ind vs nz – Chandrika Daily

ഇനിയാരും മുതിരരുത് ഈ സാഹസത്തിന്; വിക്കറ്റിന് പിന്നില്‍ വീണ്ടും ധോണി മാജിക്

Web Desk — Sat, 29 Oct 2016 15:48:54 +0000

ഇന്ത്യന്‍ ക്യാപ്റ്റന്‍ മഹേന്ദ്രസിങ് ധോണിയുടെ ഇലക്ട്രിക് കീപ്പിങ് മികവ് ക്രിക്കറ്റ് ലോകം അംഗീകരിച്ചതാണ്. സ്റ്റംപിങിലും റണ്‍ഔട്ടിലും ക്യാപ്റ്റന്റെ അതിവേഗ നീക്കങ്ങള്‍ എതിര്‍ ടീമിനെ എപ്പോഴും ഭയപ്പെടുത്താറുണ്ട്.

ന്യൂസിലാന്റിനെതിരായ നാലാം ഏകദിനത്തില്‍ റോസ് ടെയ്‌ലറെ പുറത്താക്കിയത് അത്തരമൊരു റിഫ്‌ലക്‌സിലൂടെയായിരുന്നു. ക്രിക്കറ്റ് ലോകത്തെ അമ്പരപ്പിച്ച ആ റണ്‍ഔട്ടിന്റെ പകിട്ട് മാറും മുമ്പിതാ മറ്റൊരു കീപ്പിങ് മികവ്.

ഇത്തവണ ഇരയായത് കിവീസ് താരം ടിം സൗത്തി. അമിത് മിശ്രയെ കയറിയടിക്കാനുള്ള ശ്രമം അല്‍പം പിഴച്ചു പന്ത് വിക്കറ്റിനു പിറകില്‍ ധോണിയുടെ കൈകളിലേക്ക്. ക്രീസില്‍ തൊട്ടു തൊട്ടില്ലെന്ന മട്ടില്‍ നിന്ന സൗത്തി കാല് പിന്നിലേക്ക് വലിക്കുതിന് നിമിഷങ്ങള്‍ക്ക് മുമ്പ് ധോണി പണി തീര്‍ത്തു. കിടിലന്‍ സ്റ്റംപിങ്.

https://www.chandrikadaily.com/wp-content/uploads/2016/10/K6WDNCuj0p9T2EjF.mp4

വിക്കറ്റിന് പിറകില്‍ താനാണെങ്കില്‍ ക്രീസ് വിട്ട് കയറി അടിക്കുക സാഹസമാണെന്ന ധോണിയുടെ പരസ്യമായ മുന്നറിയിപ്പ്.

