നരേന്ദ്ര മോദി ഗുജറാത്ത് മുഖ്യമന്ത്രിയായിരിക്കെ 2004ലാണ് ഇസ്രത്ത് ജഹാന്‍, മലയാളിയായ ജാവേദ് ഷെയ്ഖ് എന്നിവരടക്കം നാലുപേരെ വന്‍സാരയുടെ നേതൃത്വത്തിലുള്ള പൊലീസ് ഏറ്റുമുട്ടലില്‍ കൊലപ്പെടുന്നത്. മോദിയെ കൊലപ്പെടുത്താന്‍ വന്ന ലഷ്‌കര്‍ തീവ്രവാദികളാണെന്ന് ആരോപിച്ചായിരുന്നു ഇത്. എന്നാല്‍ പിന്നീട് പ്രത്യേകാന്വേഷണ സംഘവും സി.ബി.ഐയും നടത്തിയ അന്വേഷണത്തില്‍ ‘ഏറ്റുമുട്ടല്‍’ വ്യാജമാണെന്ന് തെളിയുകയും വന്‍സാരയടക്കമുള്ള ഉദ്യോഗസ്ഥര്‍ അറസ്റ്റിലാവുകയും ചെയ്തു.

മോദിയുടെയും ആഭ്യന്തരമന്ത്രി അമിത് ഷായുടെയും അറിവോടെയായിരുന്നു കൊലപാതകം എന്ന് തുടക്കം മുതല്‍ക്കു തന്നെ ആരോപണമുയര്‍ന്നിരുന്നു. അന്വേഷണ സമയത്ത് ഇരുവരുടേയും പങ്ക് വ്യക്തമാക്കുന്ന കണ്ടെത്തലുകള്‍ സി.ബി.ഐ തന്നെ മുന്നോട്ട് വെച്ചിരുന്നു. അഹമ്മദാബാദില്‍ വ്യാജ ഏറ്റുമുട്ടല്‍ നടക്കുന്നതിന് പതിനാല് മണിക്കൂറുകള്‍ മുമ്പ് ഗുജറാത്ത് പൊലീസിലെ എന്‍കൗണ്ടര്‍ സ്‌പെഷലിസ്റ്റ് എന്നു പേരെടുത്ത വന്‍സാര മോദിയുമായും ഷായുമായും ബന്ധപ്പെട്ടുവെന്ന വിവരവും സി.ബി.ഐക്കു ലഭിച്ചിരുന്നു.

പത്തു വര്‍ഷത്തിനു ശേഷം 2014ലാണ് അമിത് ഷായ്ക്ക് ഇഷ്രത് ജഹാന്‍ വ്യാജഏറ്റുമുട്ടല്‍ കേസില്‍ പങ്കില്ലെന്ന് കാട്ടി സി.ബി.ഐ കുറ്റപത്രം സമര്‍പ്പിച്ചത്. സി.ബി.ഐ കോടതിയില്‍ സമര്‍പ്പിച്ച വന്‍സാരെയുടെ വിടുതല്‍ ഹര്‍ജിയിലാണ് ഈ വെളിപ്പെടുത്തലുള്ളത്. മോദിയേയും അമിത് ഷായേയും അറസ്റ്റ് ചെയ്യാന്‍ സിബിഐ പദ്ധതിയിട്ടിരുന്നുവെങ്കിലും അത് നടന്നില്ല എന്നാണ് വന്‍സാരെയുടെ വെളിപ്പെടുത്തല്‍. മോദിയെ കേസന്വേഷിക്കുന്ന സി.ബി.ഐ ഉദ്യോഗസ്ഥന്‍ രഹസ്യമായി ചോദ്യം ചെയ്തിരുന്നതായി നേരത്തെ വന്‍സാര വെളിപ്പെടുത്തിയിരുന്നു.

അതേസമയം മോദിയെ ചോദ്യം ചെയ്തതിന്റെ രേഖകള്‍ എവിടെയുമില്ലെന്നും ഇഷ്രത്ത് ജഹാന്‍ കേസിലെ എല്ലാ രേഖകളും വ്യാജമാണെന്നതിന് തെളിവാണ് അതെന്നും വന്‍സാര ആരോപിച്ചിരുന്നു. ഇസ്രത്ത് ജഹാന്‍ വ്യാജ ഏറ്റുമുട്ടല്‍ കേസില്‍ ഗുജറാത്ത് പൊലീസിനൊപ്പം മഹാരാഷ്ട്ര, ജമ്മു കശ്മീര്‍ പൊലീസിനും പങ്കുള്ളതായി സി.ബി.ഐ കണ്ടെത്തിയിരുന്നു.

