മെയ് 17ന് ചെന്നയിന്‍ എഫ്.സി-ബെംഗളൂരു എഫ്.സി മത്സരമാണ് അവസാന മത്സരം. സിംഗിള്‍ ലഗ് ഹോം-എവേ ഫോര്‍മാറ്റിലാണ് ടൂര്‍ണമെന്റ് ന
ടക്കുക. അതേ സമയം മത്സര ഷെഡ്യൂള്‍ അന്തിമമായില്ലെന്നാണ് ഫുട്‌ബോള്‍ ഫെഡറേഷന്‍ പറയുന്നത്. ക്ലബ്ബുകളുടേയും മറ്റു ബന്ധപ്പെട്ടവരുടേയും സൗകര്യം കൂടി പരിഗണിച്ച് ഇതില്‍ മാറ്റം വരുത്തുമെന്നും ഫെഡറേഷന്‍ വ്യക്തമാക്കി. ഇത്തവണ സാമ്പത്തിക സ്ഥിതി പരിഗണിച്ച് ടീമുകളുടെ ഹോം ഗ്രൗണ്ടുകളില്‍ കാര്യമായ മാറ്റം വരുത്തും. നിലവില്‍ എ.ഐ.എഫ്.എഫ് തയാറാക്കിയിട്ടുള്ള കരട് പട്ടിക പ്രകാരം മുഹമ്മദന്‍സ് സ്‌പോര്‍ട്ടിങിന്റെ ഹോം ഗ്രൗണ്ട് ജംഷഡ്പൂരിലെ ജെ.ആര്‍.ഡി ടാറ്റ സ്‌പോര്‍ട്സ് കോംപ്ലക്സ് ആണ്.

കഴിഞ്ഞ സീസണില്‍ ഐ ലീഗില്‍ പശ്ചിമബംഗാളിലെ കല്യാണി ഹോം ഗ്രൗണ്ടായി ഉപയോഗിച്ചിരുന്ന ഇന്റര്‍കാശിക്ക് ഒഡീഷ എഫ്.സിയുടെ ഹോം ഗ്രൗണ്ടായ കലിംഗ സ്റ്റേഡിയം തന്നെയാണ് ഹോംഗ്രൗണ്ടായി അനുവദിച്ചിരിക്കുന്നത്. നോര്‍ത്ത് ഈസ്റ്റ് യുണൈറ്റഡ് കഴിഞ്ഞ സീസണില്‍ ഗുവാഹത്തിയും ഷില്ലോങും ഹോം ഗ്രൗണ്ടായി ഉപയോഗിച്ചിരുന്നുവെങ്കില്‍ ഇത്തവണ സരുസാജായി ഇന്ദിരാഗാന്ധി സ്റ്റേഡിയമാണ് ഹോം ഗ്രൗണ്ടാവുക. കേരള ബ്ലാസ്റ്റേഴ്‌സിന് കോഴിക്കോട് ഇ.എം.എസ് കോര്‍പറേഷന്‍ സ്റ്റേഡിയമാണ് ഇത്തവണ ഹോം ഗ്രൗണ്ട്.

ഫെബ്രുവരി 14നാണ് പുതിയ ഐ.എസ്.എല്‍ സീസണിന് കിക്കോഫ്. ഫെബ്രുവരി അവസാനമായിരിക്കും കോഴിക്കോട് കോര്‍പറേഷന്‍ സ്റ്റേഡിയത്തില്‍ ബ്ലാസ്റ്റേഴ്‌സിന്റെ സീസണിലെ ആദ്യ മത്സരം നടക്കുക. മഞ്ചേരി പയ്യനാട് സ്റ്റേഡിയവും പരിഗണിച്ചിരുന്നെങ്കിലും മെച്ചപ്പെട്ട സൗകര്യങ്ങളാണ് കോഴിക്കോടിന് അനുകൂലമായത്. കഴിഞ്ഞദിവസം ബ്ലാസ്റ്റേഴ്‌സ് പ്രതിനിധികള്‍ സ്റ്റേഡിയം സന്ദര്‍ശിച്ചിരുന്നു.

കഴിഞ്ഞ സൂപ്പര്‍ ലീഗ് കേരള സീസണില്‍ കോഴിക്കോട് സ്റ്റേഡിയത്തിലേക്ക് ആയിരങ്ങളാണ് കളി കാണാനെത്തിയത്. ഈ ആരാധക പിന്തുണയും ആവേശവും പുതിയ സീസണില്‍ ബ്ലാസ്റ്റേഴ്‌സിനും കരുത്താകുമെന്ന കണക്കുകൂട്ടലിലാണ് മാനേജ്‌മെന്റ്. ആദ്യമായാണ് ബ്ലാസ്റ്റേഴ്‌സിന്റെ ഹോം മത്സരത്തിന് കൊച്ചിക്കു പുറമെ, കേരളത്തിലെ മറ്റൊരു നഗരം വേദിയാകുന്നത്.

ഡിസംബറില്‍ നടന്ന സൂപ്പര്‍ക്രോസ് റേസിങ് ലീഗിനെ തുടര്‍ന്ന് കോഴിക്കോട് സ്റ്റേഡിയത്തിലെ പുല്ലുകള്‍ നശിച്ചത് വലിയ വിവാദമായിരുന്നു. എന്നാല്‍, പുല്‍മൈതാനം പഴയപടിയാക്കി, നവീകരണ ജോലികള്‍ പൂര്‍ത്തിയാക്കി സ്റ്റേഡിയം ഫെബ്രുവരി പകുതിയോടെ കൈമാറാമെന്ന് സംഘാടകര്‍ ഉറപ്പുനല്‍കിയിട്ടുണ്ട്. നിലവില്‍ ഐ ലീഗില്‍ ഗോകുലം കേരള എഫ്.സിയുടെയും സൂപ്പര്‍ ലീഗ് കേരളയില്‍ കാലിക്കറ്റ് എഫ്.സിയുടെയും ഹോംഗ്രൗണ്ടാണ് കോഴിക്കോട് സ്റ്റേഡിയം.