islamic – Chandrika Daily

ജര്‍മനിയിലെ മുസ്‌ലിം വിരുദ്ധ പാര്‍ട്ടി നേതാവ് ഇസ്‌ലാം മതം സ്വീകരിച്ചു

chandrika — Thu, 25 Jan 2018 16:47:39 +0000

ബെര്‍ലിന്‍: ജര്‍മനിയില്‍ ഇസ്‌ലാം വിരുദ്ധ നിലപാടുകളിലൂടെ കുപ്രസിദ്ധിയാര്‍ജിച്ച തീവ്രവലതുപക്ഷ പാര്‍ട്ടിയായ അള്‍ട്ടര്‍നേറ്റീവ് ഫോര്‍ ജര്‍മനി(എ.എഫ്.ഡി)യുടെ മുതിര്‍ന്ന നേതാവ് ഇസ്‌ലാം മതം സ്വീകരിച്ചു. ആര്‍തര്‍ വാഗ്നറാണ് ഇസ്‌ലാം സ്വീകരിച്ച് പാര്‍ട്ടിയില്‍നിന്ന് രാജിവെച്ചത്. ബ്രാന്‍ഡര്‍ബര്‍ഗ് സ്റ്റേറ്റില്‍ എ.എഫ്.ഡിക്ക് നേതൃത്വം നല്‍കുന്ന വാഗ്നറുടെ രാജി ജര്‍മനിയില്‍ സജീവ ചര്‍ച്ചയായിരിക്കുകയാണ്. പാര്‍ട്ടി വിട്ടത് എന്തിനാണെന്ന് വ്യക്തമാക്കിയില്ലെങ്കിലും ഇസ്്‌ലാമിലേക്ക് മതപരിവര്‍ത്തനം ചെയ്തതായി അദ്ദേഹം സ്ഥിരീകരിച്ചു. മതംമാറ്റം തന്റെ വ്യക്തിപരമായ കാര്യമാണെന്നും വാഗ്നര്‍ വ്യക്തമാക്കി. ഇസ്്‌ലാമിനും മുസ്്‌ലിംകള്‍ക്കുമെതിരെ കടുത്ത സമീപനം സ്വീകരിച്ചിരിക്കുന്ന എ.എഫ്.ഡി 2017 സെപ്തംബറിലെ തെരഞ്ഞെടുപ്പില്‍ 12.6 ശതമാനം വോട്ടു നേടി ശ്രദ്ധ പിടിച്ചുപറ്റിയിരുന്നു. ജര്‍മനിയില്‍ ഇസ്്‌ലാമിന് സ്ഥാനമില്ല, ജര്‍മനിയുടെ ഇസ്്‌ലാമികവത്കരണത്തെ ചെറുക്കുക എന്നിവയായിരുന്നു തെരഞ്ഞെടുപ്പ് കാലത്ത് പാര്‍ട്ടിയുടെ പ്രധാന മുദ്രാവാക്യങ്ങള്‍. ഇസ്്‌ലാമിനോടുള്ള വിരോധത്തിന്റെ ഭാഗമായി അഭയാര്‍ത്ഥികള്‍ക്കും കുടിയേറ്റക്കാര്‍ക്കുമെതിരെ ശക്തമായ നിലപാടാണ് പാര്‍ട്ടി സ്വീകരിച്ചിരിക്കുന്നത്. കഴിഞ്ഞ തെരഞ്ഞെടുപ്പിനുശേഷം ജര്‍മന്‍ പാര്‍ലമെന്റിലെ ഏറ്റവും വലിയ മൂന്നാമത്തെ കക്ഷിയായി എ.എഫ്.ഡി ഇടംപിടിച്ചിരുന്നു. ജര്‍മനിയില്‍ മുസ്്‌ലിം പള്ളികള്‍ പണിയാന്‍ അനുവദിക്കരുതെന്നാണ് പാര്‍ട്ടിയുടെ നിലപാട്. മുസ്്‌ലിം വിരുദ്ധ പോസ്റ്റുകളുടെ പേരില്‍ പാര്‍ട്ടി നേതാവ് ബീട്രിക്‌സ് വോണ്‍ സ്‌റ്റോര്‍ച്ചിന്റെ ഫേസ്ബുക്ക് ജനുവരി ആദ്യത്തില്‍ ബ്ലോക്ക് ചെയ്തിരുന്നു. മുസ്്‌ലിംകളോട് ഇത്രയൊക്കെ വിദ്വേഷം വെച്ചുപുലര്‍ത്തുന്ന ഒരു പാര്‍ട്ടിയുടെ ഉന്നതനായ നേതാവാണ് ഇപ്പോള്‍ ഇസ്്‌ലാം മതം സ്വീകരിച്ചിരിക്കുന്നത്. ക്രിസ്റ്റിയന്‍ ഡെമോക്രാറ്റിക് പാര്‍ട്ടി അംഗമായിരുന്ന വാഗ്നര്‍ 2015ലാണ് എ.എഫ്.ഡിയില്‍ ചേര്‍ന്നത്. അദ്ദേഹത്തിന്റെ മതംമാറ്റം സോഷ്യല്‍ മീഡിയയില്‍ സജീവ ചര്‍ച്ചയായിട്ടുണ്ട്. ഇസ്്‌ലാം പേടിയുള്ള എ.എഫ്.ഡിയുടെ നേതാവിനെപ്പോലും മുസ്്‌ലിമായി മാറ്റുന്ന വിധം ഇസ്്‌ലാം ജര്‍മനിയില്‍ ശക്തായാര്‍ജിച്ചുകൊണ്ടിരിക്കുകയാണെന്നായിരുന്നു ചിലരുടെ കമന്റ്.

