ind vs newzealand – Chandrika Daily

ആദ്യടെസ്റ്റില്‍ ഇന്ത്യയെ കീഴടക്കി ന്യൂസിലാന്‍ഡ്

webdesk17 — Sun, 20 Oct 2024 07:53:59 +0000

ആദ്യടെസ്റ്റില്‍ ഇന്ത്യയെ കീഴടക്കി ന്യൂസിലാന്‍ഡ്. എട്ട് വിക്കറ്റിനാണ് ന്യൂസിലാന്‍ഡിന്റെ ജയം. രണ്ടാം ഇന്നിങ്സില്‍ ഇന്ത്യ ഉയര്‍ത്തിയ 107 റണ്‍സ് വിജയലക്ഷ്യം 27 ഓവറില്‍ വെറും രണ്ട് വിക്കറ്റ് നഷ്ടത്തില്‍ ന്യൂസിലാന്‍ഡ് അനായാസം മറികടന്നു.

ഒന്നാം ഇന്നിങ്സില്‍ ഇന്ത്യന്‍ ബാറ്റിങ് നിരയെ 46 റണ്‍സിന് കൂടാരം കയറ്റിയ ന്യൂസിലാന്‍ഡ് വിജയം ഉറപ്പിച്ചിരുന്നു. എന്നാല്‍ രണ്ടാം ഇന്നിങ്സില്‍ ഇന്ത്യ കളിയിലേക്ക് തിരിച്ചു വരുമെന്ന് ആരാധകര്‍ സംശയിച്ചെങ്കിലും ഇന്ത്യന്‍ നായകന്മാര്‍ അത്ഭുതങ്ങളൊന്നും കാണിച്ചില്ല.

48 റണ്‍സുമായി വില്‍ യങ്ങും 39 റണ്‍സുമായി രച്ചിന്‍ രവീന്ദ്രയും പുറത്താകാതെ നിന്നു. ഡെവണ്‍ കോണ്‍വെ (17) ക്യാപ്റ്റന്‍ ടോം ലതാം (0) എന്നിവരാണ് പുറത്തായ ബാറ്റര്‍മാര്‍. ജസ്പ്രീത് ബുംറയാണ് രണ്ട് വിക്കറ്റും വീഴ്ത്തിയത്.

മാറ്റ് ഹെന്രി അഞ്ച് വിക്കറ്റും വില്‍ റൂര്‍ക് നാല് വിക്കറ്റും ന്യൂസിലാന്‍ഡിനായി നേടി. മറുപടി ബാറ്റിങ്ങിനിറങ്ങിയ ന്യൂസിലാന്‍ഡ് 402 റണ്‍സ് നേടി മികച്ച ഒന്നാം ഇന്നിങ്‌സ് ലീഡെടുക്കുകയായിരുന്നു. 134 റണ്‍സ് നേടിയ രച്ചിന്‍ രവീന്ദ്രയായിരുന്നു ടോപ് സ്‌കോറര്‍. ഡെവണ്‍ കോണ്‍വെ 91 റണ്‍സും, ടിം സൗത്തി 65 റണ്‍സും നേടി. ഇന്ത്യക്കായി കുല്‍ദീപ് യാദവ്, രവീന്ദ്ര ജഡേജ എന്നിവര്‍ മൂന്ന് വിക്കറ്റ് വീതം വീഴ്ത്തി.

27 ഓവറില്‍ വെറും രണ്ട് വിക്കറ്റ് നഷ്ടത്തില്‍ ന്യൂസിലാന്‍ഡ് വിജയം നേടിയെടുത്തു. ആദ്യ ഇന്നിങ്സിലെ താരം രചിന്‍ രവീന്ദ്ര തന്നെയാണ് ന്യൂസിലാന്‍ഡിനെ വിജയത്തിലേക്കെത്തിച്ചത്.

150 റണ്‍സുമായി സര്‍ഫറാസ് ഖാന്‍ ഇന്ത്യയുടെ ടോപ് സ്‌കോററയപ്പോള്‍ 99 റണ്‍സുമായി ഋഷഭ് പന്ത് മികച്ച പിന്തുണ നല്‍കി. വിരാട് കോഹ്ലി (70) രോഹിത് ശര്‍മ (52) എന്നിവരും മികവ് കാട്ടി.

1988 ന് ശേഷം ആദ്യമായാണ് ന്യൂസിലാന്‍ഡ് ഇന്ത്യന്‍ മണ്ണില്‍ വിജയം കുറിക്കുന്നത്.

