India vs Srilanka – Chandrika Daily

കൊളംബോയില്‍ നിന്ന് കൊച്ചി സ്വദേശികള്‍ തിരിച്ചെത്തി; ശ്രീലങ്കന്‍ ജനത ഇപ്പോഴും ഭയചകിതര്‍

chandrika — Mon, 22 Apr 2019 18:26:17 +0000

നെടുമ്പാശ്ശേരി: ശ്രീലങ്കയുടെ തലസ്ഥാനമായ കൊളംബയിലെ സ്‌ഫോടന പരമ്പരകളുടെ നടുവില്‍ നിന്നും ജീവന്‍ തിരിച്ച് കിട്ടിയ ആശ്വാസത്തോടെ കൊച്ചി സ്വദേശികളായ പ്രദീപ് രാജുവും സഹോദരന്‍ സജീവ് രാജുവും കുടുംബാംഗങ്ങളും തിരിച്ചെത്തി. ചോരക്കളത്തില്‍ നിന്നാണ് രക്ഷപ്പെട്ടതെന്ന് ഇവര്‍ നെടുമ്പാശ്ശേരി വിമാനത്താവളത്തില്‍ മാധ്യമങ്ങളോട് പറഞ്ഞു. ഈസ്റ്റര്‍ ദിനത്തില്‍ കൊളംബോയിലെ തെരുവുകളില്‍ നിന്ന് ജനങ്ങള്‍ പരിഭ്രാന്തരായി പലായനം ചെയ്യുകയായിരുന്നു. ആംബുലന്‍സുകള്‍ പരിക്കേറ്റവരേയുംകൊണ്ട് തലങ്ങും വിലങ്ങും ഓടുന്നത് കാണാമായിരുന്നുവെന്ന് പ്രദീപ് രാജ് പറഞ്ഞു. ബോംബ് സ്‌ഫോടനങ്ങള്‍ക്ക് ശേഷവും സുരക്ഷിതമല്ലാത്ത അവസ്ഥയാണുള്ളത് . ജനങ്ങള്‍ ഭയവിഹ്വലരായാണ് കഴിയുന്നതെന്ന് അവര്‍ പറഞ്ഞു. വിനോദ സഞ്ചാരികളായാണ് തങ്ങള്‍ പോയതെന്ന് ഇവര്‍ പറഞ്ഞു. താമസിച്ചിരുന്ന ഹോട്ടലിന്റെ 500 മീറ്റര്‍ അകലെയാണ് മൂന്ന് ബോംബുകള്‍ പൊട്ടിയത.് ഈസ്റ്റര്‍ ദിനത്തില്‍ രാവിലെ എട്ടിനാണ് ഈ മൂന്ന് സ്ഥലത്തും ബോംബുകള്‍ പൊട്ടിയത്. ആദ്യ സ്‌ഫോടനത്തില്‍ ഭീകരാക്രമണമാണെന്ന് ആരും തിരിച്ചറിഞ്ഞില്ല.പുറത്ത് വന്ന് നോക്കിയപ്പോഴാണ് പരിക്കേറ്റവരുമായി ആബുലന്‍സുകള്‍ ചീറിപ്പായുന്നത് കണ്ടത്. തിരിച്ചു പോകാനുള്ള ടിക്കറ്റ് തിങ്കളാഴ്ച ആയിരുന്നുവെങ്കിലും പ്രതികൂല സാഹചര്യം മുന്നില്‍ കണ്ട് ഞായറാഴ്ച രാത്രി തന്നെ കൊളംബോ വിമാനത്താവളത്തില്‍ തങ്ങുകയായിരുന്നു. ഭീകരാക്രമണത്തിന്റെ തീവ്രത ബോധ്യപ്പെട്ടതോടെ സര്‍ക്കാര്‍ കര്‍ഫ്യു പ്രഖ്യാപിച്ചതിനാല്‍ ജനജീവിതം ദുരിതപൂര്‍ണമാണ്. അവധി ആഘോഷിക്കാനെത്തിയ നൂറ് കണക്കിന് ഇന്ത്യന്‍ വിനോദ സഞ്ചാരികള്‍ കൊളംബോയിലെ ഹോട്ടലുകളില്‍ കുടിങ്ങിയിട്ടുണ്ടന്നും ഇവര്‍ പറഞ്ഞു. സെന്റ് ആന്റണീസ്, സെന്റ് സെബാസ്റ്റ്യന്‍സ് എന്നീ പള്ളികളിലും കിംഗ്‌സ് ബെറി, ഡിനാമന്‍ ഗ്രാന്‍ഡ്,ഷാന്‍ ഗ്രലിയ എന്നീ ഹോട്ടലുകളിലുമായി കൊളംബോയില്‍ എട്ട് സ്‌ഫോടനകളാണ് നടന്നത്.