ക്രിക്കറ്റില്‍ ഇന്ന് ‘ഫൈനല്‍’: പരമ്പര പിടിക്കാന്‍

Web Desk — Fri, 28 Oct 2016 19:37:08 +0000

വിശാഖപട്ടണം: ഒന്നു ചീഞ്ഞാലേ മറ്റൊന്നിനു വളമാകൂ എന്നാണ് ചൊല്ല്. ന്യൂസിലാന്‍ഡിന് ചരിത്രം സഷ്ടിക്കണമെങ്കില്‍ എം.എസ് ധോണി നാണക്കേടിന്റെ ചരിത്രം ഏറ്റുവാങ്ങണം. ഇന്ത്യന്‍ വിക്കറ്റ് കീപ്പര്‍ ബാറ്റ്‌സ്മാന്റെ ആദ്യ സെഞ്ച്വറി സ്വന്തമാക്കിയ വിശാഖപട്ടണത്തെ മൈതാനം തന്നെ കൈവിടില്ലെന്ന പ്രതീക്ഷയിലാണ് ഇന്ത്യന്‍ നായകന്‍. മറുഭാഗത്ത്, ഇന്ത്യന്‍ മണ്ണില്‍ ആദ്യ പരമ്പര നേട്ടമെന്ന കൈയകലത്തെ സ്വപ്‌നം സ്വന്തമാക്കാന്‍ കണക്കുകൂട്ടി ഇറങ്ങുകയാണ് കിവീസ്. അവസാന മത്സരം ജയിച്ച് പരമ്പര 2-2ലെത്തിച്ചതിന്റെ ആത്മവിശ്വാസത്തിലാണ് ലോകകപ്പ് ഫൈനലിസ്റ്റുകള്‍. പൂര്‍വികര്‍ക്ക് കഴിയാത്തത് സാധിക്കാന്‍ തന്നെയാണ് തങ്ങള്‍ ഒരുങ്ങുന്നതെന്ന് ടിം സൗത്തീ വ്യക്തമാക്കിക്കഴിഞ്ഞു. ബംഗാള്‍ ഉള്‍ക്കടല്‍ തീരത്ത് ഇന്ത്യ – ന്യൂസിലാന്‍ഡ് അഞ്ചാമത്തേയും അവസാനത്തേയും ഏകദിനം ഇന്നു നടക്കുമ്പോള്‍ ചരിത്രം ആര്‍ക്കൊപ്പമെന്നത് കാത്തിരുന്നു കാണണം. ഇന്ത്യന്‍ സമയം ഉച്ചക്ക് 1.30ന് മത്സരം ആരംഭിക്കും.
പിച്ചിനെ വായിക്കാനുള്ള ശേഷിയാണ് ഇന്ത്യന്‍ പര്യടനം നടത്തിയ മറ്റു ടീമുകളില്‍ നിന്ന് കെയ്ന്‍ വില്യംസണിന്റെ കിവീ സംഘത്തെ വ്യത്യസ്തമാക്കുന്നത്. ലോക ടി20യില്‍ അവരത് തെളിയിച്ചു. എന്നാല്‍, അതെപ്പോഴും സാധ്യമല്ലെന്നും പരമാവധി പിച്ച് വായിച്ചെടുക്കാന്‍ പരമാവധി ശ്രമിക്കുക എന്നതു മാത്രമാണ് തങ്ങള്‍ക്കു ചെയ്യാനുള്ളതെന്നും സൗത്തീ പറഞ്ഞു.
ഇന്ത്യന്‍ ബാറ്റിങിനെ മെരുക്കി മികവു തെളിയിച്ച കിവീ ബൗളര്‍മാര്‍ക്ക് ബാറ്റ്‌സ്മാന്മാരില്‍ നിന്നുള്ള പിന്തുണയാണ് വേണ്ടത്. മധ്യനിരയില്‍ കോറി ആന്‍ഡേഴ്‌സണും ലൂക് റോഞ്ചിയും ആദ്യ മൂന്നു മത്സരങ്ങളിലും വിയര്‍ത്തു. റോസ് ടയ്‌ലര്‍ ഫോമിന്റെ മിന്നലാട്ടങ്ങള്‍ കാണിച്ചു തുടങ്ങിയിട്ടുണ്ട്.
മറുഭാഗത്ത്, റാഞ്ചിയില്‍ കൈവിട്ട പരമ്പര ഉറപ്പിക്കാനാകും ഇന്ത്യ ഇറങ്ങുന്നത്. ഇതോടെ, ജയന്ത് യാദവിനും മന്ദീപ് സിങിനും ദേശീയ ജേഴ്‌സിയില്‍ അരങ്ങേറാന്‍ പുതുവര്‍ഷം വരെ കാത്തിരിക്കേണ്ടി വരും. മധ്യനിരയിലെ യുവതാരങ്ങള്‍ക്ക് ക്യാപ്റ്റന്‍ ധോണി തങ്ങളിലര്‍പ്പിച്ച വിശ്വാസം വീണ്ടെടുക്കാനുള്ള അവസരമാണ്. വിരാട് കോഹ്്‌ലിയെ അമിതമായി ആശ്രയിക്കുന്ന എന്ന ചീത്തപ്പേരില്‍ നിന്ന് ധോണിക്ക് രക്ഷപ്പെടണമെങ്കില്‍ രോഹിത് ശര്‍മ ഉള്‍പ്പെടെയുള്ള മുന്‍നിര ബാറ്റ്‌സ്മാന്മാര്‍ ഫോമിലേക്കുയരണം.
ബൗളിങില്‍ ന്യൂസിലാന്‍ഡിനെ വിഷമിപ്പിച്ച അക്ഷര്‍ പട്ടേലാണ് ഇന്ത്യന്‍ നിരയിലെ നോട്ടപ്പുള്ളി. ബാറ്റ്‌സ്മാന്‍മാര്‍ വിയര്‍ത്തു പോയ റാഞ്ചിയില്‍ നിര്‍ണായക ഘട്ടത്തില്‍ 38 റണ്‍സടിച്ച് ബാറ്റിങിലും അക്ഷര്‍ കരുത്തുകാട്ടിയിരുന്നു.
നാലു കളികളില്‍ ഏഴു വിക്കറ്റ് നേടിയ ടിം സൗത്തീയെ ഇന്ത്യ കരുതിയിരിക്കേണ്ടി വരും. പരമ്പരയിലെ വിക്കറ്റ് വേട്ടക്കാരില്‍ രണ്ടാം സ്ഥാനത്തേക്കു കയറാന്‍ സൗത്തീക്കു കഴിഞ്ഞിട്ടുണ്ട്. റാഞ്ചിയില്‍ ധോണിയെ തിരിച്ചയച്ചതു പോലെ ടീം മോഹിക്കുമ്പോള്‍ വിക്കറ്റെടുക്കാനുള്ള മികവാണ് സൗത്തീയെ വ്യത്യസ്തനാക്കുന്നത്. പത്തു വിക്കറ്റെടുത്ത ഇന്ത്യയുടെ അമിത് മിശ്രയാണ് വിക്കറ്റ് വേട്ടയില്‍ ഒന്നാം സ്ഥാനത്ത്.