ടി ട്വന്റി വനിത ലോകകപ്പില്‍ ടീം ഇന്ത്യ ഇന്നിറങ്ങും; ആദ്യമത്സരം ന്യൂസിലാന്‍ഡിനെതിരെ

webdesk17 — Fri, 04 Oct 2024 07:35:02 +0000

ടി ട്വന്റി വനിത ലോകകപ്പില്‍ ഇന്ത്യയുടെ വനിത ടീം ഇന്നിറങ്ങും. ന്യൂസിലാന്‍ഡിനെതിരെയാണ് ഹര്‍മ്മന്‍പ്രീത് കൗര്‍ നയിക്കുന്ന ടീം ഇന്ത്യ ആദ്യമത്സരത്തിനിറങ്ങുന്നത്. ദുബായ് ക്രിക്കറ്റ് സ്റ്റേഡിയത്തില്‍ വെച്ച രാത്രി ഏഴരക്കാണ് മത്സരം. പാകിസ്താന്‍, ശ്രീലങ്ക, ഓസ്ട്രേലിയ എന്നീ ടീമുകള്‍ കൂടിയുള്ള ഗ്രൂപ്പ് എ യിലാണ് ഇന്ത്യയുള്ളത്. ലോകകപ്പിന് മുന്നോടിയായി നടന്ന വനിത ഏഷ്യാകപ്പ് ഫൈനലില്‍ ഇന്ത്യ ശ്രീലങ്കയോട് തോറ്റിരുന്നു. എന്നാല്‍ സന്നാഹമത്സരങ്ങളില്‍ ദക്ഷിണാഫ്രിക്ക, വെസ്റ്റ് ഇന്‍ഡീസ് എന്നീ ടീമുകളെ ഇന്ത്യ പരാജയപ്പെടുത്തിയിരുന്നു. അതേസമയം ന്യൂസിലാന്‍ഡ് കഴിഞ്ഞ പത്തുമത്സരങ്ങളിലും പരാജയപ്പെട്ടിരുന്നു.

അന്താരാഷ്ട്ര ക്രിക്കറ്റില്‍ പരിചയസമ്പന്നരായ സ്മൃതിയും ഷെഫാലി വര്‍മയും ചേര്‍ന്നാകും ഇന്ത്യന്‍ ഇന്നിങ്‌സ് ഓപ്പണ്‍ചെയ്യുക. ജെമീമ റോഡ്രിഗസ്, ക്യാപ്റ്റന്‍ ഹര്‍മന്‍പ്രീത് കൗര്‍, റിച്ചാ ഘോഷ് എന്നിവരുള്‍പ്പെട്ട മധ്യനിരയും, പിച്ചില്‍, മലയാളി ലെഗ് സ്പിന്നര്‍ ആശാ ശോഭന, ശ്രേയങ്കാ പാട്ടീല്‍, ഓള്‍റൗണ്ടര്‍ ദീപ്തി ശര്‍മ, രാധാ യാദവ് എന്നിവരുള്‍പ്പെട്ട സ്പിന്‍ നിരയും കളിയെ നയിക്കും. കേരളത്തില്‍ നിന്ന് ഓള്‍റൗണ്ടര്‍ ആയ സജന സജീവന്‍ ടീമിലിടം പിടിച്ചിട്ടുണ്ടെങ്കിലും ആദ്യ ഇലവനില്‍ കളിക്കുമോ എന്നതില്‍ വ്യക്തതയില്ല.

ന്യൂസിലാന്‍ഡിന്റെ പ്രധാന വിക്കറ്റുകള്‍ ആദ്യ അഞ്ച് ഓവറുകളില്‍ തന്നെ വീഴ്ത്താന്‍ ശേഷിയുള്ള ബൗളിങ് നിര ഇന്ത്യക്കുണ്ടെന്നാണ് ആരാധകര്‍ പ്രതീക്ഷിക്കുന്നത്.

ഇന്ത്യക്ക് വമ്പന്‍ ജയം; പരമ്പര സ്വന്തമാക്കി ഇന്ത്യ

webdesk12 — Wed, 01 Feb 2023 18:13:42 +0000

ഏകദിനത്തിന് പുറമെ ന്യൂസിലന്‍ഡിനെതിരായ ടി20 പരമ്പരയും ഇന്ത്യക്ക് സ്വന്തം. 168 റണ്‍സിനായിരുന്നു ഇന്ത്യയുടെ ജയം. ബാറ്റിങ്ങില്‍ 17 പന്തില്‍ 30 റണ്‍സടിച്ച ക്യാപ്റ്റന്‍ ഹര്‍ദിക് പാണ്ഡ്യ നാല് വിക്കറ്റെടുത്ത് ബൗളിങ്ങിലും മിന്നി കളിയില്‍ നിര്‍ണായക പങ്കുവഹിച്ചു.