കാര്‍ത്തിക്കും പാണെ്ഡയും മിന്നി; ലങ്കയെ കശക്കി ഇന്ത്യ

chandrika — Tue, 13 Mar 2018 03:29:14 +0000

കൊളംബോ: നിധാസ് ട്രോഫി ത്രിരാഷ്ട്ര ക്രിക്കറ്റില്‍ ഇന്ത്യക്ക് തകര്‍പ്പന്‍ ജയം. മഴ കാരണം 95 മിനുട്ട് വൈകി ആരംഭിച്ച പോരാട്ടത്തില്‍ ആറ് വിക്കറ്റിന് ഇന്ത്യ ലങ്കയെ തോല്‍പ്പിച്ചു. ജയിക്കാന്‍ 153 റണ്‍സ് ആവശ്യമായ ഇന്ത്യയെ തകര്‍പ്പന്‍ ബാറ്റിംഗിലൂടെ ദിനേശ് കാര്‍ത്തിക്കും മനീഷ് പാണെ്ഡയും അഞ്ചാം വിക്കറ്റില്‍ വിജയത്തിലേക്ക് നയിക്കുകയായിരുന്നു. ഒരു ഘട്ടത്തില്‍ മുന്‍നിര തകര്‍ന്നെങ്കിലും മനീഷ് ഉജ്വല ഫോമിലായിരുന്നു. വിജയം വഴി ഇന്ത്യ ഫൈനല്‍ ബെര്‍ത്തും ഏറെകുറെ ഉറപ്പാക്കി. ആദ്യ മല്‍സരത്തില്‍ ലങ്കയോട് തോറ്റ ടീം ഇന്നലെ അവസരങ്ങള്‍ നല്‍കിയില്ല. 31 പന്തില്‍ നിന്നും മനീഷ് പുറത്താവാതെ 42 റണ്‍സ് നേടി.
മല്‍സരം 19 ഓവറാക്കി ചുരുക്കിയിരുന്നു.

That’s game set and match for #TeamIndia as they wrap up their 3rd T20I with a 6-wicket win. Brilliant team effort on display. pic.twitter.com/BC5WErTtGE

