ദീര്‍ഘനാളായി ഇന്ത്യന്‍ ടീമില്‍ നിന്ന് പുറത്തുനില്‍ക്കുന്ന പേസര്‍ മുഹമ്മദ് ഷമി ടീമില്‍ തിരിച്ചെത്തിയേക്കുമെന്നാണ് റിപ്പോര്‍ട്ടുകള്‍. ലോകകപ്പ് അടുത്തുനില്‍ക്കുന്ന പശ്ചാത്തലത്തില്‍ സെലക്ടര്‍മാര്‍ താരത്തെ പരിഗണിക്കാനാണ് സാധ്യത. അദ്ദേഹത്തിന്റെ ഫിറ്റ്‌നസ്സ് മാത്രമാണ് ആശങ്ക. ആഭ്യന്തര ടൂര്‍ണമെന്റുകളിലെ ഷമിയുടെ പ്രകടനം മാനേജ്മെന്റ് സസൂക്ഷ്മം നിരീക്ഷിക്കുന്നുമുണ്ട്.

അദ്ദേഹത്തെപ്പോലൊരു ബൗളര്‍ക്ക് വിക്കറ്റ് നേടാനാകും. സെലക്ഷന്‍ റഡാറില്‍ നിന്ന് താരം പുറത്തായിട്ടില്ല. ന്യൂസിലന്‍ഡിനെതിരായ ഏകദിന പരമ്പരയില്‍ അദ്ദേഹം പരിഗണിക്കപ്പെടാന്‍ സാധ്യതയുണ്ട്. അദ്ദേഹത്തിന്റെ പരിചയസമ്പത്തും വിക്കറ്റെടുക്കാനുള്ള കഴിവും കണക്കിലെടുത്ത് ഷമി ടീമില്‍ ഇടംപിടിക്കാന്‍ സാധ്യതയുണ്ടെന്നും ബിസിസിഐ വൃത്തങ്ങളെ ഉദ്ധരിച്ച് മാധ്യമങ്ങള്‍ റിപ്പോര്‍ട്ട് ചെയ്യുന്നുണ്ട്. കഴിഞ്ഞ ഐസിസി ചാമ്പ്യന്‍സ് ട്രോഫി ഫൈനലിന് ശേഷം താരം ഇന്ത്യക്കായി കളിച്ചിട്ടില്ല.

അതേസമയം വിക്കറ്റ് കീപ്പര്‍ ബാറ്റര്‍ ഇഷാന്‍ കിഷനും ടീമില്‍ ഇടംപിടിച്ചേക്കും. നേരത്തേ കിവീസിനെതിരായ ടി20 പരമ്പരയിലും ടി20 ലോകകപ്പ് സ്‌ക്വാഡിലും ഇഷാന്‍ കിഷന്‍ ഇടംപിടിച്ചിരുന്നു. സഞ്ജു സാംസണ്‍ ആദ്യ വിക്കറ്റ് കീപ്പറായി ലോകകപ്പ് സ്‌ക്വാഡിലുള്ളപ്പോള്‍ രണ്ടാം വിക്കറ്റ് കീപ്പറായാണ് കിഷാനെ ടീമിലെടുത്തത്. എന്നാല്‍ ഏകദിന പരമ്പരയില്‍ സഞ്ജുവിനെ ടീമിലെടുക്കാന്‍ സാധ്യതയില്ലെന്നാണ് വിവരം. സഞ്ജുവിന് പുറമേ മറ്റൊരു വിക്കറ്റ് കീപ്പര്‍ ബാറ്ററായ ഋഷഭ് പന്തും ടീമില്‍ നിന്ന് പുറത്തായേക്കു. നിലവില്‍ മിന്നും ഫോമിലുള്ള കിഷനെ സെലക്ടര്‍മാര്‍ പരിഗണിക്കുന്നതായാണ് റിപ്പോര്‍ട്ടുകള്‍.

മുതിര്‍ന്ന താരങ്ങളായ രോഹിത് ശര്‍മയും വിരാട് കോലിയും ടീമിലുണ്ടാകും. അടുത്തിടെ നടന്ന വിജയ് ഹസാരെ ട്രോഫിയില്‍ തകര്‍പ്പന്‍ പ്രകടനമാണ് ഇരുവരും കാഴ്ചവെച്ചത്. പരിക്കേറ്റ് പുറത്തായിരുന്ന ക്യാപ്റ്റന്‍ ശുഭ്മാന്‍ ഗില്‍ തിരിച്ചെത്തും. എന്നാല്‍ ഉപനായകനായ ശ്രേയസ്സ് അയ്യര്‍ ടീമിലെത്താനുള്ള സാധ്യതയില്ല. പരിക്കേറ്റ് ദീര്‍ഘനാളായി കളിക്കളത്തിന് പുറത്തിരിക്കുന്ന താരം നിലവില്‍ ബിസിസിഐയുടെ ദേശീയ അക്കാദമിയില്‍ പരിശീലനത്തിലാണ്. വേഗത്തില്‍ ശരീരഭാരം കുറയുന്നതിനാല്‍ ഉടന്‍ അയ്യരുടെ തിരിച്ചുവരവുണ്ടായേക്കില്ല.