ഇന്ത്യ നേടിയ 235 എന്ന കൂറ്റന്‍ സ്‌കോറിലേക്ക് ന്യൂസിലന്‍ഡിന് 66 റണ്‍സെടുക്കാനെ സാധിച്ചുള്ളു. 12.1 ഓവറില്‍ എല്ലാ ബാറ്റര്‍മാരെയും ഇന്ത്യ എറിഞ്ഞിട്ടു. 35 റണ്‍സെടുത്ത ഡാരില്‍ മിച്ചലാണ് കിവികളുടെ ടോപ് സ്‌കോറര്‍. വന്‍ വിജയലക്ഷ്യവുമായി ഇറങ്ങിയ ന്യൂസിലന്‍ഡിന് തുടക്കത്തിലെ തിരിച്ചടിയേല്‍ക്കുകയായിരുന്നു.

ആദ്യ ഓവറിലെ അഞ്ചാം പന്തില്‍ നാല് പന്തില്‍ മൂന്ന് റണ്‍സെടുത്ത ഫിന്‍ അലനെ പാണ്ഡ്യയുടെ പന്തില്‍ കുല്‍ദീപ് യാദവ് പിടിച്ചു പുറത്താക്കി. സ്‌കോര്‍ ബോര്‍ഡില്‍ അപ്പോള്‍ നാല് റണ്‍സേ ഉണ്ടായിരുന്നുള്ളൂ. സ്‌കോര്‍ ബോര്‍ഡില്‍ മാറ്റം വരും മുമ്ബ് ഡെവണ്‍ കോണ്‍വെയും മടങ്ങി. ഇത്തവണ അര്‍ഷ്ദീപിന്റെ പന്തില്‍ പാണ്ഡ്യക്കായിരുന്നു ക്യാച്ച്.

ഒരു റണ്‍സ് കൂടി ചേര്‍ത്തപ്പോഴേക്കും സന്ദര്‍ശകരുടെ അടുത്ത വിക്കറ്റും വീണു. അര്‍ഷ്ദീപിന്റെ പന്തില്‍ വിക്കറ്റ് കീപ്പര്‍ ഇഷാന്‍ കിഷനായിരുന്നു ക്യാച്ച്. വൈകാതെ െഗ്ലന്‍ ഫിലിപ്‌സും പവലിയനിലേക്ക് മടങ്ങി. പാണ്ഡ്യയുടെ പന്തില്‍ കുല്‍ദീപ് യാദവ് പിടിച്ചായിരുന്നു മടക്കം.

അപ്പോള്‍ സ്‌കോര്‍ബോര്‍ഡില്‍ ഉണ്ടായിരുന്നത് ഏഴ് റണ്‍സ് മാത്രമാണ്. അടുത്തത് അതിവേഗക്കാരന്‍ ഉമ്രാന്‍ മാലികിന്റെ ഊഴമായിരുന്നു. പിടിച്ചുനില്‍ക്കാന്‍ ശ്രമിച്ച ബ്രേസ് വെല്ലിന്റെ കുറ്റി ഉമ്രാന്‍ തെറിപ്പിച്ചു. ഇതോടെ അഞ്ചിന് 21 എന്ന പരിതാപകരമായ നിലയിലായി ന്യൂസിലാന്‍ഡ്. കൂട്ടത്തകര്‍ച്ചക്കിടയിലും പിടിച്ചു നിന്നത് ഡാറില്‍ മിച്ചല്‍ (33), മാത്രമാണ്. ഒരു റണ്‍സുമായി െബ്ലയര്‍ ടിക്‌നര്‍ ആണ് മിച്ചലിനൊപ്പം ക്രീസില്‍.

ടോസ് നേടി ബാറ്റിങ് തെരഞ്ഞെടുത്ത ഇന്ത്യ നിശ്ചിത ഓവറില്‍ നാല് വിക്കറ്റ് മാത്രം നഷ്ടത്തില്‍ 234 റണ്‍സാണ് അടിച്ചുകൂട്ടിയത്. കഴിഞ്ഞ രണ്ടു മത്സരങ്ങളിലും പരാജയമായ ശുഭ്മാന്‍ ഗില്‍ തകര്‍പ്പന്‍ സെഞ്ച്വറിയുമായി കളം നിറഞ്ഞപ്പോള്‍ രാഹുല്‍ ത്രിപാഠി മികച്ച പിന്തുണ നല്‍കി.