— BCCI (@BCCI) March 12, 2018

ടോസ് നേടിയ ഇന്ത്യന്‍ നായകന്‍ രോഹിത് ശര്‍മ ചെറിയ മൈതാനത്ത് രണ്ടാമത് ബാറ്റിംഗാണ് ഗുണകരമെന്ന ചിന്തയില്‍ ലങ്കയെ ബാറ്റിംഗിന് ക്ഷണിച്ചു. ഇന്ത്യന്‍ ടീമില്‍ ഒരു മാറ്റമുണ്ടായിരുന്നു. റിഷാഭ് പന്തിന് പകരം കെ.എല്‍ രാഹുലിന് അവസരം നല്‍കി. രണ്ട് മല്‍സരങ്ങളില്‍ കുറഞ്ഞ ഓവര്‍ റേറ്റിന്റെ പേരില്‍ വിലക്ക് കല്‍പ്പിക്കപ്പെട്ട സ്ഥിരം നായകന്‍ ദിനേശ് ചാണ്ഡിമാലിന് പകരം ലങ്ക സുരങ്ക ലക്മാലിനെ ഉള്‍പ്പെടുത്തി. മിന്നല്‍ തുടക്കമായിരുന്നു കുശാല്‍ മെന്‍ഡിസ് ടീമിന് നല്‍കിയത്. ഇന്ത്യന്‍ ബൗളര്‍മാരെ തലങ്ങും വിലങ്ങും പായിച്ച അദ്ദേഹം തകര്‍പ്പന്‍ ഷോട്ടുകളുമായി കളം നിറഞ്ഞു. ഉത്കണ്ഠ് എറിഞ്ഞ ആദ്യ ഓവറിലെ രണ്ടാം പന്ത് തന്നെ ഗ്യാലറിയിലെത്തിച്ച് ഗുണതിലകെ നല്‍കിയ തുടക്കത്തെ പ്രയോജനപ്പെടുത്തിയാണ് മെന്‍ഡിസ് ആക്രമണം നടത്തിയത്. ഗുണതിലകയെ (17) തകര്‍പ്പന്‍ ക്യാച്ചില്‍ സുരേഷ് റൈന മടക്കിയപ്പോള്‍ ചാമ്പ്യന്‍ഷിപ്പിലെ ആദ്യ മല്‍സരത്തില്‍ ഇന്ത്യയെ വിറപ്പിച്ച വിക്കറ്റ് കീപ്പര്‍ കുശാല്‍ പെരേരയെ വാഷിംഗ്ടണ്‍ സുന്ദര്‍ അതിവേഗം മടക്കിയത് ഇന്ത്യന്‍ ക്യാമ്പിന് ആശ്വാസമായി. പക്ഷേ പകരമെത്തിയ തരംഗ 22 റണ്‍സുമായി മെന്‍ഡിസിന് പിന്തുണ നല്‍കി. പക്ഷേ ആദ്യ പത്ത് ഓവറിന് ശേഷം ഇന്ത്യന്‍ ബൗളര്‍മാര്‍ നിലയുറപ്പിച്ചതോടെ വിക്കറ്റുകള്‍ നിലം പൊത്തി. വാലറ്റത്തില്‍ ആര്‍ക്കും അവസാനത്തില്‍ കൂറ്റന്‍ ഷോട്ടുകള്‍ക്കായില്ല. പതിനൊന്നാമത് ഓവറില്‍ മൂന്ന് വിക്കറ്റിന് 96 റണ്‍സ് എന്ന വലിയ സ്‌ക്കോര്‍ നേടിയ ടീം അവസാനം 19 ഓവര്‍ പൂര്‍ത്തിയാവുമ്പോള്‍ 152 ല്‍ നിയന്ത്രിക്കപ്പെട്ടു.ശ്രദ്ധാല്‍ ഠാക്കൂര്‍ നാല് വിക്കറ്റ് നേടിയപ്പോള്‍ വാഷിംഗ്ടണ്‍ സുന്ദര്‍ രണ്ട്് പേരെ പുറത്താക്കി.
മറുപടി ബാറ്റിംഗില്‍ ഇന്ത്യക്ക് തുടക്കത്തില്‍ തന്നെ നായകന്‍ രോഹിത് ശര്‍മയെ നഷ്ടമായി. സ്പിന്നര്‍ ധനഞ്ജയെ കണ്ടപ്പോള്‍ കൂറ്റന്‍ ഷോട്ടിന് ശ്രമിച്ചാണ് രോഹിത് പതിനൊന്ന് റണ്‍സുമായി മടങ്ങിയത്. പരമ്പരയില്‍ ഉജ്വല ഫോമില്‍ കളിച്ച ശിഖര്‍ ധവാനെയും (8) ധനഞ്ജയ പുറത്താക്കി. സുരേഷ് റൈന കൂറ്റനടികള്‍ പായിക്കവെ 27 ല്‍ മടങ്ങി. പക്ഷേ മനീഷും കാര്‍ത്തിക്കും പിന്നെ അവസരം നല്‍കിയില്ല

അന്താരാഷ്ട്ര ട്വന്റി 20-യില്‍ ഇന്ത്യയുടെ മികച്ച സ്‌കോര്‍; ലങ്കക്ക് 261 റണ്‍സ് വിജയലക്ഷ്യം

chandrika — Fri, 22 Dec 2017 15:50:39 +0000

ഇന്‍ഡോര്‍: അന്താരാഷ്ട്ര ട്വന്റി 20-യില്‍ ഇന്ത്യയുടെ ഏറ്റവും ഉയര്‍ന്ന സ്‌കോറുമായി ലെ വേഗതയേറിയ സെഞ്ച്വറി ഇന്ത്യന്‍ താല്‍ക്കാലിക ക്യാപ്ടന്‍ രോഹിത് ശര്‍മയുടെ കീഴില്‍ ഇന്ത്യന്‍ ടീം. 20 ഓവറില്‍ 260 റണ്‍സാണ് ഇന്ത്യ അടിച്ചുകൂട്ടിയത്. ഇതോടെ വെസ്റ്റിന്‍ഡീസിനെതിരെ നേടിയ 244 റണ്‍സിന്റെ റെക്കോര്‍ഡാണ് ഇന്ത്യ തിരുത്തിയെഴുതിയത്. ട്വന്റി 20യിലെ രണ്ടാമത്തെ വലിയ വിജയലക്ഷ്യമാണിത്.
ട്വന്റി 20ല്‍ വേഗമേറിയ സെഞ്ച്വറി നേടിയ ക്യാപ്റ്റന്‍ രോഹിതിന്റെ 118 (42) കരുത്തിലാണ് ലങ്കക്കുമുന്നില്‍ ഇന്ത്യ റണ്‍മല തീര്‍ത്തത്. ശ്രീലങ്കക്കെതിരായ രണ്ടാം ട്വന്റി 20-യില്‍ 35 പന്തില്‍ 101 റണ്‍സടിച്ചാണ് രോഹിത് വേഗമേറിയ സെഞ്ച്വറിയില്‍ ദക്ഷിണാഫ്രിക്കന്‍ താരം ഡേവിഡ് മില്ലറിനൊപ്പമെത്തിയത്. ഈ വര്‍ഷം ഒക്ടോബറില്‍ ബംഗ്ലാദേശിനെതിരെയാണ് ഡേവിഡ് മില്ലര്‍ വേഗമേറിയ സെഞ്ച്വറി നേടിയത്. 42 പന്തില്‍പന്ത്രണ്ട് ഫോറും 10 സിക്സറുമടക്കം118 റണ്‍സുമായി രോഹിത് പുറത്തായി. ലോകേഷ് രാഹുലിനൊപ്പം ഹിറ്റ്മാന്‍ രോഹിത്തും ചേര്‍ന്ന് ട്വന്റി20യിലെ ഇന്ത്യയുടെ ഏറ്റവും ഉയര്‍ന്ന ഓപ്പണിങ് കൂട്ടുകെട്ടാണ് നേടിയടുത്തത്. ചമീരയുടെ പന്തില്‍ ധനഞ്ജയയ്ക്ക് ക്യാച്ച് നല്‍കിയാണ് രോഹിത് മടങ്ങി.
തുടര്‍ന്ന് മൂന്നാമനായി മുന്‍ ക്യാ്പ്റ്റന്‍ എംഎസ്.ധോണി ക്രീസിലെത്തിയത് ആരാധകരെ ആവേശത്തിലാക്കി.