കോഹ്‌ലി 154 നോട്ട് ഔട്ട്; ഇന്ത്യക്ക് ഏഴു വിക്കറ്റ് ജയം

Web Desk — Sun, 23 Oct 2016 15:50:56 +0000

ചണ്ഡീഗഢ്: വിരാട് കോഹ്്‌ലി മിന്നിയപ്പോള്‍ വീണ്ടും ന്യൂസിലാന്‍ഡ് തോറ്റു. കോഹ്്‌ലി മങ്ങിപ്പോയ രണ്ടാം ഏകദിനത്തില്‍ വിജയവുമായി ഇന്ത്യന്‍ പര്യടനത്തില്‍ ആദ്യമായി തലയുയര്‍ത്തിയ കവികള്‍ക്ക് മൊഹാലിയില്‍ കിട്ടിയത് കനത്ത പ്രഹരം.

134 പന്തില്‍ 154 റണ്‍സുമായി കോഹ്്‌ലി വിജയം വരെ ക്രീസില്‍ തുടര്‍ന്നപ്പോള്‍ ഇന്ത്യക്ക് ഏഴു വിക്കറ്റിന്റെ അനായാസ വിജയം. കിവികള്‍ മൂന്നോട്ടുവെച്ച 286 റണ്‍സ് വിജയ ലക്ഷ്യം മൂന്നു വിക്കറ്റ് നഷ്ടത്തില്‍ ഇന്ത്യ മറികടക്കുമ്പോള്‍ പത്ത് പന്ത് ബാക്കി നില്‍ക്കുന്നുണ്ടായിരുന്നു. 80 റണ്‍സുമായി ക്യാപ്റ്റന്‍ എം.എസ് ധോണി ഏറെ നാള്‍ക്കു ശേഷം ഫോം കണ്ടെത്തിയെന്ന പ്രത്യേകതയും ഈ മത്സരത്തിനുണ്ട്. ജയത്തോടെ അഞ്ചു മത്സര പരമ്പരയില്‍ ഇന്ത്യ 2-1ന് മുന്നിലെത്തി.

