january 26 – Chandrika Daily

ഗള്‍ഫ് നാടുകളില്‍ ഇന്ത്യന്‍ റിപ്പബ്ലിക് ദിനം ആഘോഷിച്ചു

webdesk14 — Fri, 27 Jan 2023 08:55:05 +0000

അബുദാബി: ഇന്ത്യയുടെ 74-ാമത് റിപ്പബ്ലിക് ദിനാഘോഷം വൈവിധ്യമാര്‍ന്ന പരിപാടികളോടെ ഗള്‍ഫ്നാടുകളില്‍ ആഘോഷിച്ചു. വിവിധ ഗള്‍ഫ് രാജ്യങ്ങളിലെ ഇന്ത്യന്‍ എംബസികളില്‍ അംബാസ്സഡര്‍മാര്‍ ദേശീയ പതാക ഉയര്‍ത്തി. വിദ്യാര്‍ത്ഥികള്‍ ഉള്‍പ്പെടെ നൂറുകണക്കിനുപേര്‍ പങ്കെടുത്ത പരിപാടി വര്‍ണ്ണാഭമായിരുന്നു. വിവിധ സംഘടനാ പ്രതിനിധികളും വാണിജ്യ-വ്യവസായ പ്രമുഖരും സംബന്ധിച്ചു.

ഇന്ത്യന്‍ എംബസി അബുദാബിയില്‍ ഒരുക്കിയ പരിപാടിയില്‍ ശൈഖ് നഹ്യാന്‍ ബിന്‍ മുബാറക് അല്‍ നഹ് യാന്‍ മുഖ്യാഥിതിയായിരുന്നു. ഇന്ത്യൻ അംബാസഡർ സഞ്ജയ്‌ സുധീർ റിപ്പബ്ലിക് ദിന സന്ദേശം നൽകി.

അമ്പതോളം രാജ്യങ്ങളിലെ അംബാസ്സഡര്‍മാരും പ്രമുഖരും സംഘടനാ പ്രതിനിധികളും പങ്കെടുത്തു. ഇന്ത്യയുടെ വിവിധ കാലാപരിപാടികള്‍ അരങ്ങേറി. അബുദാബി ഇന്ത്യന്‍ ഇസ്ലാമിക് സെന്റര്‍, ഇന്ത്യ സോഷ്യല്‍ സെന്റര്‍, കേരള സോഷ്യല്‍ സെന്റര്‍, മലയാളി സമാജം തുടങ്ങി വിവിധ സംഘടനാ ആസ്ഥാനങ്ങളില്‍ ദേശീയപതാക ഉയര്‍ത്തി.

രാജ്യം 74-ാം റിപ്പബ്ലിക് ദിനാഘോഷത്തില്‍; ഡല്‍ഹിയില്‍ കനത്ത സുരക്ഷ നിര്‍ദേശം

webdesk14 — Thu, 26 Jan 2023 03:42:03 +0000

രാജ്യമൊട്ടാകെ ഇന്ന് 74-ാം റിപ്പബ്ലിക് ദിനം ആഘോഷിക്കുന്നു. ഡല്‍ഹിയിലെ കര്‍ത്തവ്യപഥില്‍ രാവിലെ 10 മണിയ്ക്ക് റിപ്പബ്ലിക്ക് ദിന പരേഡ് തുടങ്ങും. ഇത്തവണ ഈജിപ്ഷ്യന്‍ പ്രസിഡന്റ് അബ്ദുല്‍ ഫത്താഹ് അല്‍ സിസിയാണ് ചടങ്ങിലെ മുഖ്യാതിഥി. ആദ്യമായിട്ടാണ് ഒരു ഈജിപ്ഷ്യന്‍ ഭരണാധികാരിയെ റിപ്പബ്ലിക് ദിനാഘോഷത്തില്‍ മുഖ്യാതിഥിയായി എത്തുന്നത്.

റിപ്പബ്ലിക് ദിനാഘോഷത്തിന്റെ ഭാഗമായി വലിയ രീതിയിലുള്ള ആഘോഷങ്ങളാണ് ഒരുക്കിയിട്ടുള്ളത്. സൈനികശേഷിയും കരുത്തും പരേഡിനിടയില്‍ പ്രദര്‍ശിപ്പിക്കും. ഇത്തവണത്തെ പരേഡില്‍ കേരളത്തിന്റെ ഫ്‌ലോട്ടും പരേഡില്‍ സ്ഥാനം നേടിയിട്ടുണ്ട്. റിപ്പബ്ലിക് ദിനത്തിന്റെ ഭാഗമായി ആഘോഷങ്ങള്‍ ഒരുവഴിക്ക് നടക്കുമ്പോഴും കനത്ത സുരക്ഷ തന്നെയാണ് ഡല്‍ഹിയില്‍ ഒരുക്കിയിരിക്കുന്നത്. കശ്മീരിലുണ്ടായ ഭീകരാക്രമണത്തിന്റെ പശ്ചാലത്തില്‍ സുരക്ഷാ ഏജന്‍സികള്‍ കനത്ത ജാഗ്രതാ നിര്‍ദേശമാണ് നല്‍കിയിരിക്കുന്നത്.