എന്നാല്‍ 49 പന്തില്‍ 89 റണ്‍സെടുത്ത രാഹുല്‍ വൈകാതെ മടങ്ങി. സ്‌കോര്‍ ബോര്‍ഡ് മുന്നൂറ് കടക്കുമെന്ന് തോന്നിച്ചെങ്കിലും രോഹിത്തിനും രാഹുലിനും ശേഷം തുടരെ വിക്കറ്റുകള്‍ വീഴുകയായിരുന്നു. 10 റണ്‍സുമായി പാണ്ഡ്യയും എല്‍ബിയില്‍ കുരുങ്ങി ശ്രേയസ് അയ്യരും പുറത്തായി. അവസാന ഓവറില്‍ ധോനിയുടെ വിക്കറ്റും നഷ്ടമായതോടെ
ടി20ലെ മികച്ച സ്‌കോറായ ആസ്‌ത്രേലിയയുടെ 263 ഇന്ത്യക്ക് മുന്നില്‍ ബാക്കിയായി.

ധവാനിസം; ശ്രീലങ്കയ്‌ക്കെതിരായ ഏകദിന പരമ്പര ഇന്ത്യക്ക്

chandrika — Sun, 17 Dec 2017 18:27:03 +0000

വിശാഖപട്ടണം: ശ്രീലങ്കയ്‌ക്കെതിരായ ഏകദിന പരമ്പര ഇന്ത്യ 2-1ന് സ്വന്തമാക്കി. വിശാഖ പട്ടണത്ത് നടന്ന മൂന്നാം ഏകദിനത്തില്‍ ഇന്ത്യ എട്ട് വിക്കറ്റിന് ലങ്കയെ തറപറ്റിച്ചു. ആദ്യം ബാറ്റു ചെയ്ത ലങ്കയെ കുല്‍ദീപ് യാദവും ചാഹലും ചേര്‍ന്ന് 215 റണ്‍സിന് കറക്കി വീഴ്ത്തിയപ്പോള്‍ മറുപടി ബാറ്റിങിനിറങ്ങിയ ഇന്ത്യ രണ്ട് വിക്കറ്റ് നഷ്ടത്തില്‍ 32.1 ഓവറില്‍ ലക്ഷ്യം കണ്ടു. 85 പന്തില്‍ നിന്ന് 100 റണ്‍സെടുത്തു പുറത്താവാതെ നിന്ന ശിഖര്‍ ധവാനാണ് ഇന്ത്യയുടെ വിജയ ശില്‍പ്പി. 13 ബൗണ്ടറിയും രണ്ട് സിക്‌സറുമടങ്ങുന്നതായിരുന്നു ധവാന്റെ തട്ടുപൊളപ്പന്‍ ഇന്നിങ്‌സ്. ശ്രേയസ് അയ്യര്‍ 65 റണ്‍സെടുത്തപ്പോള്‍ ദിനേശ് കാര്‍ത്തിക് 26 റണ്‍സുമായി പുറത്താവാതെ നിന്നു. ക്യാപ്റ്റന്‍ രോഹിത് ശര്‍മ (07) മാത്രമാണ് പരാജയപ്പെട്ടത്. 2016 ജൂണിന് ശേഷം ഇന്ത്യ നേടുന്ന തുടര്‍ച്ചയായ എട്ടാം പരമ്പര ജയമാണിത്.