ലോകകപ്പ് ക്രിക്കറ്റ് സന്നാഹ മത്സരം ; കീവീസിനെതിരെ ഇന്ത്യക്ക് ബാറ്റിംങ്

Test User — Sat, 25 May 2019 09:34:52 +0000

ലോകകപ്പ് മത്സരങ്ങള്‍ക്ക് ഇന്ത്യയുടെ സന്നാഹ മത്സരത്തിലെ ആദ്യ മത്സരത്തില്‍ ന്യൂസിലാന്റിനെതിരെ ഇന്ത്യ ബാറ്റിങ് തെരഞ്ഞെടുത്തു. കെന്നിംഗ്ട്ടണ്‍ ഓവലിലാണ് മത്സരം. 28 ന് ബംഗ്ലാദേശിനെതിരെയാണ് അടുത്ത സന്നാഹ മത്സരം. ലോകകപ്പ് നേടാന്‍ പ്രാപ്തിയുള്ള ടീമാണ് ഇന്ത്യക്കുള്ളത് എന്നാല്‍ ബാറ്റിംങില്‍ നാലാമനായി ആര് എത്തും എന്നതാണ് ടീമില്‍ ഇപ്പോഴും ഉയരുന്ന ചര്‍ച്ച. 2011 ല്‍ ഇന്ത്യയില്‍ നടന്ന ലോകകപ്പ് ഇന്ത്യ കരസ്ഥമാക്കിയിരുന്നു.

കോലിയുടെ 200-ാം ഏകദിനത്തില്‍ ഇന്ത്യക്ക് ആറ് വിക്കറ്റ് തോല്‍വി

chandrika — Sun, 22 Oct 2017 19:08:25 +0000

മുംബൈ: വിരാത് കോലിയുടെ 200-ാം ഏകദിനത്തില്‍ ഇന്ത്യക്ക് ആറ് വിക്കറ്റ് തോല്‍വി. ന്യൂസിലാന്‍ഡിനെതിരായ ഏകദിന പരമ്പരയിലെ ആദ്യ മല്‍സരത്തിലാണ് അപ്രതിക്ഷിതമായി ഇന്ത്യന്‍ സൂപ്പര്‍ സംഘം ആറ് വിക്കറ്റിന് തോറ്റത്. ആദ്യം ബാറ്റ് ചെയ്ത ഇന്ത്യ കോലിയുടെ (121) സെഞ്ച്വറി മികവില്‍ എട്ട് വിക്കറ്റിന് 280 റണ്‍സ് നേടിയിരുന്നു. എന്നാല്‍ ഒരു ഓവര്‍ ബാക്കി നില്‍ക്കെ പുറത്താവാതെ സെഞ്ച്വറി നേടിയ ലതാമിന്റെയും 95 ല്‍ പുറത്തായ റോസ് ടെയ്‌ലറിന്റെയും മികവില്‍ കിവീസ് മല്‍സരം സ്വന്തമാക്കി. ഇന്ത്യന്‍ നിരയില്‍ കോലി മാത്രമാണ് മിന്നിയത്. 200-ാം മത്സരം കളിക്കുന്ന ക്യാപ്ടന്‍ വിരാട് കോഹ്‌ലിയുടെ ബൗളിംഗിലും പ്രകടനം ശരാശരി മാത്രമായിരുന്നു.

#TeamIndia 280/8 in 50 overs (V Kohli 121) #INDvNZ #Virat200 pic.twitter.com/Kn0i8Wy6q1

— BCCI (@BCCI) October 22, 2017

വാംഖഡെയിലെ റണ്ണൊഴുക്ക് പ്രതീക്ഷിക്കപ്പെട്ട പിച്ചില്‍ ടോസ് നേടിയ കോഹ്‌ലി ബാറ്റിങ് തെരഞ്ഞെടുക്കുകയായിരുന്നു. എന്നാല്‍, കിവികള്‍ അച്ചടക്കത്തോടെ പന്തെറിഞ്ഞപ്പോള്‍ ഇന്ത്യക്ക് ബാറ്റിങ് അത്ര എളുപ്പമായിരുന്നില്ല.