#TeamIndia take 2-1 lead in the @Paytm ODI Trophy thanks to a masterclass from @imVkohli pic.twitter.com/68YTo4lEfc

— BCCI (@BCCI) October 23, 2016

സച്ചിന്‍ തെണ്ടുല്‍ക്കറുടെ അവിസ്മരണീയ കരിയറുമായി ഇടയ്ക്കിടെ മാറ്റുരക്കപ്പെടുന്ന കോഹ്്‌ലി ഇന്നലെ ഏകദിനത്തില്‍ തന്റെ 26-ാം സെഞ്ച്വറിയാണ് കുറിച്ചത്. 172 കളികളില്‍ നിന്നായിരുന്നു ഈ നേട്ടം. 463 ഏകദിനങ്ങളില്‍ 49 സെഞ്ച്വറി കുറിച്ച സച്ചിനിലേക്ക് കോഹ്്‌ലിക്ക് ഇനിയും ദൂരമുണ്ട്. പക്ഷേ, കോഹ്്‌ലിക്ക് ഇപ്പോള്‍ 27 ആണ് പ്രായം.
ഭേദപ്പെട്ട സ്‌കോര്‍ പിന്തുടര്‍ന്ന ഇന്ത്യക്ക് തുടക്കം പിഴച്ചിരുന്നു. ഓപണര്‍മാര്‍ പെട്ടെന്നു മടങ്ങി. അജിന്‍ക്യ രഹാനെ അഞ്ചു റണ്‍സെടുത്തു പുറത്തായപ്പോള്‍ രോഹിത് ശര്‍മയുടെ ഇന്നിങ്‌സ് പതിമൂന്ന് റണ്‍സില്‍ അവസാനിച്ചു.
അതോടെ നായകനും ഉപനായകനും ക്രീസിലൊന്നിച്ചു. രോഹിത്തിനൊപ്പം 28 റണ്‍സിന്റെ കൂട്ടുകെട്ടുണ്ടാക്കിയ കോഹ്്‌ലി 21 റണ്‍സെടുത്ത് താളം കണ്ടെത്തിത്തുടങ്ങിയിരുന്നു. ധോണി എത്തിയതോടെ ഇന്ത്യ മാത്രമായി കളത്തില്‍. ധോണി – കോഹ്്‌ലി കൂട്ടുകെട്ടില്‍ 151 റണ്‍സാണ് പിറന്നത്. ഇതില്‍ 80 റണ്‍സും ധോണി സംഭാവന ചെയ്തപ്പോള്‍ 66 റണ്‍സായിരുന്നു കോഹ്്‌ലിയുടെ നേട്ടം.

എന്നാല്‍ സ്‌കോറിങ് വേഗത കൂട്ടിയ കോഹ്്‌ലി മനീഷ് പാണ്ഡെക്കൊപ്പം ചേര്‍ത്ത 97 റണ്‍സിന്റെ അപരാജിത കൂട്ടുകെട്ടില്‍ 67 റണ്‍സും സ്വന്തമാക്കി. 34 പന്തില്‍ 28 റണ്‍സായിരുന്നു പാണ്ഡെയുടെ നേട്ടം.
കോഹ്്‌ലി ഒരു സിക്‌സറും പതിനാറ് ഫോറും കുറിച്ചപ്പോള്‍ മൂന്നു സിക്‌സറും ആറു ബൗണ്ടറികളും അടങ്ങുന്നതായിരുന്നു ധോണിയുടെ പ്രകടനം. മാറ്റ് ഹെന്റി കിവീസിനു വേണ്ടി രണ്ടു വിക്കറ്റ് വീഴ്ത്തി.
ടോസ് നഷ്ടമായി ആദ്യം ബാറ്റുചെയ്യേണ്ടി വന്ന ന്യൂസിലാന്‍ഡിനു വേണ്ടി ഉജ്ജ്വല ഫോം തുടരുന്ന ടോം ലാഥമും (61) ജെയിംസ് നീഷമും (47 പന്തില്‍ 57) അര്‍ദ്ധ ശതകങ്ങള്‍ നേടി. റോസ്ടയ്‌ലര്‍ 44 റണ്‍സെടുത്തു. ഓപണര്‍ മാര്‍ട്ടിന്‍ ഗപ്ടില്‍ (27), കഴിഞ്ഞ കളിയില്‍ സെഞ്ച്വറി നേടിയ ക്യാപ്റ്റന്‍ കെയ്ന്‍ വില്യംസണ്‍ (22), കോറി ആന്‍ഡേഴ്‌സണ്‍ (ആറ്), ലൂക് റോഞ്ചി (ഒന്ന്) എന്നിങ്ങനെയായിരുന്നു മറ്റുള്ളവരുടെ പ്രകടനം. ഉമേഷ് യാദവും കേദാര്‍ ജാദവും മൂന്നു വീതം വിക്കറ്റ് സ്വന്തമാക്കി.