That’s it and that’s a wrap. #TeamIndia do it in style and win the series 2-1 #INDvSL pic.twitter.com/ftYwFqSNYQ

— BCCI (@BCCI) December 17, 2017

നേരത്തെ ടോസ് നേടി ശ്രീലങ്കയെ ബാറ്റിങ്ങിനയച്ച ഇന്ത്യ 215 റണ്‍സിന് ശ്രീലങ്കയെ ചുരുട്ടിക്കൂട്ടി. ലങ്കന്‍ ബാറ്റിങ് നിരയെ സ്പിന്നര്‍മാര്‍ പിടിച്ചു കെട്ടിയപ്പോള്‍ 95 റണ്‍സെടുത്ത ഉപുല്‍ തരംഗ മാത്രമാണ് പിടിച്ചു നിന്നത്. ഒരു ഘട്ടത്തില്‍ 27.1 ഓവറില്‍ മൂന്നിന് 160 എന്ന ശക്തമായ നിലയില്‍ നിന്നാണ് ലങ്ക അവിശ്വസനീയമായ രീതിയില്‍ തകര്‍ന്നടിഞ്ഞത്. നാലാം ഓവറില്‍ 13 റണ്‍സെടുത്ത ഓപണര്‍ ധനുഷ്‌ക ഗുണതിലകയെ പുറത്താക്കി ബുംറയാണ് ഇന്ത്യക്ക് ആദ്യ ബ്രേക്ക് നല്‍കിയത്. എന്നാല്‍ രണ്ടാം വിക്കറ്റില്‍ തരംഗയും സമരവിക്രമയും (42) ചേര്‍ന്ന് ലങ്കക്ക് 131 റണ്‍സ് കൂട്ടിച്ചേര്‍ത്തു. .പിന്നീടായിരുന്നു സ്പിന്നര്‍മാരുടെ സംഹാര താണ്ഡവം. ഹര്‍ദിക് പാണ്ഡ്യ രണ്ടും ബുംറ, ഭുവനേശ്വര്‍ കുമാര്‍ എന്നിവര്‍ ഓരോ വിക്കറ്റും വീഴ്ത്തി.

ധനഞ്ജയക്ക് സെഞ്ച്വറി; സമനില പിടിക്കാന്‍ ലങ്കന്‍ ചെറുത്തുനില്‍പ്പ്

chandrika — Wed, 06 Dec 2017 08:03:42 +0000

ന്യൂഡല്‍ഹി: ഇന്ത്യയുമായുള്ള മൂന്നാം ടെസ്റ്റില്‍ സമനില പിടിക്കാന്‍ ശ്രീലങ്ക കിണഞ്ഞു പരിശ്രമിക്കുന്നു. അഞ്ചാം ദിനത്തിന്റെ രണ്ടാം സെക്ഷന്‍ ആരംഭിച്ചിരിക്കെ ഇന്ത്യ ഉയര്‍ത്തിയ 410 റണ്‍സിന്റെ രണ്ടാം ഇ്ന്നിങ്‌സ് ലീഡ് പിടിക്കാന്‍ കഴിയില്ലെങ്കിലും ലങ്കന്‍ ബാറ്റ്‌സമാന്‍മാര്‍ വിക്കറ്റുകള്‍ സംരക്ഷിച്ച് പൊരുതുകയാണ്.

ഫിറോസ് ഷാ കോട്‌ലയില്‍ മൂന്നാം ടെസ്റ്റിന്റെ അവസാന ദിവസം ദിനേശ് ചാണ്ഡിമലിന്റെ സംഘത്തിന് ധനഞ്ജയ ഡിസില്‍വയുടെ സെഞ്ച്വറിയാണ് കരുത്ത് പകര്‍ന്നിരിക്കുന്നത്. ബാറ്റിങിങ്ങില്‍ ലങ്കന്‍ സ്‌കോര്‍ അഞ്ചു വിക്കറ്റ് നഷ്ടത്തില്‍ 200 കടന്നു. സെഞ്ച്വറി തികച്ച ധനഞ്ജയ ഡിസില്‍വ(110 പന്തില്‍ 199), തുടക്കക്കാരനായ റോഷന്‍ സില്‍വ(23 പന്തില്‍ 5) എന്നിവരാണിപ്പോള്‍ ക്രീസില്‍….

