരുന്നു രാഷ്ട്രീയ സ്വയംസേവക് സംഘിന്റെ തീവ്ര വലതുപക്ഷ ഹിന്ദുത്വ ശാഖയായ വിഎച്ച്പി സംഘടിപ്പിച്ച പരിപാടിയില്‍ ജസ്റ്റിസ് യാദവ് പറഞ്ഞത്.

ട്രംപിനെതിരെ ഇംപീച്ച്‌മെന്റ് നീക്കം തലപൊക്കുന്നു

chandrika — Thu, 13 Jul 2017 15:55:58 +0000

കാലിഫോര്‍ണിയ: അമേരിക്കന്‍ പ്രസിഡന്റ് ഡൊണാള്‍ഡ് ട്രംപിനെതിരെ ഡെമോക്രാറ്റിക് പാര്‍ട്ടിയുടെ അണിയറയില്‍ ഇംപീച്ച് നടപടികള്‍ക്ക് നീക്കം തുടങ്ങി. പ്രസിഡന്റ് തെരഞ്ഞെടുപ്പിലെ റഷ്യന്‍ ഇടപെടലിനെക്കുറിച്ച് നടക്കുന്ന അന്വേഷണം ട്രംപ് തടസപ്പെടുത്തിയെന്ന് ആരോപിച്ച് കാലിഫോര്‍ണിയയില്‍നിന്നുള്ള ഡെമോക്രാറ്റിക് നേതാവ് ബ്രാഡ് ഷെര്‍മാന്‍ ഇംപീച്ച്‌മെന്റ് റിപ്പോര്‍ട്ട് ഫയല്‍ ചെയ്തു. എഫ്.ബി.ഐ ഡയറക്ടര്‍ സ്ഥാനത്തുനിന്ന് ജെയിംസ് കോമിയെ പുറത്താക്കിയത് ഇതിന്റെ ഭാഗമാണെന്ന് അദ്ദേഹം ചൂണ്ടിക്കാട്ടുന്നു. ഇംപീച്ച്‌മെന്റിലേക്കുള്ള നീണ്ട പാതയിലെ ആദ്യ ചുവടുവെപ്പാണ് റിപ്പോര്‍ട്ടെന്ന് ഷെര്‍മാന്‍ പറയുന്നു. ഹിലരി ക്ലിന്റണെ തറപറ്റിക്കുന്നതിന് റഷ്യയില്‍നിന്നുള്ള സഹായത്തിനുവേണ്ടി ആര്‍ത്തിയോടെയാണ് ട്രംപിന്റെ പ്രചാരണ വിഭാഗം കാത്തിരുന്നതെന്ന് മകന്‍ ട്രംപ് ജൂനിയറിന്റെ ഇമെയിലുകള്‍ വ്യക്തമാക്കുന്നു. അന്വേഷണത്തിന്റെ പരിധിയില്‍നിന്ന് ചിലതൊക്കെ മറച്ചുവെക്കാന്‍ ട്രംപ് ശ്രമിച്ചുവെന്നാണ് കോമിയുടെ പുറത്താക്കല്‍ സൂചിപ്പിക്കുന്നതെന്നും അദ്ദേഹം കുറ്റപ്പെടുത്തി. ഇംപീച്ച്‌മെന്റിനെക്കുറിച്ച് പരസ്യമായി പറയാതെ ഡെമോക്രാറ്റിക് നേതാക്കള്‍ അകന്നുനില്‍ക്കുകയാണ്. റിപ്പബ്ലിക്കന്‍ പാര്‍ട്ടിയുടെ നിയന്ത്രണത്തിലുള്ള യു.എസ് കോണ്‍ഗ്രസില്‍ അത്തരമൊരു നീക്കം പരാജയപ്പെടാനും സാധ്യത ഏറെയുണ്ട്. എന്നാല്‍ ട്രംപിന്റെ നടപടികളില്‍ റിപ്പബ്ലിക്കന്‍ നേതാക്കളില്‍ ഭൂരിഭാഗവും അതൃപ്തരാണ്. ഷെര്‍മാന്റേത് ഒരു പ്രതിഷേധ നീക്കമാണെങ്കിലും ഭാവിയില്‍ കൂടുതല്‍ പേര്‍ ആ വഴിക്ക് ചിന്തിച്ചു തുടങ്ങിയേക്കുമെന്ന് റിപ്പോര്‍ട്ടുണ്ട്.

impeach – Chandrika Daily

വിവാദ പരാമര്‍ശം; അലഹാബാദ് ഹൈക്കോടതി ജസ്റ്റിസ് യാദവിനെ ഇംപീച്ച് ചെയ്യണമെന്ന് ആവശ്യം

ട്രംപിനെതിരെ ഇംപീച്ച്‌മെന്റ് നീക്കം തലപൊക്കുന്നു