26 and counting… @imVkohli #INDvNZ pic.twitter.com/aVTPYtTxop

— BCCI (@BCCI) October 23, 2016

നൂറു കടന്നു ധോനി-കോഹ്‌ലി

Web Desk — Sun, 23 Oct 2016 14:45:14 +0000

മൊഹാലി: രണ്ടാം ജയത്തിന്റെ ആവേശവുമായി ഇറങ്ങിയ ന്യൂസിലാന്‍ഡിന്റെ മികച്ച സ്‌കോറിലേക്ക് ഇന്ത്യ അനായാസം കയറുന്നു. മൊഹാലി ഏകദിനത്തില്‍ ന്യൂസിലാന്റ് ഉയര്‍ത്തിയ 286 എന്ന വിജയലക്ഷ്യത്തിലേക്ക് ക്യാപ്റ്റന്‍, വൈസ് ക്യാപ്റ്റന്‍ കൂട്ടുകട്ടില്‍ ഇന്ത്യ അനായാസം കടക്കുന്നു.

രണ്ടാം വിക്കറ്റിലെ ധോനി- കോഹ്‌ലി കൂട്ടുകെട്ട് നൂറു കടന്നിട്ടുണ്ട്. 90 ബോളില്‍ 96 റണ്‍സമായി കോഹ്‌ലിയും 13 ബോളില്‍ 7 റണ്‍സമായി മനീഷ് പാണ്ഡെയുമാണ് നിലവില്‍ ക്രീസില്‍. വമ്പന്‍ കൂട്ടുകെട്ടിലേക്ക് നീങ്ങുന്ന ക്യാപറ്റന്‍ വൈസ്‌ ക്യപ്റ്റന്‍ സഖ്യം ആരാധകരുടെ മനം കവരുന്ന പ്രകടനമാണ് പുറത്തെടുത്തത്.

ഒന്‍പതു ഫോറുകളാണ് കോഹ്‌ലിയുടെ സംഭാവനയെങ്കില്‍ മൂന്നു സിക്‌സും ആറ് ഫോറുമാണ് ധോനിയുടെ ബാറ്റില്‍ നിന്നും പറന്നത്.

പതിമൂന്നു റണ്‍സെടുത്ത റോഹിത് ശര്‍മയുടേയും അഞ്ചു റണ്‍ നേടിയ രഹാനയേയും 80 റണ്‍സെടുത്ത ക്യാപ്റ്റന്‍ ധോനിയേയുമാണ് നിലവില്‍ ഇന്ത്യക്ക് നഷ്ടമായത്.

പതിവില്‍ നിന്ന് വിപരീതമായിമ ന്യൂസിലാന്‍ഡിന് മികച്ച തുടക്കമാണ് ലഭിച്ചത്. ആദ്യ വിക്കറ്റ് നഷ്ടമായത് ടീം സ്‌കോര്‍ 46 റണ്‍സില്‍ നില്‍ക്കെയാണ്. രണ്ടാം വിക്കറ്റില്‍ വില്യംസണും ലാതമും ചേര്‍ന്ന് കരകയറ്റുന്നതിനിടെ വില്യംസണെ യാദവ് മടക്കി. മൂന്നാം വിക്കറ്റില്‍ റോസ് ടെയ്ലറും ലാതമും ടീമിനെ കരകയറ്റി.
ഒമ്പതാം വിക്കറ്റില്‍ മാറ്റ് ഹെന്റിയും ജയിംസ് നിഷമും ചേര്‍ന്നാണ് ന്യൂസിലാന്‍ഡിനെ മികച്ച റണ്‍സിലേക്ക് എത്തിച്ചത്.
84 റണ്‍സിന്റെ കൂട്ടുകെട്ടാണ് ഇവര്‍ വാലറ്റത്തു കൂട്ടിച്ചേര്‍ത്തത്. ജയിംസ് നിഷം 57 റണ്‍സ് നേടി. ഹെന്റി 39 റണ്‍സ് നേടി പുറത്താകാതെ നിന്നു. ഇന്ത്യക്ക് വേണ്ടി കേദാര്‍ യാദവും ഉമേഷ് യാദവും മൂന്ന് വിക്കറ്റ് വീതം വീഴ്ത്തി. ഭുംറ, മിശ്ര എന്നിവര്‍ രണ്ടു വിക്കറ്റ് വീതം പങ്കിട്ടു.