അവസാന ദിനം ലഞ്ചിന് ശേഷം ശ്രീലങ്കന്‍ ക്യാപ്റ്റന്‍ ദിനേഷ് ചണ്ഡിമലിന്റെ വിക്കറ്റടക്കം രണ്ടു വിക്കറ്റുകളാണ് ലങ്കക്ക് നഷ്ടമായത്. ആര്‍. അശ്വിന്‍ വിക്കറ്റിന് മുന്നില്‍ കുടുങ്ങുമ്പോള്‍ 90 പന്തില്‍ 36 റണ്‍സായിരുന്നു ചണ്ഡിമലിന്റെ സമ്പാദ്യം. ആദ്യ ഇന്നിങ്‌സില്‍ ലങ്കക്കായി സെഞ്ചുറി പ്രകടനം (111 റണ്‍സ്) നടത്തിയ താരമാണ് എയ്ഞ്ചലോ മാത്യൂസിന്റെ വിക്കറ്റും ഇന്ത്യ നേടി. ഒരു റണ്‍സ് മാത്രമെടുത്ത എയ്ഞ്ചലോ മാത്യൂസിനെ രവീന്ദ്ര ജഡേജയുടെ പന്തില്‍ അജിന്‍ക്യ രഹാനെ പിടിച്ചെടുക്കുകയായിരുന്നു. മൂന്നു വിക്കറ്റ് നഷ്ടത്തില്‍ 31 റണ്‍സെന്ന നിലയില്‍ അവസാന ദിവസം ബാറ്റിങ് പുനരാരംഭിച്ച ലങ്കയുടെ വിക്കറ്റുകള്‍ വീളുന്നുണ്ടെങ്കിലും സമയില നേടാമെന്ന പ്രതീക്ഷയിലാണ് അവര്‍. രണ്ടാം ഇന്നിങ്‌സില്‍ ഇതുവരെ ഇന്ത്യയ്ക്കായി രവീന്ദ്ര ജഡേജ മൂന്നും മുഹമ്മദ് ഷമി, ആര്‍ അശ്വിന്‍ ഒരു വിക്കറ്റും നേടി.

At Lunch on Day 5 of the final Test, Sri Lanka are (373 & 119/4). India need 6 wickets to win the match.

Updates – https://t.co/OKFOpkAcEJ #INDvSL pic.twitter.com/lSybMeF64b

— BCCI (@BCCI) December 6, 2017

അതേസമയം ഇന്ത്യന്‍ ബൗളിങ് പ്രതീക്ഷയ്‌ക്കൊത്ത് ഉയര്‍ന്നാല്‍ ഡല്‍ഹി ഇന്ത്യ ടീമിന് ബുധനാഴ്ച നല്‍കുന്നത് പുതുചരിത്രമായിരിക്കും. തുടര്‍ച്ചയായി ഒന്‍പതു ടെസ്റ്റ് പരമ്പര വിജയങ്ങളുമായി ഓസ്‌ട്രേലിയ സ്ഥാപിച്ച റെക്കോര്‍ഡ് ലക്ഷ്യമിടുന്ന ഇന്ത്യ, ആ സ്വപ്നസാഫല്യത്തിനു കയ്യെത്തും ദൂരെയാണ്.

അതിനിടെ ഡല്‍ഹിയിലെ പ്രതികൂലമായ കാലാവസ്ഥയില്‍ ബാറ്റിംഗും ബൗളിംഗും ഫീല്‍ഡിംഗുമെല്ലാം ലങ്കക്ക് ദുഷ്‌ക്കരമായിരിക്കയാണ്. ഇന്നലെയും ഇന്നുമായി മൂന്ന് താരങ്ങളെയാണ് ആരോഗ്യതളര്‍ച്ചയില്‍ ചികില്‍സക്ക് വിധേയരാക്കിയത്. ഇന്ന് സെഞ്ച്വറി നേടിയ ധനഞ്ജയെയും പരിക്കിനെ തുടര്‍ന്ന് ഗ്രൗണ്ട് വി്ട്ടുകേറി.