ആറ് ഓവറിനിടെ ഓപണര്‍മാരായ ശിഖര്‍ ധവാനെയും (9) രോഹിത് ശര്‍മയെയും (20) നഷ്ടമായ ഇന്ത്യയെ തകര്‍ച്ചയില്‍ നിന്ന് കരകയറ്റിയത് കോഹ്‌ലിയുടെ അവസരോചിത ഇന്നിങ്‌സ് ആണ്. കേദാര്‍ ജാദവ് (12) കൂടി മടങ്ങിയപ്പോള്‍ മൂന്നിന് 71 എന്ന നിലയിലായ ഇന്ത്യയെ ദിനേഷ് കാര്‍ത്തിക്കിനൊപ്പം 73 റണ്‍സിന്റെ കൂട്ടുകെട്ടുണ്ടാക്കിയാണ് കോഹ്ലി കരകയറ്റിയത്. പിന്നീട് എം.എസ് ധോണിക്കൊപ്പം (25) 57 റണ്‍സിന്റെ പാര്‍ട്ണര്‍ ഷിപ്പിലും കോഹ്ലി പങ്കാളിയായി. ഹാര്‍ദിക് പാണ്ഡ്യക്ക് (16) തിളങ്ങാനായില്ല.

ഇനിയാരും മുതിരരുത് ഈ സാഹസത്തിന്; വിക്കറ്റിന് പിന്നില്‍ വീണ്ടും ധോണി മാജിക്

Web Desk — Sat, 29 Oct 2016 15:48:54 +0000

ഇന്ത്യന്‍ ക്യാപ്റ്റന്‍ മഹേന്ദ്രസിങ് ധോണിയുടെ ഇലക്ട്രിക് കീപ്പിങ് മികവ് ക്രിക്കറ്റ് ലോകം അംഗീകരിച്ചതാണ്. സ്റ്റംപിങിലും റണ്‍ഔട്ടിലും ക്യാപ്റ്റന്റെ അതിവേഗ നീക്കങ്ങള്‍ എതിര്‍ ടീമിനെ എപ്പോഴും ഭയപ്പെടുത്താറുണ്ട്.

ന്യൂസിലാന്റിനെതിരായ നാലാം ഏകദിനത്തില്‍ റോസ് ടെയ്‌ലറെ പുറത്താക്കിയത് അത്തരമൊരു റിഫ്‌ലക്‌സിലൂടെയായിരുന്നു. ക്രിക്കറ്റ് ലോകത്തെ അമ്പരപ്പിച്ച ആ റണ്‍ഔട്ടിന്റെ പകിട്ട് മാറും മുമ്പിതാ മറ്റൊരു കീപ്പിങ് മികവ്.

ഇത്തവണ ഇരയായത് കിവീസ് താരം ടിം സൗത്തി. അമിത് മിശ്രയെ കയറിയടിക്കാനുള്ള ശ്രമം അല്‍പം പിഴച്ചു പന്ത് വിക്കറ്റിനു പിറകില്‍ ധോണിയുടെ കൈകളിലേക്ക്. ക്രീസില്‍ തൊട്ടു തൊട്ടില്ലെന്ന മട്ടില്‍ നിന്ന സൗത്തി കാല് പിന്നിലേക്ക് വലിക്കുതിന് നിമിഷങ്ങള്‍ക്ക് മുമ്പ് ധോണി പണി തീര്‍ത്തു. കിടിലന്‍ സ്റ്റംപിങ്.

https://www.chandrikadaily.com/wp-content/uploads/2016/10/K6WDNCuj0p9T2EjF.mp4

വിക്കറ്റിന് പിറകില്‍ താനാണെങ്കില്‍ ക്രീസ് വിട്ട് കയറി അടിക്കുക സാഹസമാണെന്ന ധോണിയുടെ പരസ്യമായ മുന്നറിയിപ്പ്.

ഹര്‍ദിക് മാജിക്കിനും രക്ഷിക്കാനായില്ല; രണ്ടാം ഏകദിനത്തില്‍ ഇന്ത്യക്ക് തോല്‍വി

Web Desk — Thu, 20 Oct 2016 16:15:55 +0000

ന്യൂസിലാന്റിനെതിരായ ഏകദിന പരമ്പരയിലെ രണ്ടാം മത്സരത്തില്‍ ഇന്ത്യക്ക് ആറ് റണ്‍സ് തോല്‍വി. ഒമ്പതാം വിക്കറ്റില്‍ ഹര്‍ദിക് പട്ടേലും- ഉമേഷ് യാദവും നടത്തിയ പോരാട്ടത്തില്‍ ജയത്തിനടുത്ത് വരെ എത്തിയ ശേഷമാണ് ഇന്ത്യ കീഴടങ്ങിയത്. സ്‌കോര്‍: ന്യൂസിലാന്റ്: 242/9, ഇന്ത്യ: 236 ഓള്‍ഔട്ട് (49.3over)