2004 ജൂണ്‍ 15നാണ് അഹമ്മദാബാദ് നഗരത്തിന്റെ പ്രാന്തപ്രദേശത്ത് 19കാരി ഇഷ്‌റത് ജഹാന്‍, മലയാളിയായ സുഹൃത്ത് ജാവേദ് ഷെയ്ഖ് എന്ന പ്രാണേഷ് പിള്ളൈ, സീഷാന്‍ ജോഹര്‍, അംജദ് റാണ എന്നിവരുടെ മൃതദേഹങ്ങള്‍ വെടിയേറ്റു മരിച്ചു നിലയില്‍ ഗുജറാത്ത് പൊലീസ് പ്രദര്‍ശിപ്പിച്ചത്. ഗുജറാത്ത് മുഖ്യമന്ത്രിയായിരുന്ന നരേന്ദ്രമോദിയെ വധിക്കാനെത്തിയ ലഷ്‌കര്‍ ഭീകരരെ ഏറ്റുമുട്ടലില്‍ വധിച്ചുവെന്നായിരുന്നു ഗുജറാത്ത് പൊലീസിന്റെ അവകാശവാദം. എന്നാല്‍ വ്യാജ ഏറ്റുമുട്ടലിലൂടെയാണ് ഇവരെ കൊലപ്പെടുത്തിയതെന്ന് പിന്നീട് സുപ്രീംകോടതി മേല്‍നോട്ടത്തില്‍ നടന്ന അന്വേഷണത്തില്‍ പുറത്തുവന്നു. തുടര്‍ന്ന് അന്വേഷണം സി.ബി.ഐക്ക് കൈമാറി. 2013ല്‍ പി.പി പാണ്ഡെ, ഡി.ജി വന്‍സാര, ജി.എല്‍ സിംഗാള്‍ തുടങ്ങി ഉന്നത പൊലീസ് ഉദ്യോഗസ്ഥരെ പ്രതിയാക്കി സി.ബി.ഐ ആദ്യ കുറ്റപത്രം സമര്‍പ്പിച്ചു. ക്രിമിനല്‍ ഗൂഢാലോചന, തട്ടിക്കൊണ്ടുപോകല്‍, കൊലപാതകം തുടങ്ങിയ വകുപ്പുകളാണ് പ്രതികള്‍ക്കെതിരെ ചുമത്തിയിരുന്നത്.

ഇഷറത് കേസില്‍ തന്റെ പങ്ക് സ്ഥാപിക്കാന്‍ തെളിവുകളൊന്നുമില്ലെന്ന പാണ്ഡെയുടെ വാദം അംഗീകരിച്ചാണ് സി.ബി.ഐ കോടതി അദ്ദേഹത്തെ പ്രതിപ്പട്ടികയില്‍നിന്ന് ഒഴിവാക്കിയത്. കേസിലെ സാക്ഷികള്‍ ഓരോ അന്വേഷണ ഏജന്‍സികള്‍ക്കും നല്‍കിയ മൊഴി വ്യത്യസ്തമാണെന്നും അതുകൊണ്ടുതന്നെ ഇവ വിശ്വാസത്തില്‍ എടുക്കാനാവില്ലെന്നും കോടതി അഭിപ്രായപ്പെട്ടു.

1980 ബാച്ച് ഐ.പി.എസ് ഓഫീസറായ പി.പി പാണ്ഡെയെ ഇഷ്‌റത് കേസുമായി ബന്ധപ്പെട്ട് 2013 ജൂലൈയില്‍ അറസ്റ്റു ചെയ്തിരുന്നു. 19 മാസം ജയിലില്‍ കഴിഞ്ഞ അദ്ദേഹം 2015 ഫെബ്രുവരിയില്‍ ജാമ്യത്തില്‍ ഇറങ്ങി. തൊട്ടു പിന്നാലെ സര്‍വീസില്‍ തിരികെ പ്രവേശിച്ച പാണ്ഡെയെ ഡി.ജി.പി റാങ്കിലേക്ക് ഉയര്‍ത്തി ഗുജറാത്ത് സര്‍ക്കാര്‍ കൂറു കാട്ടി. ഔദ്യോഗികമായി സര്‍വീസില്‍നിന്ന് വിരമിച്ച ശേഷവും സേവന കാലാവധി നീട്ടി നല്‍കി ഗുജറാത്ത് സര്‍ക്കാര്‍ അദ്ദേഹത്തെ സംരക്ഷിച്ചു. ഇതിനെതിരെ ഹൈക്കോടതി മുമ്പാകെ സ്വകാര്യ അന്യായം ഫയല്‍ ചെയ്തതോടെയാണ് പാണ്ഡെയുടെ സര്‍വീസ് എക്‌സ്റ്റന്‍ഷന്‍ ഗുജറാത്ത് സര്‍ക്കാര്‍ പിന്‍വലിച്ചത്.