പ്രതീക്ഷിക്കപ്പെട്ടത് പോലെ ലങ്കയുടെ ആദ്യ ഇന്നിംഗ്‌സ് ഇന്നലെ അതിവേഗം അവസാനിപ്പിച്ച വിരാത് കോലിയും സംഘവും വേഗത ഒട്ടും കുറക്കാതെ രണ്ടാം ഇന്നിംഗ്‌സ് തുടങ്ങി അഞ്ച് വിക്കറ്റിന് 246 റണ്‍സ് എന്ന നിലയില്‍ ഇന്നിംഗ്‌സ് ഡിക്ലയര്‍ ചെയ്തപ്പോള്‍ ലങ്കക്കും വിജയത്തിനുമിടയില്‍ 410 റണ്‍സിന്റെ വലിയ കോട്ടയാണ് തീര്‍ക്കപ്പെട്ടത്. നാലാം ദിവസം കളി നിര്‍ത്തുമ്പോഴാട്ടെ ഈ യാത്രയില്‍ മൂന്ന് പേരെ സന്ദര്‍ശകര്‍ക്ക് നഷ്ടമായിക്കഴിഞ്ഞു. സ്‌ക്കോറാവട്ടെ 31 റണ്‍സും. ഒരു ദിവസം ശേഷിക്കെ ലങ്കക്ക് ജയിക്കാന്‍ വേണ്ടത് ഇനി 379 റണ്‍സാണ്. കോട്‌ലയിലെ സാഹചര്യത്തില്‍ തീര്‍ത്തും ദുഷ്‌ക്കരമാണ് ഈ ലക്ഷ്യം. മുഹമ്മദ് ഷമിയുടെ സ്വിംഗിലും രവീന്ദു ജഡേജയുടെ ലെഫ്റ്റ് ആം സ്പിന്നിലുമാണ് ഇന്നലെ അവസാന സെഷനില്‍ ലങ്കക്ക് മൂന്ന് പേരെ നഷ്ടമായത്. ഇതില്‍ ജഡേജ വീഴ്ത്തിയ രണ്ട് വിക്കറ്റുകളും അവസാനത്തെ ഓവറിലായിരുന്നു. വെളിച്ചക്കുറവ് കാരണം മല്‍സരം നേരത്തെ അവസാനിക്കുമെന്നിരിക്കെയാണ് കോലി ജഡേജക്ക് പന്ത് നല്‍കിയത്. രണ്ടാം പന്തില്‍ തന്നെ ജഡേജ ഡിമിത് കരുണരത്‌നയുടെ പ്രതിരോധം തകര്‍ത്തു. ടോപ് സ്പിന്‍ ബോള്‍ പ്രതിരോധിക്കാന്‍ മുന്നോട്ട് വന്ന ബാറ്റ്‌സ്മാന്റെ ബാറ്റിലുരസി പന്ത് കീപ്പറുടെ കരങ്ങളിലെത്തി. മൂന്ന് പന്തിന് ശേഷം നൈറ്റ് വാച്ച്മാന്‍ സുരംഗ ലക്മലിനും ഇതേ പിഴവ് പറ്റി. ഇത്തവണ പന്ത് സ്റ്റംമ്പിലാണ് പതിച്ചത്. നേരത്തെ ലങ്കയുടെ ഓപ്പണര്‍ സദിര സമരവിക്രമയെ പുറത്താക്കി ഷമിയാണ് ഇന്ത്യക്ക് മികച്ച തുടക്കം നല്‍കിയത്.
ഇന്നലെ രണ്ടാം ഇന്നിംഗ്‌സിലും ഇന്ത്യന്‍ ബാറ്റ്‌സ്മാന്മാര്‍ കരുത്ത് തെളിയിച്ചു. മൂന്ന് പേര്‍ അര്‍ധസെഞ്ച്വറി സ്വന്തമാക്കി. ശിഖര്‍ ധവാനും ചേതേശ്വര്‍ പൂജായരും തമ്മിലുള്ള മൂന്നാം വിക്കറ്റ് സഖ്യം 77 റണ്‍സ് നേടിയപ്പോള്‍ രോഹിത് ശര്‍മയും വിരാത് കോലിയും അഞ്ചാം വിക്കറ്റില്‍ അതിവേഗതയില്‍ 90 റണ്‍സ് നേടി. അത്യുഗ്രന്‍ ഫോമില്‍ പരമ്പരയില്‍ കളിക്കുന്ന ക്യാപ്റ്റന്‍ കോലി വലിയ ഷോട്ടുകള്‍ക്ക് പോവാതെ സിംഗിളുകളും ഡബിളുകളുമായി സ്‌ക്കോര്‍ ബോര്‍ഡ് ചലിപ്പിച്ചപ്പോള്‍ രോഹിതും അതേ പാത പിന്തുടര്‍ന്നു. അര്‍ധ സെഞ്ച്വറി സ്വന്തമാക്കിയതോടെ മൂന്ന് മല്‍സര ടെസ്റ്റ് പരമ്പരയിലെ കോലിയുടെ റണ്‍ സമ്പാദ്യം 600 ആയി ഉയര്‍ന്നു. മുരളി വിജയ്,അജിങ്ക്യ രഹാനെ എന്നിവര്‍ മാത്രമാണ് ഇന്ത്യന്‍ ബാറ്റിംഗില്‍ പരാജയപ്പെട്ടത്. പരമ്പരയിലുടനീളം വലിയ ദുരന്തമായി മാറിയ രഹാനെയെ കോലി മൂന്നാം നമ്പറില്‍ തന്നെ ഇന്നലെ പരീക്ഷിച്ചു. കഴിഞ്ഞ മല്‍സരങ്ങളില്‍ 4,0,2,1 എന്നിങ്ങനെ മാത്രം സ്‌ക്കോര്‍ ചെയ്ത രഹാനെക്ക് പുതിയ അവസരത്തെയും പ്രയോജനപ്പെടുത്താനായില്ല.