എട്ടാം വിക്കറ്റും നഷ്ടമാവുമ്പോള്‍ ഇന്ത്യ ജയത്തില്‍ നിന്ന് 59 റണ്‍സ് അകലെയായിരുന്നു. എന്നാല്‍ അപ്രതീക്ഷിതമായി ഒമ്പതാം വിക്കറ്റില്‍ ഹര്‍ദിക് പാണ്ഡ്യയും ഉമേഷ് യാദവും തകര്‍ത്തടിച്ചതോടെ ഇന്ത്യ ജയത്തിനരികിലെത്തി. പക്ഷെ അനുഭവ സമ്പന്നനായ ട്രെന്റ് ബോള്‍ട്ടിന്റെ രണ്ടാം വരവില്‍ ഹര്‍ദിക് (36)പുറത്തായതോടെ ഇന്ത്യ തോല്‍വി വഴങ്ങുകയായിരുന്നു. അവസാന ഓവറില്‍ ജയിക്കാന്‍ 11 റണ്‍സ് വേണമെന്നിരിക്കെ ഇന്ത്യക്ക് 4 റണ്‍സ് ചേര്‍ക്കാനേ കഴിഞ്ഞൂള്ളൂ. ഉമേഷ് യാദവ് (18) പുറത്താവാതെ നിന്നു.

നേരത്തെ 73/4 എന്ന നിലയില്‍ തകര്‍ന്ന ഇന്ത്യയെ കേദാര്‍ യാദവ്(41), ക്യാപ്റ്റന്‍ ധോണി(39) എന്നിവര്‍ ചേര്‍ന്നാണ് കരകയറ്റിയത്.

ടോസ് നഷ്ടമായി ബാറ്റിങിനിറങ്ങിയ കിവീസ് ക്യാപ്റ്റന്‍ കെയ്ന്‍ വില്യംസന്റെ സെഞ്ച്വറി മികവിലാണ് 242 റണ്‍സിലെത്തിയത്. ടോം ലഥാം 46 റണ്‍സെടുത്ത ക്യാപ്റ്റന് ഉജ്വല പിന്തുണ നല്‍കി.

ഇന്ത്യാ-ന്യൂസീലാന്റ് ഏകദിനത്തിലെ അംപയറുടെ കയ്യിലെ ഉപകരണം എന്തിന്‌!

Web Desk — Tue, 18 Oct 2016 12:48:29 +0000

കഴിഞ്ഞ ഇന്ത്യാ-ന്യൂസീലാന്റ് ഏകദിന മത്സരത്തില്‍ അംപയറുടെ ഇടതു കയ്യിലെ ആ ഉപകരണം എന്തായിരുന്നു എന്നതു ഇപ്പോഴും ചിന്തിച്ചിരിക്കുകയാണോ നിങ്ങള്‍. എങ്കില്‍ ഇനിയും സംശയിച്ചു തല പുകക്കണ്ട.

കഴിഞ്ഞ ലോക ട്വന്റി ട്വന്റി ചാമ്പ്യന്‍ഷിപ്പില്‍ ഓസ്‌ട്രേലിയന്‍ അംബയര്‍ ബ്രൂസ് ഓക്‌സന്‍ഫോര്‍ഡ്

ഇതാദ്യമായി അല്ല ഓസ്‌ട്രേലിയന്‍ അംപയര്‍ ബ്രൂസ് ഓക്‌സന്‍ഫോര്‍ഡ് കളിക്കിടയില്‍ ഇത്തരമൊരു ഉപകരണം ഉപയോഗിക്കുന്നത്. ഒന്നോര്‍ത്തു നോക്കൂ, കഴിഞ്ഞ ലോക ട്വന്റി ട്വന്റി ചാമ്പ്യന്‍ഷിപ്പിലും ബ്രൂസ് ഈ ഉപകരണം ഉപയോഗിച്ചിരുന്നില്ലേ?

The latest trial in umpire safety equipment: the shield! #WT20 pic.twitter.com/aALrOfEDkJ

— cricket.com.au (@CricketAus) March 13, 2016

ഇടതു കൈയ്യില്‍ ബെല്‍റ്റ് ഉപയോഗിച്ചു ഭദ്രമായി കെട്ടിയിട്ട ഗ്ലാസ് ചട്ടയുടെ പേര് ഫോര്‍ഹാം ഷീല്‍ഡ് എന്നാണ്. ബാറ്റ്‌സ്മാനില്‍ നിന്നും പൊടുന്നനെയുണ്ടാകുന്ന അപകടകരമായ സ്‌ട്രൈറ്റ് ഡ്രൈവ് ഷോട്ടുകളിന്‍ നിന്നും അംബയിറ് സ്വയം രക്ഷപ്പെടാനുള്ള സുരക്ഷാ കവചമാണിത്.