Half century for #TeamIndia Captain @msdhoni @Paytm ODI Trophy #INDvNZ pic.twitter.com/G76ENyItEj

— BCCI (@BCCI) October 23, 2016

FIFTY! @imVkohli brings up his half century in Mohali @Paytm ODI Trophy #INDvNZ pic.twitter.com/U3d0hsZQy0

— BCCI (@BCCI) October 23, 2016

ഹര്‍ദിക് മാജിക്കിനും രക്ഷിക്കാനായില്ല; രണ്ടാം ഏകദിനത്തില്‍ ഇന്ത്യക്ക് തോല്‍വി

Web Desk — Thu, 20 Oct 2016 16:15:55 +0000

ന്യൂസിലാന്റിനെതിരായ ഏകദിന പരമ്പരയിലെ രണ്ടാം മത്സരത്തില്‍ ഇന്ത്യക്ക് ആറ് റണ്‍സ് തോല്‍വി. ഒമ്പതാം വിക്കറ്റില്‍ ഹര്‍ദിക് പട്ടേലും- ഉമേഷ് യാദവും നടത്തിയ പോരാട്ടത്തില്‍ ജയത്തിനടുത്ത് വരെ എത്തിയ ശേഷമാണ് ഇന്ത്യ കീഴടങ്ങിയത്. സ്‌കോര്‍: ന്യൂസിലാന്റ്: 242/9, ഇന്ത്യ: 236 ഓള്‍ഔട്ട് (49.3over)

എട്ടാം വിക്കറ്റും നഷ്ടമാവുമ്പോള്‍ ഇന്ത്യ ജയത്തില്‍ നിന്ന് 59 റണ്‍സ് അകലെയായിരുന്നു. എന്നാല്‍ അപ്രതീക്ഷിതമായി ഒമ്പതാം വിക്കറ്റില്‍ ഹര്‍ദിക് പാണ്ഡ്യയും ഉമേഷ് യാദവും തകര്‍ത്തടിച്ചതോടെ ഇന്ത്യ ജയത്തിനരികിലെത്തി. പക്ഷെ അനുഭവ സമ്പന്നനായ ട്രെന്റ് ബോള്‍ട്ടിന്റെ രണ്ടാം വരവില്‍ ഹര്‍ദിക് (36)പുറത്തായതോടെ ഇന്ത്യ തോല്‍വി വഴങ്ങുകയായിരുന്നു. അവസാന ഓവറില്‍ ജയിക്കാന്‍ 11 റണ്‍സ് വേണമെന്നിരിക്കെ ഇന്ത്യക്ക് 4 റണ്‍സ് ചേര്‍ക്കാനേ കഴിഞ്ഞൂള്ളൂ. ഉമേഷ് യാദവ് (18) പുറത്താവാതെ നിന്നു.

നേരത്തെ 73/4 എന്ന നിലയില്‍ തകര്‍ന്ന ഇന്ത്യയെ കേദാര്‍ യാദവ്(41), ക്യാപ്റ്റന്‍ ധോണി(39) എന്നിവര്‍ ചേര്‍ന്നാണ് കരകയറ്റിയത്.

ടോസ് നഷ്ടമായി ബാറ്റിങിനിറങ്ങിയ കിവീസ് ക്യാപ്റ്റന്‍ കെയ്ന്‍ വില്യംസന്റെ സെഞ്ച്വറി മികവിലാണ് 242 റണ്‍സിലെത്തിയത്. ടോം ലഥാം 46 റണ്‍സെടുത്ത ക്യാപ്റ്റന് ഉജ്വല പിന്തുണ നല്‍കി.