ചീഫ് ജസ്റ്റിസ് ജെ.എസ് കെഹാര്‍, ഡി.വൈ ചന്ദ്രചൂഡ് എന്നിവരടങ്ങിയ ബെഞ്ചിന്റെതാണ് ഉത്തരവ്. പൊലീസ് സര്‍വീസില്‍ നിന്ന് വിരമിച്ച ഇവരെ കരാര്‍ അടിസ്ഥാനത്തില്‍ ഗുജറാത്ത് സര്‍ക്കാര്‍ വീണ്ടും ഉന്നത സ്ഥാനങ്ങളില്‍ നിയമിക്കുകയായിരുന്നു. എന്‍.കെ അമിനെ മാഹിസാഗര്‍ ജില്ലാ പൊലീസ് സൂപ്രണ്ടായും തരുണ്‍ ബരോട്ടിനെ വഡോധര റെയില്‍വെ ഡെപ്യൂട്ടി സൂപ്രണ്ട് ഓഫ് പൊലീസായുമാണ് നിയമിച്ചത്. ഇതിനെതിരെ വിമരിച്ച ഐ.പി.എസ് ഉദ്യോഗസ്ഥന്‍ രാഹുല്‍ ശര്‍മയാണ് കോടതിയെ സമീപിച്ചത്. ശര്‍മയുടെ ഹര്‍ജി ഗുജറാത്ത് ഹൈക്കോടതി തള്ളിയതോടെ അദ്ദേഹം സുപ്രീംകോടതിയെ സമീപിക്കുകയായിരുന്നു.

അമിന്‍ രണ്ട് വ്യാജ ഏറ്റുമുട്ടല്‍ കേസില്‍ വിചാരണ നേരിടുന്ന ഉദ്യോഗസ്ഥനാണെന്നും എട്ട് വര്‍ഷത്തോളമുള്ള ജുഡീഷ്യല്‍ കസ്റ്റഡി പൂര്‍ത്തിയായതിന് തൊട്ടുപിന്നാലെയാണ് അദ്ദേഹത്തെ പൊലീസ് സൂപ്രണ്ട് ആയി നിയമിച്ചതെന്നും ശര്‍മ ഹര്‍ജിയില്‍ ചൂണ്ടിക്കാട്ടി. ഇതേതുടര്‍ന്ന് നിയമനത്തിന്റെ വിശദാംശങ്ങള്‍ സമര്‍പ്പിക്കാന്‍ സുപ്രീംകോടതി ഗുജറാത്ത് പൊലീസിനോട് ആവശ്യപ്പെട്ടിരുന്നു. സൊഹ്‌റാബുദ്ദീന്‍, ഇശ്‌റത് ജഹാന്‍ വ്യാജ ഏറ്റുമുട്ടല്‍ കേസില്‍ വിചാരണ നേരിട്ട ഉദ്യോഗസ്ഥരാണ് അമിനും ബരോട്ടും. രണ്ട് വ്യാജ ഏറ്റുമുട്ടല്‍ കേസില്‍ കുറ്റാരോപിതനായ അമിന്‍ എട്ടു വര്‍ഷം ജുഡീഷ്യല്‍ കസ്റ്റഡിയില്‍ റിമാന്റിലായിരുന്നു. സാദിഖ് ജമാല്‍, ഇശ്‌റത് ജഹാന്‍ കൊലകേസുകളിലെ പ്രതിയായ തരുണ്‍ ബരോട്ട് കൊലപാതകം, തട്ടിക്കൊണ്ടു പോകല്‍ കേസുകളില്‍ മൂന്നു വര്‍ഷം ജുഡീഷ്യല്‍ കസ്റ്റഡിയിലായിരുന്നു. ഇക്കാര്യം ചൂണ്ടിക്കാട്ടിയാണ് രാഹുല്‍ ശര്‍മ കോടതിയെ സമീപിച്ചത്. 2004 ജൂണ്‍ 15നാണ് ഇശ്‌റത് ജഹാന്‍, മലയാളിയായ ജാവേദ് ശൈഖ് എന്ന പ്രാണേഷ് കുമാര്‍ എന്നിവരും സീഷാന്‍ ജോഹര്‍, അംജദ് അലി റാണ എന്നീ പാകിസ്താന്‍കാരും അഹമ്മദാബാദിനടുത്ത കോതാര്‍പുറിലുണ്ടായ വെടിവെപ്പില്‍ കൊല്ലപ്പെട്ടത്. ആ സമയത്ത് ഗുജറാത്ത് മുഖ്യമന്ത്രിയായിരുന്ന നരേന്ദ്ര മോദിയെ വധിക്കാന്‍ പദ്ധതിയിട്ടു എന്ന് പറഞ്ഞാണ് പൊലീസ് ഇവരെ വെടിവെച്ചു കൊന്നത്. മുംബൈയില്‍ നിന്നും തീവ്രവാദി സംഘം ഗാന്ധിനഗറിലേക്ക് വരുന്നുണ്ടെന്ന കേന്ദ്ര ഇന്റലിജന്‍സ് റിപ്പോര്‍ട്ട് പ്രകാരം നടത്തിയതാണ് ഏറ്റുമുട്ടല്‍ എന്നായിരുന്നു പൊലീസ് ഭാഷ്യം. എന്നാല്‍ കേന്ദ്ര രഹസ്യാന്വേഷണ ഏജന്‍സി അത്തരം ഒരു വിവരം നല്‍കിയിട്ടില്ലെന്നും വ്യാജ ഏറ്റുമുട്ടലിലൂടെയാണ് ഇശ്‌റത് ജഹാന്‍ അടക്കമുള്ളവരെ പൊലീസ് കൊലപ്പെടുത്തിയതെന്നും പിന്നീട് അന്വേഷണത്തില്‍ വ്യക്തമായിരുന്നു.