നേരത്തെ ഇന്ത്യ-ഓസട്രേലിയ ഏകദിന മത്സരത്തില്‍ അംപയര്‍ ജോണ്‍ വാര്‍ഡ് സുരക്ഷക്കായി ഹെല്‍മറ്റ് ധരിച്ചത് വാര്‍ത്തയായിരുന്നു. കഴിഞ്ഞ ഡിസംബറില്‍ 53 കാരനായ ആസ്‌ട്രേലിയന്‍ അംപയര്‍ വാര്‍ഡ രഞ്ജി ട്രോഫി മത്സരത്തിനിടെ പരിക്കേറ്റതിനെ തുടര്‍ന്നായിരുന്നത്.

ആരു പറഞ്ഞു ഫീല്‍ഡിങ് അറിയില്ലെന്ന്? ഉമേഷിന്റെ തകര്‍പ്പന്‍ ക്യാച്ച്

chandrika — Mon, 17 Oct 2016 12:04:16 +0000

ധര്‍മശാല: ബൗളര്‍മാര്‍ പൊതുവെ ഫീല്‍ഡിങ്ങില്‍ അലസന്മാരാണെന്നാണ് ക്രിക്കറ്റ് ലോകത്തെ പൊതുവെയുള്ള സംസാരം. ചിലരൊക്കെ അതില്‍നിന്ന് വ്യത്യസ്തമാണ് താനും. ഇന്നലെ ധര്‍മശാലയില്‍ സമാപിച്ച ന്യൂസിലാന്‍ഡിനെതിരായ ആദ്യ ഏകദിനത്തില്‍ വിരാട് കോഹ്‌ലിയുടെയും ഹര്‍ദ്ദിക്ക് പാണ്ഡയുടെയും മികവിന് പുറമെ മറ്റൊരു ശ്രദ്ധേയമായ പ്രകടനം കൂടി നടന്നു. ഉമേഷ് യാദവിന്റെ തകര്‍പ്പന്‍ ഫീല്‍ഡിങ്. മിഡ് ഓഫില്‍ യാദവിന്റെ കിടിലന്‍ ക്യാച്ചില്‍ പുറത്തായത് ന്യൂസിലാന്‍ഡിന്റെ വെടിക്കെട്ട് വീരന്‍ കോറി ആന്‍ഡേഴ്‌സണ്‍. ഹര്‍ദ്ദിക്ക് പാണ്ഡെ എറിഞ്ഞ പത്താം ഓവറിലെ നാലാം പന്തിലാണ് ഉമേഷിന്റെ ഉഗ്രന്‍ ക്യാച്ച്. മത്സരത്തില്‍ ഉമേഷ് രണ്ട് വിക്കറ്റ് വീഴ്ത്തിയിരുന്നു.

ആ കാഴ്ച കാണാം.