മൂന്നാം ടെസ്റ്റിലും ഇന്ത്യ വിജയപ്രതീക്ഷയില്‍; ശ്രീലങ്ക 3/31

ചന്ദ്രിക വെബ് ഡെസ്‌ക്‌ — Tue, 05 Dec 2017 10:30:53 +0000

ന്യൂഡല്‍ഹി: ശ്രീലങ്കക്കെതിരായ മൂന്നാം ടെസ്റ്റില്‍ ഇന്ത്യ വിജയ പ്രതീക്ഷയില്‍. രണ്ടാം ഇന്നിങ്‌സില്‍ 410 എന്ന വിജയലക്ഷ്യം ശ്രീലങ്കക്കു മുന്നില്‍ വെച്ച ഇന്ത്യ നാലാം ദിനം സ്റ്റംപെടുക്കുമ്പോള്‍ 31 റണ്‍സിനിടെ ലങ്കയുടെ മൂന്ന് ബാറ്റ്‌സ്മാന്മാരെ പുറത്താക്കിയിട്ടുണ്ട്.

ദിമുത് കരുണരത്‌നെ (13), സദീര സമരവിക്രമ (5), സുരങ്ക ലക്മല്‍ (0) എന്നിവരാണ് പുറത്തായത്. ധനഞ്ജയ ഡിസില്‍വയും (13) എയ്ഞ്ചലോ മാത്യൂസും (0) ആണ് ക്രീസില്‍. അവസാന ദിനമായ നാളെ ഏഴ് വിക്കറ്റ് കയ്യിലിരിക്കെ ജയിക്കാന്‍ ലങ്കക്ക് 379 റണ്‍സ് കൂടി വേണം. മൂന്ന് മത്സരങ്ങളടങ്ങിയ പരമ്പര സമനിലയാക്കാന്‍ ശ്രീലങ്കക്ക് ഈ മത്സരത്തില്‍ ജയം അനിവാര്യമാണ്. സമനിലയില്‍ അവസാനിച്ച കൊല്‍ക്കത്ത ടെസ്റ്റിനു ശേഷം നാഗ്പൂരില്‍ ഇന്നിങ്‌സ് ജയത്തോടെ ഇന്ത്യ പരമ്പരയില്‍ 1-0 മുന്നിലാണ്.

നേരത്തെ ശ്രീലങ്കയുടെ ഒന്നാം ഇന്നിങ്‌സ് 373-ല്‍ അവസാനിപ്പിച്ച ഇന്ത്യ അഞ്ച് വിക്കറ്റിന് 246 എന്ന നിലയില്‍ രണ്ടാം ഇന്നിങ്‌സ് ഡിക്ലയര്‍ ചെയ്യുകയായിരുന്നു. ഒന്നാം ഇന്നിങ്‌സില്‍ 163 റണ്‍സ് ലീഡ് നേടിയ ഇന്ത്യ രണ്ടാം ഇന്നിങ്‌സില്‍ 246 റണ്‍സ് കൂടി ചേര്‍ത്താണ്‌ സന്ദര്‍ശകരെ രണ്ടാം ഇന്നിങ്‌സിനയച്ചത്. ശിഖര്‍ ധവാന്‍ (67), വിരാത് കോലി (50), രോഹിത് ശര്‍മ (50 നോട്ടൗട്ട്), ചേതേശ്വര്‍ പുജാര (49) എന്നിവരുടെ മികച്ച പ്രകടനമാണ് ഇന്ത്യക്ക് കരുത്തായത്. 52.2 ഓവറില്‍ 4.70 ശരാശരിയിലായിരുന്നു ഇന്ത്യയുടെ രണ്ടാം ഇന്നിങ്‌സ് സ്‌കോര്‍.

നേരത്തെ, ഒമ്പത് വിക്കറ്റിന് 356 എന്ന നിലയില്‍ ബാറ്റിങ് പുനരാരംഭിച്ച ശ്രീലങ്ക 17 റണ്‍സ് കൂടി കൂട്ടിച്ചേര്‍ത്താണ് ഓള്‍ഔട്ടായത്. രക്ഷാ പ്രവര്‍ത്തനത്തില്‍ നിര്‍ണായക പങ്കു വഹിച്ച ക്യാപ്ടന്‍ ദിനേഷ് ചണ്ഡിമല്‍ (164) ആണ് പത്താം വിക്കറ്റായി മടങ്ങിയത്. ഇശാന്ത് ശര്‍മ, അശ്വിന്‍ എന്നിവര്‍ മൂന്നു വീതവും മുഹമ്മദ് ഷമി, ജഡേജ എന്നിവര്‍ രണ്ടു വീതവും വിക്കറ്റെടുത്തു.