വര്‍ഗീയത നിറച്ച് ബനാറസ് ഹിന്ദു സര്‍വകലാശാല

chandrika — Mon, 11 Dec 2017 09:42:20 +0000

ലക്‌നോ: ഹിന്ദുത്വവാദികളുടെ ആരോപണങ്ങള്‍ക്ക് ഉത്തരം തേടി ബനാറസ് ഹിന്ദു സര്‍വകലാശാലയുടെ ചോദ്യപേപ്പര്‍. രണ്ടാം വര്‍ഷ എം.എ ഹിസ്റ്ററി ചോദ്യപേപ്പറിലാണ് ഇസ്‌ലാമിക വിഷയങ്ങളെ തെറ്റായി വ്യാഖ്യാനിച്ചുള്ള വിഷയങ്ങള്‍ പ്രതിപാദിച്ചത്. മുത്വലാഖും ഹലാലയും ഇസ്‌ലാമിലെ സാമൂഹിക വിപത്ത് എന്ന വിഷയത്തില്‍ ഉപന്യാസം എഴുതുക, ഇസ്‌ലാമിലെ ഹലാല എന്താണ്, ഗോതമ്പിന് അലാവുദ്ദീന്‍ ഖില്‍ജി നിശ്ചയിച്ച വില എത്രയായിരുന്നു തുടങ്ങി അസംബന്ധം നിറഞ്ഞ ചോദ്യങ്ങളായിരുന്നു നിറയെ. ഒരു സമുദായത്തെ അവഹേളിക്കാനുള്ള നീക്കമാണിതെന്നും ചോദ്യപേപ്പര്‍ മാറ്റിനല്‍കണമെന്നും വിദ്യാര്‍ത്ഥികള്‍ ആവശ്യപ്പെട്ടെങ്കിലും സര്‍വകലാശാല അധികൃതര്‍ ചെവിക്കൊണ്ടില്ല. മധ്യകാല ചരിത്രം പഠിക്കുമ്പോള്‍ സ്വാഭാവികമായി ഇത്തരം കാര്യങ്ങള്‍ പഠിക്കേണ്ടതുണ്ടെന്നും ഇസ്‌ലാമിലെ പോരായ്മകള്‍ ചൂണ്ടിക്കാട്ടേണ്ടതുണ്ടെന്നും ചരിത്ര വിഭാഗം അസിസ്റ്റന്റ് പ്രഫസര്‍ രാജീവ് ശ്രീവാസ്തവ പ്രതികരിച്ചു.

ഇസ്‌ലാമിന്റെ ചരിത്രം പഠിപ്പിക്കുമ്പോള്‍ ഇത്തരം കാര്യങ്ങള്‍ പ്രതിപാദിക്കേണ്ടി വരും. പഠിക്കുകയോ അവ ചോദിക്കുകയോ ചെയ്തിട്ടില്ലെങ്കില്‍ വിദ്യാര്‍ത്ഥികള്‍ എങ്ങനെയാണ് അവയെക്കുറിച്ച് അറിയുക. സഞ്ജയ് ലീല ബന്‍സാലിയെ പോലെയുള്ളവരല്ല വിദ്യാര്‍ഥികളെ ചരിത്രം പഠിപ്പിക്കേണ്ടതെന്നും അദ്ദേഹം പറഞ്ഞു. കഴിഞ്ഞദിവസം നടന്ന എം.എ പൊളിറ്റിക്കല്‍ സയന്‍സ് ഒന്നാം സെമസ്റ്റര്‍ പരീക്ഷയും വിവാദമായിരുന്നു. ബി.ജെ.പി.യെക്കുറിച്ച് 154 മാര്‍ക്കിന്റെ ഉപന്യസം എഴുതാനായിരുന്നു ചോദ്യം. ഇന്ത്യന്‍ രാഷ്ട്രീയ വ്യവസ്ഥയുടെ രൂപഘടനയും സിദ്ധാന്തങ്ങളും പഠിപ്പിക്കുന്ന പേപ്പറിലാണ് ബി.ജെ.പിയെക്കുറിച്ച് വിവരിക്കാന്‍ ചോദ്യം വന്നത്. പൊളിറ്റിക്കല്‍ സയന്‍സ് വിഭാഗത്തിന്റെ തന്നെ പൗരാണിക ചരിത്ര വിഷയ പരീക്ഷക്ക് കൗടില്യന്റെ കാലത്തെ ജി.എസ്.ടിയെക്കുറിച്ചും മനുസ്മൃതി എഴുതിയ മനുവിന്റെ ആഗോളീകരണ കാഴ്ചപ്പാടിനെക്കുറിച്ചും ചോദ്യമുണ്ടായിരുന്നു. വസ്തുതാവിരുദ്ധവും സിലബസില്‍ ഇല്ലാത്തതുമായ ചോദ്യങ്ങളാണിതെന്ന് വിദ്യാര്‍ത്ഥികള്‍ പറഞ്ഞു.

എന്നാല്‍ വിദ്യാര്‍ത്ഥികളില്‍ രാഷ്ട്രീയവബോധം വളര്‍ത്തുകയാണ് ലക്ഷ്യമെന്ന് ചോദ്യപ്പേപ്പര്‍ തയ്യാറാക്കിയ പ്രൊഫ. കൗശല്‍ കിഷോര്‍ മിശ്ര പ്രതികരിച്ചു. സംഘ്പരിവാര്‍ സംഘടനകള്‍ ഉന്നയിക്കുന്ന അടിസ്ഥാനരഹിതമായ കാര്യങ്ങളെ ശാസ്ത്ര വസ്തുതകളായി അവതരിപ്പിക്കാനുള്ള നീക്കമാണിതെന്നാണ്‌രോപണം.