https://www.youtube.com/watch?v=rywgOMEeGd0

പരമ്പരയില്‍ ഗംഭീര തുടക്കം; പാണ്ഡ്യക്കും കോഹ്ലിക്കും ഇന്ത്യക്കും

chandrika — Sun, 16 Oct 2016 19:56:28 +0000

ധര്‍മശാല: അരങ്ങേറ്റ ഏകദിനത്തില്‍ മൂന്നു വിക്കറ്റുമായി ആക്രമണം നയിച്ച ഹര്‍ദിക് പാണ്ഡ്യ, 85 റണ്‍സുമായി പുറത്താകാതെ നിന്ന വിരാട് കോഹ്്‌ലി എന്നിവര്‍ തിളങ്ങിയപ്പോള്‍ 900-ാം ഏകദിന മത്സരത്തില്‍ ഇന്ത്യക്ക് അനായാസ വിജയം. ന്യൂസിലാന്‍ഡിനെതിരെ ആറു വിക്കറ്റിന് തകര്‍ത്ത് ഏകദിന പരമ്പരയിലും ഇന്ത്യ ഗംഭീരമായി തുടങ്ങി. 190 റണ്‍സിന് സന്ദര്‍ശകരെ ചുരുട്ടിക്കെട്ടിയ ഇന്ത്യ 33.1 ഓവറില്‍ നാലു വിക്കറ്റ് നഷ്ടത്തില്‍ വിജയം കണ്ടു. ടെസ്റ്റ് പരമ്പര തൂത്തുവാരിയ ഏകപക്ഷീയ വിജയത്തിനു ശേഷം ഏകദിനത്തിലും ഇന്ത്യ ന്യൂസിലാന്‍ഡിനെതിരെ ആധിപത്യം തുടരുകയായിരുന്നു.
ബൗളര്‍മാര്‍ വിജയത്തിന് കളമൊരുക്കിയപ്പോള്‍ ബാറ്റ്‌സ്മാന്മാര്‍ക്ക് സമ്മര്‍ദമില്ലാതെ ബാറ്റു ചെയ്യാനായി. മൂന്നാമനായി കളത്തിലെത്തിയ കോഹ്്‌ലി 81 പന്തില്‍ ഒരു സിക്‌സറും ഒമ്പതു ബൗണ്ടറികളും സഹിതം പുറത്താകാതെ നിന്നു. ക്യാപ്റ്റന്‍ എം.എസ് ധോണിയാണ് കോഹ്്‌ലിക്ക് മികച്ച പിന്തുണ നല്‍കിയത്. ഇരുവരും ചേര്‍ന്ന് 60 റണ്‍സ് കൂട്ടിച്ചേര്‍ത്തു.
ടോസ് നേടിയ ഇന്ത്യ സന്ദര്‍ശകരെ ബാറ്റുചെയ്യാന്‍ ക്ഷണിക്കുകയായിരുന്നു. ഇന്ത്യന്‍ ബൗളര്‍മാരുടെ മിന്നും പ്രകടനത്തിനു മുന്നില്‍ ന്യൂസിലാന്‍ഡ് മുട്ടുമടക്കിയപ്പോള്‍ ബാറ്റ്‌സ്മാന്മാര്‍ക്ക് പോരാട്ടം വേണ്ടി വന്നില്ല. ഓപണര്‍ ടോം ലാതം 79 റണ്‍സുമായി മടങ്ങിയ ശേഷം, പത്താമനായി വന്ന് 45 പന്തില്‍ 55 റണ്‍സടിച്ച് ടിം സൗത്തീ അപ്രതീക്ഷിത ആക്രമണം നടത്തും വരെ ഇന്ത്യ മാത്രമായിരുന്നു കളത്തില്‍. ഏഴു ഓവറില്‍ 31 റണ്‍സ് അനുവദിച്ചാണ് പാണ്ഡ്യ മൂന്നു വിക്കറ്റ് വീഴ്ത്തിയത്. അപകടകാരികളായ മാര്‍ട്ടിന്‍ ഗപ്ടില്‍, കോറി ആന്‍ഡേഴ്‌സണ്‍, ലൂക് റോഞ്ചി എന്നീ വെടിക്കെട്ട് വീരന്മാരായിരുന്നു പാണ്ഡ്യയുടെ ഇരകള്‍. എട്ട് ഓവറില്‍ 31 റണ്‍സിന് രണ്ടു വിക്കറ്റെടുത്ത ഉമേഷ് യാദവും കിവികളുടെ മുന്‍നിരയെ തകര്‍ക്കുന്നതില്‍ നിര്‍ണായക പങ്കുവഹിച്ചു. വാലറ്റക്കാരെ പുറത്താക്കി അമിത് മിശ്രയും മൂന്നു വിക്കറ്റ് സ്വന്തമാക്കി. കേദാര്‍ ജാദവിനായിരുന്നു ശേഷിക്കുന്ന രണ്ടു വിക്കറ്റ്.
രോഹിത് ശര്‍മയും അജിന്‍ക്യ രഹാനെയുമാണ് ഇന്ത്യന്‍ ഇന്നിങ്‌സ് ഓപണ്‍ ചെയ്തത്. 26 പന്ത് കളിച്ച് പതിനാലു റണ്‍സുമായി രോഹിത് മടങ്ങിയപ്പോള്‍ ആക്രമണോത്സുകനായി കളിച്ച രഹാനെയിലായി (34 പന്തില്‍ 33) ഇന്ത്യന്‍ പ്രതീക്ഷകള്‍. എന്നാല്‍ കോഹ്്‌ലിക്കൊപ്പം നിലയുറപ്പിക്കും മുമ്പ് രഹാനെ പുറത്തായി. മനീഷ് പാണ്ഡെക്കും (17) നാല്‍പ്പത് റണ്‍സിന്റെ കൂട്ടുകെട്ടുമായി നിലയുറപ്പിച്ച കോഹ്്‌ലി ധോണയെ കൂട്ടുപിടിച്ച് വിജയത്തോടടുത്തു. കേദാര്‍ ജാദവിനൊപ്പം (10 നോട്ടൗട്ട്) 32 റണ്‍സിന്റെ അപരാജിത കൂട്ടുകെട്ടുമായി വിജയം ഉറപ്പിക്കുകയും ചെയ്തു.